“Prishud blong God,” Blong Ol Yut Oli Kam Strong Ogis 2021, 20–21.
Mesej Blong Ol Yut Oli Kam Strong, blong Evri Manis, Ogis 2021
Prishud Ia blong God
Wanem we evri yut i nid blong save abaot prishud mo hao i wok wetem olgeta.
?Yu bin stap lukluk finis hao bae i fasfas taem oli yusum wan wod long tu defren wei? Eksampol, long Inglis toktok ia earth i semmak long planet we yumi stap laef long hem mo ol graon we i stap andanit long leg blong yumi. Tugeta i raet, be wanem yu minim taem yu yusum toktok ia, i dipen long wanem yu stap tokbaot naoia. Blong mekem i moa konfius, taem earth i minim planet, hemia i tekem tu aedia ia blong graon from graon i stap long planet.
Tokbaot toktok ia, Prishud
Wan toktok we yumi yusum long Jos long tu wei, hem i prishud. Toktok ia, i tokbaot ful paoa mo atoriti blong God. Be, yumi yusum prishud tu long wan sot wei—i stap minim “paoa mo atoriti we God i stap givim blong odenem olgeta we oli gat prishud paoa ia, blong mekem evri samting we i posibol blong sevem ol pikinini blong God.”1
Prishud we oli givim long man i no ful paoa blong God. Jat ia we i kam afta i soem klia poen ia.
Long jat ia, bae yu luk sam eksampol blong paoa blong God we i stap blong oltaem mo i no gat limit. Insaed long hemia, yu luk tu sam eksampol blong paoa mo atoriti blong prishud blong God we Hem i pasem, o Hem i givim long ol olgeta we oli ol man we oli stap klin inaf blong lidim wok insaed long Jos ia blong Kraes.
Ol eksampol blong Prishud Atoriti long Laef blong Yu
Evri blesing blong prishud oli blong evri pikinini boe mo gel blong Papa long Heven, we Hem i lavem olgeta tumas. Seken lis ia i ripresentem ol blesing we yu kasem tru long wan we i holem ol ki blong prishud o oli givim prishud atoriti ia long hem.
Hemia i oda we God i bin stanemap finis blong oganaesem mo mekem ol wok blong Jos blong Hem, long wol ia. Ol narafala eksampol blong prishud atoriti blong God, i wan we i presiden blong ol dikon o blong ol tija, we i gat ki ia blong daerektem ol wok blong kworom blong hem, ol blesing we wan papa i givim insaed long hom, mo ol odinens mo kavenan blong tempol.
Ol Man, Ol Woman mo Prishud
Nomata se odinesen blong wan long wan ofis long prishud hem i blong olgeta we oli man nomo, Presiden Dallin H. Oaks, Fas Kaonsela long Fas Presidensi, i mekem wan impoten prinsipol i klia : “Paoa ia blong prishud i wan tabu paoa mo atoriti we God i givim wetem tras blong yusum blong mekem wok blong God blong gud blong evri pikinini blong Hem. Prishud, i no olgeta ia we oli odenem olgeta long wan ofis long prishud, o olgeta ia we oli stap yusum atoriti blong prishud ia. Ol man we oli holem prishud, oli no prishud ia. … Yumi no mas singaotem ol man we oli odenem olgeta se oli prishud.”2
Nomata se ol woman oli no odenem olgeta long prishud, Presiden Russell M. Nelson i talem: “taem oli setem yu apat blong givim seves long wan koling anda long daereksen blong wan we i holem ol ki blong prishud … , yu kasem prishud atoriti blong mekem wok long koling ia.”3 Sam eksampol blong hemia, oli Ol Yang Woman klas presidensi, ol sista misinari we oli prijim gospel, ol lida insaed long wod mo stek we oli setem olgeta apat blong tij mo lidim wok, mo ol odinens wokman insaed long tempol.
Prishud Paoa I Blesem Evriwan
Ol blesing we yufala, ol yang man mo ol yang woman, yufala i kasem, oli blong yufala tru long kavenan we yufala i mekem long taem blong baptaes, mo tru long ol kavenan we bae yufala i mekem insaed long tempol. Iven sapos yufala i no gat man we i holem prishud paoa long hom, yufala i stil kasem blesing wetem prishud paoa blong God insaed long laef blong yufala taem yufala i stap kipim ol kavenan we yufala i bin mekem wetem Hem (luk long Fas Nifae 14:14).
Taem yumi stap laef folem ol kavenan blong yumi, yumi kasem ol blesing we oli mekem yumi kam strong moa, mo oli blesem yumi. Mifala i invaetem yufala blong tingting hevi long blesing blong prishud insaed long laef blong yu—ol blesing we oli kam from paoa blong prishud we i no gat en, we i kam long God , mo olgeta blesing ia oli we oli kam speseli tru long prishud atoriti nomo we oli pasem mo givimaot insaed long Jos blong God.
© 2021 i kam long Intellectual Reserve, Inc. All rights reserved. Oli printim long YSA. Oli letem long Inglis: 6/19. Oli letem translesen: 6/19. Translesen blong Monthly For the Strength of Youth Message, August 2021. Bislama. 17472 852