ຂ່າວສານປະຈຳເດືອນ For the Strength of Youth, ເດືອນສິງຫາ 2024

ຄວາມສຳພັນ ທີ່ມີພະລັງ

ໂດຍ ຊິດສະເຕີ ແອນເດຣຍ ມູໂຍສ ສະແປນນາວສ໌

ທີ່ປຶກສາທີສອງໃນຝ່າຍປະທານອົງການຍິງໜຸ່ມສາມັນ

ພັນທະສັນຍາເປັນຫລາຍກວ່າສັນຍາ; ມັນເປັນຄວາມສຳພັນ.

ຂ້າພະເຈົ້າຍັງມີຮູບຂອງຕັ່ງສີຂຽວທີ່ແອວເດີ ພິສ໌ໂທນ ແລະ ແອວເດີ ໂມຣາສ໌ໂຄ ໄດ້ນັ່ງຢູ່ ຂະນະທີ່ເຂົາເຈົ້າສິດສອນຄອບຄົວຂອງຂ້າພະເຈົ້າໃນບ້ານຂອງຂ້າພະເຈົ້າໃນປະເທດອາກຊັງຕິນ. ເຂົາເຈົ້າສິດສອນດ້ວຍອຳນາດແຫ່ງວິນຍານທີ່ຫລວງຫລາຍ ຈົນວ່າເອື້ອຍທີ່ອາຍຸ 10 ປີຂອງຂ້າພະເຈົ້າ ແລະ ຂ້າພະເຈົ້າ (ອາຍຸ 9 ປີ) ຈະແລ່ນໄປຈັບຕັ່ງຫລັງຈາກທີ່ເຂົາເຈົ້າກັບແລ້ວ, ໂດຍຫວັງວ່າອຳນາດນັ້ນຈະແຜ່ມາຖືກໂຕພວກເຮົາ.

ບໍ່ດົນ ຂ້າພະເຈົ້າກໍໄດ້ຮຽນຮູ້ວ່າ ອຳນາດບໍ່ໄດ້ມາຈາກຕັ່ງ ແຕ່ມາຈາກການມີຄວາມສຳພັນແຫ່ງພັນທະສັນຍາກັບພຣະເຈົ້າ ແລະ ພຣະເຢຊູຄຣິດ.

ປະສົບການການບັບຕິສະມາຂອງຂ້າພະເຈົ້າ

ຂ້າພະເຈົ້າໄດ້ເຮັດພັນທະສັນຍາທຳອິດຂອງຂ້າພະເຈົ້າໃນວັນທີ 13 ເດືອນພະຈິກ, 1977. ຂ້າພະເຈົ້າຈື່ບໍ່ໄດ້ຫລາຍກ່ຽວກັບການບັບຕິສະມາຂອງຂ້າພະເຈົ້າ, ແຕ່ຂ້າພະເຈົ້າຈື່ໄດ້ວ່າ ແອວເດີ ພິສ໌ໂທນ ຊ່ວຍຂ້າພະເຈົ້າລົງໄປໃນນໍ້າ ແລະ ແອວເດີ ໂມຣາສ໌ໂຄ ຢືນຢັນຂ້າພະເຈົ້າຂະນະທີ່ຜົມຂອງຂ້າພະເຈົ້າຍັງປຽກຢູ່. ຂ້າພະເຈົ້າຍັງຈື່ຄວາມຊື່ນຊົມທີ່ຂ້າພະເຈົ້າໄດ້ຮູ້ສຶກ ຂະນະທີ່ໝູ່ເພື່ອນໃນຫວອດກອດ ແລະ ຈູບຂ້າພະເຈົ້າໃນວິຖີອາກຊັງຕິນ ແລະ ຄວາມປາດຖະໜາອັນແຮງກ້າທີ່ຂ້າພະເຈົ້າໄດ້ຮູ້ສຶກ ໃນການເປັນທິດາທີ່ຊື່ສັດຂອງພຣະບິດາເທິງສະຫວັນ.

ຄອບຄົວຢູ່ທີ່ການບັບຕິສະມາ — ຊິດສະເຕີ ສະແປນນາວສ໌ ຕອນຍັງນ້ອຍ (ກາງ) ກັບພໍ່ແມ່ຂອງເພິ່ນ (ຊ້າຍ), ເອື້ອຍຂອງເພິ່ນ ຊິລ໌ວິນາ (ຂວາສຸດ), ແລະ ແອວເດີ ໂມຣາສ໌ໂຄ.

ຕໍ່ມາ ຂ້າພະເຈົ້າໄດ້ຮູ້ວ່າ ຄວາມຊື່ນຊົມທີ່ຂ້າພະເຈົ້າໄດ້ຮູ້ສຶກນັ້ນ ແມ່ນມາຈາກຂອງປະທານແຫ່ງພຣະວິນຍານບໍລິສຸດ. ຂ້າພະເຈົ້າໄດ້ຮຽນຮູ້ວ່າ ເມື່ອຂ້າພະເຈົ້າຮັກສາພັນທະສັນຍາຂອງຂ້າພະເຈົ້າກັບພຣະເຈົ້າຢ່າງຊື່ສັດແລ້ວ, ພຣະວິນຍານຈະສະຖິດຢູ່ກັບຂ້າພະເຈົ້າ. ພຣະວິນຍານບໍລິສຸດເປັນພຽງແຕ່ໜຶ່ງໃນພອນທີ່ມີພະລັງຕ່າງໆ ທີ່ມາຈາກຄວາມສຳພັນແຫ່ງພັນທະສັນຍາກັບພຣະເຈົ້າ ແລະ ພຣະເຢຊູຄຣິດ.

ບັດນີ້, ແມ່ນແຕ່ເມື່ອແຮງຈູງໃຈ, ຄວາມຄິດ, ແລະ ການກະທຳຂອງຂ້າພະເຈົ້າຂາດເຂີນ, ຂ້າພະເຈົ້າກໍມີຄວາມຫວັງທີ່ຈະພະຍາຍາມຕໍ່ໄປ. ຍ້ອນຫຍັງ? ຍ້ອນການຮັບສ່ວນສິນລະລຶກເຮັດໃຫ້ເປັນໄປໄດ້ສຳລັບຂ້າພະເຈົ້າທີ່ຈະຕໍ່ພັນທະສັນຍາຂອງຂ້າພະເຈົ້າ ແລະ ເຮັດພັນທະສັນຍາໃໝ່່ແຕ່ລະອາທິດ. ຂ້າພະເຈົ້າກະຕັນຍູຕໍ່ພອນນັ້ນຫລາຍ.

ຄວາມສຳພັນແຫ່ງພັນທະສັນຍາທີ່ອົບອຸ່ນ

ເຮົາມັກຈະໄດ້ຍິນວ່າ ພັນທະສັນຍາແມ່ນຄຳສັນຍາສອງທາງລະຫວ່າງເຮົາກັບພຣະເຈົ້າ. ຂະນະທີ່ນັ້ນເປັນຄວາມຈິງ, ມັນກໍບໍ່ເປັນພຽງແຕ່ເທົ່ານັ້ນ. ໃນຄວາມເປັນຈິງແລ້ວ, “ການຮັກສາພັນທະສັນຍາບໍ່ແມ່ນຂໍ້ຕົກລົງທາງທຸລະກິດ ແຕ່ແມ່ນຄວາມສຳພັນທີ່ອົບອຸ່ນ.”

ສະນັ້ນ ເຈົ້າຈະສ້າງຄວາມສຳພັນແຫ່ງພັນທະສັນຍາກັບພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດໄດ້ແນວໃດ? ພວກພຣະອົງຮັກເຈົ້າຢ່າງສົມບູນຢູ່ແລ້ວ ແລະ ຢາກອວຍພອນເຈົ້າ (ເບິ່ງ 3 ນີໄຟ 14:11). ແຕ່ຄວາມສຳພັນສອງທາງໃດໆກໍໃຊ້ເວລາ ແລະ ຄວາມຮັກຈາກທັງສອງຝ່າຍກັນທັງນັ້ນ.

ເຈົ້າຢາກໃຊ້ເວລາກັບພວກພຣະອົງຫລາຍຍິ່ງຂຶ້ນບໍ່? ເມື່ອເຈົ້າເຮັດໃນສິ່ງທີ່ພວກພຣະອົງຈະເຮັດ, ເຈົ້າກໍກຳລັງຍ່າງໄປກັບພວກພຣະອົງ! ນັ້ນອາດລຽບງ່າຍເທົ່າໆກັບການຮັບຟັງໝູ່ຄົນໜຶ່ງໃນລະຫວ່າງຊ່ວງເວລາທີ່ຍາກລຳບາກ, ການຫາເວລາເພື່ອມາຫລິ້ນກັບອ້າຍເອື້ອຍນ້ອງ, ຫລື ລວມຄົນບາງຄົນທີ່ຮູ້ສຶກວ່າຖືກລະເລີຍ. ເມື່ອບໍ່ດົນມານີ້, ຂ້າພະເຈົ້າໄດ້ໃຊ້ເວລາຍ່າງກັບພຣະເຈົ້າ ໂດຍການອັດຂໍ້ຄວາມສຽງ ແລະ ສົ່ງຂໍ້ຄວາມຫາໝູ່ຄົນໜຶ່ງໃນອາກຊັງຕິນ ຜູ້ທີ່ຮູ້ສຶກໂດດດ່ຽວ. ຂ້າພະເຈົ້າຍັງໄດ້ຕັດສິນໃຈທີ່ຈະຮັກສາໃບຮັບຮອງເຂົ້າພຣະວິຫານໃຫ້ໃຊ້ງານໄດ້ຢູ່ສະເໝີ ເພື່ອວ່າຂ້າພະເຈົ້າຈະສາມາດໃຊ້ເວລາກັບພຣະຜູ້ເປັນເຈົ້າໃນບ້ານອັນສັກສິດຂອງພຣະອົງ. ເຈົ້າສາມາດອະທິຖານຂໍແນວຄິດທີ່ຈະຊ່ວຍໃຫ້ເຈົ້າໃຊ້ເວລາກັບພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດຂອງເຈົ້າ.

ເຈົ້າຢາກສະແດງໃຫ້ພວກພຣະອົງເຫັນວ່າເຈົ້າໃສ່ໃຈບໍ? ປະຕິບັດຕໍ່ພຣະບັນຍັດທີ່ເຈົ້າໄດ້ເຮັດພັນທະສັນຍາວ່າຈະຮັກສາ ເພື່ອເປັນວິທີທີ່ຈະສະແດງຄວາມຮັກຂອງເຈົ້າ, ບໍ່ແມ່ນລາຍການກ່ຽວກັບກົດເທົ່ານັ້ນ. ຍົກຕົວຢ່າງ, ເພື່ອທີ່ຈະໃຊ້ຊີວິດຕາມພຣະວາຈາແຫ່ງປັນຍາ, ຂ້າພະເຈົ້າໄດ້ຮຽນຮູ້ວິທີເຮັດອາຫານທີ່ດີຕໍ່ສຸຂະພາບ. ບັດນີ້ ຂ້າພະເຈົ້າກຳລັງສອນພວກລູກສາວຂອງຂ້າພະເຈົ້າໃຫ້ເຮັດເຊັ່ນດຽວກັນ. ຂະນະທີ່ເຈົ້າເຕັມໃຈຮັກສາພຣະບັນຍັດຂອງພຣະເຈົ້າ, ຄວາມຮັກຂອງເຈົ້າທີ່ມີຕໍ່ພຣະອົງ ແລະ ພຣະຜູ້ຊ່ວຍໃຫ້ລອດກໍຈະເຕີບໂຕຂຶ້ນ.

ຄວາມສຳພັນແຫ່ງພັນທະສັນຍາຂອງເຮົາກັບພຣະບິດາເທິງສະຫວັນ ແລະ ພຣະເຢຊູຄຣິດຈະຊ່ວຍໃຫ້ເຮົາຮູ້ຈັກພຣະອົງດີຂຶ້ນ ແລະ ເຂົ້າເຖິງອຳນາດຂອງພວກພຣະອົງໃນຊີວິດຂອງເຮົາ—ຫລາຍກວ່າສິ່ງອື່ນໃດທີ່ຊຸດຕັ່ງສີຂຽວຈະມີໃຫ້ຢ່າງບໍ່ມີຂອບເຂດ. ແລະ ອຳນາດນັ້ນຈະປ່ຽນແປງເຮົາຕະຫລອດໄປ!

© 2024 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, August 2024. Laotian. 19342 331