Zaj Lus hauv phau Ntxiv Dag Zog rau cov Tub Hluas Ntxhais Hluas Txhua Hli, Ob Hlis Ntuj 2024

2 Nifais 5

Kuv Puas Ua Neej “Nyob Zoo Siab”?

Los ntawm Eric D. Snider

Lub Koom Txoos tej Phau Ntawv Xov Xwm

Nov yog tej lub tswv yim rau koj kom paub ua neej raws li Nifais hais tias nws cov neeg nyob.

cov tub hluas ntxhais hluas

Daim duab los ntawm Alyssa Gonzalez

Tsis ntev tom qab lawv ncaim cov Neeg Lamas, Nifais hais tias nws cov neeg “ua neej nyob zoo siab” (2 Nifais 5:27). Vim muaj ib co neeg uas xav muab lawv tua (saib 2 Nifais 5:1–6, 14), ces tej zaum qhov ntawd yuav ua rau koj xav tsis thoob. Ib tug neeg yuav ua li cas kom zoo siab thaum lawv raug xwm txheej ntawd?

Qhov thib ib, cia li nco qab tias “peb tau ua neej nyob zoo siab” yeej tsis txhais tias “txhua tus Neeg Nifais zoo siab 24/7.” Qhov no txhais tias lawv tau ua neej raws li txoj kev zoo siab, thiab ua tej yam uas feem ntau ua rau tib neeg zoo siab. Feem ntau, txawm yog lawv tseem muaj tej teeb meem thiab, yog ib lub sij hawm zoo siab.

Yog li ntawd kev “ua neej nyob zoo siab” yog dab tsi? Peb yuav ua li cas kom muaj kev zoo siab hauv peb lub neej, uas kuj muaj tej teeb meem thiab? Cia peb saib!

• Cia li mloog lus. “Peb tau mob siab ua raws li tus Tswv … tej lus txib” (2 Nifais 5:10).

  Ua raws li txoj moo zoo yog Qhov 1. Tej zaum koj zoo siab rau ib ntus thaum ua txhaum, tiam sis kev zoo siab ntawd yuav kav tsis ntev. Qhov uas yus txhob txwm tsis mloog Vajtswv lus yeej tsis yog kev “ua neej nyob zoo siab” (saib Amas 41:10).

• Cia li tshawb xyuas cov vaj lug kub “Kuv, Nifais, tau nqa cov ceev xwm txheej uas tau muab sau rau saum cov phiaj toog” (2 Nifais 5:12). “Peb twb … muab tshawb xyuas thiab pom tias cov ceev xwm txheej no yeej zoo; muaj tseeb tiag, twb muaj nuj nqis heev rau peb” (1 Nifais 5:21).

  Nifais cov neeg muaj cov vaj lug kub. Thiab lawv tsis muaj xwb—lawv twb tshawb xyuas cov vaj lug kub.

• Cia li mloog cov thawj coj uas txais kev tshoov siab. “Kuv, Nifais, tau muab Yakhauj thiab Yauxej nkawd fij tseg, kom nkawd los ua pov thawj thiab xib hwb [rau] kuv cov neeg” (2 Nifais 5:26).

  Cov xib hwb no twb siv cov vaj lug kub kom pab coj lawv kev (saib 2 Nifais 4:15; 6:4).

• Cia li mus rau lub tuam tsev (thiab lwm qhov chaw dawb huv). “Kuv, Nifais, tau tsa ib lub tuam tsev” (2 Nifais 5:16).

  Yeej yog ib qho tseem ceeb rau peb muaj tej qhov chaw dawb huv xws li tej tsev sib ntsib thiab cov tuam tsev rau cov thwj tim sib sau ua ke thiab teev tiam Vajtswv. (Nyaj cov Neeg Nifais tsis muaj ib lub tuam tsev xwb—lawv twb siv.) Yog tias koj mus tsis taus rau lub tuam tsev koj tus kheej, koj yeej nrhiav tau tsev neeg zaj keeb kwm.

• Cia li ua hauj lwm. “Kuv tau qhia kuv cov neeg ua vaj ua tsev, thiab [ua hauj lwm]. …” [Kuv] tau qhia kom kuv cov neeg ua neeg nquag, thiab siv lawv txhais tes ua hauj lwm” (2 Nifais 5:15, 17).

  Ib feem ntawm txoj kev “ua neej nyob zoo siab” yog kev muaj hauj lwm uas yuav tsum ua! Kev txib, kev ua hauj lwm, kev lav ris—ib yam uas ua rau koj tsom ntsoov thiab muaj ib lub hom phiaj (tseem yuav tsum muaj me ntsis sij hawm kom so thiab). Yeej nyuaj rau yus zoo siab yog tias txhua lub sij hawm yus tsis muaj dab tsi ua.

Koj puas xav tias koj ua neej nyob zoo siab tam sim no? Yog tsis koj tsis zoo siab, tej zaum Nifais tus yam ntxwv yuav pab koj muaj tswv yim kom paub ua zoo dua.

© 2024 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, February 2024. Language. 19276 295