Mukenji wa ku ngondu wa Liahona Ngondu wa Dikumi ne Umua 2024
Mukalenga Yezu Kilisto Nealua Kabidi
Mpindiewu tshidi diba bua wewa ne mema tudilongolola bua Dilua Dibidi dia Mukalenga wetu ne Mupandishi, Yezu Kilisto.
Bana betu baluma ne bakaji, Ndi ne disakidila bualu Mukalenga mumbenesha bua kuakula kunudi.
Mu mpungilu ewu, Mukalenga muakula kutudi kupitshila kudi basadidi benda. Ndi ndukankamika bua kulonga mêyi abu. Uenzela bu kaludiki bua kutapulula bulelela ne mafi mu ngondu isambombu yalua.
Dilongolola ne diakajilula dia Ntempelo wa Salt Lake ne minga miaba mikuabu mu Temple Square bikadi nanku bitua ku bidimu bitanu. Kabala matuku kadi koku kadi kaleja ne midimu eyi neijika ku ndekelu kua 2026. Tudi ne disanka bua aba bonsu badi benza mudimu ewu munena.
Mu ngondu isambombu mishala eyi, tuvua bajidila anyi bajidilula ntempelo tshitema mu matunga atanu. Ku lelu too ne ku ndekelu kua tshidimu etshi, netujidila mikuabu itanu.
Lelu tudi ne disanka dia kunuambila malongolola a dibaka dia ntempelo 17. Bua lusa telejayi ne kanemu pandi ntela miaba.
-
Juchitán de Zaragoza, Mexico
-
Santa Ana, El Salvador
-
Medellín, Colombie
-
Santiago, Republique Dominicaine
-
Puerto Montt, Chili
-
Dublin, Irelande
-
Milan, Italie
-
Abuja, Nigeria
-
Kampala, Ouganda
-
Maputo, Mozambique
-
Coeur d’Alene, Idaho
-
Queen Creek, Arizona
-
El Paso, Texas
-
Huntsville, Alabama
-
Milwaukee, Wisconsin
-
Summit, New Jersey
-
Price, Utah
Bana betu baluma ne bakaji, nudi bamona tshidi tshikala tshienzeka kumpala kua mesu etu? Ndi nsambila bua katupangidi butumbi bua mutantshi ewu! Mukalenga udi munkatshi mua kukumbaja mudimu wenda.
Buatshinyi tudi tuibaka ntempelo mu luidi elu? Buatshinyi? Bualu Mukalenga mmutulomba bua tuetu kuenza nunku. Mabenesha a ntempelo adi ambuluisha bua dikunguija Isalele ku nseka yonsu ibidi ya tshilamba. Mabenesha aa adi ambuluisha kabidi bua kulongolola bantu badi mua kuambuluisha bua kulongolola ba pa buloba bua Dilua Dibidi dia Mukalenga!
Bu muvua muambi Yeshayi muamba ku nyuma, bu mudi Handel utuvuluija mu wenda Masiah, ne padi Yezu Kilisto upingana, “butumbi bua Yehowa nebubuluibue, ne bantu bonsu nebabutangile diatshimue.”
Mu matuku aa “bukôkeshi nebuikala pa dikaya dienda: ne dîna dienda nedibikidibua ne Mukemeshi, Mubedi, Nzambi wa Bukitu, Tatu wa Tshiendelela, Mfumu wa Ditalala.”
Yezu Kilisto nealombola Yelushalema yonsu ibidi wa kala ne Yelushalema mupia-mupia “neashibua mu bulaba bua Amelika.” Kupitshila ku miaba ibidi eyi nealombola malu a Ekelezia wenda.
Mu matuku awu Mukalenga neikala mumanyishibua bu “Mfumu wa bamfumu, ne Mukalenga wa Bakalenga.” Aba badi bikala nenda “nebabikidibua, ne basungula, ne bena lulamatu.”
Bana betu baluma ne bakaji, mpindiewu tshidi diba bua nuenu ne mema bua tudilongolola bua Dilua Dibidi dia Mukalenga ne Mupandishi wetu, Yezu Kilisto. Mpindiewu tshidi diba bua tuetu kuenza buyidi buetu tshintu tshietu tshia mushinga mukola. Mu buloba buwula ne manayi makola a ditanaja, mushindu kayi utudi mua kutshienza?
Disambila misangu yonsu mu ntempelo nedituambuluisha. Mu nzubu wa Mukalenga, tudi tushindamena pa Yezu Kilisto. Tulonga pa Yeya. Tuenza bipungidi bua kumulonda. Tudi tufika kudimumanya. Patudi tulama bipungidi bietu bia mu ntempelo, tudi tupeta bukola bua dikankamika bua Mukalenga. Mu ntempelo, tudi tupeta bukubi bua kutamba malu a pa buloba. Tudi tumvua dinanga dilelela dia Yezu Kilisto ne dia Tatu wetu wa mu Diûlu mu kabujima! Tudi tumvua ditalala ne dituishibua mu nyuma, bidi bibengangana ne dipampakana dia pa buloba.
Etshi tshidi mulayi wanyi kunudi: Mukebi yonsu mulelela wa Yezu Kilisto neamupeta mu ntempelo. Neumvua lusa luenda. Neupeta mandamuna ku nkonku yeba idi ikutatshisha. Neumvua bimpa disanka dia lumu luimpa Luenda.
Mvua mulonga ne lukonku lua mushinga lutudi bonsu bua kuandamuna ludi ne: Kudi nganyi anyi ku tshinyi kungafila moyo wanyi?
Dipangadika dianyi bua kulonda Yezu Kilisto didi dipangadika dia mushinga dintu ntshiyi muanji kuenza. Pamvua ndonga kalasa kanyi ka bu ngangabuka, mvua mupeta bujadiki bua bunzambi bua Nzambi Tatu ne Muanenda, Yezu Kilisto. Katshia, nanku Mupandishi wetu utu dibua dintu muibakila moyo wanyi. Disungula adi ditu dienza dishilangana dionsu! Dipangadika adi ditu dienza bua mapangadika a bungi alua mateketa. Dipangadika adi diakampesha kipatshila ne buludiki. Ditu kabidi dingambuluisha mu malu makola a moyo. Ndekelayi ngabanya bilejilu bibidi:
Tshiakumpala, pavua mukaji wanyi Dantzel mufua, mu mushindu umvua ntshiyi muelela meji, ntshivua ne mushindu wa kubikila nansha umua wa ku bana banyi. Diba adi mvua nkayanyi, mu dipampakana, ne nkeba diambuluisha. Diakalenga, Mukalenga wakandongesha ku nyuma Wenda buatshinyi munangibua wanyi Dantzel uvua mufua. Ne ngumvuilu ewu, mvua mukankamikibua. Mu matuku akalua, umvua mukumbana bimpa bua kutangalaja madilu. Pashisha, ngakasela mukaji wanyi munangibua Wendy. Uvua muikala munkatshi mua tshitupa tshia tshilejilu tshianyi tshibidi.
Wendy ne mema patuvua bapeshibua mudimu mu tshitupa dia buloba tshikuabu, bimvi ne bingoma bakanteka tshigoma ku mutu wanyi ne kujinga bua kungasa. Kadi tshingoma katshivua tshitema to. Kupitshila ku dimanya adi, bubidi buetu tuvua ba lufu. Wendy ne mema tuakumvua ditalala dishuwa. Tshivua ditalala “bushuwa dipita meji onsu.”
Bana betu baluma ne bakaji, Mukalenga neanusamba enu! Neanukolesha. Neanubenesha, ne ditalala nansha mu malu makola.
Bua lusa telejayi mulayi ewu wa Yezu Kilisto ku nudi: Neikala ku dia baluma ne ku dia bakaji dietu, ne Nyuma wenda neikala mu mioyo yetu, ne banjelu benda nebatunyunguluka bua kunuambuluisha.
Kakuena ndekelu bua bukola bua Mupandishi kukuambuluisha. Dikenga dienda dikola mu Getesemane ne ku Kabalubalu ka Mutu bivua bueba! Bupikudi buenda kabuyi ndekelu budi bueba!
Ndi nukankamika bua kupeta diba mu lumingu lonsu—ne mu matuku enu onsu a moyo wenu—bua kukolesha lumvu luenu lua Bupikudi bua Yezu Kilisto. Ndi nkenga bua kumona bantu badi bikala bajama mu mibi kabayi bamanya mushindu wa kupatuka to. Ndi ndila bua aba badi bikala baluangana mu nyuma anyi bikala ne majitu nkayabu bualu kabena bamanya tshidi Yezu Kilisto muenza buabu.
Wakangata yeya nkayenda mibi yenu, makenga enu, buteketa buenu, ne mateketa enu. Kanuena bua kubiambula nkayenu to! Neanubuilkidia panudi nukudimuna mutshima. Neanubenesha ne binudi nabi dijinga. Neondopa anyima yenu idi mitapika. Panuangata mutshi wenda wa tshikokedi, majitu enu neikala mapepele. Panuenza ne panualama bipungidi bua kulonda Yezu Kilisto, nenumona ne ntatu idiku bua tshikondu tshikesa mu moyo weba. Ntatu yenu neikala “midînyibua mu disanka dia Kilisto.”
Diba ki ndikumbana anyi dipita bua wewa kulua muyidi mushuwa wa Yezu Kilisto. Nanku nenupeta mabenesha onsu a Bupikudi buenda. Neulua kabidi tshiamua dia mudimu mu diambuluisha dia disangisha dia Isalele.
Bana betu baluma ne bakaji, mu matuku alua, Yezu Kilisto neapingana pa buloba bua kuikala Masiya mu bidimu tshinunu. Ke bualu kayi lelu ndi nubikila bua nenu kujidila moyo wenu kudi Yezu Kilisto. Ndi nubikila bua nenu kuambuluisha bua kusangisha Isalele udi mutangalaka ne kulongolola ba pa buloba bua Dilua Dibidi dia Mukalenga. Ndi nubikila bua kuakula bua Kilisto, kujadika bua Kilisto, kuikala ne ditabuja mu Kilisto, ne kusanka mu Kilisto!
Luayi kudi Kilisto, ne lambulayi [anyima] yenu mijima” kudiye. Etshi tshidi malu masokoka bua moyo wa disanka!
Malu malengela a tshilualua, bana betu baluma ne bakaji, bualu Mukalenga udi ulua kabidi. Malu malengela a tshilualua bualu Mukalenga udi munkatshi mua kukumbaja mudimu wenda. Malu malengela a tshilualua patuikala batangija mioyo ne nsombelu bietu kudi Yezu Kilisto.
Ndi njadika ne kanemu ne Yezu Kilisto udi Muana wa Nzambi. Ndi muyidi Wenda. Ndi ne disanka bua kuikala muyidi Wenda. Mu Dilua Dibidi Dienda “ butumbi bua Yehowa nebubuluidibue, ne bantu bonsu nebabutangile diatshimue.” Nedikala dituku diuwula ne disanka bua badi balulama!
Ku bukola bua nsapi ya buakuidi bua tshijila indi nayi, ndi ngamba bulelela ebu kunudi ne kudi ba pa buloba bonsu! Mu dîna dia Yezu Kilisto, amena.
© 2024 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, November 2024. Tshiluba. 19349 760