“Muhsahikomlac nuhke Ohiyac Wo se Emet Kom Kuh in Oasr Kac,” INuhke Kuhiyacn Mwet Fuhsr, Septempuh 2021, 6–7.
Sramsram ke Nuhke Kuhiyacn Mwet Fuhsr Mahlwem Nuhkwewa, Septempuh 2021
Muhsahikomlac nuhke Ohiyac Wo se Emet Kom Kuh in Oasr Kac
Limekohsr inkacnek in sang muhsaheack sie moul pwacr ac engan.
Sroal sel Juliet Percival
Ke Leum El sapkihn nuh sel Joseph Smith in muhsahelah Tempuhl luhn Kirtland, El tiacna fuhlwelah nuh sel in sifacna sokwack lah elac oruh fuhkah. El ahkkahlwemye nuh sel sie plwacn ma ac kuh in orwaclah wo.
“Lwelah lohm se inge in muhsahiyucklac, tiac ke atac luhn facluh,” Leum El fahk. “Lwelah tuh in muhsahiyucklac ke atac se ma nga ac tuhfah ahkkahlwemye uh” (Doctrine and Covenants 95:13–14). Leum El fahk pac lah ac muhsahiyuck fuhkah tempuhl sac (liye Doctrine and Covenants 95: 15–17).
Kuhlohlacna, lah Leum El ahkkahlwemye nuh sesr ma pohs sahyacn na in muhsaheack tempuhl uh fuhkah. El oacyacpac use nuh sesr mwe kolyuck in kahsrwe kuht in eklac nuhke ohiyac se wo emet ma kuht kuh in oasr kac. Ke kuht ukwe ma inge uh, kuht ac muhsaheack moul lasr uh “tiac ke atac luhn facluh” tuhsruhk ke atac ma Leum El luhmahlah.
Pa inge limekohsr inkacnek in sang muhsaheack sie moul pwacr ac engan ke Jisus Kraist El pa infulwac.
Muhsahelah sie Pwelucng Fokoko
Oacna sie mwet muhsah lohm ac fahk nuh sum lah pwelucng fokoko se el enenuh nuhke oacna sie lohm. Helaman el luti lah pwelucng se ma wo emeet nuhke moul lasr uh pa “fin yot luhn Mwet in Molwelah lasr, suc pa Kraist, Wen nuhtin God” (Helaman 5:12). Kuht kuh in orwaclah Kraist Elan pwelucng lasr ke kuht fahsr nuh Yohrohl ac ukwe mwe lutlut Lal uh. Fuhkah puhla lom ke orwaclah lom ke kom orwaclah tuh Kraist Elan pwelucng ke moul lom an?
Kuhlwacnsapuh Mwet Sahyac
Sie pac innek wo kuht in muhsaheack moul lasr uh kac, oacna ke Prestuhn Dieter F. Uchtdorf el fahk uh, mwet in kasruh ahkluo ke Prestuhnsi Se Met ke pacl met, tuhkuh ke “kuht puhtati ke niyacsr kuhlwacnsapuh Leum ac mwet ma raunikuhtlac.”1 Ke kom kuhlwacnsapuh mwet sahyac uh, kom oruh ma Jisus El tuh oruh ah ac luti in eklac oacna El. Ac kom ac fah tiac ahkinsewowoye moul luhn mwet kom kuhlwacsapuh ingacn muhkwena, tuhsruhk kom ac tuhfah ahkinsewowoyeyuhk pac.
Orwaclah Sie Ohiyac in Pruhe ac Riti Ma Suhmuhslah Kom in Oruh ke Lwen Nuhkwewa
Sie pac innek in muhsahelah sie moul pwacr pa in fototo nuh yurin Pahpah Tuhmasr Inkuhsrao ac Jisus Kraist. Atac se ma wo emet in oruh ma se inge uh pa ke pruhe ac riti ma suhmuhslah.
Prestuhn Uchtdorf el fahk: “In ahkfokokoye fototo lasr sin God, kuht enenuh pacl in muhkwena Yohrohl. Lohacng ke pruhe lom sifacna ac riti ma suhmuhslah… pa kuhtuh kihsackuhnlah kuht kuh in oruh in fototo nuh yurin PahpahTuhmasr Inkuhsrao.”2
Pruhe el pacl wowo se in sramsram nuh sin Pahpah Tuhmasr Inkuhsrao. El etwe kuht, luhngse kuht, ac El ke lohng sesr! Ke kuht sang insiyacsr pruhe uh, sang kuloh lasr, ac siyuhk ke ma kuht enenuh uh, El lohng ac topuk pacl nuhkwewa ke ohiyac Lal sifacna ac pacl Lal sifacna.
Nuh ke riti ma suhmuhslah an, wacngihn sie fanna atac ma fal in oruh. Ma yohk srihpac uh pa kom in oruh! Prestuhn Russel M. Nelson el luti, “In sang lohacng lom nuhke kahs luhn God ke lwen nuhkwewa el yohk sripac nuhke moul luhn nguhn uh.”3 Sislah pacl in riti ma suhmuhslah ke lwen nuhkwewa tuhfah, wacngihn tahfuh luo kac, kahsrwe kom in muhsahelah sie moul in luhlahlfongi ac fokoko.
Wi Mwet ma Pahtok Kom in Oruh Ma Wo
Pahpah Lucng El kena kuht in fototo nuhsin mwet sahyac—yohk na sucu ac mwet kawuck. Mwet ma kuht muhta wi pa wacna luhmahlah lah kuht mwet fuhkah se uh. Lah elos mempucr ke Alu uh kuh tiac, kom enenuh in wi mwet ma e kahsrwe kom in moulkihn wosasuc uh, liyacacng masap luhn Leum, ac eklac mwet wo se. Kom kuh pac in kahsruh mwet sahyom in oruh oacpacna. Suc kac sin kawuck lom an kahsrwe kom in muhsaheack pwelucng lom fin ma suwohswohs uh?
Konwacack Engan ke Muhsahelah Pwelucng Lom
Puhkantwen innek kom kuh in muhsahelah moul lom in fokoko in nguhn ac oasr engan kac, wipacna som nuhke alu ac eis kuhfa luhn Leum, orwaclah ac liyacacng olwelah nuh sin God, ac ukwe kahs in kahsruh luhn mwet pahluh moul.
Yohk srihpac in esam lah ma inge kwewa enenuh orekma yohk kac ac pacl. Oasr na muhsah ac lutlut ma enenuh in orek ke pacl nuhkwewa, tuhsruhk kom tiac enenuh in muhkwena oruh. Leum Elac fah kahsrwe kom ke kais sie lwen ke kom srihke in sang nohfohn kuhiyom in muhsahelah moul se El ac kom kuh in kaksakihn ac ma ac usot nuh sum engan.
© 2021 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lweng nuh ke Sramsram ke Nuhke Kuhiyacn Mwet Fuhsr Mahlwem Nuhkwewa, Septempuh 2021. Kosraean.17473 868