“Kasapulan Kadi nga Agbalintayo a Naan-anay Itan?” Para iti Pigsa dagiti Agtutubo, Peb. 2023.
Binulan a Mensahe iti Para iti Pigsa dagiti Agtutubo , Pebrero 2023
Kasapulan Kadi nga Agbalintayo a Naan-anay Itan?
Manipud iti Oktubre 2017 a mensahe iti sapasap a komperensia.
Dagiti panangiladawan ni Emily E. Jones
Naisurat dagiti nasantuan a kasuratan a mangbendision ken mangparegta kadatayo, ket awan duadua nga aramidenda dayta. Ngem nadlawyo kadi a sagpaminsan nga agparang ti maysa a binatog a mangipalagip kadatayo a datayo ket adda bassit pagkurangantayo? Kas pagarigan: “Agimbagkayo ngarud nga awan pagkuranganna, a kas ken Amayo a nailangitan nga awan pagkuranganna” (Mateo 5:48). Babaen iti dayta a bilin, kayattayo ti agsubli iti pagiddaantayo ket agkalumottayo. Ti kasta a nailangitan a panggep a tun-oyen kasla adayo a maragpattayo. Ngem awan duadua a dinatayo kaano man ikkan ti Apo iti bilin nga ammona a ditayo kabaelan a tungpalen.
“Wen, umasidegkayo ken ni Cristo, ket agbalinkayo a naan-anay kenkuana.” ipakaasi ni Moroni. “Ayatenyo ti Dios iti isu amin a kabaelan, panunot ken pigsayo, ket … babaen ti paraburna agbalinkayo a naan-anay ken ni Cristo” (Moroni 10:32; nainayon ti panangyunay-unay). Ti laeng namnamatayo iti pudno a kinaan-anay ket ti panangawat iti daytoy a kas maysa a sagut manipud iti langit—ditayo mabalin nga “ulluen” daytoy.
Malaksid ken ni Jesus, awan pay dagiti awan pakapilawanna nga aramid iti daytoy naindagaan a panagdaliasat a sursurotentayo, isu a bayat ti mortalidad, ikagumaantayo ti natalged a panagdur-as ken liklikantayo dagiti nalabes a namnamaen iti bagitayo ken iti dadduma.
No agpursigitayo, kalpasanna iti sadino man iti agnanayon a maileppas ken makumpletonto ti pannakapasayaattayo—nga isu ti kaipapanan iti Baro a Tulag ti kinaan-anay.
© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, February 2023. Language. 18910 864