“Kakoaua Iroun Kristo Imwain Manga Okina,” Ibukin Kakorakoraia Kairake, Eberi. 2024.
Te Rongorongo Ibukin Kakorakoraia Kairake ni Katoa Namwakaina, Eberi 2024
Kakoaua Iroun Kristo Imwain Manga Okina
Nibwaite a kaman onimaki imwain rokon te Tia Kamaiu, ao ti kona ni karekea te onimaki imwain manga Okina.
Ko a tia n iangoia bwa e kanga aron kakoauaan te Tia Kamaiu imwain Okina nakon te aonaaba? Nibwaite ake ngkoa a tia ni karaoa anne—“ni kairiia nakon te Metia, ao ni kakoaua n aiaron ae e a tia n roko” (Iarom 1:11).
N taai aikai, ti karekei booki aika tabu ao rekooti n rongorongon ngkoa ake a kakoaua bwa Iesu Kristo e maiu, mate, ao mangauti. Ti kakoaua te Tia Kamaiu are e a tia roko. Ma ti kakoaua naba bwa te Tia Kamaiu e na manga oki.
Imwain Rokon Iesu Kristo, Nibwaite Iai aia Onimak Nakon:
A kabwaraaki aia bure.
“Bwa akana a kakoaua bwa e na roko Kristo, a na kona ni karekea kamaunaan aia bure, a na onrake n te kimwareirei ae moan te bati, riki n aiaron are aongkoa e a bon tia n roko ibuakoia” (Motiaea 3:13; e kairaaki ma katuruturuana).
A kabwarai aia bure.
“Ao e a roko te bwanaa nakoiu ni kangai: Enoti, a na kabwaraki am bure, ao ko na kakabwaiaki. … Mangaia ae, a mauna namakinan te bure mai irou. Ao I taku: te Uea, e kanga ni karaoaki aio? Ao E taku nakoiu: E kona ni karaoaki ibukin korakoran am onimaki iroun Kristo, ae ko tuai n ongo taekana ke n nooria. Ao a na mwaiti ririki aika a na roko i mwaain ae e kaoti n rabwata e kamaiuko am onimaki.”(Enoti 1:5–8; kairaki ma katuruturuana).
Karaoi taian kakaki.
“Ti ataa taekan Kristo, ao ti kariaria rokon mimitongina i nanon bubua n ririki i mwaain okina. … N riaon are ti na kona n tuatua n aran Iesu ao a na iri ara taeka taian aroka, ke taian maunga,ke naon marawa” (Iakobwa 4:4, 6; e kaairaki ma katuruturuana).
Karekean kaotioti.
“A mwaiti ake a bon rianako korakoran aia onimaki, i mwaain naba rokon Kristo, ake a bon aki kona n tukaki man rabunan te ataibwai, ma a bon noori ma te koaua ni mataia” (Ita 12:19; e kaairaki ma katuruturuana).
Imwain Manga Okin Iesu Kristo, Ti Kona ni Karekea te Onimaki Nakon:
Kabwarabure, kabwaraan ara bure, karaoan kakai, ao karekean kaotioti (n aroia Nibwaite).
Ti katauraoira i mwain Rokona.
Ngkai ti kataia ni kawakin ara berita aika tabu, ti bon katauraoira ni maeka n te abanuea ae te teretio. “Te maiu aei bon aia tai aomata bwa a na katauraoia ni kaitibo ma te Atua; eng, nooria te bong ni maiu n te maiu aei bon te bong are aomata a na karaoi aia beku” (Aramwa 34:32).
Katauraoa te aonaaba ibukin Rokona.
Ti bane ni kaoaki iroun Beretitenti Russell M. Nelson n riki bwa mwakoron “te mwakuri ae korakora ioan te aba”—ikotakiia tibun Iteraera. “E a tia Tamara are i Karawa ni kawakin ninikorian Arona aika mwaiti—tao, N na kangai, Ana kabanea n tamaroa n tiim—ibukin te kabanea n tai. Tamnei aika rine akanne—taan takakaro aika bane aroia, ninikoria aikanne—bon ngkami!”1
Karekea te kantaninga inanon taai aika a matoa.
Ngkana te Tia Kamaiu e manga oki, aika raoiroi a na maeka n rau. Te Tia Kamaiu e na uea, ao a na kaetaki taan babakanikawai. “‘Bwa e na mena i buakoia te Uea, ao e na mena mimitongina i aoia, ao e na riki bwa aia uea ao aia tia anga tua” (Reirei ao Berita aika Tabu 45:59).
Onimakina te Mangauti.
Ni kabane aomata a na karekea te mangauti. Ti na karekea kororaoin, rabwatara ae aki mamate. Ti na kona ni manga nooria ake ti tangiriia ake a tia ni mate. “Te tamnei ao te rabwata a na manga ikotaki riki n aroia ae kororaoi; baai ma wae ma toman te rabwata ana manga kaokaki nakon teia ni koaua, n aron ae iroura n te tai aei” (Aramwa 11:43).
Nibwaite ngkoa a kaman karekea aia onimaki iroun te Tia Kamaiu imwain Rokona. Ti kona ni karekea ara onimaki bwa e na roko te Tia Kamaiu riki—ngkana “[ti] na [Nooria] n nangin karawa, ni kunnikaiaki n te mwaaka ao te mimitong” (Reirei ao Berita aika Tabu 45:44; taraa naba Mwakuri 1:11). E kanga ataakin are E na manga roko ni bita te bwai are ko karaoia n te bong aei?
© 2024 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki te Ingiriti: 6/19. Kariaiakaki rairana: 6/19. Rairan te Rongorongo ibukin Kakorakoraia Kairake ni Katoa Namwakaina, Eberi 2024. Language. 19353 859