“Mu Yoloy nga But’,” Fan ko Gelngin e Pi’in ni Fal’yangren, July 2021, 18–19.
Milwol ni Ngan Thapeg ko biney e Pul nifan e Fan ko Gelngin e Pi’in ni Fal’yangren ko July 2021
Mu Yoloy nga But’
Yoloy e tafney rom nga but’ ko ngiyal’ ni gabe fil fapi chep nib thothup e rayag ni nge ayuwegnem.
“Gubin ngiyal’ ni gura be’eg fapi thin nib thothup, ma guma mol!!” ke yog ba missionary ngak e mission president rok. “Wod ni fapi thin nib thothup e fan e falay ko mol!”
Me fulweg fare president ni ga’ar, “Gama yol ko ngiyal’ ni gabe be’eg e babyor?”
“Danga’,” nike yoeg fare missionary.
“Mom ni ngan mol fa yaen e tafney rom ni fa’anra kemus ni gabe be’eg e babyor,” ke yog fare president, “mab momaw’ ni fa’anra kam uneg e yol ngay!”
Re bugithin ney ni yog e re mission president ney ngak fare missionary e ri ayuweg ni rib gel. Ere fa’anra gabe gay rogon ni ngam mon’og nag rogon i fil e chep nib thothup, mu gay rogon ngam rrin’ e biney. Ngiyal’ ni gabe yoloy e n’en ni gabe be’eg, ma gara pire’eg ni garam fil bo’or, banan.
Ba’aray boch rogon ni kug pire’egned nra pi’ e ayuw nib gel.
Brother Steven Lund:
Guma tay e babyor u to’beg u napan ni gube be’eg e babyor. Napan nra thogthog fare Thothup ngog ko ngiyal’ ni gube fil, mug yoloy e pin’ey nga but’.
Ku thapeg e biney rok Elder Richard G. Scott (1928–2015) ko fare Ulung ko fare Ragag nge L’agruwi Apostles, ni ga’ar: “Mu yoloy nga but’ e pi n’en ni ke fil ngom fare Thothup. Gara pire’eg ni pin’ey nib ga’fan ni kam yoloy nga but’, e bay ki yib boch nib bo’or. Ma, pi llowaen’ ni bay mfil riy e bay i par rom u n’umngin napan e yafos rom” (“Nthapeg e Llowaen’ nge Gelingin ni ngan Fanay ko tin nib Gonop,” Ensign, June 2002, 32).
Gu manang ni pi thin nem e rib riyul’. Napan ni gura fal’ag rogon e numon fa tin ni nggu machib nag, ma gathi kemus ni bay gu be’eg fapi chep nib thothup machane kug ma yan u dakean e tin ni kug yoloy nga but’.
Brother Ahmad Corbitt:
Ri gu ba’adag ni guma fil mornga’agen bugi banan. Gu ma be’eg fapi thin nib thothup ko gin somm’on nge mada’ ko gin tomur, ma kug ba’adag ni nggu fil mornga’agen bugi banan. Wod ni, guma yus nag e Topical Guide nge pire’eg e chep nib thothup ni mornga’agen e mich fa mukun rok pi u Isreal. Ma gathi kemus ni bay gu yoloy nga but’, ya kug ma yoloy nga but’ e tin ni gube fil ni nge micheg nri gube nangfan nib fel’ rogon. Gubin ngiyal’ ma gin owcheg ko tin ni kug nangfan napan ni gura rrin’ e biney. Kug ma mel’eg boch e thin nib thothup ni nggu fil.
Brother Bradley Wilcox:
Bay reb e babyor nifan e tin ni gube fil ni guma yoloy e chep nib thothup ngay ko rogon ni kug nangfan. Wod e, “Gidiiʼ nib fekyath e toʼogor rokʼ Got,” (Mosiah 3:19) bay gu thilyeg ko “Gidiiʼ nib ʼufʼuf ma dar ma kalnganʼ e ke melʼeg ni yad e toʼogor rok Got, machane Got e gathi toʼogor rok. Got e tafagar rok.”
Kug ma yoloy e duwer. Bay ni fapi duwer ni gube tafney nag u mʼon ni nggu beʼeg, fa duwer ni bayi yib ni bachan e nʼen ni kug beʼeg. Demtrug rogon, ya biney e ke ayuweg neg kug tinʼug ngay.
Gelngin e Tafney Nikan Yoloy
Gamad gubin ulan fare presidency e gamad ma fil fapi chep nib thothup nib thil rogon, machane gamad gubin ni gamad ma yoloy nga butʼ.
Beʼeg e ma ayuweg e tafney nge thamtham romad. Biney e rib gaʼfan. Ma napan ni gamad ra non fa gu yoloyed, kug pireʼegned mag mad weliy e thamtham ni be yib u rongrenmad nga butʼ. Gamad be thamiy ni be ayuwegmad nggu nanged ni fare gospel e briyulʼ.
Reb e pagal ni felʼyangren e pireʼeg e biney nib riyulʼ napan nin fith ni nge non ko muʼulung ko sacrament. Ke motoyil ko gidiiʼ nib boʼor nike non machane dariy reb fapi thin ni ka manang. Yaney e ke thil. Napan ni yoloy morngaʼagen e tin ni nge weliy, gathi kemus ni ayuweg ni nge piʼ fare numon nib felʼ rogon, ya ki ayuweg ke par fare numon u waenʼ nib nʼuw napan.
Rayag ni nge buch e biney ko ngiyalʼ ni gabe fil fapi chep nib thothup. Faʼanra gabe mol ko ngiyalʼ ni kam bing fapi chep nib thothup, ke taw ko ngiyalʼ ni ngom od. Mu fek e pencil, pen, fon, fa computer rom mag tabab ko yol. Ya ra gin owchem ngay ko nʼen nra thilyeg!
© 2021 ko Intellectual Reserve, Inc. Gubin ma bay mat’won. Kan yoloey u Mariken. Kan micheg nag ko thin nu Ngalis: 6/19. Micheg i pilyeg: 6/19. Pilyeg ni Monthly For the Strength of Youth Message, July 2021. Yapese. 17471 905