“Cov Yawg Suab: Lawv Yog Leej Twg thiab Vim Li Cas Lawv Muaj Nqis,” Ntxiv Dag Zog rau cov Tub Hluas Ntxhais Hluas, Ob Hlis Ntuj 2022.
Zaj Lus hauv phau Ntxiv Dag Zog rau cov Tub Hluas Ntxhais Hluas Txhua Hli, Ob Hlis Ntuj 2022
Cov Yawg Suab
Lawv Yog Leej Twg thiab Vim Li Cas Lawv Muaj Nqis
Tej zaum koj tau hnov txog Anplaham, Ixaj, thiab Yakhauj. Peb nyeem txog lawv ntau zaus nyob hauv Phau Ntawv Maumoos thiab koj yeej yuav hnov txog lawv thaum koj kawm Phau Qub xyoo no. Vim cov vaj lug kub hais ntau txog lawv, nyaj lawv tseem ceeb heev, yom? Tiam sis tej zaum koj nug koj tus kheej, “Vim li cas peb tug txiv neej uas nyob puag thaum ub muaj nqis niaj hnub nim no?” Yeej yog vim lawv tau khi lus mus ib txhis thiab Vajtswv tau cog lus tias lawv yuav tau koob hmoov.
Anplaham
Cov duab los ntawm Jarom Vogel
Anplaham yog ib tug yaj saub zoo kawg. Nws yog ib tug neeg ncaj ncees thiab tau ua raws li Vajtswv cov lus txib.
Nws tau ua kev cai raus dej, tau txais lub pov thawj hwj, thiab tau ua kev cai sib khi nrog nws tus poj niam Xalas kom nyob mus ib txhis.
Vajtswv tau khi lus rau Anplaham hais tias nws cov xeeb leej xeeb ntxwv yuav ua ib haiv neeg tseem ceeb thiab lawv yuav muaj tib co koob hmoov uas nws tau txais.
Lawv yuav muab Yexus Khetos txoj moo zoo tag nrho tshaj tawm rau tej haiv neeg ntawm lub ntiaj teb no.
Ixaj
Ixaj yog Anplaham thiab Xalas tus tub.
Vajtswv tau hais kom Anplaham muab Ixaj txi. Anplaham hlub Ixaj tiam sis nws tau xaiv mloog Vajtswv lus. Ua ntej Anplaham yuav muab Ixaj txi, ib tug tim tswv tau qhia kom Anplaham tsis txhob ua li ntawd. Qhov uas Anplaham thiab Ixaj txaus siab mloog Vajtswv lus yeej yog ib lub cim txog Vajtswv Tib Leeg Tub txoj Kev Theej Txhoj.
Vajtswv tau cog lus rau Ixaj tias nws yuav tau tib co koob hmoov ib yam li Anplaham tau txais.
Yakhauj
Ib yam li nws txiv thiab nws yawg, Yakhauj muab siab rau ntseeg Vajtswv.
Vim nws rau siab ntseeg, tus Tswv tau muab Yakhauj lub npe hloov los ua Ixayees, uas txhais hais tias “ib tug uas yeej nrog Vajtswv” los sis “cia Vajtswv yeej” (saib Phau Qhia txog Vaj Lug Kub, “Ixayees”).
Yakhauj muaj 12 tug tub. Cov tub thiab lawv tsev neeg no hu ua cov xeem neeg Ixayees.
Kev khi lus uas Vajtswv tau khi nrog Anplaham los tau muab rau Yakhauj thiab nws cov me nyuam thiab.
Cov Yawg Suab thiab Koj
Vim koj yog ib tug mej zeej ntawm lub Koom Txoos no, koj yog Anplaham, Ixaj, thiab Yakhauj ib tug xeeb ntxwv. Lawv txoj kev khi lus nrog Vajtswv yog koj txoj kev khi lus thiab!
Koj tau koob hmoov thiab muaj kev lav ris kom ua tim khawv txog tus Cawm Seej thiab qhia txog txoj moo zoo.
Vajtswv kuj tau hu koj caw txhua leej txhua tus ua raws li tej kev khi lus no thiab txais cov kab ke pov thawj hwj thiab. Thawj Tswj Hwm Russell M. Nelson tau hais tias nov yog ib feem ntawm kev muab Ixayees sau los ua ke, uas “yog qhov tseem ceeb tshaj plaws uas peb ua hauv lub ntiaj teb niaj hnub nim no” (“Hope of Israel,” [kev tshaj tawm rau cov neeg hluas thoob ntiaj teb, Rau Hli Ntuj 3, 2018], 8, ChurchofJesusChrist.org).
© 2022 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, February 2022. Hmong. 18344 295