“Rahn Isuh en Ehukihwei,” Ohng Kakehlepen me Pwulopwul, Sulai 2023.
Sounpwong kan Ohng Kakehlepen me Pwulopwul Padahk kan, Sulai 2023
Rahn Isuh en Ehukihwei
Ke kak ehuki rongamwahuo ni wiepe mengei kei. Ke men song wia?
Ansou me kitail kin kosoia mwomwen atail ehuki atail kadehde kan, kitail kalapw medewe wia atail kadehde nan ansoun kamadipw sarawi de ekei ansoun kohpene kan. Ahpw kitail kin kangoangieng en “kilangada ansou mwahu kan pwehn koasoaia duwen atail pwoson ni mwohmw mengei kei.”1
Ni rahn-isuh me kitail en song wia me sansal pah, ke kak ehuki ahmw kadehde ni wiepe wekpeseng kei rahn koaros nan erein ehu wihk. Ke kak wia mepwukat ni keirekdi sohte lipilipil, de ke kak pein medewehda dahme ke pahn wia! Ke men song wia?
Rahn 1: Mwomwohdiso
Wia ahmw kadehde ni rahn en kaisihsol nan imwen sarawio ma ke kak. Ma soh, ke kak pil wia ahmw kadehde nan imwen sarawi sang ni ahmw pahn iang kihda ahmw ire nan class kan oh nan semineri. Ire me ke pahn kihda kak kamarainihda mehteikan oh kakehlakahda arail kadehde kan duwehte pein ahmw.
Rahn 2: Kempoakepah kan
Dahme ke esehla nan mwomwohdiso Rahn Sarawio? Ke mwahuki dahme emen padahngki nan kaudek en kamadipw sarawio de koasoakoasoaipenehn nan ahnw class o? Mwein koul en ritingadahu wia ehu me ke leliki. Indahng emen iengomw duwen koulo! Eri pil idek dahme re wia ni wihkendo.
Rahn 3: Social Media
Social Media wia ehu wasahn ehuki mehn kamarain mengei. Ohng rahn wet, kihda ehu nan social media.
-
Ehu ire me ke kin perenki nan pwuhk sarawi.
-
Ehu iren kakehlail sang nan kapokon lap.
-
Ehu kamarain sang ngehno de dahme ke lelehng.
-
Mehkot me ke perenki de kapingki me pid Sounkomouro.
-
Dahme E ketin wia me seweseiuk de Sapwellime kahlmang me ke pwungki oh kahrepe.
Rahn 4: Kasdo de Inting
Kadar ehu iren kakehlail ohng iengomw emen ni inting de kasdo. Ke kak ehuki ehu padahk en kapokon me ke medewe irail pahn pwungki, indahng irail dahme ke kapingkin irailki, de ehuki ahmw pwoson me pid duwen Sises Krais. Ni karasepe, irail mwein anahne ese duwen Sapwellimen Sahmw Nanleng limpoak ohng irail. Ansou koaros ke pil kak indahng irail ansou me ke tuhweng irail!
Rahn 5: Sahpis
Mwein ke medmedewe ia mwomwen sahpis ohng mehteikan ah kak wia kisehn ehuki ahmw kadehde. Wahnpoaron Paul masahniheng Timoty, “Ke en wia mehn kahlemengi ehu ong irail kan me pwoson, ni omw koasoi, ni omw tiahk, ni omw limpoak, ni omw pwoson oh mwakelekel.” (1 Timoty 4:12). Eri ke kak kasalehda soahng kan me ke kamehlele sang ni ahmw karasaras, sang sahpis ohng mehteikan me rasehng Sounkomouro.
Rahn 6: Mahlen
Pak tohto mie aramas kin doadoahngki mahlen ni mwohmw ehu pwehn ehukihwei arail madamadau oh pepehm kan. Ke kak doadoahngki mahlen, sansal takai kan, lepin kahs, ngilen koul, de sohte lipilipil me ke kak ehuki pwehn kasalehda ahmw pepehm ohng Sises Krais oh Sapwellime rongamwahuo.
Rahn 7: Koaskoasoaipene kan
Kedeh masak indahda dahme ke kamehlele kan, duwehte ahmw pahn kin ehuki ahmw madamadau kan ohng oaralap teikan.
Ni mehlelo, ke kak, koasoaia duwen kemwekid en Mwomwohdiso kan de ehu iren pwuhk sarawi me ke ahpwte wadek, ahpw e pil kak mengei sang mwo. Ni karasaras:
-
Ma ke alehdi kapehm sang ni kepikipik en sampah, kasalehda ahmw kaping ohng sapwellimen Koht kepikipik kan ohng emen.
-
Mwein ke ahpwte alehdi ehu kamarain sang ngehno. Kosoiahieng emen iengomw ma e konehng.
-
Rapahki ehu karasaras en rongamwahuo nan ehu pwuhk de kasdo me ke leliki, oh kasalehda ahmw pepehm kan.
Mwohmw Mengei
Ni ahmw pahn diar wiepe kei pwehn ehuki dahme ke kamehlele, e pahn wiahla mehkot mengei ohng uhk. Mwein e pahn ekis kasoangsuwed ni tapio, ahpw e mwahute! Taman, me pein ahmw kadehde mengeienguhk—e wia kisehn ihs kowe. Ehuki kak mengeila. Ihte me ke anahne wia ken kasalehda ekis ekis rahn koaros.
Ia mwomwen ahmw pahn ehuki ahmw kadehde rahn wet?
© 2003 sang Intellectual Reserve, Inc. Kolokol pwuhng koaros. Intingda nan USA. Kamanaman ohng ni lokaiahn Wai: 6/19. Kamanaman ohng kawehwe: 6/19. Kawehwehdi Sounpwong kan Ohng Kakehlepen me Pwulopwul Padahak kan, Sulai 2023. Language. 19045 885