“4 Ways Jesus Christ Strengthens You,” For the Strength of Youth, Jan. 2023.
ຂ່າວສານປະຈໍາເດືອນ For the Strength of Youth, ເດືອນມັງກອນ 2023
4 ວິທີ ທີ່ພຣະເຢຊູຄຣິດຊູກຳລັງ ເຈົ້າ
ເຮົາສາມາດສູ້ກັບທຸກສິ່ງໄດ້ໂດຍ ພຣະຄຣິດ.
ຟີລິບປອຍ 4:13
ຕະຫລອດທົ່ວໂລກ, ຊາວຄຣິດໄດ້ປິຕິຍິນດີກັບພຣະຄຳພີຂໍ້ນີ້ທີ່ວ່າ: “ເຮົາສາມາດສູ້ກັບທຸກສິ່ງໄດ້ໂດຍ [ພຣະຄຣິດ] ຜູ້ຊົງຊູກຳລັງເຮົາ” (ຟີລິບປອຍ 4:13).
ເມື່ອຜູ້ຄົນໄດ້ຍິນແນວນີ້, ບາງຄົນອາດຈະຄິດວ່າມັນໝາຍຄວາມວ່າເຂົາເຈົ້າສາມາດຜ່ານການທົດສອບໃດໆກໍໄດ້, ຊະນະເກມໃດໆກໍໄດ້, ແລະ ທຸກໆຄວາມປາດຖະໜານັ້ນເປັນຈິງ. ແຕ່ວ່ານັ້ນບໍ່ແມ່ນສິ່ງທີ່ພຣະຄຳພີສິດສອນ.
ມັນຖືກຂຽນຂຶ້ນໂດຍອັກຄະສາວົກໂປໂລ ໃນຂະນະທີ່ເພິ່ນຢູ່ໃນຄຸກ. ໃນຖານະນັກໂທດ, ມີຫລາຍສິ່ງຫລາຍຢ່າງທີ່ໂປໂລ ບໍ່ ສາມາດເຮັດໄດ້, ແຕ່ເພິ່ນຮູ້ວ່າພຣະເຢຊູຄຣິດສາມາດຊູກຳລັງເພິ່ນໃຫ້ເຮັດສິ່ງທີ່ສຳຄັນທີ່ສຸດ.
ມັນກໍຈິງເຊັ່ນດຽວກັນສຳລັບເຈົ້າ!
1 ພຣະຄຣິດຊູກຳລັງເຈົ້າໃຫ້ ຮູ້
ພຣະເຢຊູຄຣິດໄດ້ປະທານວິທີສຳຄັນຫລາຍປະການເພື່ອເຈົ້າຈະສາມາດຮູ້ວ່າສິ່ງໃດເປັນຄວາມຈິງ. ພຣະອົງໄດ້ສິດສອນເຮົາທຸກຄົນໃຫ້ອະທິຖານຕະຫລອດເວລາ (ເບິ່ງ 3 ນີໄຟ 18:18) ແລະ ໃຫ້ທູນຂໍເພື່ອຈະໄດ້ຮູ້ວ່າສິ່ງໃດເປັນຄວາມຈິງ (ເບິ່ງ ໂມໂຣໄນ 10:4–5). ເຈົ້າຍັງສາມາດຊອກຫາ ແລະ ຮູ້ວ່າສິ່ງໃດເປັນຄວາມຈິງຜ່ານທາງການສຶກສາພຣະຄຳພີຂອງເຈົ້າໄດ້ເຊັ່ນກັນ.
ການອະທິຖານ ແລະ ການສຶກສາພຣະຄຳພີຈະນຳພຣະວິນຍານເຂົ້າມາໃນຊີວິດຂອງເຈົ້າ. ພຣະວິນຍານຈະບອກ “ໃນຈິດໃຈ ແລະ … ຫົວໃຈຂອງເຈົ້າ” (ຄຳສອນ ແລະ ພັນທະສັນຍາ 8:2), “ເຮັດໃຫ້ຈິດວິນຍານຂອງເຈົ້າເຕັມໄປດ້ວຍຄວາມສຸກ,” ແລະ “ໃຫ້ຄວາມສະຫວ່າງແກ່ຄວາມຄິດຂອງເຈົ້າ” (ຄຳສອນ ແລະ ພັນທະສັນຍາ 11:13).
ໃນວິທີເຫລົ່ານີ້, ເຈົ້າຈະສາມາດ “ຟັງພຣະອົງ”—ຟັງພຣະຄຳຂອງພຣະຜູ້ຊ່ວຍໃຫ້ລອດ ແລະ ເຮັດຕາມສິ່ງທີ່ພຣະອົງໄດ້ກ່າວໄວ້. ປະທານຣະໂຊ ເອັມ ແນວສັນ ໄດ້ສິດສອນວ່າ ນີ້ແມ່ນ “ແບບແຜນຂອງຄວາມສຳເລັດຜົນ, ຄວາມສຸກ, ແລະ ຄວາມຊື່ນຊົມໃນຊີວິດນີ້.”1
2 ພຣະຄຣິດຊູກຳລັງເຈົ້າໃຫ້ ເຮັດ
ຄວາມເຂັ້ມແຂງຈະມາຫາເຈົ້າຂະນະທີ່ເຈົ້າພະຍາຍາມຮັກສາພຣະບັນຍັດ ແລະ ເຮັດການເລືອກໃນສິ່ງທີ່ດີ ທີ່ນຳໄປສູ່ຄວາມສະຫງົບ ແລະ ຄວາມສຸກ. ພຣະເຢຊູຄຣິດຊູກຳລັງເຈົ້າໃນການເຮັດສິ່ງນີ້ເຖິງແມ່ນວ່າການເລືອກເຫລົ່ານັ້ນເຮັດໄດ້ຍາກກໍຕາມ. ບາງຄັ້ງເຈົ້າອາດຈະເລືອກໃນສິ່ງທີ່ບໍ່ດີ. ໂຊກດີທີ່, ການຊົດໃຊ້ຂອງພຣະຜູ້ຊ່ວຍໃຫ້ລອດເຮັດໃຫ້ການກັບໃຈນັ້ນເປັນໄປໄດ້. ເພາະພຣະເຢຊູຄຣິດ, ເຈົ້າຈຶ່ງສາມາດສະອາດ ແລະ ພົບຄວາມສຸກໄດ້. ພຣະອົງສາມາດຊູກຳລັງເຈົ້າໃຫ້ “ເຮັດ ດີຂຶ້ນກວ່າເກົ່າ ແລະ ເປັນຄົນ ດີຂຶ້ນກວ່າເກົ່າ”2 ໃນແຕ່ລະມື້.
3 ພຣະຄຣິດຊູກຳລັງເຈົ້າໃຫ້ ເອົາຊະນະ
ໃນຂະນະທີ່ຢູ່ໃນຄຸກ, ໂປໂລໄດ້ຂຽນວ່າ: “ເພາະເຮົາຈະມີຖານະຢ່າງໃດກໍຕາມ ເຮົາກໍຮຽນຮູ້ແລ້ວທີ່ຈະພໍໃຈຢູ່ຢ່າງນັ້ນ.
“ເຮົາຮູ້ຈັກທີ່ຈະປະສົບກັບການຕົກຕ່ຳ, ແລະ ຮູ້ຈັກທີ່ຈະປະສົບກັບຄວາມອຸດົມສົມບູນ: ບໍ່ວ່າໃນກໍລະນີໃດໆ ເຮົາໄດ້ຮຽນຮູ້ເຖິງແງ່ຄວາມລັບ” (ຟີລິບປອຍ 4:11–12).
ໃນອີກຄຳໜຶ່ງ, ໂປໂລໄດ້ຮຽນຮູ້ວ່າ, ຜ່ານທາງພຣະຄຣິດ, ເພິ່ນສາມາດເອົາຊະນະ ແລະ ຮຽນຮູ້ຈາກການທົດລອງ ແລະ ສິ່ງທ້າທາຍຂອງເພິ່ນ. ພຣະເຢຊູຄຣິດສາມາດຊູກຳລັງເຈົ້າໃຫ້ເຮັດໄດ້ເຊັ່ນກັນ.
ພຣະຜູ້ຊ່ວຍໃຫ້ລອດໄດ້ທົນຕໍ່ “ຄວາມເຈັບປວດ ແລະ ຄວາມທຸກ ແລະ ການລໍ້ລວງທຸກຢ່າງ.” ພຣະອົງຮັບເອົາຄວາມບົກພ່ອງຂອງເຮົາໄວ້ກັບພຣະອົງເອງ “ເພື່ອພຣະອົງຈະຮູ້ຈັກ … ວ່າຈະຊ່ວຍເຫລືອ [ຊຶ່ງມີຄວາມໝາຍວ່າຊ່ວຍ] ຜູ້ຄົນຂອງພຣະອົງຕາມຄວາມບົກພ່ອງຂອງພວກເຂົາໄດ້ແນວໃດ” (ແອວມາ 7:11–12). ບໍ່ວ່າເຈົ້າຈະປະເຊີນໜ້າກັບສິ່ງໃດກໍຕາມ, ພຣະເຢຊູຄຣິດສາມາດຊູກຳລັງເຈົ້າໃຫ້ອົດທົນ ແລະ ປະສົບຄວາມສຳເລັດໃນສິ່ງທີ່ເຈົ້າບໍ່ສາມາດເຮັດໄດ້ດ້ວຍຕົວເອງ.
4 ພຣະຄຣິດຊູກຳລັງເຈົ້າໃຫ້ ກາຍເປັນ
ພຣະເຢຊູຄຣິດໄດ້ເຮັດໃຫ້ການຟື້ນຄືນຊີວິດເປັນຈິງໄດ້ສຳລັບເຮົາທຸກຄົນ, ແລະ ພຣະອົງເຮັດໃຫ້ຊີວິດນິລັນດອນເປັນໄປໄດ້ສຳລັບຜູ້ທີ່ກັບໃຈ, ຮັບເອົາພິທີການທີ່ຈຳເປັນ, ແລະ ເຮັດ ແລະ ຮັກສາພັນທະສັນຍາທີ່ກ່ຽວຂ້ອງກັບເຂົາເຈົ້າ. ປາດສະຈາກພຣະຄຣິດແລ້ວ, ເຮົາບໍ່ສາມາດບັນລຸໃນສິ່ງທີ່ພຣະບິດາເທິງສະຫວັນຕ້ອງການຫລາຍທີ່ສຸດ—ເພື່ອໃຫ້ເຮົາກາຍເປັນເໝືອນດັ່ງພຣະອົງ ແລະ ພຣະບຸດຂອງພຣະອົງ, ພຣະເຢຊູຄຣິດ, ແລະ ຢູ່ກັບພວກພຣະອົງຊົ່ວນິລັນດອນ.
ເຈົ້າສາມາດເປັນເໝືອນດັ່ງພຣະເຢຊູຄຣິດຫລາຍຂຶ້ນເມື່ອເຈົ້າຮຽນຮູ້ກ່ຽວກັບພຣະອົງ, ເພິ່ງພາ ແລະ ໄວ້ວາງໃຈໃນພຣະອົງ, ແລະ ເຮັດຕາມຕົວຢ່າງຂອງພຣະອົງ. ສິ່ງນີ້ຈະນຳພາເຈົ້າໃຫ້ດຳລົງຊີວິດດ້ວຍສັດທາ, ຄວາມຫວັງ, ຄວາມໃຈບຸນ, ຄວາມອົດທົນ, ຄວາມຖ່ອມຕົວ, ຄວາມບໍລິສຸດ ແລະ ການເຊື່ອຟັງຫລາຍຂຶ້ນ. ທັງໝົດນີ້ແມ່ນຄຸນລັກສະນະຂອງພຣະຜູ້ຊ່ວຍໃຫ້ລອດ.
ຂະນະທີ່ເຈົ້າພະຍາຍາມຕິດຕາມພຣະເຢຊູຄຣິດ, ພຣະອົງຈະເປັນຄວາມຫວັງ ແລະ ແສງສະຫວ່າງຂອງເຈົ້າ ທີ່ຈະນຳພາເຈົ້າໃຫ້ກາຍເປັນທຸກສິ່ງທີ່ພຣະອົງຮູ້ວ່າເຈົ້າສາມາດກາຍເປັນໄດ້. ແລະ, ຮ່ວມກັບໂປໂລ, ເຈົ້າຈະສາມາດເວົ້າໄດ້ວ່າ, “ຂ້ອຍສາມາດສູ້ກັບທຸກສິ່ງໄດ້ ໂດຍພຣະອົງຜູ້ຊູກຳລັງຂ້ອຍ.”
© 2023 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, January 2023. Language. 18904 331