Agtalinaedkayo iti Takem a Nakatudinganyo
Thomas S. Monson
Umuna a Mammagbaga iti Umuna a Panguluen
Matulongan ken maisalakantayo koma dagiti kimmayakayen, nga awanto koma uray maysa a kararua ti mapukaw.
Naguummongtayo itoy a sardam kas napigsa a bagi ti priesthood, agpada ditoy iti Conference Center ken kadagiti lokasion iti intero a lubong. Sumagmamano ti addaan iti Aaronic Priesthood, idinto nga addaan iti Melchizedek Priesthood dagiti dadduma.
Impakdaar ni Presidente Stephen L Richards, a nagserbi a counselor ken ni Presidente David O. McKay, “Ti Priesthood ket gagangay a mailawlawag a daytoy ‘ti bileg ti Dios a naidutok iti lalaki.’” Intuloyna: “Daytoy a pannakailawlawag, panagkunak, ket umisu. Ngem para kadagiti maaramat a panggep kayatko nga ilawlawag ti kaipapanan ti Priesthood no maipanggep iti panagserbi ken masansan nga awagak daytoy iti ‘ti naan-anay a plano ti panagserbi.’ … Daytoy ti maysa a ramit ti panagserbi … ket ti lalaki a saan a mangaramat iti daytoy ket mabalin a mapukawna daytoy, gapu ta silalawag a naibaga kadatayo a babaen iti paltiing nga isu a mangliway iti daytoy ket ‘saanto a maibilang a maikari a tumakder.’”1
Iti Pioneer Stake, a masarakan iti Salt Lake City ken nakaawatak iti agpada nga Aaronic ken Melchizedek Priesthood, nasursuruankami nga agbalin a pamiliar kadagiti nasantuan a kasuratan, agraman dagiti benneg 20, 84, ken 107 ti Doktrina ken Katulagan. Kadagitoy a benneg masursuruantayo maipapan iti priesthood ken gobierno iti Simbaan.
Ita a sardam kayatko a yunay-unay ti maysa a bersikulo manipud iti Benneg 107: “Gapuna, adalen koma ti tunggal tao ti pagrebbenganna, ken agtignay iti takem a nakaitudinganna, iti amin a kinaregta.”2
Masansan nga insuro ni Presidente Harold B. Lee frequently: “No agbalin ti maysa nga agig-iggem iti priesthood, isu ti agbalin a mangbagi [agent] ti Apo. Nasken a panunotenna ti takemna [calling] a kasla adda isuna iti pangibaonan ti Apo.”3
Masursurotayo pay manipud kadagitoy a benneg dagiti pangrebbengan dagiti panguluen ti korum ken ti kinapudno a datayo ti akinrebbeng kadagiti dadduma saan laeng a ti bagbagitayo.
Sititibker a mamatiak a napigpigsa ti Simbaan ita ngem iti sigud a kasasaadna. Dagiti lebel ti aktibidad dagiti agtutubotayo ket mangipaneknek a daytoy ti henerasion ti pammati ken debosion iti kinapudno. Ngem adda pay dagiti sumagmamano a kumayakay, a mangsapul iti dadduma pay a pagesman a mangallukoy kadakuada tapno mangbaybay-an kadagiti pagrebbenganda iti Simbaan. Nasken a ditayo mapukawan kadagiti kakasta a napapateg a kararua.
Adda dagiti umad-adu a bilang dagiti inanamaen nga elder a saan a makita kadagiti miting iti Simbaan wenno mangpumpunno kadagiti naidutok nga aramiden iti Simbaan. Mabalin ken nasken a marisut daytoy a kasasaad. Datayo ti akinrebbeng iti daytoy nga aramid. Nasken a maidutok ti pagrebbengan ket maaramid ti panagkagumaan a saan nga agtantan.
Dagiti panguluen dagiti korum ti Aaronic Priesthood, babaen ti panangidaulo ti bishopric ken dagiti mamalbalakad ti korum, ket mabalin a mapabileg tapno mangtulong ken mangispal.
Kinuna ti Apo, “laglagipen a napateg dagiti kararua iti imatang ti Dios; … ken anian a naindaklan ti rag-o iti kararua a nagbabawi!”4
No dadduma kasla nadagsen unay ti trabaho. Makaalatayo iti baro a tured manipud iti padas ni Gedeon idi un-unana, nga isu, a kaduana ti bassit a buyotna, ket nasken a makigubatda kadagiti Madianitas ken Amalecitas. Malagipyonto no kasano a naipasango ni Gedeon ken ti buyotna iti napalaus a pigsa dagiti buyotna ken aduan iti armas ken iti bilang. Naisurat iti libro ti Uk-ukom iti Daan a Tulag a nagiti nagkaykaysa a kabusor, dagiti Madianitas ken Amalecitas, “addada idi a naiwaras idiay lubong a kasda la duddudon iti kaaduda; ket di ket dagiti kamkamelioda saan a mabilang, a kasda la dardarat iti igid ti baybay iti kaaduda.”5 Immasideg ni Gedeon iti Mannakabalin a Dios para iti pigsana.
Iti siddaawna, binalakadan ti Apo ni Gedeon a nalaus ti kaadu dagiti buyotna tapno yawat ti Apo ti kabusor kadagiti imada, no saan kunada, “Ti imak met laeng ti nangisalakan kaniak.”6 Nabilin ni Gedeon a mangpakdaar kadagiti taon: “Siasino man nga agbuteng ken agpigerger, maipalubos kenkuana nga agsubli ken pumanaw … manipud iti bantay ti Galaad. Ket nagsubli kadagiti tao dagiti duapulo-ket-dua a ribu; ket natda idi dagiti sangapulo ribu.”7
Kalpasanna kinuna ti Apo, “Dagiti tattao, aduda pay laeng.”8 Binilinna ni Gedeon nga isalogna dagiti tao iti danum tapno paliiwen no kasano ti nasken a panaginumda iti danum. Dagiti nangdildil iti danum ket nailasin iti maysa a grupo, ken dagiti nagiparintumeng iti tumengda nga uminum ket nailasin iti sabali a grupo. Kinuna ti Apo ken ni Gedeon, “kadagitoy tallo gasut a lallaki a nagdildil isalakankayto, ket yawatkonto dagiti Madianitas ita imam; ket mapan koma aminen dagiti tattao tunggal maysa iti lugarna.”9
Nagsubli ni Gedeon kadagiti buyotna ket kinunana kadakuada, “Tumakderkayo; ta ni Jehova inyawatna iti buyot ti Madian ita imayo.”10 Ket biningayna dagiti tallo gasut a tattao iti nagkatlo a kabuyotan, ket inkabilna kadagiti im-imada amin dagiti tangtangguyob, ken dagiti gorgorita agraman al-aluten iti uneg dagiti gorgorita. Ket kinuna kadakuada:
“Kitaendak, ket agaramidkayo iti kas aramidek: ket adtoy, intono siak umayak iti akin-igid a paset ti pakarso, isunto, a kas iti aramidekto, kasta ti aramidenyonto.
“Intono paguniek ti tangguyob, siak ken dagiti amin nga adda kaniak, pagunienyo metten dagiti tangtangguyob iti tunggal sikigan ti amin a pakarso … ket indir-ida, Ti kampilan da Jehova ken Gedeon.” Kalpasanna kinunana, “Surotendak.” Dagitoy ti eksakto a balikasna, “Ti aramidekto, kasta ti aramidenyonto.”11
Iti signal ti pangulo, pinaguni ti buyot ni Gedeon dagiti tangguyob ken binurakda dagiti gorgorita ket impukkawda, “Ti kampilan da Jehova ken Gedeon.” Insurat ti nasantuan a kasuratan ti nagbanagan daytoy a naikeddeng a gubat: “Ket sitatakderda tunggal lalaki iti lugarna,” ket nagun-od ti balligi.12
Ti home teaching ket paset ti plano nga agispal iti agdama. Idi inyam-ammo daytoy ni Presidente David O. McKay iti amin a General Authority, imbalakadna: “Ti panangisuro iti pagtaengan ket maysa kadagiti kapatgan ken kangrunaan a gundawaytayo a mangaywan ken mangparegta, mangbalakad ken mangiturong kadagiti annak ti Amatayo. … Maysa [daytoy] a nadiosan a panagserbi, nadiosan nga awag. Pagrebbengantayo kas Home Teacher a mangisangbay iti nadiosan a kaipapanan iti tunggal pagtaengan ken puso.”13
Iti sumagmamano a lugar nga awan ti umdas a pigsa ti Melchizedek Priesthood, dagiti stake president ken bishop, iti pannakitinnulong iti mission president, mabalinda nga usaren dagiti full-time missionary a mangsarungkar kadagiti less-active ken part-member family. Saan laeng a daytoy ti mangparayray manen iti espiritu ti missionary iti pagtaengan, no di ketdi mangipaay pay iti nasayaat a gundaway para kadagiti maikari a referral a magun-od.
Kadagiti napalabas a tawen bayat ti isasarungkarko iti adu a stake iti intero a lubong, adda dagiti stake a dagiti lider ti ward ken stake, gapu iti panagkasapulan wenno panagtulnog iti pagrebbengan, ket nagsardengdan a nagpambar, nakasagadan a mangrugi, ket babaen iti tulong ti Apo, nagtrabahoda ken nangpatanorda kadagiti napapateg a lallaki a maikari para iti Melchizedek Priesthood ken, kakuyogda dagiti assawa ken annakda, tapno sumrek iti nasantuan a templo para kadagiti endowment ken pannakailantipda.
Iti ababa a porma dakamatekto ti sumagmamano a pagarigan:
Iti isasarungkarko iti Millcreek Stake iti Salt Lake City sumagmamanon a tawen ti napalabas, naammuak a nasurok laeng a 100 a kakabsat a lallaki dagiti inanamaen nga eIder a naordenan nga elder kabayatan ti napalabas a tawen. Dinamagko ken ni Presidente James Clegg ti sekreto ti balligina. Nupay napakumbaba unay isuna a mangawat it pammadayaw, maysa kadagiti mamagbagana ti nangibaga a ni Presidente Clegg, iti panangbigbigna iti karit, ket personal a nangyawag ken nangurnos iti pribado a pannakipag-appointmentna iti tunggal inanamaen nga elder. Kabayatan ti appointment, dakamaten ni Presidente Clegg ti templo ti Apo, dagiti pangisalakan nga ordinansa ken katulagan a nayunay-unay idiay, ken gibusanna iti daytoy a saludsod: “Dimo kadi tarigagayan nga ikuyog ti patpatgem nga asawa ken dagiti napapateg nga annakmo iti balay ti Apo, tapno makapagbalinkayo nga agnanayon a pamilia iti unos dagiti kinaagnanayon?” Simmaruno ti panangawat, naaramid ti proseso ti panagpaaktibo manen, ket nagun-od ti panggep a tun-oyen.
Idi 1952 ti kaaduan dagiti pamilia iti Rose Park Third Ward ket miembro a dagiti amma wenno assawada nga addaan laeng iti Aaronic Priesthood, imbes a ti Melchizedek Priesthood. Naawagan ni Brother L. Brent Goates nga agserbi a kas bishop. Inawisna ti maysa a less-active a kabsat iti ward, ni Ernest Skinner, tapno tumulong iti panangpaaktibo iti 29 a nataengan a kakabsat a lallaki iti ward nga aggiggem iti saad ti teacher iti Aaronic Priesthood and tapno tumulong kadagitoy a lallaki ken dagiti pamiliada a mapan iti templo. Kas maysa a less-active a miembro mismo, nagkedked idi damo ni Brother Skinner ngem iti kamaudianan impakitana nga aramidenna ti amin a kabaelanna. Personal nga inrugina ti panangsarungkar kadagiti less-active adult teacher, nga inkarkarigatanna a tulongan ida a mangkita iti akemda kas priesthood leader kadagiti pagtaenganda ken kas assawa ken amma kadagiti pamiliada. Iti saan a nabayag inlistana ti sumagmamano a kakabsat a less active tapno mangtulong kenkuana iti naidutok nga aramidenna. Saggaysa a nagbalinda a naan-anay nga aktibo manen ket impanda dagiti pamiliada iti templo.
Maysa nga aldaw rimmuar ti ward clerk iti maysa a grocery checking line tapno mangkablaaw iti maudi a grupo a mapan iti templo. Iti panagsaona maipapan iti saadna kas kaudian, kinuna ti lalaki: “Tinarabay ken binantayak ida bayat ti panagbalin nga aktibo ti amin iti dayta a grupo iti wardmi ken napan iti templo. No koma laeng kabaelak a panunoten idi no kasano ti kapintas ti uneg ti templo, ken no kasano a balbaliwanna ti biagko iti agnanayon, saanak koma a maibilang a kaudian ti 29 a mailantip iti templo.”
Iti tunggal maysa kadagitoy a pakasaritaan, adda uppat nga elemento a mangiturong kadakuada iti balligi:
-
Naipatungpal ti gundaway iti panagpaaktibo iti lebel ti ward.
-
Nairaman ti bishop ti ward.
-
Naited dagiti maikari ken naparegta a mannursuro.
-
Naited ti atension iti tunggal indibidual.
Kakabsat, laglagipentayo koma ti balakad ni Ari Benjamin: No agserserbikayo kadagiti padayo a tao; agsersebikayo laeng iti Dios.”14
Tumulongtayo koma a mangispal kadagiti agkasapulan iti tulongtayo ken mangitag-ay kadakuada iti nasaysayaat ken nalinlinteg a wagas ti panagbiag. Agpokustayo koma iti panangpanunot kadagiti kasapulan dagiti priesthood holder ken dagiti assawa ken annakda a natnag manipud iti dana ti panagaktibo. Dumngegtayo koma iti saan a naisawang a mensahe manipud iti puspusoda:
Ti aramid iti panagpaaktibo ket saan a trabaho para iti nasadut ken managarapaap. Dumakkel dagiti ubbing, bumaket ken lumakay dagiti nagannak, ken saan nga aguray ti panawen iti tao. Saanyo koma nga itantan ti dumngeg iti parikna; ketdi, agtignay iti daytoy, ket luktanto ti Apo ti dalan.
Masansan a kasapulan ti nailangitan a saguday ti kinaanus. Kas maysa a bishop naiparikna kaniak iti maysa nga aldaw ti awag iti maysa a lalaki a medio aktibo ti asawana kasta met dagiti annakna. Nupay kasta, saan a pulos nagresponde daytoy a lalaki. Maysa a napudot a kalgaw idi agtuktokak iti ridaw ni Harold G. Gallacher. Makitak ni Brother Gallacher a nakatugaw iti tugawna nga agbasbasa iti pagiwarnak. “Asino dayta?” dinamagna, a saan a kumitkita.
“Ti bishopmo,” insungbatko. “Immayak a makiam-ammo ket kiddawek ti idadar-aymo a kaduam ti pamiliam kadagiti mitingtayo.”
“Diak masango, nagadu ti obrak,” insungbatna. Saan a pulos a kimmita. Nagyamanak kenkuana iti idedengngegna ket pimmanawak.
Immakar ti pamilia Gallacher iti California nabiit kalpasan dayta. Napalabas dagiti tawen. Kalpasanna, idi maysaak a miembro ti Korum dagiti Sangapulo-ket-dua, agtartrabahoak iti opisinak iti maysa nga aldaw idi inawagannak ti sekretariak, a kunkunana: Kayatnaka a kasarita ni Brother Gallacher a naminsan idi a nagnaed iti wardmo. Adda isuna ditoy iti opisinak.”
Simmungbatak, “Damagem man kenkuana no Harold G. Gallacher ti naganna, a nagnaed kadua ti pamiliana iti Vissing Place iti West Temple ken Fifth South.”
Kinunana, “Isu ti lalaki.”
Kiniddawko kenkuana a pastrekenna. Naaddaankami iti naragsak a panagsarita maipanggep iti pamiliana. Imbagana kaniak, “Immayak tapno dumawat iti dispensar iti saanko nga itatakder iti tugawko tapno pastrekenka iti ridaw iti dayta nga aldaw ti kalgaw nabayagen a tawen ti napalabas.” Dinamagko kenkuana no aktibo isuna iti Simbaan. Siiisem nga insungbatna, “Siak itan ti maikadua a mammagbaga iti bishopric ti wardmi. Ti awismo nga umay iti simbaan, ken ti negatibo a sungbatko, ket masansan a mangipalagip kaniak isu nga inkeddengko ti agaramid iti maysa a banag maipapan iti daytoy.”
Nagkaduakami ken ni Harold iti isasarungkar iti adu a gundaway sakbay a pimmusay isuna. Dagiti Gallacher ken dagiti annakda ti nangpunno iti adu a takem iti Simbaan. Maysa kadagiti kaubingan nga appoko ti agserserbi itan iti full-time a msion.
Kadagiti adu a missionary a mabalin a dumdumngeg itoy a sardam, ibinglayko ti pammaliiwko a dagiti bukel ti pammaneknek ket masansan a saan a dagus nga agramut ken agsabong. Ti tinapay a maipalladaw iti danum ket agsubli, no dadduma, kalpasan laeng ti adu nga aldaw. Ngem agsubli daytoy.
Sinungbatak ti kiriring ti teleponok iti maysa a sardam tapno denggek ti timek a nagsaludsod, “Kabagyam kadi ni Elder Monson a nagserbi iti New England Mission sumagmamanon a tawen ti napalabas?”
Insungbatko a saan a kasta ti kasasaad. Inyam-ammo ti immawag ti bagina a maysa a Brother Leonardo Gambardella ket kalpasanna dinakamatna a maysa nga Elder Monson ken maysa nga Elder Bonner ti immawag iti pagtaenganna nabayagen a panawen ti napalabas ket imburayda dagiti pammaneknekda kenkuana ken iti asawana. Dimngegda ngem awan ti ad-adda pay nga inaramidda a mangyaplikar kadagiti insursuroda. Idi agangay immakarda iti California, a sumagmamano a 13 a tawen kalpasanna, nasarakanda manen ti kinapudno ket na-convert ken nabuniaganda. Dinamag ni Brother Gambardella kalpasanna no adda maysa a wagas a pakasarakanna kadagiti elder nga immuna idi a nangsarungkar kadakuada, tapno mayebkasna ti nalaus a panagyamanna para kadagiti pammaneknekda, a nagtalinaed kenkuana ken iti asawana.
Kinitak dagiti rekordko. Sinapulko dagiti elder. Mailadawanyo kadi ti siddaawda idi, ita addan assawada nga adda bukoddan a pamilia, tinawagak ida iti telepono ket imbagak kadakuada ti napintas a damag—uray ti panangrugi dagiti immuna a panagkagumaanda. Dagus a nalagipda dagiti Gambardellas. Nakipagurnosak iti maysa a conference telephone call tapno personal a maibagada ti panangkablaawda ken panangawat kadakuada iti Simbaan. Inaramidda. Nagarubos dagiti lua, ngem dagitoy ti lua ti ragsak.
Insurat ni Edwin Markham dagitoy a linia:
Adda maysa a pagtungpalan a mangaramid kadatayo nga agkakabsat;
Awan ti magna iti dalanna nga agmaymaysa:
Amin nga ipaaytayo iti biag dagiti sabali
Agsubli iti bukodtayo.16
Ita a sardam ikararagko nga amintayo nga agiggem iti priesthood mariknatayo koma dagiti pagrebbengantayo, a datayo, kas ken ni Gedeon idi un-unana, makapagtakder ti tunggal tao iti nakatudinganna ken, sangkamaysa, a surotentayo ti Dadaulotayo—kas ken ni Apo Jesucristo—ken ti propetana, ni Presidente Gordon B. Hinckley. Matulongan ken maisalakantayo koma dagiti kimmayakayen, nga awanto koma uray maysa a kararua ti mapukaw.
Iti nagan ni Jesucristo, amen.