“Kukuak Ida ken Am-ammok Ida,” Para iti Pigsa dagiti Agtutubo, Ene. 2022.
Binulan a Mensahe iti Para iti Pigsa dagiti Agtutubo , Enero 2022
“Kukuak Ida ken Am-ammok Ida”
Ladawan manipud iti Getty Images
Nariknayo kadin nga awan pategyo? Mabalin a kastoy ti riknayo no pinanunotyo maipapan no mano dagiti tattao iti lubong wenno nakitayon no mano dagiti bitbituen iti tangatang. Nasdaawkayo kadin no talaga nga ammo ti Dios no asinokayo ken no ania ti kayarigan ti biagyo? No kasta, ngarud adda mensahe ni Moises para kadakayo.
Iti maysa a parmata, impakita ti Dios ken ni Moises ti tunggal tulnek ti daga ken amin a tattao nga agnaed idiay. “Dakkel ti bilangda kas iti di pannakabilang ti anay iti igid ti baybay” (Moises 1:28). Imbaga ngarud ni Moises a “saan a mabilang dagiti lubong” a pinarsuana (Moises 1:33)—nga adu dagiti pinarsuana malaksid iti daytoy a daga.
Nalabit a natalipupos ni Moises idi makitana amin dagitoy a banag. Nalabit a napanunotna: Sadino ti pakaitutopak iti kasta unay a kaadu a pinarsua? Ken kasano a maasikaso ti Dios ti kasta unay?
Simple laeng ti sungbat ti Dios: “Ammok ti bilang dagiti amin a banag.” Kasano? “Kukuak ida ken ammok ida” (Moises 1:35). Ammo ti Dios no asino ni Moises, kas met nga ammona amin nga annakna, kasta met iti amin a pinarsuana. Kukuana amin dagitoy—dagiti bituen, dagiti anay, ken nangnangruna dagiti annakna iti daga. Isuda ti sibubukel a gapu nga inaramidna ti daga. Ti agnanayon a pannakaisalakanda ti kapatgan nga aramid ti Dios.
“Ta adtoy, daytoy ti aramidko ken gloriak—ti mangipatungpal iti saan nga ipapatay ken ti agnanayon a biag ti tao” (Moises 1:39).
Kas met laeng iti pannakaammo ni Moises iti pakaitutopanna iti plano ti Dios, maipanamnama met kadakayo nga am-ammonakayo ti Dios! Tultulongannakayo nga agsubli Kenkuana babaen iti aramid ken gloriana. Apay? Gapu ta kukuanakayo. Ken awan ti saan a napateg maipapan iti dayta!
© 2021 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, December 2021. Ilokano. 18295 864