“Nga Mwet Tuhma Lutlut se luhn Jisus Kraist,” In Ahkkweye Mwet Fuhsr, Jan. 2024.
Mahlwem Nuhkwewa In Ahkkweye Mwet Fuhsr Pweng, Jacnweri 2024
Nga sie Mwet Tuhma Lutlut luhn Jisus Kraist
Kom kuh in fahsr tukun Mwet Lahngo ac fwahkwelihk kahs Lal nuh sin kuhtuh pac.
Kuh oacna kom suk lah efuh, tukun El ahkkweyelah mwet, Jisus El fahk nuh sin kuhtuh selos in tiac sruhmuhn nuh sin kutwena (liye Mark 7:36)? Sie srihpac uh kuh pacna in ma ke kain in mwet lutlut El enenuh. Kom ac kuh in nuhnkuh muh fin mwet uh sruhmuhn ke kwelac lalos ac innek na wowo se Jisus lacn pwen muhtuhn mwet lutlut Lal. Tuhsruhktuh, Jisus el tiac enenuh mwet lutlut muhkwena. El enenuh mwet tuhma lutlut.
Jisus el fahk nuh sel Peter ac Andrew, “Fahsr tukuk” (Matthew 4:19). Luhngaslah lal Joseph Smith ke fuhs inge rit, “Nga pa El suc sihmihsyucklac sin mwet pahluh; fahsr tukuk” Joseph Smith Translation, Matthew 4:18 [ke Matthew 4:19,footnote a]). Mwe suli sac te ma in Weluhl ke kihtin pacl na. El ke elos in Mwet Tuhma Lutlut Lal ma pahtpaht.
El tiacna ke elos in liyacl ke El luti mwet, luhngse mwet, ac orek mwenmwen. El ke elos in oruh oacpacna. El ke orekma Lal in eklac ma lalos. Sulaclah Leum pa elos ac luti in kuhlwacnsap oacna ke El kuhlwacnsap ac nuhnak oacna ke El nuhnak. Elos ac ahkpahye moul lalos oacna ke El moul, ac El fah lotwelos ac sang nuh selos kahsruh ma elos enenuh in eklac yohk oacna El.
Mwet Tuhma Lutlut ke kahs Greek pa mathetes. Kalmac pa yohk liki mwet lutlut kuh tuhlihk lutlut. Kwacna lwenglah oacna aprentis. Ke pacl Lal Kraist ac, mwet lutlut elos kwacna sulaclah mwet kol ma elos luhngse lutlut se in muh tok elos eklac mwet kol pac. Kraist el tiacna ukwe kain ahkpah se. El oruh siena El furohklah ac sokwack mwet tuhma lutlut Lal. Mihsenge, Kraist El pahngon kuht in tuhkuh nuh Yohrohl. El pahngon kuht in mwet tuhma lutlut Lal ac fahkwelihk kahs Lal inmahsrlon mwet Lal tuh elos fah eis moul ma pahtpaht (liye 3 Nephi 5:13).
Sie muhtwacn fuhsr fin acn Haiti ke Caribbean ahkkahlwemye luhngse lal in sie mwet tuhma lutlut luhn Kraist ke el suli kawuck se lal suc tiac mempuhr ke Alu uh in weluhl nuhke FSY kanfracns se. Met pahpah tuhmacn kawuck se lal ah sruhnga sang lelah lacn som. Mwet kol luhn Alu uh ahkuhtweyac ke ma wolacna elac puhla ahkolah sanel ac mwet kahsruh wowo mahtuh ma ac fah liaclwacng. Pahpah sac sang lwelah nuh sin tuhlihk muhtwacn sac in som, ac tukun el liye eklac ke moul lal, el oacyacpac sang lwelah nuh sel in wi miting ke Alu ac—mahlwem ohnkohsr tohkoh—pacptaislac.
Sie mukul fuhsr fin acn Argentina ke South America ahkkahlwemye luhngse lal in sie mwet tuhma lutlut luhn Kraist ke el akacsruhi ke kuhtuh kacnte nwacl nuh sin kawuck se ke eltahlwi bus ah ah nuh ke lutlut ah. Ke el ema em kohfi, el ahkuhtweyac lah el sonna wi ema em sac ke srihpen wacngihn mwet in sucu lal ah nihm kohfi. Ma se inge pwacnwack sramsramkihn Alu uh, suc oraclah solsol in tuhkuh nuhke miting, suc sahflahiac pwacnlah kawuck se lal ah in welah Alu uh ac kuhlwacnsap ke misin fin acn Chile.
Tiac mwet nuhkwewa kom sramsram nuh se ke Alu uh kuh suli nuhke mukuikui luhn Alu uh ac luhngse welah. Ac WONA. Tiac mwet nuhkwewa Kraist el sramsram nuh se ke luti Lal facluh ah welah pac. Ingena, ke kuht sulaclah in mwet tuhma lutlut luhn Jisus Kraist ac fahkwack kahs Lal, El ac fah use nuh sesr puhlaik ac kahsruh wolacna. Kuht ac fah luti fuhkah kuht in eklac oacna El, ac pa inge ma mwet tuhma lutlut uh oruh.
© 2024 sin Intellectual Reserve, Inc.Suwohs nuhkewa fihliyucki. Printiyucki fin acn USA. Ahkkweyeyucklac nuh ke English: 6/19. Ahkkweyeyucklac ke lweng: 6/19. Lwenglah luhn Mahlwem Nuhkwewa Nuh ke Kuh luhn Mwet Fuhsr Pweng, Jacnweri 2024. Language.19273 000