“Tsis Txhob Ntshai, tus Tswv Nrog Nraim Koj Nyob,” Ntxiv Dag Zog rau cov Tub Hluas Ntxhais Hluas, Xya Hli Ntuj 2022.
Zaj Lus hauv Ntxiv Dag Zog rau cov Tub Hluas Ntxhais Hluas Txhua Hli, Xya Hli Ntuj 2022
Tsis Txhob Ntshai—tus Tswv Nrog Nraim Koj Nyob
Kev ntshai yeej tsis yog ib yam tshiab. Txij puag thaum ub, kev ntshai ua rau Vajtswv cov me nyuam pom tsis deb. Nyob hauv 2 Vaj Ntxwv, cov Xilias tus vaj ntxwv twb xa ib pawg neeg coob mus muab tus yaj saub Elisas ntes thiab tua tuag.
“Thaum kaj ntug, Elisas tus tub qhe tawm mus ncig nraum zoov, nws pom cov tub rog Xilias thiab lawv tej nees thiab tsheb nees vij tag nrho lub nroog. Thiab nws tus tub qhe hais tias, Tus tswv, zaum no ces peb yuav tsis dim li lauj! peb yuav ua li cas?” 2 Vaj Ntxwv 6:15.
Nws hais li ntawd vim nws ntshai.
“Elisas teb hais tias, Tsis txhob ntshai: Peb tog muaj coob dua lawv tog.
“Elisas thov Vajtswv hais tias, tus Tswv thov koj qhib nws lub qhov muag kom nws pom. Tus Tswv teb Elisas tej lus thov, ces Elisas tus tub txib thiaj pom tej nees huab cua thiab tsheb nees nplaim taws nyob puv toj roob hauv pes ib ncig Elisas” (2 Vaj Ntxwv 6:16-17).
Tej zaum peb yuav tsis muaj tej nees tsheb nees nplaim taws los ua rau peb txoj kev ntshai ploj thiab kov yeej peb cov yeeb ncuab, tiam sis zaj dab neeg no yeej qhia meej. Tus Tswv nrog nraim peb, paub txog peb thiab foom koob hmoov rau peb zoo li Nws tib leeg ua tau.
Yog peb tso siab plhuav rau tus Tswv thiab Nws tej kev, yog peb rau siab ua Nws txoj hauj lwm, peb yuav tsis ntshai los sis nyuaj siab txog tej yam ntawm lub ntiaj teb. Tus Tswv saib xyuas peb, hlub peb thiab sawv ntawm peb ib sab.
© 2022 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, July 2022. Hmong. 18298 295