“Am I Living ‘after the Manner of Happiness’?,” For the Strength of Youth, Feb. 2024.

ຂ່າວສານປະຈຳເດືອນ For the Strength of Youth, ເດືອນກຸມພາ 2024

ເຮົາກຳລັງດຳລົງຊີວິດ “ຕາມທາງແຫ່ງຄວາມສຸກ” ແລ້ວບໍ?

ໂດຍ ແອຣິກ ດີ ສະໄນເດີ

ວາລະສານຂອງສາດສະໜາຈັກ

ນີ້ແມ່ນແນວຄິດບາງຢ່າງເພື່ອໃຫ້ເຈົ້າມີຊີວິດຕາມທາງທີ່ນີໄຟໄດ້ກ່າວວ່າຜູ້ຄົນຂອງເພິ່ນໄດ້ມີ.

ບໍ່ດົນຫລັງຈາກທີ່ແຍກຕົວອອກຈາກຊາວເລມັນ, ນີໄຟໄດ້ກ່າວວ່າ ຜູ້ຄົນຂອງເພິ່ນ “ມີຊີວິດຢູ່ຕາມທາງແຫ່ງຄວາມສຸກ” (2 ນີໄຟ 5:27). ໂດຍຄຳນຶງວ່າ ມີຄົນອີກກຸ່ມໜຶ່ງທີ່ຢາກຂ້າພວກເຂົາ (ເບິ່ງ 2 ນີໄຟ 5:1–6, 14), ນັ້ນອາດເປັນສິ່ງທີ່ໜ້າປະຫລາດໃຈ. ຄົນເຮົາຈະສາມາດມີຄວາມສຸກພາຍໃຕ້ສະຖານະການເຊັ່ນນັ້ນໄດ້ຢ່າງໃດ?

ກ່ອນອື່ນໝົດ, ໃຫ້ຮູ້ໄວ້ວ່າ “ພວກເຮົາມີຊີວິດຢູ່ຕາມທາງແຫ່ງຄວາມສຸກ” ບໍ່ໄດ້ ໝາຍຄວາມວ່າ “ຊາວນີໄຟແຕ່ລະຄົນມີຄວາມສຸກຕະຫລອດ 24 ຊົ່ວໂມງ.” ມັນໝາຍຄວາມວ່າ ພວກເຂົາໄດ້ມີຊີວິດໃນວິທີ, ແລະ ໄດ້ເຮັດສິ່ງ, ທີ່ ໂດຍທົ່ວໄປແລ້ວ ນຳໄປສູ່ຄວາມສຸກ. ໂດຍລວມແລ້ວ, ເຖິງແມ່ນພວກເຂົາຈະມີຄວາມທ້າທາຍກໍຕາມ, ມັນກໍເປັນຊ່ວງເວລາທີ່ມີຄວາມສຸກ.

ສະນັ້ນ, “ທາງແຫ່ງຄວາມສຸກ” ແມ່ນຫຍັງ? ເຮົາຈະສາມາດເຮັດມັນຊໍ້າໃນຊີວິດຂອງເຮົາເອງ, ຊຶ່ງມີຄວາມທ້າທາຍເຊັ່ນກັນໄດ້ຢ່າງໃດ? ມາເບິ່ງນຳກັນ!

ຈົ່ງເຊື່ອຟັງ. “ພວກເຮົາໄດ້ຍຶດຖືທີ່ຈະຮັກສາ … ພຣະບັນຍັດຂອງພຣະຜູ້ເປັນເຈົ້າ” (2 ນີໄຟ 5:10).

ການດຳລົງຊີວິດຕາມພຣະກິດຕິຄຸນແມ່ນຂັ້້ນຕອນທີ 1. ເຈົ້າອາດມີຄວາມສຸກຊົ່ວຄາວໃນບາບ, ແຕ່ມັນຈະບໍ່ຄົງຢູ່ຕະຫລອດໄປ. ການຈົງໃຈບໍ່ເຊື່ອຟັງພຣະເຈົ້າ ບໍ່ແມ່ນ “ທາງແຫ່ງຄວາມສຸກ” (ເບິ່ງ ແອວມາ 41:10).
ຄົ້ນຄວ້າພຣະຄຳພີ. “ຂ້າພະເຈົ້ານີໄຟໄດ້ນຳແຜ່ນຈາລຶກທີ່ໄດ້ບັນທຶກໄວ້ໃນແຜ່ນຈາລຶກທອງເຫລືອງມານຳ” (2 ນີໄຟ 5:12). “ພວກເຮົາ … ຄົ້ນຄວ້າມັນ ແລະ ພົບວ່າເປັນສິ່ງເພິ່ງປາດຖະໜາ; ແທ້ຈິງແລ້ວ, ແມ່ນມີຄຸນຄ່າຫລາຍຕໍ່ພວກເຮົາ” (1 ນີໄຟ 5:21).

ຜູ້ຄົນຂອງນີໄຟມີພຣະຄຳພີ. ແລະ ພວກເຂົາບໍ່ໄດ້ພຽງແຕ່ ມີ ມັນເທົ່ານັ້ນ—ພວກເຂົາໄດ້ ຄົ້ນຄວ້າ ມັນ.
ຟັງຜູ້ນຳທີ່ໄດ້ຮັບການດົນໃຈ. “ຂ້າພະເຈົ້ານີໄຟໄດ້ແຕ່ງຕັ້ງຢາໂຄບກັບໂຢເຊັບ ເພື່ອພວກເຂົາຈະໄດ້ເປັນປະໂລຫິດ ແລະ ຜູ້ສອນ … ຜູ້ຄົນຂອງຂ້າພະເຈົ້າ” (2 ນີໄຟ 5:26).

ຜູ້ສອນເຫລົ່ານີ້ໄດ້ໃຊ້ພຣະຄຳພີເປັນຄູ່ມືຂອງພວກເຂົາ (ເບິ່ງ 2 ນີໄຟ 4:15; 6:4).
ໄປພຣະວິຫານ (ແລະ ສະຖານທີ່ສັກສິດອື່ນໆ). “ຂ້າພະເຈົ້ານີໄຟໄດ້ສ້າງພຣະວິຫານໄວ້ແຫ່ງໜຶ່ງ” (2 ນີໄຟ 5:16).

ມັນສຳຄັນທີ່ຈະມີສະຖານທີ່ສັກສິດຕ່າງໆເຊັ່ນ ອາຄານປະຊຸມ ແລະ ພຣະວິຫານ ເພື່ອໃຫ້ບັນດາສານຸສິດເຕົ້າໂຮມກັນ ແລະ ນະມັດສະການ. (ເຮົາສາມາດສັນນິຖານໄດ້ວ່າ ຊາວນີໄຟບໍ່ໄດ້ພຽງແຕ່ ມີ ພຣະວິຫານເທົ່ານັ້ນ—ພວກເຂົາໄດ້ໃຊ້ມັນແທ້ໆ.) ຖ້າເຈົ້າບໍ່ສາມາດເຂົ້າພຣະວິຫານດ້ວຍຕົນເອງໄດ້, ເຈົ້າສາມາດເຮັດວຽກງານປະຫວັດຄອບຄົວໄດ້ສະເໝີ.
ມີປະສິດທິຜົນ. “ຂ້າພະເຈົ້າໄດ້ສິດສອນຜູ້ຄົນຂອງຂ້າພະເຈົ້າໃຫ້ສ້າງເຮືອນຊານ ແລະ ໃຫ້ເຮັດວຽກ. … [ຂ້າພະເຈົ້າ] ໄດ້ໃຫ້ຜູ້ຄົນຂອງຂ້າພະເຈົ້າມີຄວາມດຸໝັ່ນ ແລະ ທຳງານດ້ວຍຝີມືຂອງພວກເຂົາ” (2 ນີໄຟ 5:15, 17).

ສ່ວນໜຶ່ງຂອງ “ທາງແຫ່ງຄວາມສຸກ” ແມ່ນການມີຫຍັງໃຫ້ເຮັດ! ການມອບໝາຍ, ວຽກງານ, ໜ້າທີ່ຮັບຜິດຊອບ—ບາງສິ່ງທີ່ໃຫ້ເຈົ້າສຸມໃຈໃສ່ ແລະ ມີຈຸດປະສົງ (ແນ່ນອນ, ພ້ອມກັບເວລາວ່າງສຳລັບຜ່ອນຄາຍ). ມັນຍາກທີ່ຈະມີຄວາມສຸກ ຖ້າຫາກເຈົ້າຮູ້ສຶກເບື່ອຢູ່ຕະຫລອດເວລາ.

ເຈົ້າຈະເວົ້າວ່າ ປະຈຸບັນເຈົ້າກຳລັງດຳລົງຊີວິດຕາມທາງແຫ່ງຄວາມສຸກໄດ້ບໍ? ຖ້າບໍ່ດັ່ງນັ້ນ, ບາງເທື່ອ ຕົວຢ່າງຂອງນີໄຟສາມາດໃຫ້ແນວຄິດບາງຢ່າງແກ່ເຈົ້າກ່ຽວກັບວິທີປັບປຸງໄດ້.

© 2024 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, February 2024. Language. 19276 331