?Mi Mi Stap Laef ‘folem Fasin blong stap Hapi’?,” Blong Ol Yut Oli Kam Strong, Febwari 2024.

Mesej blong Blong Ol Yut Oli Kam Strong blong Evri Manis, Febwari 2024

?Mi Mi Stap Laef Folem “Fasin blong Stap Hapi”?

I kam long Eric D. Snider

Ol Magasin blong Jos

Hemia sam aedia blong yu blong laef folem ol wei we Nifae i bin talem se ol pipol blong hem oli bin laef folem.

Sot taem afta we oli bin seraot long ol man blong Leman, Nifae i talem se ol pipol blong hem oli bin “laef folem fasin blong stap hapi” (Seken Nifae 5:27). Tingbaot se i gat wan narafala grup blong ol pipol we oli wantem blong kilim olgeta (luk long Seken Nifae 5:1–6, 14), maet hemia bae i mekem yu sapraes. ?Olsem wanem nao eni man i save stap hapi long ol kaen situesen olsem?

Fas wan, tekem not se “mifala i bin laef folem fasin blong stap hapi” i no minim se “wanwan long evri man blong Nifae oli stap hapi 24/7.” I minim se oli bin laef long wan fasin blong stap kaen, mo mekem ol samting wetem kaen fasin, we i mekem se i lidim olgeta blong stap hapi. Antap long hemia, nomata long ol jalenj blong olgeta, hem i bin wan taem blong stap hapi.

?Wanem nao i “fasin blong stap hapi?” ?Olsem wanem yumi save mekem semmak fasin ia long laef blong yumiwan, we yumi tu i gat ol jalenj? !Letem yumi luk!

Stap Obei. “Yumi fetful blong stap obei … long ol komanmen blong Lod” (Seken Nifae 5:10).

Fas step 1 i blong laef folem gospel. Yu maet stap hapi long sin long taem naoia, be bae i no save stap blong longfala taem. Blong gohed long fasin blong no stap obei long God i no “ fasin blong stap hapi” (luk Alma 41:10).
Luklukgud long ol skripja “Mo mi, Nifae, mi bin … karem tu ol histri we oli bin raetemdaon long ol buk we oli bin mekem wetem bras” (Seken Nifae 5:12). “Mifala … i bin stadi gud histri ia mo faenemaot se hemia ol samting we mifala i wantem tumas; yes, we i gat bigfala yus long mifala” (Seken Nifae 5:21) .

Ol pipol blong Nifae oli gat ol skripja. Mo oli no bin gat ol skripja ia nomo—oli bin stadi long ol olgeta.
Lisin long ol lida we oli givim insperesen. “Mi, Nifae, mi bin konsekretem Jekob mo Josef, blong oli kam ol pris mo ol tija ova long graon blong pipol blong mi”. (Seken Nifae 5:26).

Ol tija ia oli yusum ol skripja olsem ol gaed blong olgeta (luk long 2 Nifae 4:15; 6:4).
Go long tempol (mo ol nara ples we oli tabu). “Mi, Nifae, mi bin bildim wan tempol” (Seken Nifae 5:16).

Hem i impoten blong gat ol ples we oli tabu olsem ol miting haos mo ol tempol blong ol disaepol oli kam tugeta mo wosip. (Yumi save se ol man blong Nifae oli no bin gat wan tempol nomo—be oli bin yusum tempol ia.) Sapos yu no save go long wan tempol, oltaem yu save mekem famli histri wok.
Save blong mekem ol samting. “Mi bin tijim ol pipol blong mi blong bildim ol haos, mo blong wok. … [Mi] bin mekem se ol pipol blong mi oli save mekem wok, mo blong oli save wok wetem ol han blong olgeta” (Seken Nifae 5:15, 17).

Pat blong stap “laef folem fasin blong stap hapi” i blong gat wan samting blong mekem! Wan asaenmen, wan wok, wan responsabiliti—wan samting we i givim wok mo stamba tingting long yu (yes, wetem stret taem blong spel). Hem i had blong stap hapi sapos yu stap les nomo evri taem.

?Bae yu save talem se yu stap laef naoia folem fasin blong stap hapi? Sapos no, maet eksampol blong Nifae i save givim yu sam aedia long olsem wanem blong kam moa gud.

© 2024 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Blong Ol Yut Oli Kam Strong blong Evri Manis,, Febwari 2024. Language. 17463 852