Bulanan nga Mensahe sa Liahona, Nobyembre 2023

Magpamensar sang Selestiyal!

Ni Pangulong Russell M. Nelson

Pangulo sang Ang Simbahan ni Jesucristo sang mga Santos sa Ulihing mga Adlaw

Ang imo mga pagpili ang magadesisyon kon diin ka mangabuhi sa bilog nga wala katapusan, sang klase sang lawas kon diin ka mabanhaw, kag kon sin-o ang imo makaupod sa wala katubtuban.

Mahal kong mga kauturan, dako gid ang akon pagpasalamat nga makahambal sa inyo sini nga adlaw. Sa edad ko, ang tagsa ka bag-o nga adlaw may dala nga manami pati na sang mabudlay nga mga sorpresa. Tatlo ka semana na ang nagligad, nahalitan ang mga maskulo sa akon likod. Gani, bisan nga nakahatag na ako sing masobra 100 ka mensahe sa pangkabilogan nga mga komperensya nga nagatindog, sini nga adlaw siling ko mapungko naman ako. Ginapangamuyo ko nga dalhon sang Espiritu ang akon mensahe pasulod sa inyo mga tagipusuon sini nga adlaw.

Sang nagligad lang ginselebrar ko ang akon ika-99 nga kaadlawan kag gani nagsugod na ang akon ika-100 ka tuig nga pagpangabuhi. Pirme ako ginapamangkot sang sekreto sang malawig ko nga kabuhi. Dapat ang mas maayo ipamangkot “Ano ang natun-an ko sa halos isa ka siglo nga pagpangabuhi?”

Ang oras ko wala nagatugot nga masabat ko ina nga pamangkot sing maayo, pero isaysay ko ang pinakaimportante nga mga leksyon nga akon natun-an.

Natun-an ko nga ang plano sang Amay nga Langitnon para sa aton matahum, nga may pulos ang ginahimo naton sa sini nga kabuhi, kag ang Pagbayad-Sala sang Manluluwas ang nagapatigayon sang plano sang aton Amay.¹

Samtang ginaantos ang grabe nga kasakit sang akon likod, nabatyagan ko ang mas dako nga pagpasalamat kay Jesucristo kag sa indi matupungan nga regalo sang Iya Pagbayad-Sala. Hunahunaa ina! Ang Manluluwas nag-antos sang “mga kasakit kag mga kapipit-an kag mga pagsulay sang tagsa ka sahi”² para mapaumpawan Niya kita, mapaayo kita, kag masalbar sa mga panahon sang panginahanglan.³ Ginlaragway ni Jesucristo ang Iya eksperiyensya sa Getsemani kag sa Kalbaryo nga: “Sa diin ang amo nga pag-antos nagpakurog sa akon bangod sa kasakit, bisan pa nga Dios, nga pinakagamhanan sa tanan, kag nagwa ang dugo halin sa tagsa ka buho-buho sang panit.”⁴ Ang nagasakit ko nga likod nagtulod sa akon nga pamalandungan sing liwat-liwat ang “pagkawala’y tupong sang Balaan sang Israel.”⁵ Sang nagapaayo ako, ginpakita sang Ginuo ang Iya diosnon nga gahum sa malinong kag maathag nga pamaagi.

Peru

Tungod sa wala dulonan nga Pagbayad-Sala ni Jesucristo, ang plano sang aton Amay nga Langitnon isa ka perpekto nga plano! Ang pag-intiendi sang matahum nga plano sang Dios nagadula sang misteryo sang kabuhi kag sang kawala kasiguraduhan sa aton palaabuton. Ginatugotan sini ang tagsa sa aton nga magpili kon paano kita mangabuhi diri sa duta kag kon diin kita magapuyo sa katubtuban. Ang wala basehan nga ideya nga dapat kita “magkaon, mag-inom, kag magkasadya, kay buas mamatay kita; kag mangin maayo ini para sa aton”⁶ isa sa pinakadako nga kabutigan sa uniberso.

Ari ang dako nga balita sang plano sang Dios: ang mga butang nga magahimo sang inyo mortal nga kabuhi nga pinakamanami amo mismo ang mga butang nga magahimo sang inyo kabuhi sa wala katapusan nga pinakamanami nga pwede ini mangin! Sini nga adlaw, para buligan kamo nga mangin kwalipikado sa kadamo nga mga bugay nga ginatigana sang Amay nga Langitnon para sa inyo, ginaimbitar ko kamo nga sundon ang paggawi sang “pagpamensar sang selestiyal”!⁷ Ang pagpamensar sang selestiyal nagakahulugan sang pagka-espirituhanon sing kaisipan. Natun-an naton halin sa propetang si Jacob sa Libro ni Mormon nga “ang mangin espirituhanon sing kaisipan amo ang wala’y katapusan nga kabuhi.”⁸

Estados Unidos

Ang kabuhi sa duta espesyal nga kurso sa pagtuon sa pagpili sang mga butang nga may pinakadako nga epekto sa wala katapusan. Kadamo kaayo sang mga tawo nga nagapangabuhi nga daw ining kabuhi gid lang ang tanan-tanan. Ugaling, ang inyo mga pagpili subong ang magadesisyon sang tatlo ka butang: kon diin ka mangabuhi sa bilog nga wala katapusan, ang klase sang lawas kon diin ka mabanhaw, kag kon sin-o ang imo makaupod sa wala katubtuban. Gani magpamensar sang selestiyal.

Sa una ko nga mensahe bilang Pangulo sang Simbahan, ginpaisog ko kamo nga magsugod nga ginapanumdom ang katuyuan. Buot silingon himuon ninyo ang selestiyal nga ginharian nga inyo lalab-uton para sa wala katapusan kag dayon pamensaron sang maayo kon diin ang tagsa ninyo ka desisyon diri sa duta magadala sa inyo sa pihak nga kinabuhi.⁹

Maathag nga gintudlo sang Ginuo nga ang mga lalaki kag babayi lamang nga naselyohan bilang bana kag asawa sa templo, nga nagatuman sang ila mga kasugtanan, ang magaupod sa katubtuban. Siling Niya, “Tanan nga kasugtanan, kontrata, pasalig, obligasyon, panumpa, panaad, paghikot, kaangtanan, pag-inupdanay ukon pagpaabot, nga wala ginhimo kag ginhisugtan kag ginselyohan paagi sa Balaan nga Espiritu nga ginpromisa … magauntat kon ang tawo patay na.”¹⁰

Gani, kon pawala naton nga ginapili nga magpangabuhi sang telestiyal nga mga layi subong, ginapili naton nga mabanhaw sa telestiyal nga lawas. Ginapili naton nga indi magpangabuhi upod sa aton mga pamilya sa katubtuban.

Gani, pinalangga kong kauturan, paano kag diin kag upod kay sin-o ang gusto ninyo nga kabuhi sa wala katubtuban? Kamo ang magpili.¹¹

Kon magpili kamo, ginahagad ko kamo nga tulukon ang kabilogan—ang wala katapusan nga panan-awan. Unaha si Jesucristo, tungod ang inyo kabuhi nga wala katapusan nagadepende sa inyo pagtuo sa Iya kag sa Iya Pagbayad-Sala.¹² Nagadepende man ini sa inyo pagtuman sang Iya mga layi. Ang pagtuman nagabukas sang dalan sang malipayon nga kabuhi ninyo sa karon kag sang matahum kag wala katapusan nga padya sa palaabuton.

Kon nagapangatubang kamo sang palaligban, magpamensar sang selestiyal! Kon ginatilawan sang tentasyon, magpamensar sang selestiyal! Kon dismayado kamo sa kabuhi ukon sang mga mahal sa kabuhi, magpamensar sang selestiyal! Kon may mapatay sing temprano, magpamensar sang selestiyal. Kon may nagaantos sang malubha nga balatian, magpamensar sang selestiyal. Kon ang mga kabudlayan sang kabuhi nagatumpok sa inyo, magpamensar sang selestiyal! Samtang nagapaayo kamo tungod sa aksidente ukon kasamaran, pareho ko subong, magpamensar sang selestiyal!

Samtang nagatutok kamo sa pagpamensar sang selestiyal, paabuta nga may oposisyon gid.¹³ Pila ka dekada ang nagligad, may kaupod ako sa propesyon nga nagpakalain sa akon tungod “puro templo” ako, kag masobra sa isa ka supervisor ang nagpina sa akon tungod sa akon pagtuo. Ugaling, kumbinsido ako, nga ang pagpamensar sang selestiyal nagpauswag gid sang akon karera.

Samtang nagapamensar ka selestiyal, amat-amat nga magabag-o ang imo tagipusuion. Mas gusto mo magpangamuyo pirme kag sing mas sinsero. Palihog indi ninyo paghimoa ang inyo mga pangamuyo nga daw listahan sang balaklon. Ang perspektibo sang Ginuo labaw pa sangsa inyo mortal nga kaalam. Mahimo nga masorpresa kamo sa Iya sabat sa inyo mga pangamuyo kag makabulig sa inyo nga magpamensar sang selestiyal.

Pamensara ang sabat sang Ginuo kay Joseph Smith sang nag-ampo sia sang kaumpawan sa Liberty Jail. Gintudloan sang Ginuo ang Propeta nga ang indi tawhanon nga pagtrato sa iya magahatag sa iya sang eksperiyensya kag mangin para sa iya kaayuhan.¹⁴ “Kon mabatas mo ini sing maayo,” ginpromisa sang Ginuo, “pagapakataason ka sang Dios sa langit.”¹⁵ Ginatudloan sang Ginuo si Joseph Smith nga magpamensar sang selestiyal kag hunahunaon ang wala katapusan nga padya imbes nga magtutok sa masakit nga mga kabudlayan sina nga adlaw. Ang aton mga pangamuyo pwede mangin—kag dapat mangin—buhi nga mga diskusyon upod sa aton Amay nga Langitnon.

Kon nagapamensar kamo sang selestiyal, mamutikan mo nga ginalikawan ninyo ang bisan ano nga nagakakas sang inyo kahilwayan sa pagpili. Ang bisan ano nga adiksyon—sa hampang, sugal, pagpangutang, droga, makahulubog nga ilimnon, kaakig, pornograpiya, sex, ukon bisan sa pagkaon—nagasaklaw sang Dios. Ngaa? Tungod ang inyo obsesyon ang inyo mangin dios. Amo ini ang inyo ginadangpan imbes nga Sia para sa kaumpawan. Kon may ara kamo sang adiksyon, magpangayo sang espirituhanon kag propesyunal nga bulig. Indi pagtugoti ang obsesyon nga kuhaon ang inyo kahilwayan sa pagsunod sang matahum nga plano sang Dios.

Ang pagpamensar sang selestiyal makabulig man sa inyo nga tumanon ang layi sang kaputli. Diutay lang gid nga butang ang magakomplikar sang inyo kabuhi sing mas madasig sangsa pagsupak sining diosnon nga layi. Sa mga naghimo sang kasugtanan upod sa Dios, ang pagkaimoral isa sa pinakamadasig nga paagi para madula ang inyo testimonya.

Madamo sa wala-untat nga mga tentasyon sang kaaway nagasakop sang pagsupak sang moral nga katinlo. Ang gahum sa pagtuga sang kabuhi amo ang solo nga pribelihiyo sang pagkadios nga gintugot sang Amay nga Langitnon nga gamiton sang Iya mortal nga mga anak. Gani, nagbutang ang Dios sang klaro nga mga pagsulundan sa paggamit sining buhi kag diosnon nga gahum. Ang pisikal nga intimasiya para lang sa lalaki kag babayi nga ginkasal sa isa kag isa.

Kalabanan sang ara sa kalibutan wala nagapati sini, pero ang opinyon sang publiko indi ang hukom sang kamatuoran. Gindeklarar sang Ginuo nga wala sang indi putli nga tawo nga makabaton sang selestiyal nga ginharian. Gani kon magdesisyon kamo parte sa moralidad, palihog magpamensar sang selestiyal. Kag kon wala kamo nangin putli, ginapangabay ko sa inyo nga maghinulsol. Magpalapit kay Cristo kag magbaton sang Iya promisa sang lubos nga kapatawaran kon maghinulsol kamo sang inyo mga sala.¹⁶

Denmark

Kon nagapamensar kamo sang selestiyal, makita ninyo ang inyo mga pagtilaw kag oposisyon sa bag-o nga panan-awan. Kon ang inyo mahal sa kabuhi nagakontra sa kamatuoran, magpamensar sang selestiyal, kag indi pagdudahi ang inyo testimonya. Si Apostoles Pablo nagpropesiya nga “sa ulihi nga mga tion ang iban magatalikod sa pagtuo nga nagatalupangod sa nagapatalang nga mga espiritu kag sa mga pagtulon-an sang mga yawa.”¹⁷

Kag wala sing katapusan ang mga pagpatalang sang kaaway. Palihog maghanda. Indi magbaton sang laygay halin sa mga wala nagapati. Magpangayo sang giya sa mga tawo nga masaligan ninyo—sa mga propeta, manugpanan-aw, kag mga manugpahayag sang rebelasyon kag sa mga paghutik sang Balaan nga Espiritu, nga “[magapakita] sa inyo sang tanan nga mga butang nga inyo dapat himuon.”¹⁸ Palihog himoa ang espirituhanon nga mga buluhaton para magdako ang inyo ikasarang sa pagbaton sang personal nga rebelasyon.¹⁹

Kon magpamensar kamo sang selestiyal, magadako ang inyo pagtuo. Sang hubin pa ako nga intern, ang akon kita $15 kada bulan. Isa ka gab-i, ang asawa ko nga si Dantzel namangkot kon nagabayad ako sang ikapulo sa gamay ko nga sweldo. Wala ko ina ginahimo. Naghinulsol ako insigida kag nagsugod sa pagbayad sang dugang nga $1.50 sang bulanan nga ikapulo.

May nagbag-o bala sa Simbahan tungod gindakoan namon ang amon ikapulo? Siyempre wala. Pero, ang pagka-full-tithe payer nagbag-o sa akon. Didto ko natun-an nga ang pagbayad sang ikapulo parte sa pagtuo, indi parte sa kuwarta. Sang nangin full-tithe payer ako, nagsugod nga magbukas ang mga bintana sang langit para sa akon. Ginaangot ko ang pila ka nagsunod nga mga oportunidad sa propesyon sa amon matutom nga pagbayad sang ikapulo.²⁰

Ang pagbayad sang ikapulo nagakinahanglan sang pagtuo, kag nagapatubo man ini sang pagtuo sa Dios kag sa Iya Pinalangga nga Anak.

Ang pagpili nga magpangabuhi sang dungganon nga kabuhi sa tunga sang sekswal kag politikal nga kalibutan nagapatubo sang pagtuo.

Ang paghatag sang mas dako nga tiyempo sa templo nagapatubo sang pagtuo. Kag ang inyo pagserbisyo kag pagsimba sa templo makabulig sa inyo nga magpamensar sang selestiyal. Ang templo isa ka lugar sang rebelasyon. Didto makita ninyo kon paano magprogreso padulong sa selestiyal nga kabuhi. Didto mas magalapit kamo sa Manluluwas kag ginahatagan sang mas dako nga kahigayunan sa paglab-ot sang Iya gahum. Didto magiyahan kamo sa pagsolbar sang mga problema sa inyo kabuhi, bisan pa ang inyo pinakamabudlay nga mga problema.

Ang mga ordinansa kag mga kasugtanan sa templo wala katapusan ang importansya. Padayon kita nga magapatindog sang dugang nga mga templo para himuon ining sagrado nga mga posibilidad nga realidad sa tagsa ninyo ka kabuhi. Nagapasalamat kita nga ianunsyo ang amon mga plano nga magpatindog sang templo sa tagsa sining 20 ka lokasyon:

• Savai’i, Samoa

• Cancún, Mexico

• Piura, Peru

• Huancayo, Peru

• Viña del Mar, Chile

• Goiânia, Brazil

• João Pessoa, Brazil

• Calabar, Nigeria

• Cape Coast, Ghana

• Luanda, Angola

• Mbuji-Mayi, Democratic Republic of the Congo

• Laoag, Philippines

• Osaka, Japan

• Kahului, Maui, Hawaii

• Fairbanks, Alaska

• Vancouver, Washington

• Colorado Springs, Colorado

• Tulsa, Oklahoma

• Roanoke, Virginia

• Ulaanbaatar, Mongolia

Ginasugo kita sang Ginuo nga magpatindog sining mga templo para buligan kita nga magpamensar sang selestiyal. Buhi ang Dios. Si Jesus amo ang Cristo! Ang Iya Simbahan ginpanumbalik para bugayan ang tanan nga anak sang Dios. Ginasaksi ko ini sa sagrado nga ngalan ni Jesucristo, amen.

© 2023 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, November 2023. Language. 19050 861

Mga Tanda

1. Tan-awa sa Juan 6:38.

2. Alma 7:11.

3. Tan-awa sa Alma 7:12.

4. Doktrina kag mga Kasugtanan 19:18.

5. 2 Nefi 9:40.

6. 2 Nefi 28:7.

7. Matuod nga mas mahapos maghinulsol kag magprogreso sa espirituhanon diri, samtang ang aton espiritu nagaupod pa sa aton lawas, sangsa sa dason nga kinabuhi sa tiyempo sa tunga-tunga sang pagkapatay naton kag pagkabanhaw. Sa gintudlo ni Amulek sa mga Zoramnon nga nagtalikod sa kamatuoran, “Ining kabuhi amo ang tion … para maghanda sa pag-atubang sa Dios” (tan-awa sa Alma 34:32–35).

8. 2 Nefi 9:39.

9. Tan-awa sa Mosias 4:30, kon diin ginalaygayan ni Haring Benjamin ang iya katawhan, “Kon indi ninyo pagbantayan ang inyo mga kaugalingon, kag ang inyo mga panghunahuna, kag ang inyo mga pulong, kag ang inyo mga buhat, kag magtuman sang mga kasuguan sang Dios, kag magpadayon sa pagtuo … , pat-od gid nga kamo mawala.”

10. Doktrina kag mga Kasugtanan 132:7; emphasis gindugang.

11. Siyempre, ang inyo kahilwayan sa pagpili indi magpangibabaw sa kahilwayan sang iban sa pagpili kag sang kaupod sini nga mga konsikwensya. Desperado ako nga maselyohan sa akon mga ginikanan. Pero, kinahanglan ko maghulat hasta nga ginpili nila nga magpa-endow, sang sobra na 80 anyos ang ila edad. Dayon ginselyohan sila bilang bana kag asawa, kag ginselyohan kami nga kabataan sa ila.

12. Sulit-sulit nga nagapamatuod ang balaan nga mga kasulatan nga ang regalo sang wala katapusan nga kabuhi posible lamang paagi sa merito, kaluoy, kag grasya sang Manluluwas nga si Jesucristo (tan-awa halimbawa, sa Moroni 7:41; tan-awa man sa 2 Nefi 2:6–8, 27).

13. Tan-awa sa 2 Nefi 2:11.

14. Tan-awa sa Doktrina kag mga Kasugtanan 122:7.

15. Doktrina kag mga Kasugtanan 121:8.

16. Tan-awa sa Isaias 1:16–18; Doktrina kag mga Kasugtanan 58:42–43.

17. 1 Timoteo 4:1. Ginpadayon sa madason nga bersikulo, “Ini nga mga pagtulon-an ginapalapnag paagi sa pagdaya sang mga tawo nga butigon kag ang ila mga konsensya patay, nga daw sa nasunog sang nagabaga nga salsalon” (bersikulo 2). Naghambal man si Pablo nga ang tanan nga “magkabuhi sing diosnon sa paghiusa kay Cristo Jesus pagahingabuton” (2 Timoteo 3:12).

18. 2 Nefi 32:5; emphasis gindugang. Kon pangayuon naton, “makabaton [kita] sang rebelasyon dugang sa rebelasyon, ihibalo dugang sa ihibalo” (Doktrina kag mga Kasugtanan 42:61).

19. Tan-awa sa Russell M. Nelson, “Revelation for the Church, Revelation for Our Lives,” Liahona, Mayo 2018, 96.

20. Wala ini nagakahulugan sang sitwasyon nga ang isa ka aksyon direkta nga nagapat-od sang resulta (cause-and-effect relationship). May mga wala nagabayad sang ikapulo nga nagaangkon sang mga oportunidad sa propesyon, samtang ang iban nga nagabayad sang ikapulo wala. Ang promisa amo nga ang mga bintana sang langit paga buksan sa nagabayad sang ikapulo. Ang klase sang mga bugay lainlain.