ແສງໂຄມນຳທາງໃຫ້ເຮົາ

ສິ່ງຂອງທົ່ວໄປຂອງຊາວອິດສະຣາເອນໃນສະໃໝບູຮານສາມາດສິດສອນເຮົາເຖິງວິທີທີ່ພຣະຜູ້ເປັນເຈົ້ານຳທາງເຮົາ.

ຄວາມເປັນຈິງ

ໃນສະໃໝພຣະຄຳພີເດີມ, ຜູ້ຄົນໄດ້ໃຊ້ໂຄມໄຟນ້ຳມັນເພື່ອເອົາແສງສະຫວ່າງໄປກັບພວກເຂົາໃນຄວາມມືດ. ໂຄມໄຟເຫລົ່ານີ້ສ່ວນຫລາຍມີລັກສະນະພື້ນຖານສາມຢ່າງຄື:

ຖ້ວຍດິນເຜົາ ເພື່ອບັນຈຸນ້ຳມັນໝາກກອກ, ປົກກະຕິແມ່ນມີຂະໜາດນ້ອຍພໍທີ່ຈະຖືໃນອົ້ງມື
ໃສ້ໂຄມໄຟທີ່ເຮັດດ້ວຍດ້າຍຜ້າເພື່ອຈູດໄຟຫລັງຈາກທີ່ມັນດູດຊຶມນ້ຳມັນ
ຫົວ ຫລື ທໍ່ຫົວເພື່ອວາງໃສ້ໂຄມໄຟ

ໂຄມໄຟນ້ຳມັນທຳມະດາທີ່ມີໃສ້ພຽງອັນດຽວຈະສ່ອງແສງໄດ້ພໍສອງສາມສອກອ້ອມຮອບຕົວ. ຖ້າໃຊ້ໃນຂະນະທີ່ກຳລັງຍ່າງໄປມາ, ມັນຈະສ່ອງແສງໄດ້ພໍແຕ່ໃຫ້ເຫັນບາດກ້າວທາງໜ້າຂອງເຈົ້າເທົ່ານັ້ນ ເພື່ອໃຫ້ເຈົ້າສາມາດຍ່າງໄປມາຢ່າງລະມັດລະວັງໃນຄວາມມືດ.

ສິ່ງທີ່ເຮົາສາມາດຮຽນຮູ້

ພຣະຄຳຂອງພຣະຜູ້ເປັນເຈົ້າສາມາດສ່ອງທາງເຮົາຜ່ານຄວາມມືດ ແລະ ຄວາມສັບສົນທີ່ຢູ່ອ້ອມຮອບເຮົາໃນໂລກ.

ພຣະຜູ້ເປັນເຈົ້າໄດ້ຂໍໃຫ້ເຮົາບໍ່ຕ້ອງປິດບັງຄວາມສະຫວ່າງຂອງເຮົາ ແຕ່ໃຫ້ນຳເອົາຄວາມສະຫວ່າງຂອງພຣະກິດຕິຄຸນໄປກັບເຮົາ ເພື່ອໃຫ້ຄົນອື່ນສາມາດເຫັນໄດ້ (ເບິ່ງ ມັດທາຍ 5:14–16).

ມັນຂຶ້ນກັບເຮົາທີ່ຈະເຮັດໃຫ້ແນ່ໃຈວ່າໂຄມໄຟຂອງເຮົາຖືກເຕີມເຕັມດ້ວຍນ້ຳມັນ (ເບິ່ງ ມັດທາຍ 25:1–13). ເຮົາເຮັດສິ່ງນີ້ຜ່ານທາງການອະທິຖານ, ສຶກສາພຣະຄຳພີ, ຮັບໃຊ້, ເຮັດຕາມສາດສະດາ, ແລະ ການກະທຳອື່ນໆດ້ວຍສັດທາ ແລະ ການອຸທິດຕົນ (ເບິ່ງ Spencer W. Kimball, Faith Precedes the Miracle [1972], 256).

ຖ້າເຮົາໃຊ້ສັດທາ, ບາງຄັ້ງພຣະຜູ້ເປັນເຈົ້າກໍສົ່ງແສງນຳທາງເຮົາພຽງພໍສຳລັບໃຫ້ເຮົາກ້າວໄປອີກຂັ້ນ (ເບິ່ງ Boyd K. Packer, “The Candle of the Lord,” Ensign, Jan. 1983, 54).

© 2022 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, August 2022. Laotian. 18316 331