Kin Ntingiedi

Sang Presidensi Lap en Mwahnakapw kan

Ntingiedi amwail madmadau kan ansou me kumwail kin onopiki irehn pwuhk sarawi kan kak sewesei kumwail en esehla.

Ansou koaros me I kin tepda wadek pwuhk sarawi kan, I kin men meirla! Emen misinerio ndahiong ah misin presideno. Likamwete pwuhk sarawi kan wia ehu wini en kemeir!

Ah presideno sapeng, Ke kin ntingiedi ireh kan ansou me ke kin wadek?

Misinerio sapengki me, Soh.

Presideno nda, E kin mengei ken men meirla de sohla taman ansou me ke kin wie wadawad te, ahpw ke sohte kak meirla ma ke kin kapatahiong nting!

Kaweid me presideno kihong nah misineri me nanantio wiahda lapalahn sawas ehu. Eri ma kumwail raprapahki ehu wiepe kapw en kakehlailiala amwail onopiki irehn pwuhk sarawi kan, na kumwail song wia met. Ni amwail kin ntingiedi dahme kumwail wie wadwadek, kumwail pahn kilang me kumwail kin ngoahngda oh pil esehla mwahu.

Iet ekei wiepe kan me se diarehr me katapan.

Brother Steven Lund:

I kin kaunopada doropwe ansou me I kin wadawad. Ansou me Ngehno kin sair ie, I kin ntiniedi dahme Ngehno kasairehkinie.

I koledi wiepe wet sang Elder Richard G. Scott (1928–2015) en Pwihn en Wahnparon Ehk-riemenko, me nda: Kin ntingiedi nan ehu wasa mwahu ire kesempwal kan me kumwail kin koledi sang Ngehno. Kumwail pahn diar me ni amwail kin ntingiedi ire kesempwal kan, pil ekei pahn pwarada. Oh, kamarain me kumwail ale pahn mihmi rehmwail erein amwail mour (Pwehn Ale Kamarain oh Kehl en Doadoahngki ni KeneineiEnsign Suhn 2002, 32).

I ese me mahsen pwukat me mehlel. Ni ahi kin kaunopada kapahrek kan on irehn kasukuhl kan, I sohte kin kilangte irehn pwuhk sarawi kan ahpw I pil kin kilang dahme I ngtingiedi ansou me I wadwadek ire pwuko.

Brother Ahmad Corbitt:

I kin pereniki onopiki oralap kan. I kin wadek irehn pwuhk sarawi kan sang tapi lel ni imwi, ahpw I pil kin men kilang seli oh onopiki oralap kan. Karasepe, I kin doadoahngki Topical Guide pwehn diar irehn pwuhk sarawi kan me pid pwoson de kapokonpenehn mehn Israel. Eri I sohte kin ntingiedihte ireh kan, ahpw I kin ntingiedi dahme I esehla pwehn kak wehwehkihla mehlel. I kin kalap pwuriamweikihla uwen ahi kin wehwehkihla mwahu ansou me I wia met. I pil kin pilada ekei irehn pwuhk sarawi kan pwehn esehla douluhl.

Brother Bradley Wilcox:

I kolokol ehu pwuhk en onop wasa me I kin ntingiedi irehn pwuhk sarawi kan nan pein ahi lokaia. Ni karasepe, Pwe aramas en sampa wia imwintihti ong Koht(Mosiah 3:19) uhd wiahla “Pwe aramas pohnmwahso oh aklapalap kin pilada en imwintihti ong Koht, ahpw Koht sohte wia ah imwintihti. Koht iei kempoakepah keieu mwahu.”

I pil kin ntingiedi peidek kan. Irail kak wia peidek kei me I kin medemedewe mwohn ahi wadawad, de peidek kan me kin pwarada sang dahme I wadeko. Sohte lipilipil da, e kin kakainene ie.

Manaman en Ntingiedi Amwail Madmadau kan

Emenemen kitail nan atail presidensi kan kin wekpeseng atail onopiki irehn pwuhk sarawi kan, ahpw kitail koaros kin ntingiedi dahme kitail onopiki.

Wadawad kin sewesei kitail en koledi madmadau kan oh pepehm kan. Met me kesempwal. Oh ansou me kitail kin koasoia de ntingi, kitail kin diar oh kasalehda madmadau kan oh pepehm kan me kin kohsang nan loallatail. Kitail kin pehm me e sewese kitail wehwehkihla mwahu duwen rongamwahuo.

Emen mwahnakapwo pein diar me mehlel wet ansou me e pahn kihda padahk nan mihting en kamadipw sarawi. E rongehr me aramas tohto kin kihda padahk ahpw sohte kin tamataman audepen padahngko. Ahpw ansou wet ehu soahng. Ansou me e ntingiedi oralap en ah padahko, e sohte sewesehte ih en kihda ehu padahk kaselel, ahpw e tamataman audepen padahko ansou reirei.

Mwekid wet kak wiawi nan amwail onopiki pwuhk sarawi. Ma kumwail kin men meirla ni ansou me kumwail kin pahkpeseng noumwail pwuhk sarawi kan, met iei ansoun amwail pirida. Song ale ehu pinsel, pen, sehl pwohn, de kampiuder oh tepda nting. Kumwail pahn pwuriamweikihla uwen kamwahu me mwekid wet kak wiahda!

© 2021 sang Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Kawehwepen Padahk en Sounpwong kan Ong Kakehlepen me Pwulopwul kan, Suhlai 2021, Mahsen.17471 885.