Usuŋ Inaŋ Jesus Ɔsɔŋɔke Fi Idem

Otode mme General Presidency eke Nkaiferi Iban ye Mkparawa Iren

Ami mekeme ndinam kpukpru ŋkpɔ otode ke Christ.
Ŋwed Mbon Philippi 4:13

Ke ofuri ererimbot, Ikɔt Abasi esidara ke itie ŋwed Abasi emi: “Mmenyene ukeme ndinam kpukpru odudu Andisɔŋɔ mi idem” (Ŋwed Mbon Philippi 4:13).

Ini emi mme owo ekopde emi, ubak mmɔ eyekere ke oro ɔwɔrɔ ke mmɔ ekeme edibɔhɔ idomo ekededi, ekan ke mbre ekededi, enyuŋ ekut unen ke ofuri uduak mmɔ. Edi idige se itie ŋwed Abasi edi oro.

Edi Apostle Paul ekewet emi kini enye okodude ke ufɔk-ŋkpɔkɔbi. Nte owo-ŋkpɔkɔbi, ama odu ediwak ŋkpɔ se Paul miki kemeke ndinam, edi enye ama ɔdiɔŋɔ ke Christ ekeme edisɔŋɔ enye idem man anam ŋkpɔ se inehede inyene ata ufɔn.

Ukem oro edi akpanikɔ ɔnɔ mbufo!

Akpa Christ Ɔsɔŋɔ Nnyin Idem ete Idiɔŋɔ

Jesus Christ ama ɔnɔ mbufo ediwak akpan usuŋ emi mbufo ekemeke edi-di ndidiɔŋɔ se idide akpanikɔ. Enye ama ekpep kpukpru nnyin ete ibɔŋ-akam kpukpru ini (se Ɔyɔhɔ Ŋwed Nephi Ita 18:18) yuŋ bup man ɔdiɔŋɔ se idide akpanikɔ (se Moroni 10:4–5). Afo nko emekeme edikut onyuŋ ɔdiɔŋɔ se idi akpanikɔ oto ke afo edikot ŋwed Abasi.

Edibɔŋ-akam ye edikot ŋwed Abasi ada Spirit esin ke uwem fo. Spirit oro ekeme editiŋ-ikɔ ɔnɔ “ekikere ye … esit fo” (Doctrine ye Covenants 8:2), “ɔyɔhɔ ukpɔŋ fo ye idara,” (Doctrine ye Covenants 11:13).

Ke mme usuŋ ntem, afo emekeme “edikop uyo Esie”—okop mme ikɔ Andinyaŋa onyuŋ etiene se Enye eketiŋde. President Russell M. Nelson ekekpep ete ke emi edi “usuŋ ɔnɔ edikut unen, inemesit, ye idara ke uwem emi.”¹

Udiana Christ Ɔsɔŋɔ Nnyin Idem ete Inam

Ɔsɔŋɔ edi ebine mbufo nte mbufo enwanade edinim ibet enyuŋ enam nti mbumek emi adade ekesim emem ye inemesit. Jesus Christ ɔsɔŋɔ mbufo idem man enam emi kpa kini mme mbumek oro ɔsɔŋde ndinam. Ubak-ini afo emekeme edi-nam idiɔk mbumek. Ke mfɔniso, Erisio-isop eke Andinyaŋa anam edikabare-esit odu. Otode ke ntak Jesus Christ, afo emekeme ndikabare nsana onyuŋ okut idara. Enye ekeme edisɔŋɔ fi idem man “anam ɔfɔn onyuŋ edi ɔfɔn-akan”² ku-usen-ku-usen.

Ɔyɔhɔ Ita Christ Ɔsɔŋɔ Nnyin Idem man Inyene-edikan

Kini odude ke ufɔk-ŋkpɔkɔbi, Paul ekewet ete: “Mmekpep nditie ke oruk itie ekededi eke ntiede ye inem.

“Mmɔdiɔŋɔ ndidu ke usuhɔre itie, mmonyuŋ ndiɔŋɔ ndinyene ŋkpɔ ke uwak-uwak: ke kpukpru ebiet ye ke kpukpru ŋkpɔ eke etemede mi” (Ŋwed Mbon Philippi 4:11–12).

Ke ikɔ efen, Paul ama ekpep ete, otode ke Christ, imɔ iyekan inyuŋ ikpep ito mme idomo ye afanikɔŋ esie. Jesus Christ ekeme edisɔŋɔ mbufo idem man enam ukem oro.

Andinyaŋa ama ɔbɔ “ofuri oruk ubiak ye ukut ye idomo.” Enye ama emen mme unan nnyin odori ke Idemesie man oto do “enye ɔkpɔdiɔŋɔ … nte enye ɔyɔde [emi ɔwɔrɔde man anyaŋa] ikɔt esie etiene mme unan mmɔ” (Alma 7:11–12). Ke sutɔ ndaha emi mbufo ekutde, Jesus Christ ekeme edisɔŋɔ mbufi idem man eyɔ enyuŋ enam-ekure mme ŋkpɔ eke mbufo mikpikemeke edi-nam ke idem mbufo.

Ɔyɔhɔ Inaŋ Christ Ɔsɔŋɔ Nnyin Idem man Ikabare-idi

Jesus Christ ama anam eriset-ke-mkpa odu ɔnɔ kpukpru nnyin, ndien Enye anam uwem nsinsi odu ɔnɔ emi ekabarede-esit, ebɔde mme akpan edinam ikɔ-Abasi, enyuŋ enamde ye enimde ediomi eke asaŋade ye edinam oro. Ke esiode Christ, nnyin ikpikemeke edi-nam se Ete ke Enyɔŋ enehede oyom—ɔnɔ nnyin man ikabare itie nte Enye ye Eyen Esie, Jesus Christ, man inyuŋ iduŋ ye Mmɔ ke nsinsi.

Afo emekeme edikabare ntie nte Jesus Christ ke nte afo ekpebede Enye, ɔbuɔt-idem onyuŋ enim Enye ke akpanikɔ, ndien etiene uwutŋkpɔ Esie. Emi eyenam fi oduŋ ke ata mbuɔtidem, idorenyin, ata-ima, ime, nsuhɔre-idem, edisana-ido, ye nkopitem. Kpukpru emi edi mme edu eke Andinyaŋa.

Nte mbufo enwanade editiene Jesus Christ, Enye eyedi idorenyin ye unwana emi edidade mbufo usuŋ man edi kpukpru se Enye ɔdiɔŋɔke se mbufo ekpekemede ndidi. Ndien, ye Paul, mbufo eyekeme editiŋ ete, “Mmenyene ukeme ndinam kpukpru odudu Andisɔŋɔ mi idem.”

© 2023 otode Intellectual Reserve, Inc. Ekpeme kpukpru unen ndimiŋ. Ekemiŋ ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare Ɔfiɔŋ-ke-ɔfiɔŋ Etop Abaŋade Nsɔŋɔnda eke Iwaad, January 2023. Language. 18904 000