“Para iti Pigsa dagiti Agtutubo: Ti Mensahe ti Mangisalakan Kenka,” Para iti Pigsa dagiti Agtutubo, Mar. 2024.
Binulan a Mensahe ti Para iti Pigsa dagiti Agtutubo , Marso 2024
Para iti Pigsa dagiti Agtutubo: Ti Mensahe ti Mangisalakan Kenka
Tulongannaka daytoy a pangiwanwan a mangikonekta kadagiti pilim ken ni Jesucristo ken iti doktrinana.
Agtakderak iti Ruangan ket Agtuktokak, ni J. Kirk Richards
Panunotem nga agnanaedka iti nagkauna a Galilea, 2,000 a tawenen ti napalabas. Naawiskayo ken dagiti gagayyemyo iti debosional dagiti agtutubo iti lokal a sinagoga, a pakairamanan ti espesial a sangaili nga agpalawag: ni Jesus a taga Nazaret. Ket iti maysa a paset ti mensahena, awisen ni Jesus dagiti agtutubo kadagiti agdengdengngeg nga agsaludsod Kenkuana.
Ania a kita ti saludsod ti pagarupyo a mabalin a mangngegyo?
Pagarupek a ti dadduma a saludsod ti mangipakita iti kultura ken kasasaad iti dayta a tiempo. Ngem pudno a patiek nga adu kadagita ti kasla kadagiti adu a saludsodtayo ita.
Kas pagarigan, iti Baro a Tulag, nagdamag dagiti tao iti Mangisalakan kadagiti saludsod a kas kadagitoy:
-
Ania ti masapul nga aramidek tapno magun-odko ti biag nga agnanayon?1
-
Maawatnak kadi? Maibilangnak kadi?2
-
No agbasol kaniak ti kabsatko, mamin-ano a pakawanek?3
-
Ania ti mapasamak iti daytoy a lubong iti masanguanan? Natalgedakto ngata?4
-
Mabalinmo kadi nga agasan ti ay-ayatek?5
-
Ania ti kinapudno?6
-
Kasano a maammuak no umiso ti dalan a pagturongak?7
Saan kadi nga agpapada ti pampanunotentayo amin sagpaminsan? Iti panaglabas dagiti siglo, saan unay a nagbalbaliw dagiti saludsod. Ket kasta met a saan a nagbaliw ti asi ti Mangisalakan kadagiti tao nga agsalsaludsod. Ammona no kasano a makariribuk ken makariro ti biag. Ammona no kasano ti kalaka ti mapukaw iti dalantayo. Ammona a madanagantayo no dadduma maipapan iti masakbayan. Ket kunana kenka ken kaniak, kas iti kinunana kadagiti pasurotna idi un-unana:
No adda dagiti napateg a pagpilianyo, ni Jesucristo ken ti naisubli nga ebangheliona ti kasayaatan a pilien. No adda dagiti saludsodyo, ni Jesucristo ken ti naisubli nga ebangheliona ti kasayaatan a sungbat.
Daytoy ti gapuna nga ay-ayatek ti Para iti Pigsa dagiti Agtutubo: Maysa a Pangiwanwan para iti Panagpili. Itudonatayo ken ni Jesucristo tapno maawattayo ti pigsana. Kanayon nga adda kopiak iti daytoy iti bulsak. Bayat ti pannakaam-ammok kadagiti tattao iti intero a lubong a mayat a mangammo no apay a datayo, kas kameng ti Simbaan ni Jesucristo, ket ar-aramidentayo dagiti ar-aramidentayo, ibinglayko daytoy a pangiwanwan kadakuada.
TiPara iti Pigsa ti Agtutubo ti mangisuro kadagiti agnanayon a kinapudno maipapan iti Mangisalakan ken ti Dalanna. Awisennakayo nga agpili a naibatay kadagita a kinapudno. Ket ibinglayna dagiti naikari a bendision nga ipaayna kadagiti sumurot Kenkuana. Basaen, utoben, ken ibinglayyo koma daytoy a pangiwanwan!
Awisem Isuna a Sumrek
Kayat ni Jesucristo ti agbalin a paset ti biagmo—a kanayon nga inaldaw nga adda, kadagiti nasayaat ken dakes a panawen. Saan laeng nga agtaktakder iti ungto ti dalan, nga agur-uray kenka tapno makadwanaka. Makipagnanto kenka iti tunggal addang ti dalan. Isu ti Dalan!
Ngem saanna nga ipilit ti dalanna iti biagmo. Awisem Isuna a sumrek, babaen kadagiti pilim. Daytoy ti gapuna a napateg unay ti pangiwanwan iti panagpili, kas iti Para iti Pigsa dagiti Agtutubo. Tunggal agaramidka iti nalinteg a pili a naibatay kadagiti agnanayon a kinapudno ti Mangisalakan, ipakitam a kayatmo nga adda Isuna iti biagmo. Dagita a pili ti manglukat kadagiti ruangan ti langit, ket sumangbayto ti pigsana iti biagmo.11
Mangaramid iti Natibker a Koneksion
Mabalin a malagipmo nga inyarig ti Mangisalakan dagidiay dumdumngeg ken agar-aramid kadagiti sasaona iti masirib a tao a “nangbangon iti balayna iti rabaw ti bato.” Inlawlawagna:
“Ket nagtinnag ti tudo, ket ti layus immay, ket nagangin, ket nagdissuoranda dayta a balay; ket saan a narba, ta nabangon iti bato.”12
Saan a makalasat ti balay iti bagyo gapu ta napigsa ti balay. Saan met a makalasat gapu laeng ta natibker ti bato. Makalasat ti balay iti bagyo gapu ta natibker ti pannakaikapetna iti dayta napigsa a bato. Ti pigsa ti koneksion iti bato ti napateg.
Kasta met, bayat ti panangbangontayo iti biagtayo, napateg ti agpili kadagiti nasayaat. Ket napateg a maawatan ti agnanayon a kinapudno ti Mangisalakan. Ngem sumangbay ti pigsa a kasapulantayo a mangdaer kadagiti bagyo ti biag no maikonektatayo dagiti pilitayo ken ni Jesucristo ken iti doktrinana. Tulongannatayo nga aramiden dayta ti Para iti Pigsa dagiti Agtutubo .
Kas pagarigan, mabalin nga ammo dagiti gagayyemmo nga ikagkagumaam ti saan nga agusar iti makapabain wenno makasair a sasao. Mabalin a makitada a tultulongam ti maysa nga ubing idiay eskuelaan a di ikankano ti kaaduan a tattao wenno i-bul-bully-da. Ngem ammoda kadi nga ar-aramidem dagitoy a pili gapu ta insuro ni Jesucristo nga “amin a tattao ket kakabsatmo a lallaki ken babbai—agraman … dagiti tattao a naiduma kenka”?13
Mabalin nga ammo dagiti gagayyemmo a makimismisaka iti tunggal Domingo. Mabalin a madlawda no iddepem ti maysa a kanta wenno saanmo nga awaten ti awis nga agbuya iti maysa a pelikula. Ngem ammoda kadi nga ar-aramidem dagitoy a pili gapu ta addaanka iti “naragsak a relasion ti katulagan iti Nailangitan nga Ama ken ni Jesucristo,” ket kas paset dayta a panagkumit a mangsurot iti Mangisalakan, pagyamanam “iti kaadda ti Espiritu Santo kas kanayon a kaduam”?14
Mabalin nga ammo dagiti tattao a dika umin-inom wenno agsigsigarilio wenno agusar iti dadduma pay a makadangran a droga. Ngem ammoda kadi nga ar-aramidem dagitoy a pili gapu ta insuro ni Jesucristo a “sagrado ti bagim,” “maysa a nakaskasdaaw a sagut manipud iti Nailangitan nga Amam,” a naaramid iti ladawanna?15
Mabalin nga ammo dagiti gagayyemmo a dika agkusit wenno agulbod ken serioso ti panangipategmo iti edukasion. Ngem ammoda kadi a daytoy ket gapu ta insuro ni Jesucristo a “ti kinapudno wayawayaannakayto”?16
Kangrunaan iti amin, ammo kadi dagiti gagayyemmo nga ar-aramidem dagitoy no dadduma a di nalatak a pili tapno agtalinaedka a napudno kadagiti pagalagadan ni Cristo gapu ta ammom a “ni Jesucristo ti pigsam”?17
Isu ti Pigsam
Itedko kadakayo ti pudno a pammaneknekko a ni Jesucristo ti Dalan nga agturong iti naraniag ken nadayag a masakbayan—ti masakbayanyo. Ket Isu met ti Dalan nga agturong iti naraniag ken nadayag nga agdama. Magnakayo iti dalanna, ket makipagnanto kadakayo. Maaramidyo daytoy!
Patpatgek nga agtutubo a gagayyemko, ni Jesucristo ti pigsayo. Itultuloyyo ti makipagna Kenkuana, ket tulongannakayo nga agtayab “nga addaan payak a kasla agila”18 nga agturong iti agnanayon a rag-o nga insaganana para kadakayo.
© 2024 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, March 2024. Ilokano. 19356 864