“They are Mine and I Know Them,” For the Strength of Youth, Jan. 2022.
ຂ່າວສານປະຈໍາເດືອນ For the Strength of Youth, ເດືອນມັງກອນ 2022
“ເພາະວ່າມັນເປັນຂອງເຮົາ ແລະ ເຮົາຮູ້ຈັກມັນ”
ຮູບພາບຈາກ Getty Images
ເຈົ້າເຄີຍຮູ້ສຶກບໍ່ມີຄວາມສຳຄັນບໍ? ເຈົ້າອາດຈະຮູ້ສຶກແບບນີ້ເມື່ອເຈົ້າຄິດກ່ຽວກັບວ່າມີຄົນຈຳນວນຫລາຍປານໃດໃນໂລກໃບນີ້ ຫລື ເບິ່ງດວງດາວທີ່ຢູ່ໃນທ້ອງຟ້າ. ເຈົ້າເຄີຍສົງໄສບໍວ່າ ພຣະເຈົ້າຮູ້ແທ້ວ່າເຈົ້າເປັນໃຜ ແລະ ຊີວິດຂອງເຈົ້າເປັນຄືແນວໃດ? ຖ້າເຄີຍສົງໄສ, ໂມເຊມີຂ່າວສານສຳລັບເຈົ້າ.
ໃນພາບນິມິດ, ພຣະເຈົ້າໄດ້ສະແດງຕໍ່ໂມເຊທຸກຊອກທຸກມຸມຂອງແຜ່ນດິນໂລກ ແລະ ຜູ້ຄົນທັງໝົດທີ່ຈະອາໄສຢູ່ໃນນັ້ນ. ພວກເຂົານັ້ນ, “ເກີນກວ່າຈະນັບໄດ້ດັ່ງເມັດຊາຍຢູ່ເທິງຝັ່ງທະເລ” (ໂມເຊ 1:28). ແລ້ວພຣະເຈົ້າໄດ້ກ່າວກັບໂມເຊວ່າ ພຣະອົງໄດ້ສ້າງ “ໂລກຕ່າງໆຈົນນັບບໍ່ຖ້ວນ” ອີກ (ໂມເຊ 1:33)—ວ່າການສ້າງຂອງພຣະອົງນັ້ນໄປໄກເກີນກວ່າໂລກນີ້.
ໂມເຊອາດຈະຮູ້ສຶກຕົກໃຈເມື່ອເພິ່ນເຫັນສິ່ງເຫລົ່ານີ້ທັງໝົດ. ບາງທີເພິ່ນອາດຈະສົງໄສວ່າ: ຂ້າພະເຈົ້າຢູ່ບ່ອນໃດໃນທ່າມກາງການສ້າງທີ່ຫລາກຫລາຍເຫລົ່ານີ້? ແລະ ພຣະເຈົ້າຈະສາມາດຕິດຕາມເບິ່ງຫລາຍແບບນີ້ໄດ້ແນວໃດ?
ຄຳຕອບຂອງພຣະເຈົ້ານັ້ນລຽບງ່າຍ: “ທຸກສິ່ງທັງປວງໄດ້ຖືກນັບໄວ້ສຳລັບເຮົາ.” ແນວໃດ? “ເພາະວ່າມັນເປັນຂອງເຮົາ ແລະ ເຮົາຮູ້ຈັກມັນ” (ໂມເຊ 1:35). ພຣະເຈົ້າຮູ້ວ່າໂມເຊແມ່ນໃຜ, ເໝືອນດັ່ງທີ່ພຣະອົງຮູ້ຈັກລູກໆຂອງພຣະອົງທັງໝົດ, ເຊັ່ນດຽວກັນກັບການສ້າງທັງປວງຂອງພຣະອົງ. ທຸກສິ່ງທັງໝົດເປັນຂອງພຣະອົງ—ດວງດາວຕ່າງໆ, ເມັດຊາຍ, ແລະ ໂດຍສະເພາະລູກໆຂອງພຣະອົງຢູ່ເທິງແຜ່ນດິນໂລກ. ພວກເຂົາຄືເຫດຜົນທັງໝົດທີ່ພຣະອົງໄດ້ສ້າງແຜ່ນດິນໂລກ. ຄວາມລອດນິລັນດອນຂອງພວກເຂົາຄືວຽກງານທີ່ສຳຄັນທີ່ສຸດຂອງພຣະເຈົ້າ.
“ເພາະຈົ່ງເບິ່ງ, ນີ້ຄື ວຽກງານຂອງເຮົາ ແລະ ລັດສະໝີພາບຂອງເຮົາ—ຄືການທີ່ຈະເຮັດໃຫ້ເກີດຄວາມເປັນອະມະຕະ ແລະ ຊີວິດນິລັນດອນຂອງມະນຸດ” (ໂມເຊ 1:39).
ເຊັ່ນດຽວກັນກັບທີ່ໂມເຊໄດ້ຮຽນຮູ້ວ່າເພິ່ນຢູ່ບ່ອນໃດໃນແຜນຂອງພຣະເຈົ້າ, ເຈົ້າກໍເຊັ່ນດຽວກັນສາມາດໝັ້ນໃຈໄດ້ວ່າພຣະເຈົ້າຮູ້ຈັກເຈົ້າ! ການຊ່ວຍເຫລືອເຈົ້າກັບຄືນໄປຫາພຣະອົງຄືວຽກງານ ແລະ ລັດສະໝີພາບຂອງພຣະອົງ. ເປັນຫຍັງ? ເພາະເຈົ້າເປັນຂອງພຣະອົງ. ແລະ ບໍ່ມີສິ່ງໃດສຳຄັນໄປກວ່ານັ້ນ!
© 2022 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, January 2022. Laotian. 18295 331