“Priesthood eo an Anij,” N̄an Kōkajoorļo̧k Jodikdik ro, O̧kwōj 2021, 20–21.
Ennaan eo jān N̄an Kōkajoorļo̧k Jodikdik Ro ilo Allōn̄ Otemjej, O̧kwōj 2021
Priesthood eo an Anij
Ta eo aolep jodikdik ro rej aikuj jeļā kōn priesthood eo im men ko rej ekkeijel n̄ane.
Konan̄in ke kar kile elmen an tarpok n̄e juon naan ej jerbal ilo ruo wāween ko? N̄an waanjon̄ak, ilo kajin Pālle laļ ej jim̧or jerbal n̄an laļ eo jej mour ioon im bo̧k eo ium̧win need. Jim̧or rejim̧we, ak ta meļeļein am̧ ba n̄e kwoj kōjerbal tōōm̧ ko pedped ioon ta eo kwoj kōnono kake ilo iien eo. Bwe en ļapļo̧k wōt an pok, n̄e laļ meļeļein laļ in ad, ej bar kobatok naan in bok, kōnke bo̧k ej laļ.
Kōmeļeļein Tōōm̧ eo Priesthood
Juon tōōm̧ jemaron̄ kōjerbale ilo Kabun̄ in ilo ruo wāween ko ej priesthood. Tōōm̧ ko rej iookļo̧k kajoor im mālim eo an Anij. Ijoke, jemaron̄ bar kōjerbal priesthood ilo wāween ko elōn̄ jon̄aer—n̄an ba “kajoor im mālim eo an Anij leļo̧k n̄an rikabwijer priesthood ro kar ekkapit n̄an jerbal ilo aolep men ko rekkar n̄an lo̧mo̧o̧ren ro nejin Anij.”1
Priesthood eo an kar leļo̧k ioon juon em̧m̧aan ejjab aolepān kajoor eo an Anij. Jaat in ilaļ ej kōmeļeļeik alikkar in.
Ilo jaat in kwoj lo jet waanjon̄ak ko kōn kajoor eo an Anij, eo ekwojarjar im ejjeļo̧k jem̧ļo̧kin. Ippān ļo̧k, komaron̄ bar lo waanjon̄ak ko kōn kajoor im mālim in priesthood eo an Anij me E ej leļo̧k, ak leļo̧k n̄an, em̧m̧aan ro rerreeo n̄an jerbal ilo Kabun̄ in an Kraist.
Waanjon̄ak ko in Mālim eo an Priesthood ilo Mour eo Am̧
Aolep kōjeraam̧m̧an ko an priesthood rej n̄an aolep ro nejin Jemedwōj Ilan̄ leddik im ļaddik ro rejitenbōro. Laajrak in kein karuo ej bōk jikin kōjeraam̧m̧an ko me rej itok n̄an eok jen eo ej kabwijer priesthood kii ko ak eo ewōr mālim in priesthood kar leļo̧k n̄an e.
En̄in ej elaajrak eo an Anij kar ejaake n̄an doulul eo n̄an tōl Kabun̄ in An ioon laļ in. Waanjon̄ak ko kōn mālim eo an priesthood eo an Anij ekoba būreejtōn eo an doulul eo an tikōn im rūkaki ro ro rej kabwijer kii ko n̄an tōl jerbal ilo doulul eo an, juon kōjeraam̧m̧an an baba ej leļo̧k ilo m̧weeo, im kain̄i ko an tampeļ im bujen ko.
Em̧m̧aan ro, Kōrā ro, im Priesthood eo
Men̄e kain̄i eo n̄an priesthood opiij in ej leļo̧k n̄an em̧m̧aan ro wōt, Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Kein Kajuon, ekar kōmeļeļeiki juon pedped in katak eo eaorōk: “Priesthood eo ej juon kajoor ekwojarjar im mālim n̄an kabwijere ilo lōke n̄an kōjerbale ilo jerbal in an Anij n̄an em̧m̧an eo an aolep ro ajri ro Nejin. Priesthood eo ejjab ro me em̧ōj kapit er n̄an juon priesthood opiij ak ro me rej kōjerbal mālim eo. Em̧m̧aan ro rej kabwijer priesthood eo ejjab er priesthood eo. … Jejjab aikuj en̄inn̄in em̧m̧aan ro āinwōt priesthood eo.”2
Men̄e kōrā ro rejjab ekkapit n̄an priesthood eo, Būreejtōn Russell M. Nelson ekar ba, “n̄e em̧ōj kōjenolo̧k n̄an jerbal ilo juon kūr ium̧win tōl eo an juon eo ej kabwijer priesthood kii ko … kwoj bōk mālim eo an prietshood n̄an jerbal ilo kūr in.”3 Jet waanjon̄ak ko koba būreejtōnji ko an Doulul eo an Jiron̄ Ro, sister mijenede ro rej kwaļo̧k gospel eo, ritōl ro ilo ward ko im stake ko em̧ōj aer kar kōjenolo̧k n̄an kwaļo̧k im tōl, im rijerbal in kain̄i ro ilo tampeļ.
Kajoor eo an Priesthood ej Kōjeraam̧m̧an Aolep
Kōjeraam̧m̧an ko kom̧ likao ro im jiron̄ ro kom̧ij būki rej ami kōn bujen ko kom̧ij kōm̧m̧ani ilo iien peptaij im būjen ko kwonaaj kōm̧m̧ani ilo tampeļ. Men̄e ejjeļo̧k rikabwijer priesthood ilo m̧weeo im̧ōm̧, kwomaron̄ in nej jeraam̧m̧an wōt kōn kajoor in priesthood eo an Anij ilo mour eo am̧ ilo am̧ kōjparok bujen ko kwaar kōm̧m̧ani Ippān (lale 1 Nipai 14:14).
Ilo ad mour kake bujen ko ad, jej bōk kōjeraam̧m̧an ko me rej kōkajoor im kōjeraam̧m̧an kōj. Kōmij kajjitōk ippāmi n̄an kōļmenļo̧kjeņ kōn kōjeraam̧m̧an ko an priesthood ilo mour eo ami—kōjeraam̧m̧an ko me rej itok kōn wōt kajoor in priesthood eo an Anij ejjeļo̧k jemļo̧kin im ro rej itok kōn priesthood mālim me kar ekkapit im kar leļo̧k ilo Kabun̄ in an Anij.
© 2021 jān Intellectual Reserve, Inc. Aolep jim̧we ko rej pād ie. Kar būriin ilo USA. Kōmālim ilo kajin English: 6/19. Kōmālim an ukook: 6/19. Ukook eo an Monthly For the Strength of Youth Message, August 2021. Marshallese. 17472 874