« តើយើងសន្យាអ្វីឲ្យប្រាកដ ពេលយើងទទួលបុណ្យជ្រមុជទឹក ? » ដើម្បីកម្លាំងនៃយុវជន ខែ មិថុនា ឆ្នាំ ២០២៤ ។

សារលិខិត ដើម្បីកម្លាំងនៃយុវជន ប្រចាំខែ មិថុនា ឆ្នាំ ២០២៤

តើយើងសន្យាអ្វីឲ្យប្រាកដ ពេលយើងទទួលបុណ្យជ្រមុជទឹក ?

ព្រះគម្ពីរបង្រៀនយើងថា នៅពេលដែលយើងទទួលបុណ្យជ្រមុជទឹក យើងចុះសេចក្ដីសញ្ញា ( ឬសន្យា ) យល់ព្រមយកព្រះនាមរបស់ព្រះយេស៊ូវគ្រីស្ទមកដាក់លើខ្លួនយើង បម្រើព្រះ និងកាន់តាមបទបញ្ញត្តិរបស់ទ្រង់ ( សូមមើល ម៉ូសាយ ១៨:១០; គោលលទ្ធិ និងសេចក្តីសញ្ញា ២០:៣៧, ៧៧ ) ។

យើងក៏បានរៀននៅក្នុងព្រះគម្ពីរផងដែរថា ពិធីបុណ្យជ្រមុជទឹកជួយយើងឲ្យបំពេញនូវបំណងប្រាថ្នារបស់យើងដែល « ចង់ចូលរួមក្នុងក្រោលនៃព្រះ ហើយដើម្បីឲ្យបានហៅថាជារាស្ត្ររបស់ទ្រង់ » ( ម៉ូសាយ ១៨:៨ ) ។ និយាយម្យ៉ាងទៀត ហេតុផលមួយដែលយើងទទួលបុណ្យជ្រមុជទឹក គឺយើងចង់ចូលរួមក្នុងសាសនាចក្រនៃព្រះយេស៊ូវគ្រីស្ទ ហើយរីករាយនឹងសេចក្ដីស្រឡាញ់ និងភាពជាសមាជិកដែលបានមកពីការរួបរួមគ្នានៅក្នុងព្រះគ្រីស្ទ ។

ការតាំងចិត្តក្នុងការបម្រើព្រះអម្ចាស់ និងកាន់តាមបទបញ្ញត្ដិរបស់ទ្រង់អាចរួមបញ្ចូលនូវការណ៍ជាច្រើនពេញមួយជីវិតរបស់យើង ។ ឧទាហរណ៍ វារួមបញ្ចូលនូវការ « យល់ព្រមទទួលបន្ទុកគ្នាទៅវិញទៅមក … ព្រមទួញយំជាមួយនឹងអ្នកណាដែលទួញយំ មែនហើយ ហើយកម្សាន្ដទុក្ខដល់អស់អ្នកណាដែលកំពុងត្រូវការកម្សាន្ដទុក្ខ ហើយឈរជាសាក្សីដល់ព្រះនៅគ្រប់ពេល និងគ្រប់សេចក្ដី និងគ្រប់ទីកន្លែង » ( ម៉ូសាយ១៨:៨–៩ ) ។

© 2024 by Intellectual Reserve, Inc. All rights reserved. បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly For the Strength of Youth Message, June 2024. Cambodian. 19299 258