“Pagtukod sang Pinakamaayo nga Ikaw,” Para sa Kusog sang mga Lamharon, Sep. 2021, 6-7.
Bulanan nga Mensahe sang Para sa Kusog sang mga Lamharon, Septyembre 2021
Pagtukod sang Pinakamaayo nga Ikaw
Lima ka paagi sa pagtukod sang malipayon kag masadya nga kabuhi
Mga ilustrasyon ni Juliet Percival
Sang ang Ginuo nagsugo kay Joseph Smith nga ipatukod ang Templo sang Kirtland, wala Niya sia ginpabay-an nga magpalibog kon paano ini himuon nga sia lang. Ginpahayag Niya ang plano nga magadala sing kadalag-an.
“Ipatukod ang balay indi suno sa pamaagi sang kalibutan,” siling sang Ginuo. “Ipatukod ini suno sa pamaagi nga ipakita ko sa inyo” (Doktrina kag mga Kasugtanan 95:13–14). Dayon ginhatag sang Ginuo ang mga panulin kon paano tukuron ang templo (tan-awa sa Doktrina kag mga Kasugtanan 95:15–17).
Maayo lang, ginpakita sang Ginuo sa aton ang masobra pa sa kon paano tukuron ang mga templo. Ginhatagan man Niya kita sang mga panulin nga magabulig sa aton nga mangin pinakamaayo nga tawo nga pwede kita mangin. Kon sundon naton ang mga ini, pagatukuron naton ang aton mga kabuhi “indi suno sa pamaagi sang kalibutan” kundi suno sa paagi nga gindisenyo sang Ginuo.
Ari ang lima ka pamaagi sa pagtukod sang malipayon kag masadya nga kabuhi nga nasentro kay Jesucristo.
Magtukod sang Malig-on nga Pundasyon
Bisan sin-o nga arkitekto ukon panday magasiling sa imo nga ang maayo nga pundasyon importante. Si Helaman nagtudlo nga ang pinakamaayo nga pundasyon para sa aton mga kabuhi amo ang “bato sang aton Manunubos, nga amo si Cristo, ang Anak sang Dios” (Helaman 5:12). Sarang naton himuon si Cristo nga aton pundasyon paagi sa pagpalapit sa Iya kag pagsunod sang Iya mga pinanudlo. Kamusta sa pamatyag mo ang imo pagpaninguha nga himuon si Cristo nga pundasyon sang imo kabuhi?
Magserbisyo sa Iban
Isa pa ka maayo nga paagi sa pagtukod sang aton mga kabuhi suno kay Pangulong Dieter F. Uchtdorf, anay Ikaduhang Manuglaygay sang Unang Panguluhan, amo ang kon “kita ara sa pagserbisyo sa Ginuo kag sa pagserbisyo sa ila nga ara sa aton palibot.”1 Kon nagaserbisyo ka sa iban, ginahimo mo ang ginhimo ni Jesus kag nagatuon nga mangin mas kaangay pa gid Niya. Kag wala mo lang ginapakamaayo ang kabuhi sang mga tawo nga imo ginaserbisyohan, kundi ikaw pagapakamaayuhon man.
Maghiwat sang Regular nga Pagpangamuyo kag Pagtuon sang Balaan nga mga Kasulatan
Isa pa ka paagi sa pagtukod sang malipayon nga kabuhi amo ang pagtukod sang relasyon sa Amay nga Langitnon kag kay Jesucristo. Isa ka maayo nga paagi agud himuon ina amo ang magpangamuyo kag magtuon sang balaan nga mga kasulatan.
Si Pangulong Uchtdorf nagsiling: “Agud pabakuron ang aton kaangtanan sa Dios, kinahanglan naton sang makahulugan nga tion upod sa Iya. Ang malinong nga pagsentro sa adlaw-adlaw nga personal nga pangamuyo kag pagtuon sang balaan nga kasulatan… mangin pila sa maalamon nga mga puhunan sang aton tion kag mga paghimud-os agud mangin mas malapit sa aton Amay nga Langitnon.”2
Ang pangamuyo isa ka oportunidad sa pagpakigsugilanon sa aton Amay sa Langit. Sia nakakilala sa aton, nagapalangga sa aton, kag luyag makabati halin sa aton! Kon magpangamuyo kita sing sinsero, magpasalamat, kag mangabay sang mga butang nga aton ginakinahanglan, nagapamati Sia kag pirme nagasabat sa Iya kaugalingon nga pamaagi kag tion.
Kon parte sa pagtuon sa balaan nga mga kasulatan, wala sing isa ka husto nga paagi sa paghimo sini. Ang importante amo nga ginahimo mo ini! Si Pangulong Russell M. Nelson nagtudlo, “Ang adlaw-adlaw nga pagtuon sang pulong sang Dios importante para sa espirituhanon nga kaluwasan.”3 Ang pagbasa sang balaan nga mga kasulatan kada adlaw, wala sing duda, makabulig sa imo sa pagtukod sang kabuhi nga may pagtuo kag kusog.
Palibuti ang Imo Kaugalingon Sinang mga Nagapaisog sa Imo nga Maghimo sang Maayo
Luyag sang Langitnon nga Amay nga makig-angot kag magtukod kita sang mga relasyon sa iban—ilabi na sa pamilya kag kaabyanan. Masami kita nga ginaimpluwensyahan sinang.mga tawo nga aton pirme kaupod. Miyembro man sila sang Simbahan ukon indi, kinahanglan nga palibutan mo ang imo kaugalingon sang mga tawo nga nagabulig sa imo nga ipangabuhi ang ebanghelyo, tipigan ang mga sulundan sang Ginuo, kag mangin mas maayo nga tawo. Mahimo mo man buligan ang mga tawo sa imo palibot nga himuon man ini. Sin-o sa imo kaabyanan ang nagabulig sa imo tukod sang imo pundasyon sa pagkamatarong?
Magkalipay sa Pagtukod sang Imo Pundasyon
May madamo pa nga paagi nga matukod mo ang imo kabuhi agud mangin mabakod sa espirituhanon kag malipayon, lakip na ang pagsimba kag pag-ambit sang sakramento, paghimo kag pagtipig sang mga kasugtanan, kag pagsunod sa laygay sang buhi nga mga propeta.
Importante nga panumdumon nga ining tanan nagakinahanglan sang buhat kag panahon. May ara gid pirme sang hilimuon nga pagtukod kag pagtuon, pero indi mo kinahanglan nga himuon ini nga isahanon. Buligan ka sang Ginuo kada adlaw samtang ginahimo mo ang imo pinakamaayo sa pagtukod sang kabuhi nga sarang nimo kag Niya mapabugal kag makahatag sa imo sang kalipay.
© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, September 2021. Hiligaynon. 17473 861