Parau poro’i tā’āva’e Nō te Pūai o te Feiā ’Āpī, ’Ātopa 2021

Te i’oa o tāna ’Ēkālesia

Tē vai ra te aura’a i muri i te i’oa tā Iesu Mesia i hōro’a i tāna ’Ēkālesia.

Iesu Mesia ’ei Tīa’i māmoe maita’i

Te Ha’api’ira’a Tumu ’e te mau Fafaura’a 115:4

4 ’O teie ho’i te i’oa ’o tē topahia i ni’a i tā’u ’ēkālesia i te mau mahana hopea nei, ’oia ho’i Te ’Ēkālesia a Iesu Mesia i te Feiā Mo’a i te mau Mahana Hope’a nei.

tā’u ’ēkālesia

Te ’Ēkālesia—e pupu ta’ata ’o tē ti’aturi nei i te hō’ē ā mau mea ’e ’o tē ha’amori ’āmui nei. Nā Iesu Mesia teie ’Ēkālesia. ’Ua ha’amata ’oia i te reira. Tē arata’i nei ’oia i te reira. Nāna te reira.

topahia

’Ua parau mai Iesu Mesia ia tātou i te i’oa tāna e hina’aro ’ia pi’i te ta’ata i tāna ’Ēkālesia. Nō reira, ’o te i’oa ïa tā tātou e pi’i i te reira—’e ’o te i’oa ato’a tā tātou e tāparu ia vetahi ’ē ’ia pi’i i te reira. Nā Iesu Mesia i hōro’a mai i teie i’oa.

mau mahana hope’a nei

mau mahana hope’a nei—te mau mahana tā tātou e ora nei ; te taime hou te Tae-Piti-Ra’a mai o Iesu Mesia. ’Ua fa’aho’i fa’ahou mai Iesu Mesia i tāna ’Ēkālesia i te fenua nei nō teie taime hope’a. E tauturu te reira ’ia fa’aineine i te ao nei nō tōna Tae-Piti-Ra’a mai.

Te ’Ēkālesia a Iesu Mesia

(Hi’o « tā’u ’ēkālesia ».) Teie te tuha’a mātāmua o te i’oa tā te Fa’aora i hōro’a i tāna ’Ēkālesia. ’Ua parau ’oia i te reira « Te ’Ēkālesia » nō te mea nāna i fa’anahonaho i te reira. ’E ’ua tu’u ’oia i tōna i’oa i ni’a iho.

Mau mahana hope’a nei

(Hi’o « mau mahana hope’a nei ».) ’O tā tātou mau parau hope’a ïa nō te i’oa o te ’Ēkālesia. Tē fa’a’ite noa nei te reira ē, ’o te ’Ēkālesia teie tāna i fa’aho’i fa’ahou mai i teie mau mahana nei, ’eiaha rā terā tāna i ha’amata i nā mua atu.

Feiā Mo’a

Feiā Mo’a—te aura’a o teie parau, ’o « te mau ta’ata mo’a » ïa. E tuha’a faufa’a rahi ato’a teie nō te i’oa o te ’Ēkālesia. Tē parau nei te reira nō ni’a i te mau melo o te ’Ēkālesia. E ti’a ia Iesu Mesia ’ia tāmā ia tātou, ’ia vai ateate tātou. ’E ’ua hōro’a mai ’oia i te Vārua Maita’i nō te ha’apūai ia tātou, ’a tāmata ai tātou i te rave i te mea tāna i fa’aue mai. Mai te mea e fa’aro’o tō tātou iāna ’e e tāmau noa tātou i te tāmata, e fa’ariro ’oia ia tātou ’ei mea mo’a. E fa’ariro ’oia ia tātou ’ei Feiā Mo’a.

Nō te tahi atu parau

Nō te tahi atu parau nō ni’a i te i’oa o te ’Ēkālesia, hi’o :

• Russell M. Nelson, « Te i’oa ti’a o te ’Ēkālesia », ’āmuira’a rahi nō ’Ātopa 2018.

• Russell M. Nelson, « Thus Shall My Church Be Called », ’āmuira’a rahi nō ’Ēperēra 1990.

• Arata’i nō te mau pāpa’ira’a mo’a, « ’Ēkālesia, i’oa nō te ».

© 2021 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly For the Strength of Youth Message, October 2021. Tahitian. 17474 895