“Ti Priesthood ti Dios,” Para iti Pigsa dagiti Agtutubo, Ago. 2021, 20–21.
Binulan a Mensahe ti Para iti Pigsa dagiti Agtutubo Agosto 2021
Ti Priesthood ti Dios
Ti nasken a maammuan ti tunggal agtutubo maipapan iti priesthood ken ti pakainaiganda iti daytoy.
Nadlawyo kadin no kasano a makatikaw daytoy no mausar ti maysa a balikas iti dua a wagas? Kas pagarigan, iti Iloko ti balikas a daga ket mangtukoy iti agpada a planeta a pagnaedantayo ken ti rugit a paypayatantayo. Agpada nga umisu, ngem no ania ti kayatmo a sawen no usarem ti termino ket agdepende iti no ania ti isasaom iti daytoy a kanito. Tapno maaramid daytoy nga ad-adda a makatikaw, no ti kaipapanan ti daga ket ti planetatayo, iramanna pay ti kapanunotan maipapan iti rugit, gapu ta ti rugit adda iti planeta.
Panangilawlawag iti Kaipapanan ti Termino a Priesthood
Ti maysa a termino nga usarentayo iti Simbaan iti dua a wagas ket ti priesthood. Ti termino ket mangtukoy iti naan-anay a bileg ken turay ti Dios. Nupay kasta, usarentayo pay ti priesthood iti ad-adda a limitado a wagas—a mangtukoy iti “ti pannakabalin ken turay nga ited ti Dios a maordenan a priesthood holder nga agaramid iti amin a banag a kasapulan para iti pannakaisalakan dagiti annak ti Dios.”1
Ti priesthood a naitalek iti lalaki ket saan nga amin a bileg ti Dios. Iladawan ti sumaganad a tsart daytoy a punto.
Iti daytoy a tsart a makitayo ti sumagmamano a pagarigan ti bileg ti Dios, nga awan patinggana ken awan dagiti beddengna. Iti uneg dayta, makitayo pay dagiti pagarigan ti bileg ken turay ti priesthood ti Dios nga italekna, wenno itedna, kadagiti maikari a lallaki a mangimaton iti Simbaan ni Cristo.
Dagiti Pagarigan ti Turay ti Priesthood iti Biagyo
Sidadaan a magun-od dagiti amin a bendision ti priesthood iti amin a maipatpateg nga annak a babbai ken annak a lallaki ti Nailangitan nga Ama. Gagangay a ti maikadua a listaan ti mangibagi kadagita a bendision a sumangbay kadakayo babaen ti maysa nga agig-iggem kadagiti tulbek ti priesthood wenno addaan iti turay ti priesthood a naitalek kenkuana.
Daytoy ti urnos nga impasdek ti Dios para iti pannakabukel ken pannakaimaton ti Simbaanna iti rabaw ti daga. Iraman ti dadduma pay a pagarigan ti turay ti priesthood ti Dios ti maysa a presidente ti korum dagiti deacon ken teacher nga addaan kadagiti tulbek a mangiturong iti aramid ti korumna, dagiti bendision ti maysa nga ama a maited iti maysa a pagtaengan, ken dagiti ordinansa ken katulagan iti templo.
Dagiti Lallaki, Babbai, ken ti Priesthood
Nupay naited laeng ti ordinasion iti takem ti priesthood kadagiti lallaki, inlawlawag ni Presidente Dallin H. Oaks, Umuna a Mammagbaga iti Umuna a Panguluen, ti maysa a napateg a pagbatayan: “Ti priesthood ket maysa a nadiosan a bileg ken turay a maik-ikutan nga addaan panagtalek a mausar para iti aramid ti Dios para iti pagimbagan ti amin nga annakna. Ti priesthood ket saan a dagiti naordenan iti saad ti priesthood wenno dagiti mangaramat iti turayna. Saan a priesthood dagiti lallaki nga agik-ikut iti priesthood. … Saan a rumbeng nga ibasartayo dagiti naordenan a lallaki a ti priesthood.”2
Nupay saan a naordenan dagiti babbai iti priesthood, inlawlawag ni Presidente Russell M. Nelson, “no ma-set apartka nga agserbi iti maysa a takem wenno calling iti babaen ti panangiturongg ti maysa nga agig-iggem kadagiti tulbek ti priesthood … maited kenka ti turay ti priesthood a mangitrabaho iti dayta a takem.”3 Iraman ti sumagmamano a pagarigan daytoy dagiti panguluen ti klase ti Young Women, dagiti sister missionary a mangikaskasaba iti ebanghelio, dagiti lider kadagiti ward ken stake a na-set apart a mangisuro ken mangidaulo, ken dagiti ordinance worker iti templo.
Bendisionan ti Bileg ti Priesthood ti Tunggal Maysa
Kukuayo nga agtutubo a lallaki ken agtutubo a babbai dagiti parabur nga awatenyo babaen kadagiti katulagan nga aramidenyo iti panagbuniag ken dagiti katulagan nga aramidenyonto iti templo. Uray no awanankayo iti priesthood bearer iti pagtaenganyo, maparaburankayo latta iti bileg ti priesthood ti Dios iti biagyo bayat ti panagtungpalyo kadagiti katulagan nga inaramidyo Kenkuana (kitaen iti 1 Nephi 14:14).
No agbiagtayo a maibatay kadagiti katulagantayo, umawattayo kadagiti bendision a mangpapigsa ken mangbendision kadatayo. Awisendakayo nga agutob maipanggep kadagiti bendision ti priesthood iti biagyo—dagiti bendision a sumangbay gapu iti bileg ti awan patinggana a priesthood ti Dios ken dagiti nangnangruna a sumangbay babaen iti turay ti priesthood a naitalek ken naituding iti Simbaan ti Dios.
© 2021 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, August 2021. Ilokano. 17472 864