Te rongorongo Ibukin Kakorakoraia Kairake ae Katoa Namwakaina, Aokati 2024
Te Reitaki ae Mwakaroiroi
Te berita ae tabu e bon korakora riki nakon te kaonturaeki; bon te reitaki.
Iai naba ngkai irou tamnein kaintekateka aika a kiriin are a tekateka iai Unimwaane Pistone ao Unimwaane Morasco ngke a reireiniia au utu inanon mweengara i Argentina. A reirei ma mwaakan te tamnei ae moan te korakora are Ngai (9 au ririki) ao tariu ae ikawai ae 10 ana ririki ti biri n riingi kaintekateka i mwiin nakoia, n te kantaninga are e kona n reke te mwaka anne nakoira.
I ataia n te tai ae waekoa bwa e aki roko te mwaka man taian kaintekateka bwa man karekean te reitaki n te bierita ae tabu ma te Atua ao Iesu Kristo.
Au Namakin n Au Bwabetito
I karaoa au moan berita ae tabu n Nobembwa 13, 1977. E karako ae I uringnga n taekan au bwabetito, ma I tii uringnga Unimwaane Pistone ngke e buokai ni karuoai nako aan te ran ao Unimwaane Morasco ngke e kamatoaai ao e bon nwaimwai irau. I uringa naba te kimwareirei are I namakinna ngke a rabwatai ao n aroka tabau raoraou aika a boou n te uoote ni katein Arentina ao te nano ae korakora are I namakinna ni kan riki bwa te nati te aine iroun te Tama are i Karawa.
Te kairake ae Titita Spannaus (inuuka) ma ana karo (n te maing), tarina ae Silvina (angatai mai tabona), ao Unimwaane Morasco.
i mwiina ao I a nooria bwa te kimwareirei are I namakinna bon mairoun te Tamnei ae Raoiroi. I ataia bwa ngkai I kakaonimaki ni kawakin au berita aika tabu ma te Atua, e na memena te Tamnei irarikiu. Te Tamnei ae Raoiroi bon teuana te kakabwaia ae mwakaroiroi are e roko man te reitaki n te berita ae tabu ma te Atua ao Iesu Kristo.
N te tai aei, e ngae ngke au kantaninga, iango, ao au mwakuri a kabwaka, I karekea te kantaninga bwa N na keiakina ae tamaroa n tainako. Bukin tera? Ibukina bwa kanakin te toa e anganai ae N na kona ni kabooua au berita ao ni karaoi berita aika boou ni katoa wiiki. I rangi ni kakaitau ibukin te kakabwaia anne.
Te Reitaki n te Berita ae Tabu, n Tangira ao n Akoi
Ti aki toki n ongoongo ae berita aika tabu bon berita aika uoua kawaina imarenara ma te Atua. Ngkana e koaua anne, tiaki aei aron taraakina. Ni koauana, “kawakinan te berita ae tabu tiaki te iokinibwai ma bon te reitaki n tangira ao n akoi.”
Ngaia are ko na kanga ni karaoa am reitaki ma te Tama are i Karawa ao te Tia Kamaiu? A kaman tangiriko n te aro ae moan te kororaoi ao a tangiria ni kakabwaiako (taraa 3 Nibwaai 14:11). Ma te berita ae tabu ae uoua kawaina e kainnanoa te tai ae rangi ni maan ao te tangira nan itera aika uoua.
Ko tangiria ni kan kabanea am tai Mangaiia? Ngkana ko karaoi bwaai ake A karaoi, e na bon bane am tai Mangaiia ao n toumwiin aia reirei. Anne e na kona ni bebete n aron ae ko ongoraa iroun raoraom inanon te tai ae rangi ni kangaanga; karekean te tai n takakaro ma tarim ke mwaanem, ke n ikotaki ma temanna are e namakina te katinanikuaki. N te tai ae nako, I kabanea au tai ma te Atua man rawean bwanaa i aon rongorongo ao ni kanakoa au taeka nakon raoraou i Argentina are e namakina te maroaa. I a tia ni baireia bwa N na teimatoa ni kakamwakura au beeba ni kariaia nakon te tembora bwa I aonga ni kona ni kabanea au tai ma te Uea inanon Ana auti ae tabu. Ko kona n tataroakin iango ake a na buokiko ni kabanea am tai ma te Tama are i Karawa ao am Tia Kamaiu.
Ko tangiria ni kan kaotia Nakoia bwa iai taben nanom iai? Kawakin tuua e are ko berita bwa ko na kawakin ni kateimatoa bwa te anga are ko na kaota am tangira, ma tiaki ae a riki bwa rinanin tuua. N aron te katooto, ni maiuakina Tuan te Mauri, I reiakinna bwa N na kanga ni kukani amwarake aika a kamarurung. N te tai aei I reireiniia natiu aine bwa a na karaoa naba anne. Ngkai ko tauraoi ni kawakin ana tua te Atua, e na rikirake am tangira Ibukina ma te Tia Kamaiu.
Ara reitaki n te berita ae tabu ma te Tama are i Karawa ao Iesu Kristo e na buokiira ni Kinaiia riki ao ni kona ni karekea Mwaakaia inanon maiura—n akea tokina nakon riki bwaai tabeua n aron are e na reke man kaintekateka aika a kiriin. Ao te mwaaka anne e bitiira n akea tokina!
© 2024 by Intellectual Reserve, Inc. All rights reserved. Boretiaki i USA. Kariaiaka te Ingiriti: 6/19. Kariaiakaki rairana: 6/19. Rairan te Monthly For the Strength of Youth Message, August 2024. Kiribati. 19342 859