Bosome bosome De ma Mmabunu Ahoɔden Nkrasɛm, Ɔsanaa 2024
Abusuabɔ a Ɛmu Yɛ Den
Apam so sene nhyehyɛeɛ; ɛyɛ abusuabɔ.
Meda so wɔ nkonnwa ahahamono a Elder Pistone ne Elder Morasco tenaa mu berɛ a wɔkyerɛkyerɛɛ m’abusua wɔ yɛn fie wɔ Argentina no mfonin. Wɔde honhom mu tumi kɛseɛ kyerɛkyerɛeɛ maa me (mfeɛ 9) ne me nuabaa panin a na wadi mfeɛ 10 tuu mmirika kɔsɔɔ nkonnwa no mu berɛ a wɔkɔeɛ no, a na yɛgye di sɛ tumi bɛfiri mu aba yɛn so.
Ankyɛre na mehuu sɛ na tumi no mfiri nkonnwa no mu na mmom ɛfiri apam abusuabɔ a yɛne Onyankopɔn ne Yesu Kristo wɔ mu.
M’Asubɔ Suahunu
Meyɛɛ m’apam a ɛdi kan wɔ Obubuo 13, 1977. Menkae pii fa m’asubɔ ho, nanso mekae Elder Pistone a ɔboa de me kɔɔ nsuo no mu ne Elder Morasco a ɔhyɛɛ me den berɛ a na me tirinwi da so afɔ. Me san nso kae anigyeɛ a menyaeɛ berɛ a m’ayɔnkofoɔ afoforɔ wɔ wɔɔdo hɔ yɛɛ me atuu na wɔfee m’afono ho sɛdeɛ yɛyɛ no wɔ Argentina ɛne ɔpɛ atenka kɛseɛ a menyaeɛ sɛ mɛyɛ Ɔsoro Agya babaa nokwafoɔ.
Onuabaa kumaa Spannaus (mfimfini) ne n’awofoɔ (benkum), ne onuabaa Silvinia (nifa nohoa), ne Elder Morasco.
Akyire no mehuu sɛ anigyeɛ a menyaeɛ no firi Sunsum Kronkron akyɛdeɛ no. Mesuaa sɛ, sɛ medi nokorɛ ma apam a me ne Onyankopɔn wɔ a, Honhom no bɛka me ho. Sunsum Kronkron no yɛ nhyira akɛseɛ a ɛfiri yɛne Onyankopɔn ne Yesu Kristo apam abusuabɔ mu ba no mu baako.
Seesei, sɛ mpo me botaeɛ, m’adwene, ne me nneyɛɛ tɔ sini a, mewɔ anidasoɔ sɛ menkɔ so mmɔ mmɔden. Adɛn? Ɛfiri sɛ adidi kronkronfa ma ɛyɛ yie ma me sɛ mɛsan ayɛ m’apam ahodoɔ no na mayɛ apam afoforɔ nnawɔtwe biara. M’ani sɔ saa nhyira no yie.
Apam Abusuabɔ a ɛyɛ Ahomeka
Yɛtaa te sɛ apam yɛ bɔhyɛ akwan-mmienu a ɛda yɛne Onyankopɔn ntam. Berɛ a ɛno yɛ nokorɛ no, yei nyɛ ɛno nko ara. Nokorɛ ne sɛ, “apam so die nyɛ ahɔhoɔ dwadie na mmom ɛyɛ abusuabɔ a ɛyɛ ahomeka.”
Enti sɛn na wo ne Ɔsoro Agya ne Agyenkwa no yɛ apam abusuabɔ? Wɔwɔ ɔdɔ a ɛwie pɛyɛ ma wo dada na wɔpɛ sɛ wɔhyira wo (hwɛ 3 Nephi 14:11). Nanso akwan-mmienu abusuabɔ biara fa berɛ ne ɔdɔ firi afanu no nyinaa.
Wopɛ sɛ Wɔnya berɛ bebree ma wo? Berɛ a woyɛ nneɛma a anka Wɔbɛyɛ no, wo ne Wɔn nam! Ɛbɛtumi ayɛ ade ketewa bi te sɛ woretie adamfoɔ bi wɔ ahokyerɛ berɛ mu, worenya berɛ ne obusuani bi adi agorɔ, anaa wode obi a ɔte nka sɛ wɔayi no mu reka ho. Nnansa yi ara, menyaa berɛ ne Onyankopɔn nanteeɛ berɛ a meyɛɛ ɛnne nkrasɛm ne atwerɛ kɔmaa adamfoɔ bi a ɔwɔ Argentina a na ɔte nka sɛ ɔyɛ ankonam. Masan asi gyinaeɛ sɛ mɛma me tɛmpol nkamfoɔ krataa adi mu berɛ biara na matumi ne Awurade anya berɛ wɔ Ne fie kronkron mu. Wobɛtumi abɔ mpaeɛ anya adwene a ɛbɛboa ma wo ne Ɔsoro Agya ne w’Agyenkwa anya berɛ.
Wopɛ sɛ wokyerɛ Wɔn sɛ wodwene Wɔn ho? Fa mmaransɛm a woayɛ apam sɛ wobɛdi so no yɛ adwuma yie fa kyerɛ wo dɔ, na ɛnyɛ sɛ mmara bi mmoano. Nhwɛsoɔ, sɛdeɛ mɛdi Nyansɛm no so no, mesuaa sɛdeɛ mɛnoa aduane a ahoɔden wom. Seesei merekyerɛ me mmammaa sɛ wɔbɛyɛ saa ara. Sɛ wofiri wo pɛ mu di Onyankopɔn mmaransɛm so a, wo dɔ ma No ne Agyenkwa no bɛnyini.
Apam abusuabɔ a yɛne Ɔsoro Agya ne Yesu Kristo wɔ no bɛboa yɛn ma yɛahunu Wɔn yie na yɛanya kwan bebree wɔ Wɔn tumi ho wɔ yɛn abrabɔ mu—a ɛnni ano bebree sene adeɛ biara a nkonnwa ahahamono bi wɔ ma yɛn. Na saa tumi no sesa yɛn afebɔɔ!
© 2024 by Intellectual Reserve, Inc. Wɔakora hokwan ahodoɔ nyinaa so. Wɔtintimm wɔ USA Borɔfo Kasa ho kwan-ma: 6/19. Nkyerɛaseɛ ho kwan-ma: 6/19. Nkyerɛaseɛ ma Bosome bosome De ma Mmabunu Ahoɔden Nkrasɛm, Ɔsanaa 2024. Twi. 19342 503