“Buakuidi bua Nzambi,” Bua Dikankamika dia Bansonga, Ngondo wa Muanda Mukulu 2021, 20–21.

Mukenji wa ku ngondo Bua Dikankamika dia Bansonga, Ngondo wa Muanda Mukulu 2021

Buakuidi bua Nzambi

Kudi Bulombodi Bukulu Bunena bua Bansonga

Tshidi nsonga yonsu ne bua kumanya pa buakuidi ne dituangana dienda kudibu.

Ukadiku mujandula mudibi bifila tshibuejakaja padi muaku umua wakudibua mu mishindu ibidi anyi? Bu tshilejelu, mu Angele muaku earth (buloba) udi umvuija; dibulungu ditudi bikalangana ne lusenga ludi muinshi mua makasa etu. Bionsu bibidi mbilelela, kadi tshiudi wamba paudi wakula muaku tshidi tshitangila tshiudi munkatshi mua kuakula mu mutantshi awu. Bua kutamba kubibuejakaja, padi earth umvuija dibulungu dietu, udi kabidi ubueja mu lungenyi lusenga, bualu lusenga ludi pa dibulungu.

Kumvuija kua muaku Buakuidi

Muaku umua utudi tuakula mu Ekelezia mu mishindu ibidi udi buakuidi. Muaku udi umvuija busangishi bua bukola ne bukokeshi bua Nzambi. Kadi, tudi tutela kabidi buakuidi mu mushindu udi muipi—bua kumvuija “bukola ne bukokeshi budi Nzambi ufila bua kujidila balami ba buakuidi bua benza mudimu mu malu onsu bua lupandu lua bana ba Nzambi.”¹

Buakuidi buambikila muntu muluma kabuena bukola bonsu bua Nzambi to. Mu tshibadilu tshiidi kuinshi eku tshidi tshileja bualu ebu.

Mu tshibadilu etshi udi umona bimua bilejelu bia bukola bua Nzambi, budi buikala kabuyi ndekelu ne kabuyi mikalu. Munkatshi muabu, udi umona kabidi bilejelu bia bukola ne bukokeshi bua buakuidi bua Nzambi budiye muambikila, anyi mupesha bantu baluma badi bakumbana baa kuenza mudimu mu Ekelezia wa Kilisto.

Bilejelu bia Bukokeshi bua Buakuidi mu Moyo Weba

Mabenesha onsu a buakuidi adi makumbena bana bakaji ne baluma banangibua bonsu ba Tatu wa mu Diûlu Mulongu muibidi udi uleja nangananga mabenesha awu adi alua kuudi kupitshila ku muntu udi ne nsapi ya buakuidi anyi uvua muikala muambikibua bukokeshi bua buakuidi pa yeya.

Ewu udi ngikadilu uvua Nzambi muteka bua bulongolodi ne ngenzelu ya mudimu mu Ekelezia Wenda pa buloba. Bilejelu bikuabu bia bukokeshi bua buakuidi bua Nzambi bidi kabidi bitangila mulombodi mukulu wa mpuilu wa ba diakre anyi balongeshi udi muikala ne nsapi ya kuludika mudimu wa mpuilu wenda, mabenesha a tatu mafidila mu nzubu, ne milulu ne bipungidi bia ku ntempelu.

Bantu Baluma, Bakaji, ne Buakuidi

Nansha mudi dijidila dia mu mudimu wa buakuidi dienzeka anu bua bantu baluma, Mulombodi Mukulu Dallin H. Oaks, Mubedi wa Kumpala mu Bulombodi Bukulu bua Kumpala, wakumvuija dilongesha dia mushinga wamba se: “buakuidi budi bukola ne bukokeshi bua bunzambi bulamibua ku dieyemena bua kuenza nabu mudimu wa Nzambi bua bunema bua bana Benda bonsu. Buakuidi kabuena aba bavua bikala bajidila ku mudimu wa buakuidi anyi aba badi bakuata mudimu ne bukokeshi buabu to. Bantu baluma badi ne buakuidi, bobu kabena buakuidi to. … Katuikadi tutangila bantu bajidila bu buakuidi.”²

Nansha mudi bantu bakaji kabayi bajidibua ku buakuidi to, Mulombodi Mukulu Russell M. Nelson wakumvuija ne “paudi utekibua pa bula bua kuenza mudimu mu dibikila ku buludiki bua muntu udi ne nsapi ya buakuidi … udi mupeshibua bukokeshi bua buakuidi bua kutumika mu dibikila adi.”³ Bimua bilejelu bia bualu ebu bidi bitangila malombodi makulu a Bansonga Bakaji, ba mamu bena bukenji badi bayisha lumu luimpa, balombodi badi mu bikonga ne mu makunji badi batekibua pa bula bua kulongesha ne kulombola, ne bena mudimu ba milulu mu ntempelu.

Bukola bua Buakuidi Budi Bubenesha Bantu Bonsu

Mabenesha anudi nuenu bansonga baluma ne bakaji bapeta adi enu kupitshila ku bipungidi binudi benza ku ditambula ne ku bipungidi binueza mu ntempelu. Nansha binuikala kanuyi ne muntu udi ne buakuidi mu nzubu yenu, udi mua kuikala anu mubeneshibua ne bukola bua buakuidi bua Nzambi mu moyo weba pawikala udi ulama bipungidi bieba biudi muenza Nenda (tangila 1 Nefi 14:14).

Patudi tuenda ne moyo mu kulama kua bipungidi bietu, tudi tupeta mabenesha adi atukankamika ne atubenesha. Tudi tunubikila bua nuela meji ku mabenesha a buakuidi mu moyo wenu—mabenesha adi alua kupitshila ku bukola bua buakuidi bua Nzambi budi kabuyi ndekelu ne makuabu adi alua kupitshila anu ku bukokeshi bua buakuidi budi buambika ne butumibua mu Ekelezia wa Nzambi.

© 2021 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly For the Strength of Youth Message, August 2021. Tshiluba. 17472 760