“How Do You Hear Him?,” For the Strength of Youth, Mar. 2022.
ຂ່າວສານປະຈຳເດືອນ For the Strength of Youth, ເດືອນມີນາ 2022
ທ່ານໄດ້ຍິນພຣະອົງໃນວິທີໃດ?
ຮູບພາບປະກອບ ໂດຍ ອ໊ອກຊານາ ກຣີວິນາ
ພ້ອມກັບການຊີ້ນຳດ້ວຍຄວາມສະຫງົບ ທີ່ເຮົາໄດ້ຮັບຈາກພຣະວິນຍານບໍລິສຸດ, ເປັນບາງຄັ້ງ, ພຣະເຈົ້າໃຫ້ເຮົາແຕ່ລະຄົນແນ່ໃຈໄດ້ຢ່າງມີພະລັງ ແລະ ເປັນສ່ວນຕົວວ່າ ພຣະອົງຮູ້ຈັກເຮົາ ແລະ ຮັກເຮົາ. ແລ້ວ, ໃນຊ່ວງເວລາອັນຫຍຸ້ງຍາກຂອງເຮົາ, ພຣະຜູ້ຊ່ວຍໃຫ້ລອດໄດ້ນຳປະສົບການເຫລົ່ານີ້ກັບຄືນເຂົ້າສູ່ຈິດໃຈຂອງເຮົາ.
ໃຫ້ຄິດກ່ຽວກັບຊີວິດຂອງທ່ານເອງ. ປະສົບການເຫລົ່ານີ້ອາດເກີດຂຶ້ນໃນເວລາທີ່ສຳຄັນໃນຊີວິດຂອງເຮົາ ຫລື ໃນສິ່ງທີ່ ຕອນທຳອິດ ເບິ່ງຄືວ່າບໍ່ມີເຫດຜົນ. ຊ່ວງເວລາທາງວິນຍານທີ່ມີພະລັງເຫລົ່ານີ້ ເກີດຂຶ້ນໃນເວລາ ແລະ ວິທີທີ່ແຕກຕ່າງກັນ, ສຳລັບເຮົາ ແຕ່ລະຄົນໂດຍສະເພາະ.
ໂຈເຊັບ ສະມິດ ໄດ້ອະທິບາຍວ່າ ບາງເທື່ອເຮົາ “ອາດຄິດຂຶ້ນໄດ້ທັນທີ” ແລະ ບາງເວລາ ຄວາມຮູ້ອັນບໍລິສຸດໄດ້ຫລັ່ງໄຫລມາ.1
ປະທານດາລິນ ເອັຈ ໂອກສ໌, ໃນການເວົ້າຕອບຜູ້ຊາຍຄົນໜຶ່ງທີ່ຈິງໃຈ ແຕ່ບໍ່ເຄີຍມີປະສົບການເຊັ່ນນີ້, ໄດ້ແນະນຳວ່າ, “ບາງທີຄຳອະທິຖານຂອງເຈົ້າໄດ້ຮັບຄຳຕອບຫລາຍເທື່ອແລ້ວ, ແຕ່ເຈົ້າມີຄວາມຄາດໝາຍສູງ ຢາກເຫັນເຄື່ອງໝາຍອັນຍິ່ງໃຫຍ່ ຫລື ຢາກໄດ້ຍິນສຽງດັງໆ ຈົນວ່າເຈົ້າຄິດວ່າຕົວເອງບໍ່ໄດ້ຮັບຄຳຕອບ.”2
ເມື່ອບໍ່ດົນມານີ້ ເຮົາໄດ້ຍິນຈາກປະທານຣະໂຊ ເອັມ ແນວສັນ ກ່າວວ່າ: “ຂ້າພະເຈົ້າຂໍເຊື້ອເຊີນທ່ານໃຫ້ຄິດຢ່າງເລິກເຊິ່ງ ແລະ ເລື້ອຍໆ ກ່ຽວກັບຄຳຖາມທີ່ສຳຄັນນີ້: ທ່ານ ໄດ້ຍິນພຣະອົງໃນວິທີໃດ? ຂ້າພະເຈົ້າຂໍເຊື້ອເຊີນທ່ານຄືກັນ ໃຫ້ຮັບຟັງພຣະອົງໃຫ້ດີ ແລະ ເລື້ອຍໆກວ່າເກົ່າ.”3
© 2022 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, March 2022. Laotian. 18296 331