Mesej Blong Ol Yut Oli Kam Strong blong Evri Manis, Ogis 2024
Wan Strong Rilesensip
Wan kavenan i moa bitim wan kontrak; hem i wan rilesensip.
Mi kipim yet wan pikja blong ol grin jea we Elda Pistone mo Elda Morasco i bin sidaon long hem taem tufala i bin stap tijim famli blong mi long hom blong mifala long Ajentina. Oli bin tij wetem paoa blong spirit mekem se sista blong mi we i gat 10 yia mo mi (mi gat 9 yia) bae i ron i go blong tajem ol jea afta we tufala i aot i go, wetem hop ia se bae paoa ia bae i kam long mitufala.
I no long taem i pas mi bin kam blong lanem se paoa ia i no kam long ol jea ia be i kam taem yumi gat kavenan rilesensip wetem God mo Jisas Kraes
Baptaes Eksperiens blong Mi
Mi bin mekem fas kavenan blong mi long 13 Novemba, 1977. Mi no tingbaot plante samting abaot baptaes blong mi, be mi tingbaot Elda Pistone i helpem mi blong go insaed long wota mo Elda Morasco i konfemem mi taem hea blong i wetwet i yet stap . Mi tingabaot tu glad we mi bin filim taem ol niufala fren long wod oli kam haggem mo givim ol kis folem fasin blong ol man Ajentina mo wan strong filing we mi filim blong wantem tumas blong stap olsem wan fetful pikinini gel blong Papa long Heven.
Yang Sista Spannau (long medel) wetem papa mo mama (long lef saed) sista blong hem Silvina (long raet saed), mo Elda Morasco.
Afta, mi kam blong luksave se glad we mi bin filim i kam long presen blong Tabu Spirit. Mi bin lanem se taem mi stap fetful blong kipim ol kavenan blong mi wetem God, Spirit bae i stap wetem mi. Tabu Spirit i wan long ol bigfala blesing we i kam long wan kavenan rilesensip wetem God mo Jisas Kraes.
Naoia, iven taem ol plan, ol tingting, mo ol aksen blong mi i no inaf, mi gat hop blong stap gogohed blong traem. ?From wanem? From se blong stap tekpat long sakramen i mekem i posibol long mi blong riniu ol kavenan blong mi, mo mekem ol niu kavenan evri wik. Mi talem tangkyu tumas from blesing ia.
Wan Naesfala Kavenan Rilesensip
Plante taem yumi harem se ol kavenan oli ol tu wei promes bitwin yumi mo God. Nao hemia i tru, be i no hemia nomo. Blong talem stret, “blong stap kipim ol kavenan i no wan kolkol o nogud bisnis be i wan naes rilesensip.”
?Olsem wanem nao yu krietem wan kavenan rilesensip wetem Papa long Heven mo Sevya? Tufala i lavem yu wetem lav we i stret gud evriwan mo wantem blong blesem yu (luk long 3 Nifae 14:11]. Be eni tufala wei rilesensip ia i tekem taem mo lav long tugeta saed.
?Yu yu wantem blong spenem moa taem wetem Tufala? Taem yu mekem ol samting we bae Tufala i mekem, yu stap wokabaot wetem Tufala! Hem ia i olsem se i isi nomo olsem blong stap lisin long wan fren we i stap long wan had taem, i stap mekem taem blong pleplei wetem wan brata o sista, o blong stap mekem wan i filim se hem i pat mo no mekem hem i fil se hem i stap hemwan. I no long taem i pas, mi bin spenem taem blong wokabaot wetem God taem mi stap rekodem ol voes mesej mo stap sendem ol teks mesej i go long wan fren long Ajentina we i stap filim sore hemwan. Mo tu, mi bin mekem wan joes blong oltaem kipim tempol rekomen blong mi i stap aktiv mekem se mi save spenem taem wetem Lod insaed long tabu haos blong Hem. Yu save prea from ol aedia we bae i helpem yu blong spenem taem wetem Papa long Heven mo Sevya blong yu.
?Yu yu wantem blong soem long Tufala se yu kea? Tritim ol komanmen we yu bin promes blong kipim olsem wan wei blong soemaot lav blong yu, be i no olsem wan lis blong ol rul. Eksampol, blong stap laef folem Tok blong Waes, mi bin lanem olsem wanem blong kukum ol helti kaekae. Naoia mi stap tijim ol pikinini gel blong mi blong mekem semmak olsem mi. Taem yu wiling blong kipim ol komanmen blong God, lav blong yu long Hem mo long Sevya bae i gro.
Ol kavenan rilesensip blong yumi wetem Papa long Heven mo Jisas Kraes bae i helpem yumi blong save gud Tufala mo gat moa akses long paoa blong Tufala long laef blong yumi—paoa we i no gat en i bitim eni samting we wan set blong ol grin jea oli save givim. Mo paoa ia i jenisim yumi blong oltaem!
© 2024 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Blong Ol Yut Oli Kam Strong Mesej, Ogis 2024. Bislama. 19342 852