E lāmepa i tō tātou pae ’āvae

Tē ha’api’i nei te hō’ē tao’a mātauhia e tō ’Īserā’ela i tahito ra nāhea te Fatu ’ia arata’i ia tātou.

Te mau parau rahi

I te tau o te Faufa’a Tahito, e rave te ta’ata i te mau lāmepa hinu mōrī nō te tūrama nā roto i te pōiri. E toru tuha’a niu i roto i te rahira’a o teie mau lāmepa. Tē vai ra :

Te ’au’a ’araea ’ei fāri’i nō te hinu ’olive ; e ō tōna na’ina’i i roto i te ’apu rima ’ia tāpe’ahia
Te ’ūiti nīnira tē fa’a’amahia i muri a’e i tōna purura’a i roto i te hinu mori
Te tāviriviri nō te tāpe’a i te ’ūiti

E mau lāmepa hinu mōrī ha’iha’i ē hō’ē noa atu ’ūiti nō tē tūrama tau metera ri’i noa mai. ’Ia fa’a’ohipa-noa-hia-atu te reira i roto i tō ’outou mau orihaerera’a, e nāva’i te tūramara’a i mua noa mai i tō ’outou ta’ahira’a ’āvae ’ei pārurura’a i tō ’outou mau haere’a nā roto i te pōiri.

E aha tā tātou e ha’api’i nei

E tūrama te parau a te Fatu i tō tātou ’ē’a nā roto i te pōiri ’e te ahoaho e hā’ati nei ia tātou i te ao nei.

’Ua ani mai te Fatu ia tātou ’eiaha e tāpo’i i tō tātou māramarama ’ia ta’ita’i rā i te māramarama o te ’evanelia nā muri ia tātou ’ia ’ite mai te mau ta’ata i te reira (hi’o Mataio 5:14–16).

Tei ia tātou te arara’a ē ua ī tā tātou mau lāmepa i te hinu mōrī (hi’o Mataio 25:1–13). E nā reira tātou nā roto i te pure, te tuatāpapara’a i te pāpa’ira’a mo’a, te tāvinira’a, te pe’era’a i te peropheta ’e te tahi atu mau ’ohipa nō te fa’aro’o ’e te paieti (hi’o Spencer W. Kimball, Faith Precedes the Miracle [1972], 256).

’Ia fa’a’ohipa tātou i te fa’aro’o, i te tahi mau taime e tūrama te Fatu i tō tātou ’ē’a ’ia tae noa a’e tātou i te ta’ahira’a i muri mai (hi’o Boyd K. Packer, « The Candle of the Lord, » Ensign, Tēnuare 1983, 54).

© 2022 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly For the Strength of Youth Message, August 2022. Tahitian. 17467 895