“kushindamija Buimpe Bueba,” Bua Dikankamika dia Bansonga, Ngondo wa Tshitema 2021, 6–7.
Mukenji wa ku ngondo Bua Dikankamika dia Bansonga, Ngondo wa Tshitema 2021
kushindamija Buimpe Bueba
Mishindu itanu bua kushindamija nsombelu wa diakalenga ne wa disanka.
Bimfuanyi bia kudi Juliet Percival
Pakadi Mukalenga muambila Joseph Smith bua kuibaka Ntempelu wa Kirtland, kakamulekela nkayende bua kudienzela mudimu ewu to. Wakamubuluila bulongolodi buvua ne bua kumulombola ku dikumbaja.
Mukalenga wakamba ne “Nzubu ibakibua, kayi bumudi ya pa buloba,”. “Ibakibua mu mushindu ungaleja” (Dilongesha ne Bipungidi 95:13–14). Pashisha Mukalenga wakafila maludiki pa mushindu wa kuibaka ntempelu (tangila Dilongesha ne Bipungidi 95:15–17).
Diakalenga, Mukalenga wakatuleja biabungi kabiyi bitangila anu mushindu wa kuibaka ntempelu. Wakatupesha kabidi maludiki bua kutuambuluisha bua tuikala bantu bimpa. Patudi tualonda, tudi tuibaka nsombelu wetu “kayi bu mushindu wa ba pa buloba to” kadi mu mushindu udi Mukalenga mufunkuna.
Eyi idi minshindu itanu bua kuibaka nsombelu wa diakalenga ne wa disanka muimanyina pa Yezu Kilosto.
Kuibaka Nshindamenu Mujalama
Muibaki yonsu munena anyi mukesa neakuambila ne nshindamenu mukola udi ne mushinga bua luibaku lonso. Helamana wakalongesha ne; nshindamenu muimpa wa mioyo yetu udi “dibua dia Musungidi wetu, udi muikala Kilisto, Muana wa Nzambi” (Helamana 5:12). Tudi mua kuenza Kilisto nshindamenu wetu, patudi tulua kudiye ne tulonda malongesha Enda. Mushindu kayi uudi umvua paudi uteka Kilisto nshindamenu wa moyo weba?
Sadilayi Bakuabu
Mushindu mukuabu muakana wa kuibaka mioyo yetu, bilondeshila Mulombodi Mukulu Dieter F. Uchtdorf, pavuaye mufidi wa ngenyenyi muibidi mu Bulombodi Bukulu, mpatudi “tuenda ku makasa bua kuenzela Mukalenga mudimu ne kusadila badi batunyunguluka.”1 Paudi usadila bakuabo, udi wenza tshiakenza Yezu, ne udi ulonga bua kufuanangana Nende. Ne kuakubenesha anu mioyo ya baudi usadila to, kadi wewe neubeneshibue kabidi.
Enza Tshibidilu tshia Kusambila ne Kulonga Mifundu
Mushindu mukuabu wa kushindamija nsombelu wa diakalenga udi wenzeka mu kuenza bulunda ne Tatu wa mu Diûlu ne Yezu Kilisto. Mushindu wa kutshienza udi kupitshila ku disambila ne dilonga dia mifundu.
Mulombodi Mukulu Uchtdorf wakamba ne: “Bua kukankamika malanda etu ne Nzambi, tudi dijinga ne kupitshisha diba Nenda nkayetu. Kutamba kuenza dituku dionsu disambila dia nkaya ne dilonga dia mifundu… netshikala tshibutshilu tshia diba dietu ne didienzeja dietu dia kusemena pabuipi ne Tatu wa mu Diûlu.”2
Disambila didi mushindu utudi tuyukila ne Tatu wetu wa mu Diûlu. Mmutumanya, mmutunanga, ne mmusue kututeleja! Patudi tusambila ne moyo mujima, tuela tuasakidila, ne tulomba bintu bitudi nabi dijinga, udi umvua ne udi anu wandamuna mu mushindu ne mu diba Dienda.
Patshidi tshitangila kubala kua mifundu, kakuena mushindu muimpa wakuenza to. Tshidi tshikala ne mushinga ntshia kutungunuka dienza! Mulombodi Mukulu Russell M. Nelson wakalongesha ne, “Didibuinka dia matuku onsu mu dîyi dia Nzambi diidi tshiakane bua kudisha nyuma.”3 Dipitshisha dia diba dituku dionsu mu mifundu, kakuyi mpata, nedikuambuluisha bua kuibaka nsombelu wa ditabuja ne dikankamana.
Somba Ne Aba Badi Bakukankamika bua Kuenza Malu Mimpa
Tatu wa mu Diûlu musue bua tupetangana ne tuenza malanda ne bakuabu—nangananga mêku ne balunda. Tutu tuakajibua nangananga kudi aba batudi tupitshisha nabu diba. Nansha bobu bikala bidimba bia Ekelezia anyi to, udi ne bua kuikala munyungulukibua kudi bantu badi mua kukuambuluisha bua wewa kuteka lumu luimpe mu tshienzedi, kunemeka mikenji ya Mukalenga ne kulua muntu muimpe. Udi mua kubambuluisha peba bua kuenza momumue. Nganyi wa kubalunda beba udi ukuambuluisha bua kuibaka nshindamenu pa buakana.
Peta Disanka mu Dibaka dia Nshindamenu Weba
Kudi mishindu mipite bungi yudi mua kuibaka nsombelu weba bua kuikalayi ne makanda ne disanka, popamue ne kuya mu ekelezia ne kuangata biadidia bia tshijila, kuenza ne kulama kua bipungidi, ne kulonda kua mibelu ya bambi badi ne moyo.
Bidi bikala bia mushinga bua kuvuluka ne, bionsu ebi bidi bilomba mudimu ne diba. Kudi anu dishindamija ne dilonga bua kuenza, kadi kuena muenzejibua bua kuenza nkayeba to. Mukalenga neakuambuluisha dituku dionsu pawikala wenza mueba monsu bua kuteta kuibaka moyo udi ufila didiumvua kuudi wewa ne Yeya ne ukutuadila disanka.
© 2021 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly For the Strength of Youth Message, September 2021. Tshiluba. 17473 760