Stanap long Ol Ples We Oli Putum Yu long Hem
Thomas S. Monson
Fas Kaonsela long Fas Presidensi
Bae yumi go aot mo sevem olgeta we oli bin foldaon long saed blong rod, mekem se i nogat wan sol we i impoten bae i lus.
Yumi kam tugeta long naet ia olsem wan bigfala mo strong bodi blong prishud, tugeta long ples ia long Konfrens Senta mo long ol ples raon long wol. Sam oli holem Aronik Prishud, mo ol narawan oli holem Melkesedek Prishud.
Presiden Stephen L Richards, we i bin wok olsem wan kaonsela blong Presiden David O. McKay, i bin talemaot, “Simpol mining blong Prishud hem i ‘paoa blong God we Hem i givim wetem tras i go long man.’” Hem i gohed; “Mining ia, mi ting se, hem i stret.” Be from ol risen we yumi stap yusum, mi laekem blong talem se mining blong Prishud long saed blong givim seves, mo fulap taem mi stap singaotem se hem i ‘plan blong seves we i stret evriwan.’ … Hem i wan tul blong givim seves … mo man we i no stap yusum bae i save lusum, from oli bin talem long yumi tru long revelesen se hem we i no wantem paoa ia ‘bae oli no kaontem hem se hem i klin inaf blong stanap.’”1
Long Stek blong Paeonia, we i stap long Sot Lek Siti, long ples we mi bin kasem tugeta Aronik mo Melkesedek Prishud, oli bin tijim mifala blong save olgeta skripja, mo tu ol seksen 20, 84, mo 107 blong Doktrin mo Ol Kavenan. Long ol seksen ia yumi lanem abaot prishud mo Gavman blong Jos.
Tedei long naet mi wantem tokbaot bigwan wan ves long Seksen 107: “Evri man i mas lanem diuti blong hem mo i mas tekem aksen long ofis we oli bin putum hem long hem, wetem fasin blong wok strong wetem strong tingting.”2
Presiden Harold B. Lee oltaem i tijim: “Taem wan i kam blong kasem prishud, hem i kam wan we i ripresentem o wok blong Lod. Hem i mas tingting long koling blong hem olsem se hem i stap mekem wok we Lod i sendem hem from.”3
Yumi lanem tu long ol seksen ia ol wok blong kworom blong ol presidensi mo tru samting se yumi responsibol long ol narawan mo long yumiwan.
Mi biliv strong se Jos tedei i moa strong bitim evri nara taem. Ol level blong ol aktiviti blong ol yut blong yumi i testifae se jeneresen ia i wan jeneresen blong fet mo divosen i go long trutok. Be i gat sam we oli foldaon long saed blong rod, we oli faenem ol nara intres we i lidim olgeta blong no mekem ol wok blong olgeta long Jos. Yumi no mas lusum ol sol ia we i gat valiu long hem.
I gat ol memba we oli stap gro long medel blong olgeta we oli save kam ol elda we oli no faenem olgeta long ol Miting blong Jos o stap mekem ol wok we Jos i askem olgeta blong mekem. Situesen ia oli save mo oli mas stretem. Wok hem i blong yumi. Responsabiliti i nid blong yumi asaenem mo putum fulap wok i go fored mo no slo.
Ol presidensi blong kworom blong Aronik Prishud, andanit long lidasip blong bisoprik mo kworom blong ol advaesa, oli save kasem paoa blong go kasem mo sevem ol sol.
Lod i talem, “Tingbaot se praes blong wan sol i bigwan long ae blong God; … !mo bae glad blong hem i bigwan tumas from sol we i sakem sin!”4
Samtaem wok i luk olsem i tumas. Yumi save leftemap tingting long eksperiens blong Gidion blong bifo, we wetem strong paoa blong hem, hem i mas faet wetem ol man Midian mo ol man Amalek. Bae yu tingbaot olsem wanem Gidion mo ami blong hem i fesem ol strong fos we i bigwan tumas long saed blong ol tul mo long namba. Buk blong Jajes insaed long Ol Testeman i raetem se enemi we i kam wan, ol man Midian mo ol man Amalek, “oli kavremap olgeta ples olsem anis nomo. Mo ol kamel blong olgeta oli plante tumas, olsem sanbij long solwota.”5 Gidion i go long God we I gat fulap Paoa from paoa blong hem.
Long sapraes blong hem, Lod i talem long Gidion se ol man blong faet blong hem oli fulap tumas blong Lod i tekemaot olgeta long ol han blong ol enemi blong olgeta, sapos nomo oli talem se, “Sapos oli win, bambae oli ting se oli win long paoa blong olgeta nomo.”6 Lod i bin talem long Gidion blong talemaot long ol pipol blong hem: “Sapos sam long yumi oli fraet, i gud oli gobak long ples blong olgeta. I gat twante tu taosen man oli gobak long ples olgeta, ten taosen nomo oli stap.”7
Afta Lod i talem, “No, ol man ia oli plante tumas yet ya.”8 Hem i talem long Gidion blong tekem ol man ia i go long wota blong luk olsem wanem oli dring wota. Olgeta we oli kasem wota long han blong olgeta mo sakem i go long maot blong olgeta, oli putum olgeta long wan grup, mo olgeta we oli nildaon mo pusum hed blong olgeta i go long wota mo dring, oli putum olgeta long wan nara grup. Lod i talem long Gidion, “Bambae mi yusum ol tri handred man ya nomo blong sevem yufala, mo blong mekem yufala i winim ol man Midian ya long faet. Be ol narafala man ya, yu talem long olgeta blong oli gohom.”9
Gidion i gobak long ol ami blong hem mo talem long olgeta, “Yufala i girap; Hae God i putum olgeta ya long han blong yumi finis!”10 Mo hem i seperetem ol tri handred man ia i go long tri kampani, mo hem i putum wan pupu long han blong evri man, wetem ol graonpot we i gat laet i stap laet smolsmol insaed long ol graonpot ya. Mo hem i bin talem long olgeta:
“Taem yumi go kolosap long ples blong ol man Midian, bambae yufala i mas lukluk i kam long mi. Wanem samting we mi bambae mi mekem, yufala tu bambae i mas mekem olsem.
“Taem mi wetem kampani blong mi, mifala i blu pupu, bambae yufala tu i mas blu pupu … mo yumi singaot bigwan se, Yumi faet long nem blong Hae God mo long nem blong Gidion.” Afta hem i bin talem wetem paoa, “Folem mi.” Ol stret toktok blong hem i, “Wanem samting we mi mekem, yufala tu bambae yufala i mas mekem olsem.”11
Long saen blong lida, ol man blong Gidion oli blu pupu mo brekem ol graonpot mo oli bin singaot, “Yumi faet long nem blong Hae God mo long nem blong Gidion.” Ol skripja oli raetem ol risal blong faet ia we oli bin disaed gud long hem: “Oli stanap raon long ples,” mo oli bin winim viktri.12
Hom tijing i pat blong plan blong tedei blong sevem ol man. Taem we Presiden David O. Mckay i bin talemaot long ol Jeneral Atoriti, hem i givim kaonsel se: “Hom tijing hem i wan long ol janis we i gat bigfala nid mo fulap blesing blong hem, blong helpem mo givim insperesen blong kaonselem mo lidim ol pikinini blong Papa. … Hem i wan seves we i tabu, mo wan tabu koling. Hem i wok blong yumi olsem ol Hom Tija blong karem tabu spirit ya i go long evri hom mo hat.”13
Long sam eria we i no gat inaf paoa blong Melkesedek Prishud, ol stek presiden mo ol bisop, tugeta wetem misin presiden, oli save yusum ol fultaem misinari blong visitim ol les-aktiv mo ol famli we sam nomo i memba. Hemia i no mekem spirit blong misinari i laef bakegen nomo long hom, be tu, i givim janis blong yumi save kasem ol gudfala riferol.
Long ol yia i pas, taem mi bin stap visitim fulap stek truaot long wol, i bin gat ol stek we ol wod mo stek lida blong olgeta oli aot long nid o ansa long ol wok, oli bin stop blong foldem han, rolem han blong set blong olgeta, mo, wetem help blong Lod, oli go wok mo tekembak ol man we oli gat fulap valiu mo oli naf blong kasem Melkesedek Prishud mo, wetem ol waef mo ol pikinini blong olgeta, blong go long tabu tempol blong mekem ol endaomen mo siling blong olgeta.
Long wan sot wei bae mi talem sam eksampol:
Long wan visit i go long Milkrik Stek long Sol Lek Siti sam yia i pas, mi bin lanem se ova long 100 brata we oli bin ol elda we oli stap rere blong go long misin, oli bin odenem olgeta i kam ol elda long yia ia. Mi bin askem long Presiden James Clegg wanem nao sikret blong sakses blong hem. Hem i bin gat tingting we i stap daon mo no wantem flas long sakses blong hem mo no toktok, be wan long ol kaonsela blong hem i talem se Presiden Clegg, taem we hem i bin luk save jalenj, hem i bin tekem long hemwan koling ia mo mekem wan praevet miting bitwin hem mo wan wan long evri elda we oli stap rere blong go long misin. Long miting ia, Presiden Clegg bae i tokbaot tempol blong Lod, mo ol tabu wok blong sevem man mo ol kavenan we oli tokbaot bigwan longwe, mo afta bae i klosem wetem kwestin ia: “Bae yu wantem blong tekem swit waef mo ol pikinini blong yu we oli gat fulap valiu i go long haos blong Lod, blong bae yufala i save stap olsem wan famli we i blong oltaem truaot long ol taem we i no save finis?” Wan tok tangkyu i folem, proses ia blong tekem wan i kambak long jos i bin tekem ples, mo oli bin kasem gol we i bin stap.
Long 1952 fulap long ol famli long Rose Park Third Wod oli bin ol memba we ol papa o ol hasban oli bin holem Aronik Prishud nomo, bitim Melkesedek Prishud. Oli bin singaotem Brata L. Brent Goates blong wok olsem Bisop. Hem i bin invaetem wan brata we i no aktiv long wod, Ernest Skinner, blong help aktivetem 29 brata we oli ol adalt long wod we oli bin holem ofis blong tija insaed long Aronik Prishud mo blong helpem ol man ia mo ol famli blong olgeta blong go long tempol. Olsem wan memba we i no strong, Brata Skinner i bin tingting tu fastaem be afta i bin talem se bae hem i mekem wanem hem i save mekem. Hem i stat blong visitim ol lesaktiv tija we oli ol adalt, mo traem blong helpem olgeta blong luksave wok blong olgeta olsem ol prishud lida long ol hom blong olgeta mo olsem ol hasban mo ol papa long ol famli blong olgeta. I no longtaem, hem i askem sam long ol lesaktiv brata ia blong helpem hem long wok blong hem. Wan afta wan oli kam fulwan long Jos bakegen mo tekem ol famli blong olgeta i go long tempol.
Wan dei klak blong wod i kamaot long laen blong ol man we oli stap laenap blong pem ol samting long stoa blong talem tata long las grup we bae oli go long tempol. Olsem las man blong go, man ia i talem: “Mi bin stanap mo lukluk taem evri man long las grup ia i kambak fulwan long wod blong mifala mo go long tempol. Sapos nomo mi save pikjarem olsem wanem i naes tumas insaed long tempol, mo olsem wanem bae i save jenisim laef blong mi blong oltaem, bae mi mi no wan long ol las 29 ia blong sil insaed long tempol.”
Long wanwan stori ia, i bin gat fo samting we i bin lidim olgeta i go long sakses:
-
Janis ia blong go mo tekembak wan i kam long jos i bin tekem ples long level blong wod.
-
Bisop blong wod i bin tekempat tu.
-
Oli bin provaedem ol tija we oli kwalifae mo gat insperesen.
-
Oli bin lukluk gud long wanwan man mo woman.
Ol Brata, letem yumi tingbaot kaonsel blong King Benjamin: “Taem we yufala i stap wok blong ol narafala man, yufala i stap mekem wok blong God blong yufala nomo.”14
Bae yumi kasem mo sevem olgeta we oli nidim help blong yumi blong leftemap olgeta i go long ol rod we i moa antap mo long wan wei we i moa gud. Bae yumi putum strong tingting blong yumi long ol nid blong olgeta we oli stap holem prishud mo ol waef mo ol pikinini blong olgeta we oli bin lus long rod blong aktiviti. Bae yumi lisin long ol mesej we oli no talem we i kam long ol hat blong olgeta:
Lidim mi, tekem mi, wokabaot long saed blong mi,
Helpem mi faenem rod.
Tijim mi olgeta samting ia
Blong gobak stap wetem Hem sam dei.15
Wok blong riaktivesen i no wok blong ol man we oli stap les mo drim. Ol pikinini oli gro, ol mama mo ol papa oli kam olfala, mo taem i no wet long eniman. No muvum kwaet toktok blong tabu spirit i go long we; be, yu mekem wanem i talem yu blong mekem, mo bae Lod bae i openem rod.
Fulap taem i nidim tabu klin fasin we i fasin blong save wet longtaem. Olsem wan bisop mi filim kwaet toktok blong Tabu Spirit wan dei blong ringim wan man we waef blong hem i aktiv long Jos mo ol pikinini blong hem tu. Man ia, i neva ansa. Hem i wan dei long taem blong ples i hot taem mi bin noknok long skrin blong doa blong Harold G. Gallacher. Mi save luk Brata Gallacher i stap sidaon long jea blong hem mo i stap ridim nius pepa. “Hu ya?” hem i bin askem, be i no lukluk i kam antap.
“Bisop blong yu,” mi ansa. “Mi kam blong luk yu mo askem strong blong yu kam long Jos wetem famli blong yu long ol miting blong yumi.”
“No, mi bisi tumas,” hem i bin ansa. Hem i neva lukluk i kam antap. Mi bin talem tangkyu long hem blong lisin long mi mo mi bin aot long ol step blong doa.
Famli Gallacher i bin muv i go long Kalifonia i no longtaem i pas. Ol yia oli bin pas. Afta, olsem wan memba blong Kworom blong Ol Twelef, mi bin stap wok long ofis blong mi wan dei taem we sekretari blong mi i ring mo talem: “Wan Brata Gallacher we i bin stap long wod blong yu i wantem toktok wetem yu. Hem i stap ia long ofis blong mi.”
Mi bin ansa, “Askem hem sapos nem blong hem Harold G. Gallacher we, wetem famli blong hem, oli bin stap long Vissing Place long West Tempol mo Fifth South.”
Hem i talem, “Man ia nao.”
Mi askem hem blong sendem man ia i kam insaed. Mifala i bin gat wan gudfala storian tugeta abaot famli blong hem. Hem i bin talem long mi, “Mi kam blong talem sori blong no kamaot long jea blong mi mo letem yu kam long doa long taem we ples i hot long sam yia i pas.” Mi bin askem long hem sapos hem i aktiv long Jos. Wetem wan smael we i slak, hem i ansa: “Mi mi seken kaonsela long bisoprik blong mifala long wod.” Invitesen blong yu blong kamaot mo kam long Jos, mo ansa blong mi we i no gud, i mekem mi wokem tingbaot mo gat strong tingting blong mekem samting ia.”
Mi mo Harold i bin stap visit fulap taem bifo hem i bin lus. Ol Gallacher mo ol pikinini blong olgeta oli bin karem fulap koling insaed long Jos. Wan long ol yangfala bubu blong olgeta i stap wok olsem wan fultaem misinari naoia.
I go long ol fulap misinari we i stap lisin long naet ia, mi serem ol lukluk se ol sid blong testemoni fulap taem oli no mekem rus blong olgeta mo flaoa kwiktaem. Bred we oli sakem long wota i kambak, fulap taem, be afta nomo long fulap dei i pas. Be hem i kambak.
Mi ansarem telefon blong mi we i ring wan naet blong harem wan voes i askem, “Yu no famli wetem wan elda Monson we i bin wok olsem wan misinari long New England Misin plante yia i pas finis?”
Mi bin ansa se no. Man we i stap ring i introdiusum hemwan olsem Brata Leonardo Gambardella afta hem i talem se wan Elda Monson mo wan Elda Bonner long haos blong hem long taem i pas, oli bin serem testemoni blong olgeta long hem mo waef blong hem. Oli bin lisin be oli no bin mekem wan samting blong putum i go long praktis wanem oli bin tijim long tufala. Afta long samtaem, oli bin muv i go long Kalifonia, we 13 yia afta, oli bin faenem trutok bakegen mo oli bin jenisim laef mo kasem baptaes. Afta Brata Gambardella i bin askem sapos i gat wan wei we hem i save kasem ol elda ia we oli bin visitim olgeta fastaem, blong hem i save talemaot bigfala tangkyu blong hem long olgeta from ol testemoni blong olgeta we bin stap wetem hem mo waef blong hem.
Mi bin jekem ol rekod. Mi bin kasem ples we ol elda oli stap long hem. Yu save pikjarem long maen blong yu sapraes blong olgeta taem, naoia we oli mared finis wetem ol famli blong olgeta wan, taem mi bin ringim olgeta mo talem gudfala nius ia long olgeta—bigfala praes ia blong ol hadwok blong olgeta blong longtaem. Oli tingbaot wan taem nomo ol Gambardella. Mi bin mekem wan telefon kol we mifala evriwan i save toktok long hem blong oli save talem kongratulesen blong olgeta wanwan mo welkamem olgeta i kam long Jos. Oli bin mekem. I bin gat wota blong ae, be hem i ol krae blong glad.
Edwin Markham i raetem ol laen ia:
I gat wan fiuja we i mekem yumitu brata;
I no gat man i folem rod hemwan.
Evri samting yumi sendem i go long laef blong ol narafala man
I kambak long laef blong yumi bakegen.16
Tedei long naet mi prea se evriwan long yumi we i holem prishud, bae i filim save responsabiliti blong yumi, se yumi, olsem Gidion blong bifo, yumi save stanap wanwan long ples we oli putum yumi mo, olsem wan, yumi folem Lida blong yumi—we i Lod Jisas Kraes—mo profet blong Hem, Presiden Gordon B. Hinckley. Letem yumi kasem mo sevem olgeta we oli bin foldaon long saed blong rod, mekem se i nogat wan sol we i impoten bae i lus.
Long nem blong Jisas Kraes, amen.