Shoko reMwedzi Woga Woga reFor the Strength of Youth (ZveRusimbiso rweVechidiki), Zvita 2024

Kuzvarwa kwaJesu

NaDavid A. Edwards

Mamagazini eChechi

Dzidza pamusoro pechiitiko ichi chinozivikanwa cheKirisimasi uye kuti chinotibatsira sei kunangisa pfungwa pana Muponesi.

Mifananidzo naCaroline Vibbert

Betrehema

Betrehema zvinoreva “imba yechingwa” muchiHeberu. Dzimwe nguva inodaidzwa kuti guta raDavidi, uyo kubva mudzinza rake Mesiasi akaporofitwa kuti aizouya (ona Jeremiah 23:5; Johane 7:42). Samueri akazodza Davidi kuva mambo muBetrehema (ona 1 Samueri 16:1–13). Zvakaporofitwa kuti Mesiasi aizozvarirwa ikoko (ona Mika 5:2).

“Zvaiva zvakakodzera sei kuti [Jesu Kritsu], ‘chingwa choupenyu,’ aizouya kubva ‘muimba yechingwa.’”

Mutungamiri Russell M. Nelson, “In This Holy Land,” Liahona, Kukadzi 1991, 13.

Imba yevaeni

Shoko rechiGiriki reimba yevaeni rinokwanisa kureva papi zvapo pokugara kwenguva pfupi, kusanganisira mupanda wevaeni. Maria “akaradzika [Mwana Kristu] muchidyiro; nokuti vakashaiwa nzvimbo mumba mavaeni” (Ruka 2:7). (Dudziro yaJoseph Smith inoti “dzimba dzavaeni.”) “Vakashaiwa nzvimbo” zvinokwanisa kureva kuti vakadzingwa kana kuti hapana nzvimbo yavaikwanisa kugara yaiva nenzvimbo yekuzvarira mwana. Zvisinei hazvo, vakaenda kune imwe nzvimbo iyo yaiva nechidyiro.

Chidyiro

Chidyiro ibhokisi rakakwirira kana chinwiro chinochengeterwa zvekudya zvezvipfuyo . MuJudea yechinyakare, izvi kazhinji zvaiva zvakagadzirwa nemabwe. Dzimba dzevaeni dzaiva nezvivanze zvepakati pezvivako zvine zvidyiro uye dzimba zhinji dzaivawo nezvidyiro mumupanda mukuru kuitira kuti zvipfuyo zvikwanise kuchengetwa imomo usiku hwose.

Micheka Yekuputira

Vanaamai vakagara vachiputira vana vachangozvarwa (vachivaputira mugumbeze kana mucheka) kwezviuru zvamakore. Izvi zvinovadzikamisa nekuvanyaradza mushure mevhundutso yekubuda muchibereko. Mucheka wakashandiswa naMaria unogona kunge waiva nechiratidzo chakakosha chine revo kumhuri yavo chete.

Maria naJosefa

Vaiva vanhu vakanaka uye vakarurama, uye vose vaiva zvizvarwa zvaDavidi. Umwe neumwe wavo akanga ashanyirwa nengirozi mukugadzirira kuzvarwa kweMuponesi (ona Mateo 1:18–25; Ruka 1:26–38). Vakafamba makiromita 100–140 (mamaira 60–90) kuenda kuBetrehema. Maria aiva nepamuviri panguva yerwendo urwu.

Vafudzi

Vafudzi vaiva vachifudza zvipfuyo zvavo pedyo neBetrehema. Maererano nedzimwe nyanzvi dzezvedzidzo, makwai aichengeterwa zvibayiro zvetemberi ndiwo chete aibvumirwa kufudzwa pedyo neguta. Saka vafudzi ava vanogona kunge vaifudza makwai aizomiririra kuzvipira kwaJesu Kristu kwatiri (ona Mosesi 5:6–7). Vakasiya zvipfuyo zvavo kuti vanoona Mesiasi, uyo kuzvipira kwerudzikinuro kwake kwaizobvisa zvibayiro zvemhuka.

Mwana Kristu

Jesu Kristu ndiye munhu akakosha zvikuru wechiitiko cheKuzvarwa kwaJesu—uye weupenyu hwedu.

“Ndine tariro yekuti muchatora nguva yeKirisimasi ino kugara pasi kwenguva shomanani munyerere uye motendera kuti Mweya weMuponesi ukudziisei uye ukusimbisei. … Garai pasi munyerere nemucheche muduku iyeyo uye mobvapo masimbiswa pane zvepamweya. … Tenderai kuti nguva iyoyo ive yezororo uye yekumutsiridza uye yesimbiso uye yevandudzo.

“Mwari vakupei ropafadzo iroro Kirisimasi ino apo iwe, neni, patinopa uchapupu hweMuponesi Jesu Kristu—hukoshi Hwake kuupenyu hwedu, kuupenyu hwese hwevanhu, uye kuchinangwa chaicho chekurarama.”

Gosa D. Todd Christofferson veChikwata chaVaApositora vane Gumi naVaviri, “Be at Peace,” Liahona, Zvita 2015, 37.

© 2024 by Intellectual Reserve, Inc. All rights reserved. Chakadhindwa muUSA. Mvumo yemuChirungu: 6/19. Mvumo yeDudziro: 6/19. Dudziro yeMonthly For the Strength of Youth Message, December 2024. Shona. 19346 731

Manotsi

1. Joseph Smith Translation, Luke 2:7 (in Luke 2:7, footnote b).

2. Ona Andy Mickelson, “An Improbable Inn: Texts and Tradition Surrounding Luke 2:7,” Studia Antiqua bhuku 14, nhamba 1 (Chivabvu 2015).

3. Ona Andy Mickelson, “An Improbable Inn.”

4. Ona Russell M. Nelson, “The Peace and Joy of Knowing the Savior Lives,” Liahona, Zvita 2011, 19–20.

5. Ona Alfred Edersheim, The Life and Times of Jesus the Messiah, 8th ed. (1907), 1:186.