Molaetsa oa Khoeli Bakeng Sa Matlafalo ea Bacha Ts´itoe 2024

Tsoalo ea Jesu

Ka David A. Edwards

Limakasine tsa Kereke

Ithute ka ketsahalo ena e tloaelehileng ea Keresemese le kamoo e re thusang ho tsepamisa maikutlo ho Mopholosi.

Lits´oants´o ka Caroline Vibbert

Bethlehema

Bethlehema e bolela “ntlo ea bohobe” ka Seheberu. Ka linako tse ling e bitsoa motse oa Davida, oo ho porofetiloeng hore Messia o tla tsoa lelokong la oona (bona Jeremia 23:5; Johanne 7:42). Samuele o ile a tlotsa Davida hore e be morena oa Bethlehema (bona 1 Samuele 16:1–13). Ho ile ha porofetoa hore Messia o tla tsoalloa moo (bona Mikia 5:2).

“Ho loketse hakaakang hore [Jesu Kreste], ‘bohobe ba bophelo’, a tsoe ‘ntlong ea bohobe.’”

Moetapele Russell M. Nelson, “Naheng Ena e Halalelang” Liahona, Hlakola 1991, 13.

Ntlo ea Baeti

Lentsoe la Sekherike bakeng sa ntlo ea baeti le ka bolela bolulo bo bong le bo bong ba nakoana, ho kenyelletsa le phaposi ea baeti. Maria a “belehela [Lesea Kreste] sejelong; ho ne ho se sebaka sa bona tlung ea baeti” (Luka 2:7). (Phetolelo ea Joseph Smith e re “matlo a baeti.”) “Ha ho sebaka” ho ka bolela hore ba ile ba khutlisoa kapa hore ha ho sebaka seo ba ka beng ba ile ba lula ho sona se neng se e-na le sebaka sa ho belehela ngoana. Leha ho le joalo, ba ile ba ea sebakeng se seng moo ho neng ho e-na le sejelo.

Sejelo

Sejelo ke lebokose kapa sejana se phahameng se bolokang lijo tsa liphoofolo. Mehleng ea khale-khale Judea, boholo ba tsona li ne li entsoe ka majoe. Matlo a baeti a ne a e-na le mabala a bohareng a nang le lijelo, le malapeng matlo a mangata a ne a boetse a e-na le lijelo ka phaposing e kholo e le hore liphoofolo li ke li bolokoe moo bosiu bo le bong.

Liaparo tse Thatelang

Bo-mme ba ne ba thatela masea a sa tsoa tsoaloa (ba a phuthela ka kobo kapa lesela) ka lilemo tse likete. Sena sea ba khutsisa le ho ba ts′elisa ka mor′a ho ts′oha ha ba tsoile popelong. Lesela leo Maria a neng a le sebelisa e ka ba le neng le e-na le lets′oao le ikhethileng lelapeng leo.

Maria le Josefa

E ne e le batho ba molemo ba lokileng, ´me e le litloholo tsa Davida ka bobeli. E mong le e mong o ne a etetsoe ke lengeloi ho lokisetsa tsoalo ea Mopholosi (bona Mattheu 1:18–25; Luka 1:26–38). Ba tsamaile 100–140 km (maele tse 60–90) ho ea Bethlehema. Maria o ne a imme nakong ea leeto.

Balisa

Balisa ba ne ba alositse mehlape ea bona haufi le Bethlehema. Ho ea ka litsebi tse ling, ke linku feela tse neng li etsa lihlabelo tsa tempele tse neng li lumelloa ho ruuoa haufi le motse. Kahoo e ka ′na eaba balisa bana ba ne ba alositse linku tse neng li tla emela sehlabelo sa Jesu Kreste molemong oa rona (bona Moshe 5:6–7). Ba ile ba siea mehlape ea bona ho ea bona Messia, eo sehlabelo sa hae se neng se tla felisa lihlabelo tsa liphoofolo.

Ngoana Kreste

Jesu Kreste ke khubu ea sets′oants′o sa Tsoalo ea Jesu—le bophelo ba rona.

“Ke ts′epa hore u tla nka nako nakong ena ea Keresemese ho lula metsotsoana e seng mekae e khutsitseng le ho lumella Moea oa Mopholosi hore o u futhumatse le ho u tiisetsa. … Lula ka khutso le lesea leo le lenyenyane ′me u tle u matlafetse moeeng. … Etsa hore motsotso oo e be oa phomolo le o khathollang ´me oa tiisetso le nchafalo.

“Molimo a u fe hlohonolofatso eo ea Keresemese ha uena, le ′na, re paka ka Mopholosi Jesu Kreste—bohlokoa ba Hae bophelong ba rona, bophelong bohle ba batho, le morerong oa ho phela.”

Moholo D. Todd Christofferson oa Lekhotla la Baapostola ba Leshome le Metso e ´Meli, “E ba le Khotso,” Liahona, Ts′itoe. 2015, 37.

© 2024 by Intellectual Reserve, Inc. All rights reserved. E hatisitsoe USA. Tumello ea Senyesemane: 6/19. Tumello ea Phetolelo: 6/19. Phetholelo ea Monthly For the Strength of Youth Message, December 2024. South Sotho. 19346 739

Lintlha

1. Phetolelo ea Joseph Smith, Luka 2:7 (in Luka 2:7, mongolo o botlaaseng ba leqephe b).

2. Bona Andy Mickelson, “An Improbable Inn: Texts and Tradition Surrounding Luke 2:7,” Studia Antiqua vol. 14, no. 1 (Mots′eanong 2015).

3. Bona Andy Mickelson, “An Improbable Inn.”

4. Bona Russell M. Nelson, “Khotso le Thabo ea ho Tseba Hore ′Moloki O oa Phela,” Liahona, Ts′itoe 2011, 19–20.

5. Bona Alfred Edersheim, The Life and Times of Jesus the Messiah, 8th ed. (1907), 1:186.