Bulanan nga Mensahe sa Liahona, Nobyembre 2022
Legasiya sang Pagpaisog
Mga Bahin
Sa ginasiling sang akon nanay sa akon kon magreklamo ako nga kabudlay gid sang isa ka butang, “Ahay, Hal, siyempre mabudlay gid. Amo gid na iya. Kay ang kabuhi pagtilaw.”
Ginasiling niya ina nga kalmado, nga nagayuhum pa gani, kay nahibal-an niya ang duha ka butang. Nga bisan ano kabudlay, ang importante lang gid amo nga makapauli sia agud makaupod sang iya Amay nga Langitnon. Kag nahibal-an niya nga mahimo niya ini paagi sa pagtuo sa iya Manluluwas. …
Ang legasiya sang pagpaisog nga iya ginbilin sa amon malaragway sang pinakamaayo sa Moroni 7, kon diin ginapaisog ni Mormon ang iya anak nga si Moroni kag ang iya katawhan. …
Ginabutang niya una si Jesucristo, pareho sang tanan nga nagamadinalag-on sa pagpaisog sang mga ginabudlayan pasaka sa dalanon padulong sa ila langitnon nga puluy-an. …
Nakita ni Mormon ang pagkamapainubuson bilang ebidensya sang kakusog sang ila pagtuo. …
Dayon ginpaisog sila ni Mormon paagi sa pagpamatuod nga padulong na sila sa pagbaton sang regalo nga ang ila mga tagipusuon pun-on sang puro nga gugma ni Cristo. …
Kon panumdumon ko, makita ko na karon kon paano inang dulot sang gugma sa isigkawawo—ang puro nga gugma ni Cristo—nagpabakod, naggiya, nagsakdag, kag nagbag-o sa akon nanay sa iya pagpangabudlay sa iya pagpauli. …
… Nahibal-an sang Manluluwas ang detalye sang inyo mga kabudlayan. Nahibal-an Niya ang inyo dako nga potensyal para magpatubo sang pagtuo, paglaum, kag gugma sa isigkatawo.
Ang mga kasuguan kag kasugtanan nga Iya ginatanyag sa inyo indi mga pagtilaw para kontrolon kamo. Mga regalo ini para alsahon kamo hasta nga mabaton ang tanan nga mga regalo sang Dios kag makabalik pauli sa inyo Amay nga Langitnon kag sa Ginuo, nga nagapalangga sa inyo.