“I Am a Disciple of Jesus Christ,” For the Strength of Youth, Jan. 2024.
ຂ່າວສານປະຈຳເດືອນ For the Strength of Youth, ເດືອນມັງກອນ 2024
ເຮົາເປັນ ສານຸສິດ ຂອງ ພຣະເຢຊູຄຣິດ
ເຈົ້າສາມາດຕິດຕາມພຣະຜູ້ຊ່ວຍໃຫ້ລອດ ແລະ ເຜີຍແຜ່ພຣະຄຳຂອງພຣະອົງໃຫ້ແກ່ຄົນອື່ນ.
ເຈົ້າເຄີຍສົງໄສບໍ່ວ່າ ເປັນຫຍັງ, ຫລັງຈາກທີ່ປິ່ນປົວຜູ້ຄົນແລ້ວ, ພຣະເຢຊູຈຶ່ງໄດ້ບອກພວກເຂົາບໍ່ໃຫ້ບອກໃຜ (ເບິ່ງ ມາຣະໂກ 7:36)? ເຫດຜົນໜຶ່ງອາດກ່ຽວຂ້ອງກັບປະເພດຂອງຜູ້ຕິດຕາມທີ່ພຣະອົງຕ້ອງການ. ເຈົ້າອາດຄິດວ່າ ຖ້າຄົນທັງຫລາຍເວົ້າກ່ຽວກັບການປິ່ນປົວຂອງພວກເຂົາແລ້ວ ມັນຈະເປັນວິທີທີ່ດີສຳລັບພຣະເຢຊູທີ່ຈະດຶງດູດຜູ້ຕິດຕາມ. ເຖິງຢ່າງໃດກໍຕາມ, ພຣະເຢຊູບໍ່ໄດ້ຕ້ອງການພຽງແຕ່ຜູ້ຕິດຕາມເທົ່ານັ້ນ. ພຣະອົງຕ້ອງການ ສານຸສິດ.
ພຣະເຢຊູໄດ້ກ່າວແກ່ເປໂຕ ແລະ ອັນເດອາວ່າ, “ຈົ່ງຕາມເຮົາມາ” (ມັດທາຍ 4:19). ການແປຂອງໂຈເຊັບ ສະມິດ ຂອງຂໍ້ພຣະຄຳພີນັ້ນອ່ານວ່າ, “ເຮົາຄືຜູ້ທີ່ສາດສະດາໄດ້ຂຽນເຖິງ; ຈົ່ງຕາມເຮົາມາ” (ການແປຂອງໂຈເຊັບ ສະມິດ, ມັດທາຍ 4:18 [ໃນ ມັດທາຍ 4:19, ໝາຍເຫດຢູ່ທາງລຸ່ມໜ້າປຶ້ມ ກ]). ການເຊື້ອເຊີນບໍ່ແມ່ນໃຫ້ໃຊ້ເວລາຢູ່ກັບພຣະອົງພຽງແຕ່ຊົ່ວໄລຍະໜຶ່ງ. ພຣະອົງຕ້ອງການໃຫ້ພວກເພິ່ນເປັນສານຸສິດຂອງພຣະອົງຕະຫລອດໄປ.
ພຣະອົງບໍ່ໄດ້ພຽງແຕ່ຕ້ອງການໃຫ້ພວກເພິ່ນເບິ່ງພຣະອົງສິດສອນຜູ້ຄົນ, ຮັກຜູ້ຄົນ, ແລະ ເຮັດການອັດສະຈັນເທົ່ານັ້ນ. ພຣະອົງຕ້ອງການໃຫ້ພວກເພິ່ນເຮັດເຊັ່ນດຽວກັນ. ພຣະອົງຕ້ອງການໃຫ້ວຽກງານຂອງພຣະອົງກາຍເປັນວຽກງານຂອງພວກເພິ່ນ. ການເລືອກພຣະຄຣິດ ໝາຍຄວາມວ່າ ພວກເພິ່ນຈະຮຽນຮູ້ທີ່ຈະຮັບໃຊ້ເຊັ່ນດຽວກັບທີ່ພຣະອົງໄດ້ຮັບໃຊ້ ແລະ ຄິດເຊັ່ນດຽວກັບທີ່ພຣະອົງໄດ້ຄິດ. ພວກເພິ່ນຈະດຳເນີນການດຳລົງຊີວິດດັ່ງທີ່ພຣະອົງໄດ້ດຳລົງ, ແລະ ພຣະອົງຈະສິດສອນພວກເພິ່ນພິເສດ ແລະ ໃຫ້ຄວາມຊ່ວຍເຫລືອທີ່ຈຳເປັນແກ່ພວກເພິ່ນ ເພື່ອທີ່ຈະກາຍເປັນເໝືອນດັ່ງພຣະອົງຫລາຍຂຶ້ນ.
ຄຳພາສາກຣີກສຳລັບສານຸສິດແມ່ນ mathetes. ມັນມີຄວາມໝາຍຫລາຍກວ່າຜູ້ຕິດຕາມ ຫລື ນັກຮຽນ. ມັນມັກຈະຖືກແປວ່າ ນັກຮຽນຝຶກຫັດ. ໃນສະໄໝຂອງພຣະຄຣິດ, ໂດຍທົ່ວໄປແລ້ວ, ສານຸສິດຈະເລືອກອາຈານຈາກຜູ້ທີ່ພວກເຂົາຕ້ອງການຢາກຮຽນຮູ້ນຳ ໂດຍມຸ້ງຫວັງທີ່ຈະກາຍເປັນອາຈານເອງ. ພຣະຄຣິດບໍ່ໄດ້ເຮັດຕາມແນວທາງປະຕິບັດທົ່ວໄປ. ພຣະອົງປີ້ນມັນ ແລະ ໄດ້ຊອກຫາສານຸສິດຂອງພຣະອົງແທນ. ສະໄໝນີ້, ພຣະຄຣິດເອີ້ນຫາເຮົາໃຫ້ເຂົ້າມາຫາພຣະອົງ. ພຣະອົງເອີ້ນເຮົາເພື່ອເປັນສານຸສິດຂອງພຣະອົງ ແລະ ປະກາດພຣະຄຳຂອງພຣະອົງທ່າມກາງຜູ້ຄົນຂອງພຣະອົງ ເພື່ອວ່າພວກເຂົາຈະມີຊີວິດອັນເປັນນິດ (ເບິ່ງ 3 ນີໄຟ 5:13).
ຍິງໜຸ່ມຄົນໜຶ່ງຈາກປະເທດໄຮຕີໃນຄາຣິບຽນ ໄດ້ສະແດງຄວາມປາດຖະໜາຂອງນາງທີ່ຈະເປັນສານຸສິດຂອງພຣະຄຣິດ ໂດຍການເຊື້ອເຊີນໝູ່ຂອງນາງຜູ້ທີ່ບໍ່ເປັັນສະມາຊິກຂອງສາດສະໜາຈັກ ໃຫ້ມາກອງປະຊຸມ ສຳລັບຄວາມເຂັ້ມແຂງຂອງຊາວໜຸ່ມ ກັບນາງ. ຕອນທຳອິດ ພໍ່ຂອງໝູ່ນາງບໍ່ຢາກອະນຸຍາດໃຫ້ລູກສາວຂອງລາວໄປ. ບັນດາຜູ້ນຳສາດສະໜາຈັກໄດ້ອະທິບາຍກ່ຽວກັບປະສົບການທາງບວກທີ່ກຳລັງລໍຖ້ານາງຢູ່ ແລະ ບັນດາທີ່ປຶກສາຜູ້ໃຫຍ່ໜຸ່ມທີ່ດີເລີດ ຜູ້ທີ່ຈະຄອຍເບິ່ງແຍງນາງ. ຜູ້ເປັນພໍ່ໄດ້ອະນຸຍາດໃຫ້ລູກສາວຂອງລາວເຂົ້າຮ່ວມ, ແລະ ຫລັງຈາກທີ່ເຫັນຄວາມແຕກຕ່າງທີ່ເກີດຂຶ້ນໃນຊີວິດຂອງນາງ, ລາວກໍອະນຸຍາດໃຫ້ນາງເຂົ້າຮ່ວມການປະຊຸມຕ່າງໆຂອງສາດສະໜາຈັກ ແລະ—ຫົກເດືອນຕໍ່ມາ—ກໍໄດ້ຮັບບັບຕິສະມາ.
ຊາຍໜຸ່ມຄົນໜຶ່ງຈາກປະເທດອາກຊັງຕິນໃນອາເມຣິກາໃຕ້ ໄດ້ສະແດງຄວາມປາດຖະໜາຂອງລາວທີ່ຈະເປັນສານຸສິດຂອງພຣະຄຣິດ ໂດຍການແບ່ງປັນເຂົ້າໜົມອົມກັບໝູ່ຄົນໜຶ່ງ ຂະນະທີ່ພວກເຂົາຂີ່ລົດເມໄປໂຮງຮຽນ. ເມື່ອລາວມາຮອດກ້ອນລົດກາເຟ, ລາວໄດ້ອະທິບາຍວ່າ ລາວບໍ່ເຄີຍພັດທະນາລົດສະນິຍົມຕໍ່ລົດຊາດນັ້ນເລີຍ ເພາະວ່າບໍ່ມີໃຜໃນຄອບຄົວຂອງລາວກິນກາເຟ. ນັ້ນໄດ້ນຳໄປສູ່ການສົນທະນາກ່ຽວກັບສາດສະໜາຈັກ, ຊຶ່ງໄດ້ນຳໄປສູ່ການເຊື້ອເຊີນໃຫ້ມາຮ່ວມການປະຊຸມຕ່າງໆ, ຊຶ່ງທ້າຍທີ່ສຸດ ໄດ້ເຮັດໃຫ້ໝູ່ລາວເຂົ້າຮ່ວມສາດສະໜາຈັກ ແລະ ຮັບໃຊ້ເຜີຍແຜ່ໃນປະເທດຈີເລ.
ບໍ່ແມ່ນທຸກຄົນທີ່ເຈົ້າເວົ້ານຳກ່ຽວກັບສາດສະໜາຈັກ ຫລື ເຊື້ອເຊີນໃຫ້ໄປກິດຈະກຳຂອງສາດສະໜາຈັກ ຈະຢາກເຂົ້າຮ່ວມ. ບໍ່ເປັນຫຍັງ. ບໍ່ແມ່ນທຸກຄົນທີ່ພຣະຄຣິດໄດ້ເວົ້ານຳລະຫວ່າງການປະຕິບັດສາດສະໜາກິດຂອງພຣະອົງຢູ່ໃນໂລກໄດ້ເຂົ້າຮ່ວມເຊັ່ນກັນ. ເຖິງຢ່າງນັ້ນກໍດີ, ເມື່ອເຮົາເລືອກທີ່ຈະເປັນສານຸສິດຂອງພຣະເຢຊູຄຣິດ ແລະ ປະກາດພຣະຄຳຂອງພຣະອົງ, ພຣະອົງຈະປະທານຄວາມກ້າຫານ ແລະ ຄວາມຊ່ວຍເຫລືອຈາກສະຫວັນໃຫ້ແກ່ເຮົາ. ເຮົາຈະຮຽນຮູ້ວິທີທີ່ຈະກາຍເປັນເໝືອນດັ່ງພຣະອົງຫລາຍຍິ່ງຂຶ້ນ, ແລະ ນັ້ນຄືສິ່ງທີ່ສານຸສິດເຮັດ.
© 2024 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, January 2024. Language. 19273 331