Magbarug sa Gitudlo Kanimo nga Dapit
Thomas S. Monson
Unang Magtatambag sa Unang Kapangulohan
Unta tabangan nato ug luwason kadtong kinsa nangawala na, nga walay usa nga bililhong kalag ang mawala.
Nagkatigum kita karong gabhiona isip usa ka gamhanan nga pundok sa pagkapari, dinhi sa Conference Center ug sa mga dapit sa tibuok kalibutan. Ang uban naghupot sa Aaronic nga Pagkapari, samtang ang uban naghupot sa Melchizedek nga Pagkapari.
Si Presidente Stephen L Richards, kinsa nagserbisyo isip magtatambag ngadto ni Presidente David O. McKay, namahayag, “Ang Pagkapari kasagaran yano nga gipasabut isip ‘ang gahum sa Dios nga gitugyan ngadto sa tawo.’” Mipadayon siya: “Kini nga depinisyon, sa akong hunahuna, tukma. Apan sa praktikal nga mga katuyoan gusto nakong ipatin-aw nga ang Pagkapari kabahin sa serbisyo ug kasagaran ako ning gitawag og ‘ang hingpit nga plano sa serbisyo.’ … Usa kini ka instrumento sa pag-alagad … ug ang tawo nga mapakyas sa paggamit niini lagmit makawala niini, tungod kay gisultihan kita pinaagi sa pagpadayag nga siya kinsa nagbalewala niini ‘dili takus nga iphon nga mobarug.’”1
Sa Pioneer Stake, nga nahimutang sa Siyudad sa Salt Lake ug diin nakadawat ko sa Aaronic ug Melchizedek nga Pagkapari, gitudloan kami nga mamahimong pamilyar sa mga kasulatan, lakip na ang mga seksyon 20, 84, ug 107 sa Doktrina ug mga Pakigsaad. Niini nga mga seksyon atong makat-unan ang kabahin sa pagkapari ug pangagamhanan sa Simbahan.
Karong gabhiona gusto nakong hatagan og gibug-aton ang usa ka bersikulo gikan sa Seksyon 107: “Busa, karon himoa ang matag tawo nga makakat-on sa iyang katungdanan, ug pagbuhat sa buhatan diin siya natudlo, diha sa tanan nga kakugi.”2
Si Presidente Harold B. Lee kanunayng mitudlo: “Kon ang usa ka tawo mahimong maghupot sa pagkapari, mahimo siyang sulugoon sa Ginoo. Kinahanglan siyang maghunahuna sa iyang balaang tawag [calling] ingon og siya anaa sa pagkasinugo sa Ginoo.”3
Nakat-unan usab nato gikan niini nga mga seksyon ang mga katungdanan sa kapangulohan sa korum ug ang katinuod nga responsable kita sa uban dili lamang sa atong kaugalingon.
Mahugtanon akong nagtuo nga ang Simbahan karon mas lig-on kay sa kaniadto. Ang mga lebel sa kalihokan sa atong mga kabatan-onan makapamatuod nga kini usa ka henerasyon sa pagtuo ug debosyon ngadto sa kamatuoran. Gani adunay pipila nga nangawala, kinsa nakakita og laing mgainteres nga nakaagni nila sa pagpasagad sa ilang mga katungdanan sa Simbahan. Kinahanglang dili nato wagtangon kining bililhong mga kalag.
Adunay daghang umaabot nga mga elder kinsa wala diha sa mga miting sa Simbahan ni nagtuman sa mga buluhaton sa Simbahan. Kini nga sitwasyon mahimo ug kinahanglan nga masolusyunan. Ang buluhaton atoa. Ang responsibilidad kinahanglan nga ihatag ug ang paningkamot buhaton sa walay paglangay.
Ang mga kapangulohan sa mga korum sa Aaronic nga Pagkapari, ubos sa pagpangulo sa bishopric ug mga tigtambag sa korum, mahimong mahatagan og gahum sa pagtabang ug pagluwas.
Ang Ginoo miingon, “Hinumdumi ang bili sa mga kalag mahinungdanon sa panan-aw sa Dios; … ug unsa ka dako ang iyang hingpit nga kalipay diha sa kalag nga naghinulsol!”4
Usahay ang buluhaton daw bug-at kaayo. Makaangkon kita og maayong kadasig gikan sa kasinatian ni Gedeon sa unang panahon, kinsa, uban sa iyang gamayng kasundalohan, makiggubat sa mga Madianhon ug mga Amalekanhon. Mahinumduman nimo kon giunsa ni Gedeon ug sa iyang kasundalohan pagbatok sa dili mabangbang nga kusog sa mga kasundalohan nga hilabihan ka gamhanan nga labaw kaayo sa ekipo ug ang gidaghanon. Ang basahon sa Mga Maghuhukom sa Daang Tugon nagrekord nga ang hiniusang kaaway, ang mga Madianhon ug ang mga Amalekanhon, “nanagpahaluna sa walog ingon sa mga dulon sa gidaghanon; ug ang ilang mga kamelyo dili maisip, ingon sa balas nga anaa sa baybayon sa gidaghanon.”5 Si Gedeon miadto sa Labing Gamhanan nga Dios alang sa iyang kalig-on.
Sa iyang pagkakurat, gitambagan si Gedeon sa Ginoo nga ang iyang kasundalohan daghan ra kaayo alang sa Ginoo sa pagtugyan sa kaaway ngadto sa ilang mga kamot, basin sila moingon, “Ang akong kaugalingong kamot maoy nakaluwas kanako.”6 Gimanduan si Gedeon sa pagpahayag sa iyang katawhan: “Bisan kinsa ang napun-an sa kahadlok ug nangurog, pumauli siya ug pumahawa … gikan sa bukid sa Galaad. Ug may mingpauli sa katawhan nga kawhaan ug duha ka libo; ug may nahibilin nga napulo ka libo.”7
Dayon miingon ang Ginoo, “Ang katawhan daghan pa kaayo.”8 Iyang gimanduan si Gedeon nga dad-on ang mga katawhan ngadto sa tubig aron mag-obserbar sa paagi nga sila nag-inom sa tubig. Kadtong motilap sa tubig gibutang sa usa ka grupo, ug kadtong moluhod sa pag-inom gibutang sa lain. Miingon ang Ginoo ngadto ni Gedeon, “Pinaagi niining tulo ka gatus ka tawo nga mingtilap ako magaluwas kanimo, ug magahatag sa mga Madianhon nganha sa imong kamot: ug ang tibuok nga katawhan papaulia ang tagsatagsa ka tawo sa iyang kaugalingong dapit.”9
Si Gedeon mibalik ngadto sa iyang kampo ug miingon ngadto kanila, “Tumindog ka; lumugsong ka ngadto sa kampo kay gihatag ko na kana nganha sa imong kamot ang panon sa Madian.”10 Ug gibahin niya ang tulo ka gatus ka tawo sa tulo ka pundok, ug gibutang niya diha sa mga kamot nilang tanan ang mga trumpeta, ug mga tibod nga walay sulod lakip ang mga sulo sa sulod sa mga tibod. Ug siya miingon kanila:
“Tan-awa ako ninyo, ug buhaton ninyo ang ingon niini: ug ania karon, kong ako moadto sa kinagawasang dapit sa kampo, ug mao kini, nga ingon sa akong buhaton, buhaton usab ninyo.
“Kung ako magahuyop sa trumpeta, ako ug ang tanan nga mouban kanako, nan huypa usab ninyo ang mga trumpeta sa tanang daplin sa kampo ug mag-ingon, Ang espada ni Jehova, ug kang Gedeon.” Siya dayon miingon, “Sunod kanako.” Ang Iyang eksakto nga mga pulong mao, “Ingon sa akong buhaton, buhaton usab ninyo.”11
Sa sinyas sa lider, ang panon ni Gedeon mihuyop sa mga trumpeta ug gibuak ang mga tibod ug misiyagit, “Ang espada ni Jehova, ug ni Gedeon.” Ang kasulatan nagrekord sa resulta niini nga hukom sa gubat: “Ug sila nanindog ang tagsatagsa ka tawo sa iyang dapit,” ug ang kadaugan naangkon.12
Ang home teaching kabahin sa karon nga plano sa pagluwas. Sa dihang gipaila kini ni Presidente David O. McKay sa tanang General Authority, siya mitambag: “Ang home teaching usa sa atong pinakadinalian ug pinakamagantihong oportunidad sa pag-alima ug pagdasig, sa pagpanambag ug pagtudlo sa mga anak sa atong Amahan. … Balaan [kini] nga pagserbisyo, balaan nga tawag. Atong katungdanan isip mga home teacher ang pagdala sa balaang espiritu ngadto sa matag balay ug kasingkasing.”13
Sa ubang lugar diin igo-igong kalig-on sa Melchizedek nga Pagkapari ang nawala, ang mga presidente sa stake ug mga bishop, makigtambayayong sa presidente sa misyon, mahimong mogamit sa full-time nga mga misyonaryo aron sa pagbisita sa dili kaayo aktibo ug mga pamilya nga dili ang tanan miyembro sa simbahan. Dili lang kay kini nagpabuhi og balik sa espiritu sa misyonaryo diha sa panimalay, apan kini usab naghatag og maayo nga oportunidad aron maangkon ang imbitasyon sa pagtudlo sa ebanghelyo.
Sulod sa katuigan sa akong pagbisita sa daghang mga stake sa tibuok kalibutan, dihay mga stake diin ang mga lider sa ward ug stake, tungod sa panginahanglan o agig tubag sa katungdanan, mihunong sa paghimo og mga pagpangatarungan, milukot sa ilang mga bukton, ug, uban sa tabang sa Ginoo, mitrabaho ug midala og bililhong mga lalaki aron mosarang alang sa Melchizedek nga Pagkapari ug, uban sa ilang mga asawa ug mga anak, sa pagsulod sa balaang templo alang sa ilang mga endowment ug mga pagbugkos [sealing].
Sa minubo akong hisgutan ang pipila ka mga ehemplo:
Sa pagbisita sa Millcreek Stake sa Siyudad sa Salt Lake mga pila na ka tuig ang milabay, nahibaloan nako nga sobra sa 100 ka mga kaigsoonan kinsa umaabot nga mga elder naordinahan na nga mga elder sa milabayng tuig. Nangutana ko ni Presidente James Clegg sa sekreto sa iyang kalampusan. Bisan og siya ligdong kaayo sa pagdawat sa kredito, usa sa iyang mga magtatambag mipahibalo nga si Presidente Clegg, nakahibalo sa hagit, mibuhat og personal nga tawag ug miareglo og pribado nga pakigkita tali kaniya ug sa matag umaabut nga elder. Atol sa pakigkita, si Presidente Clegg mohisgot sa templo sa Ginoo, ang makaluwas nga mga ordinansa ug mga pakigsaad nga gihatagan og gibug-aton didto, ug motapus niini nga pangutana: “Dili ka ba gusto modala sa imong mahal nga asawa ug sa inyong bililhong mga anak ngadto sa balay sa Ginoo, aron kamo mahimong mahangturon nga pamilya hangtud sa kahangturan?” Mitubag og oo ang umaabut nga elder, ang proseso sa pagpaaktibo pag-usab gipadayon, ug ang tumong nakab-ot.
Niadtong 1952 kadaghanan sa mga pamilya sa Rose Park Third Ward mga miyembro kansang mga amahan o mga bana naghupot lamang og Aaronic Priesthood, kay sa Melchizedek Priesthood. Si Brother L. Brent Goates gitawag sa pagserbisyo isip ang bishop. Iyang gidapit ang usa ka dili kaayo aktibo nga brother sa ward, si Ernest Skinner, aron sa pagtabang sa pagpaaktibo sa 29 ka hamtong nga mga kaigsoonan sa ward kinsa naghupot sa office nga teacher sa Aaronic nga Pagkapari ug sa pagtabang niini nga mga lalaki ug sa ilang pamilya nga moadto sa templo. Isip usa ka dili kaayo aktibo nga miyembro, si Brother Skinner nagdumili sa sinugdanan apan sa katapusan nagpakita nga iyang buhaton kutob sa iyang mahimo. Iyang gisugdan sa personal nga pagbisita sa dili kaayo aktibong hamtong nga mga teacher, naninguha sa pagtabang kanila nga makita ang ilang tahas isip mga lider sa priesthood sa ilang panimalay ug isip mga bana ug mga amahan sa ilang mga pamilya. Siya dayon milista sa pipila ka mga dili kaayo aktibo nga mga kaigsoonan sa pagtabang kaniya sa iyang buluhaton. Tagsatagsa nahimo silang aktibo pag-usab ug midala sa ilang mga pamilya ngadto sa templo.
Usa ka adlaw niana ang ward clerk migawas sa tindahan aron makighimamat sa katapusan nga grupo nga moadto sa templo. Nagkomento sa iyang posisyon nga maoy katapusan, ang tawo miingon: “Nagbarug lang ko ug nagtan-aw samtang kadtong tanang grupo nahimong aktibo sa atong ward ug miadto sa templo. Kon nakahunahuna pa lang ko unsa ka nindot didto sa templo, ug sa unsang paagi kini makapausab sa akong kinabuhi sa kahangturan, dili unta ko mahimong katapusan sa 29 nga mabugkos [seal] sa templo.”
Sa matag usa niini nga mga istorya, adunay upat ka elemento nga nakapalampus kanila:
-
Ang oportunidad sa pagpaaktibo gibuhat dinha sa ward.
-
Ang bishop sa ward apil.
-
Kwalipikado ug nadasig nga mga magtutudlo ang gihatag.
-
Gihatagan og pagtagad ang matag indibidwal.
Mga kaigsoonan, atong hinumduman ang tambag ni Haring Benjamin: “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.”14
Tabangan nato kadtong nagkinahanglan sa atong tabang ug agakon sila ngadto sa mas maayo ug mas matarung nga kinabuhi. Motutok kita sa panginahanglan sa mga naghupot sa pagkapari ug sa ilang asawa ug mga anak nga mibiya na sa Simbahan. Unta maminaw kita sa mensahe gikan sa ilang kasingkasing:
Ang trabaho sa pagpaaktibo pag-usab dili trabaho para sa mga tapulan o magdamgo lang. Motubo ang mga anak, matigulang ang mga ginikan, ug ang panahon walay paabuton. Ayaw langana ang pag-aghat; hinoon, buhata dayon kini, ug ang Ginoo mobukas sa agianan.
Sa kasagaran ang langitnong hiyas sa pagpailub gikinahanglan. Isip usa ka bishop naaghat ko usa ka adlaw niana sa pagbisita sa tawo kansang asawa aktibo gamay, ingon man usab ang mga anak. Kini nga tawo, bisan pa man, wala gayud motubag. Init kadto nga adlaw sa dihang nanuktok ko sa screen nga pultahan ni Harold G. Gallacher. Makita nako si Brother Gallacher nga naglingkod sa iyang lingkuranan nga nagbasa sa pamantalaan. “Kinsa na?” nangutana siya, nga wala motan-aw.
“Imong bishop,” mitubag ko. “Mianhi ko aron magkaila ‘ta ug moawhag sa imong pagtambong kauban sa imong pamilya sa atong mga miting.”
“Dili, busy kaayo ko,” mao ang mabiay-biayon nga tubag. Wala gayud siya mihangad. Nagpasalamat ko niya sa pagpaminaw ug milakaw.
Ang pamilya Gallacher mibalhin sa California wala madugay human niadto. Milabay ang katuigan. Dayon, isip usa ka miyembro sa Korum sa Napulog Duha, nagtrabaho ko sa akong opisina usa ka adlaw niana sa dihang ang akong sekretarya nanawag, miingon: “Usa ka Brother Gallacher nga nagpuyo sa inyong ward sa una gusto makigsulti nimo. Nia siya sa akong opisina.”
Mitubag ko, “Pangutan-a siya kon ang iyang ngalan si Harold G. Gallacher ba nga, uban sa iyang pamilya, nagpuyo sa Vissing Place sa West Temple ug Fifth South.”
Miingon siya, “Siya kadto.”
Ako siyang gihangyo nga pasudlon siya. Maayo kaayo ang among panag-istoryahay kalabot sa iyang pamilya. Miingon siya nako, “Nia ko aron sa pagpangayo og pasaylo nga wala gyud ko mobarug gikan sa akong gilingkuran ug mopasulod nimo niadtong init nga adlaw pila na ka tuig ang milabay.” Nangutana ko niya kon aktibo ba siya sa Simbahan. Uban sa pinangislo nga pahiyum, mitubag siya: “Ikaduhang magtatambag na ko karon sa bishopric sa akong ward. Ang imong imbitasyon sa pagbalik sa simbahan, ug ang akong negatibo nga tubag sige og balikbalik sa akong panumduman nga maoy nakapaaghat nako sa pagbalik.”
Si Harold ug ako kanunayng nagkita sa daghang okasyon sa wala pa siya motaliwan. Ang mga Gallacher ug ang ilang mga anak mibuhat og daghang mga calling sa Simbahan. Usa sa mga kamanghuran nga apo nagserbisyo karon og full-time nga misyon.
Ngadto sa daghang mga misyonaryo nga naminaw karong gabhiona, akong gipaambit ang obserbasyon nga ang mga liso sa pagpamatuod kasagaran dili dayon mogamut ug mamulak. Ang pagbuhat og mga butang kansang mga resulta wala nimo mahibaloan madawat ra sa kaulahian. Apan mobalik ra gayud kini.
Akong gitubag ang bagting sa akong telepono usa ka gabii niana sa pagpaminaw sa usa ka tingog nga nangutana, “Paryente ka ba sa usa ka Elder Monson nga nakaserbisyo sa New England Mission pila na ka tuig ang milabay?”
Mitubag ko nga dili kana mao ang sitwasyon. Ang nanawag mipaila sa iyang kaugalingon nga usa ka Brother Leonardo Gambardella ug dayon mihisgot nga usa ka Elder Monson ug usa ka Elder Bonner nanawag sa iyang panimalay dugay nang panahon ug mihatag sa ilang pagpamatuod ngadto kaniya ug sa iyang asawa. Naminaw sila apan walay gibuhat aron sa paggamit sa ilang gipangtudlo. Dayon namalhin sila ngadto sa California, diin, human sa 13 ka tuig, nakit-an na usab nila ang kamatuoran ug nakabig ug nabunyagan. Nangutana dayon si Brother Gambardella kon naa bay mga paagi nga matultolan nila ang mga elder kinsa unang nakabisita kanila, aron siya makapasalamat og maayo alang sa ilang mga pagpamatuod, nga nagpabilin kaniya ug sa iyang asawa.
Akong gitan-aw ang mga rekord. Akong nakit-an ang mga elder. Makahunahuna ba mo sa ilang kasurprisa sa dihang, karon minyo na nga may kaugalingong mga pamilya na, nanawag ko nila ug ako silang giingnan sa maayong balita—gani ang kasangkoan sa ilang sayo nga mga paningkamot. Nakahinumdom dayon sila sa mga Gambardella. Akong giareglo ang usa ka panag-istoryahay sa telepono aron personal nilang mapadangat ang ilang pahalipay ug pag-abiabi kanila ngadto sa Simbahan. Ila kining gibuhat. Adunay mga luha, apan mga luha kadto sa kalipay.
Si Edwin Markham misulat niini nga mga linya:
Adunay kapalaran nga naghimo kanato nga mga managsoon;
Walay magpakabuhi nga para lang sa iyang kaugalingon:
Tanan nga atong gibuhat ngadto sa kinabuhi sa uban
Mobalik ra sa atong kaugalingon.16
Karong gabhiona nag-ampo ko nga kitang tanan nga naghupot sa pagkapari unta makahibalo sa atong mga responsibilidad, nga kita, sama ni Gedeon sa karaan, mobarug matag tawo sa iyang gikatakda nga dapit ug, isip usa, mosunod sa atong Lider—bisan ang Ginoong Jesukristo—ug sa Iyang propeta, si Presidente Gordon B. Hinckley. Unta tabangan nato ug luwason kadtong kinsa nangawala na, nga walay usa nga bililhong kalag ang mawala.
Sa ngalan ni Jesukristo, amen.