Zaj Lus hauv Ntxiv Dag Zog rau cov Tub Hluas Ntxhais Hluas Txhua Hli, Yim Hli Ntuj 2024
Ib txoj Kev Sib Raug Zoo Yam Muaj Hwj Chim
Ib txoj kev khi lus yeej loj dua ib qho kev sib yeem lus; yog ib txoj kev sib raug zoo thiab.
Kuv tseem muaj ib daim duab txog ob lub rooj zaum ntsuab uas Txwj Laug Pistone thiab Txwj Laug Morasco zaum hauv thaum nkawd qhia kuv tsev neeg hauv peb lub tsev hauv lub teb chaws Argentina. Nkawd qhia peb yam muaj hwj chim ntawm sab ntsuj plig npaum li tias kuv tus niam laus muaj hnub nyoog 10 xyoo thiab kuv (hnub nyoog 9 xyoos) yuav kov ob lub rooj zaum tom qab nkawd mus tsev, es wb cia siab tias nkawd lub hwj chim yuav raug rau wb.
Tsis ntev kuv kawm hais tias lub hwj chim no tsis los ntawm ob lub rooj zaum ntawd tiam sis yog los ntawm txoj kev nrog Vajtswv thiab Yexus Khetos sib khi lus.
Thaum Kuv Ua Kev Cai Raus Dej
Kuv khi lus thawj zaug thaum lub Kaum Ib Hlis Ntuj 13, 1977. Kuv tsis nco qab ntau txog thaum kuv ua kev cai raus dej, tiam sis kuv nco tau txog thaum Txwj Laug Pistone pab kuv nqis los hauv cov dej thiab thaum Txwj Laug Morasco ua kev cai pom zoo rau kuv thaum kuv cov plaub hau tseem ntub. Kuv kuj nco tau qhov kev xyiv fab uas kuv hnov hauv kuv lub siab thaum kuv cov phooj ywg hauv kuv pawg ntseeg khawm kuv raws li hom Argentine thiab qhov uas kuv xav ua Leej Txiv Saum Ntuj Ceeb Tsheej ib tug ntxhais ncaj ncees.
Muam Spannaus thaum hluas (hauv nruab nrab) ua ke nrog nws niam txiv (sab laug), nws tus niam laus Silvina (sab xis), thiab Txwj Laug Morasco.
Tom qab no kuv paub tias qhov kev xyiv fab ntawd los ntawm lub txiaj ntsim Vaj Ntsuj Plig Dawb Huv. Kuv kawm tias thaum kuv rau siab ua raws li kuv tej kev khi lus nrog Vajtswv, tus Ntsuj Plig yuav nrog kuv nyob. Tus Vaj Ntsuj Plig Dawb Huv yog ib txoj koob hmoov yam muaj hwj chim uas los ntawm txoj kev nrog Vajtswv thiab Yexus sib khi lus.
Nim no, txawm tias kuv tej kev ntswv siab, tej kev xav, thiab tej yam kuv ua tsis zoo tag nrho, kuv cia siab tias kuv yeej meem sim ua los tau. Vim li cas? Vim thaum kuv noj lub cim nco txog qhov ntawd muab ib lub cib fim rau kuv rov qab khi kuv tej kev khi lus dua ib zaug ntxiv thiab khi lus dua tshiab txhua lub lim tiam. Kuv ua Vajtswv tsaug rau txoj koob hmoov ntawd.
Ib txoj Kev Sib Raug Zoo los ntawm Kev Khi Lus
Feem ntau peb hnov hais tias tej kev khi lus yog ib txoj kev sib cog lus ib leeg rau ib leeg nyob ntawm peb thiab Vajtswv. Txawm tias qhov no muaj tseeb, tseem tshuav ib qho ntxiv thiab. Tiag tiag, “txoj kev sib khi lus tsis yog sib hais haum txias li ua lag luam tiam sis yog ib txoj kev sib raug zoo.”
Yog li ntawd, yus yuav tsum ua li cas kom thiaj nrog Leej Txiv Saum Ntuj Ceeb Tsheej thiab tus Cawm Seej sib khi lus? Nkawd yeej los hlub koj zoo tag nrho thiab xav foom koob hmoov rau koj (saib 3 Nifais 14:11). Tiam sis ib txoj kev sib raug zoo ib leeg rau ib leeg yeej siv sij hawm thiab ib tog hlub ib tog.
Koj puas xav siv sij hawm nrog Nkawd ntau dua? Thaum koj ua tej yam uas Nkawd ua, koj nrog Nkawd mus tom ntej! Tej zaum koj pab tau ib tug phooj ywg uas nyuaj siab, siv sij hawm nrog ib tug hauv koj tsev neeg ua si, los sis suav ib tug neeg uas nyob nrug deb ntawm sawv daws. Tsis ntev tas los no, kuv siv sij hawm nrog Vajtswv mus kev thaum kuv kaw kuv lub suab thiab xa xov mus rau ib tug phooj ywg hauv teb chaws Argentina uas kho siab heev. Kuv kuj tau txiav txim siab ceev kuv daim ntawv nkag tuam tsev kom kuv thiaj mus siv sij hawm nrog tus Tswv hauv Nws lub tsev dawb huv. Koj thov Vajtswv kom tau tswv yim uas yuav pab koj siv sij hawm nrog Leej Txiv Saum Ntuj Ceeb Tsheej thiab koj tus Cawm Seej.
Koj puas xav qhia Nkawd hais tias koj hlub Nkawd? Ua raws li tej lus txib uas koj tau khi lus tseg kom ua ib qho kev qhia kev hlub rau Nkawd, tsis yog ib co kev cai xwb. Piv txwv hais tias, kom ua raws li Lo Lus Txawj Ntse, kuv kawm ua tej pluas mov uas zoo rau kuv lub cev. Nim no kuv qhia kuv cov ntxhais kom ua li ntawd thiab. Thaum koj kam ceev Vajtswv tej kev txib, koj txoj kev hlub rau Nws thiab tus Cawm Seej yuav loj hlob tuaj.
Peb tej kev khi lus nrog Leej Txiv Saum Ntuj Ceeb Tsheej thiab Yexus Khetos yuav pab peb paub Nkawd zoo dua thiab ncav tau Nkawd lub hwj chim hauv peb lub neej—yeej ntau tshaj ob lub rooj zaum ntsuab i muaj rau peb. Thiab lub hwj chim ntawd hloov tau peb mus ib txhis li!
© 2024 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, August 2024. Hmong. 19342 295