Jutak ilo Ijo Kar Karōke n̄an Eok
Thomas S. Monson
Rikakpilōklōk eo Kein Kajuon ilo Būreejtōnji eo Kein Kajuon
Bwe jen diwōjļo̧k im lo̧mo̧o̧ren ro em̧ōj aer wōtlo̧k itōrerein iaļ eo, bwe en ejjeļo̧k juon jetōb aorōk enaaj jako.
Jej kuktok ippān doon joteenin āinwōt juon ānbwin in priesthood ekajoor, jim̧or ilo Conference Center in im ilo jikin ko jet ipeļaakin laļ in. Jet rej kabwijer Priesthood eo an Aron, ilo an ro jet kabwijer Melkizedek Priesthood eo.
Būreejtōn Stephen L Richards, eo eaar jerbal āinwōt juon rikakpilōklōk n̄an Būreejtōn David O. McKay, eaar kwaļo̧k, “Emakijkij kōmeļeļeik Priesthood eo āinwōt ‘kajoor eo an Anij leļo̧k ioon juon em̧m̧aan.’” Ej wōnm̧aanļo̧k wōt: “Meļeļe in, ij ļōm̧ņak, ejetjet. Bōtaab kōn jibadbad ko an kōjerbale ikōņaan kōmeļeļeik Priesthood eo ilo naan ko kōn jerbal in jipan̄ im emakijkij aō ņa etan ‘karōk in jerbal in jipan̄ eweppān.’ … Ej juon kein jerbal an jerbal in jipan̄ … im juon em̧m̧aan eo ej likjab in kōjerbale ej maron̄ jako jān e, bwe em̧ōj kar ba n̄an kōj ilo revelesōn ke eo enaaj jāniknik kake ‘jamin naaj kōmālim e juon eo watōke etōllo̧ke jutak.’”1
Ilo Pioneer Stake eo, eo ej pād ilo Salt Lake City im ijo iaar bōk jim̧or Priesthood eo an Aron im Melkizedek Priesthood eo, kar katakin kōm n̄an jeļā kōn jeje ko rekwojarjar, ekoba jekjen 20, 84, 107 in Katak im Bujen ko. Ilo jekjen kein jej katak kōn priesthood im kien an Kabun̄ in.
Joteenin ikōņaan kōmejajaik juon eoon jān jekjen 107: “Kōn menin, kiiō kōtļo̧k bwe em̧m̧aan otemjej en jeļā jerbal eo an, im n̄an m̧akūtkūt ilo opij eo me jitōn̄e n̄an e, ilo aolep laļn̄ijn̄ij.”2
Būreejtōn Harold B. Lee eaar katakin: “N̄e juon ej erom juon rikabwijer priesthood eo, em̧ōj an erom juon rijerbal an Irooj. Ej aikuj ļōmņak kōn kūr eo an āinwōt n̄e ej pād ilo jerbal eo an Irooj.”3
Jej bar ekkatak jān jekjen kein ke jerbal ko an būreejtōnji ko an doulul eo im m̧ool eo bwe jej eddoik ro jet ijello̧kin kōj make.
Ij dim ilo tōmak bwe Kabun̄ in rainin ekajoorļo̧k jān kar jinoin. Jon̄an m̧akūtkūt ko an jodikdik ro ad ej kam̧ool bwe en̄in ej juon epepen in tōmak im wūjlepļo̧k n̄an m̧ool eo. Mekarta ewōr ro rej wōtlo̧k ilo tōrerein iaļ eo, ro rej lo bar jet itok limo ko me rej kareel er n̄an kowaan jerbal ko aer ilo Kabun̄ in. Jej aikuj jab jerwane kain jetōb rein raorōk.
Ewōr oran ko rej eddōkļo̧k ibwilijin ro repojak in elder me jab loe er ilo kweilo̧k ko an Kabun̄ in ak kanne kūr ko an Kabun̄. Jekjek in ej aikuj ņa mejļan. Jerbal eo ej ad. Eddo eo ej aikuj in liļo̧k im kijejeto eo n̄an kwaļo̧ki ilo ejjeļo̧k karum̧wijļo̧k.
Būreejtōnji ko an doulul ko an Priesthood eo an Aron, ium̧win tōl eo an bisoprik eo im rikakpilōklōk ro an doulul eo, maron̄ kōmaron̄ er n̄an kajjion̄ kareel im lo̧mo̧o̧ren.
Irooj eaar ba, “Keememej bwe aorōk in jetōb ko ekanooj ļap ilo mejān Anij; … Im ewi jon̄an m̧ōņōņō eo An ilo armej eo ej ukweļo̧k!”4
Jet iien jerbal eo ej waļo̧k etōr jān jon̄an. Jemaron̄ bōk peran ekāāl jān en̄jake eo an Gideon eo etto, eo, ippānļo̧k jar in tariņae eo an edik, kar tariņae ippān Rimidian ro im Riamalek ro. Kwonaaj keememej ekōjkan an Gideon im jarin tariņae eo an kar en̄jake juon kajoor etōr jān jon̄an an jarin tariņae ko rellōn̄ reļļap ilo kein tariņae im ilo oran. Bok in Ekajet ilo Kallim̧ur M̧okta ej je bwe koba in rikejdet eo, Rimidian ro im Riamalek ro, “rej babu ilo koṃlaḷ eo, oraer āinwōt lokōs ko; im kamel ko aer ejjeḷọk oraer, āinwōt bokin pārijet kōn aer lōñ.”5 Gideon eaar kepaak Anij kajoor Pōtata kōn kajoor eo an.
Kōn bwilōn̄, Irooj eaar kapilōk Gideon bwe jarin tariņae eo an raar kanooj lōn̄ uwaer ilo nōm̧ba n̄an an Irooj bōkļo̧k rikōjdat n̄an peier, ilo jekjek in rej ba, “Peiū make eaar lo̧mo̧ren eō.”6 Kar jiron̄ Gideon bwe en kwaļo̧k n̄an armej ro an: “Jabdewōt eo ej lōḷn̄ọn̄ im wūdiddid, en jepḷaak im ilọk … jān toḷ Giliad. Innām roñoul ruo tọujin iaan armej ro raar jepḷaakḷọk; im raar pād wōt joñoul tọujin.”7
Innām Irooj eaar ba “armej ro relōñ wōt.”8 Eaar jiron̄ Gideon n̄an bōk em̧m̧aan ro n̄an dān eo n̄an lale wāween eo me rej aikuj in idaak jān dān eo. Ro raar nemak dān eo kar likūt er ilo juon kurup, im ro raar bukwelōlō im idaak kar likut er ilo bar juon kurup. Irooj eaar ba n̄an Gideon, “Kōn jilu bukwi ro raar dāṃwij Inaaj lọmọọremi, im ketak ro ri Midian ṇa ilo peōmi; im kwōn kōtḷọk armej ro otemjej bwe ren ilọk, jabdewōt armej ñan jikin.”9
Gideon eaar rolļo̧k n̄an jar in tariņae eo an im ba n̄an er, “Jerkak; bwe Irooj em̧ōj an kōtļo̧k tok kumi eo an Midian n̄an peimi.”10 Im eaar ajije jilu bukwi em̧m̧aan ro n̄an jilu kumi ko, im ej likūt juon rebba ilo aolep pein em̧m̧aan, ippān pijja ko ejjeļo̧k kobbaer im ļaam̧ ko ilowaan pijja ko. Im eaar ba n̄an er:
“Koṃwin lale ña im kōṃṃan āinwōt; im lo, ñe ij itok ñan tōrerein kamp eo, āinwōt ña ij kōṃṃan, āindein koṃwin kōṃṃan.
Ñe ij jilel, ña im ro otemjej ippa, innām koṃwin bar āinwōt jilel ijo ko otemjej ilo aolepen tōrerein ijo … im ba, Jāje eo an Irooj im an Gideon.” Innām eaar ba ilo kajoor, “Ļo̧o̧r eō.” Jejjōt in naan ko ej, “Āinwōt aō kōm̧m̧an, kom barainwōt kōm̧m̧an.”11
Ilo kōkaļļe eo an ritōl eo, kumi eo an Gideon raar kōjan̄ rebba ko im rube pijja ko im kar lam̧ōj, “Jāje eo an Irooj im an Gideon.” Jeje ko Rkwojarjar ej ļo̧o̧ke jem̧ļo̧kin pata in eaorōk: “Im raar jutak jabdewōt eṃṃaan ilo jikin,” im raar anjo.12
Jerbal in loļo̧k m̧ōko ej m̧ōttan karōk in lo̧mo̧o̧r eo an rainin. Ke kar kwaļo̧k kadkad in jān Būreejtōn David O. McKay n̄an aolep Riutiej ro an Kabun̄, eaar kapilōk: “Jerbal in loļo̧k m̧ōko rej juon iaan iien ko rem̧m̧an emenin ekkairir im ekabun̄ bōro tata n̄an naajdik im im̧we, n̄an ko̧o̧njeļ im tōl ajri ro nejin Jemed. … [Ej] juon jerbal in jipan̄ ekwojarjar, juon kūr ekwojarjar. Ej jerbal eo ad āinwōt Rūkaki ro an M̧ōko n̄an bōkļo̧k jetōb eo n̄an aolep em̧ im bōro.”13
Ilo jet jikin ko ijo ebwe kajoor in Melkizedek Priesthood eo ejako, stake būreejtōn ro im bisop ro, rej jerbal ippān mijen būreejtōn eo, maron̄ kōjerbal mijenede ro rej jerbal aolep raan n̄an loļo̧k ro rejeniknik im baam̧el ko ejjab aolep rej membōr. Menin ejjab wōt bar kōkāāl jetōb in mijenede eo ilo m̧weo, ak ebarāinwōt leļo̧k juon iien em̧m̧an n̄an kūr ko n̄an katakin gospel eo n̄an bōke.
Ium̧win iiō ko ke iaar loļo̧k elōn̄ stake ko ilo aolepān laļ in, ekar lōn̄ stake ko ijo ritōl ro an ward im stake , kōn aikuj eo ak ilo uwaake jerbal eo, kar kabōjrak jekpen ņae ko, pojak in jerbal, im, kōn jipan̄ an Irooj, ilo̧k n̄an jerbal im bōktok em̧m̧an ro raorōk n̄an karbōb n̄an Melkizedek Priesthood eo im, ippān kōrā ro pāleer im ajri, n̄an deļo̧n̄e tampeļ kwojarjar eo kōn menin letok kwojarjar ko aer im liāp ko.
Ilo juon jekjek ekadu inaaj kwaļo̧k jet waanjo̧n̄o̧k ko:
Ilo juon loļo̧k ekadu n̄an Millcreek Stake ilo Salt Lake City jet iiō ko remootļo̧k, iaar katak bwe elōn̄ļo̧k jān 100 em̧m̧aan ro me raar pojak in erom elder ro kar ekkapit er n̄an elder ro ilo iiō ko im̧aanļo̧k. Iaar kajjitōk ippan Būreejtōn James Clegg ta kōl n̄an tōprak eo an. Mekarta eaar lukkuun ettā n̄an bōk nebar, juon iaan rikakpilōklōk ro an ekar kwaļo̧k bwe Būreejtōn Clegg, ekar kile apan̄ eo, im kar make ko̧o̧ļ im karōk juon kweilo̧k ikōtaan im kajjojo ro rej pojak in elder. Ilo kweilo̧k eo, Būreejtōn Clegg emaron̄ kōnono kōn tampeļ eo an Irooj, kain̄i in lo̧mo̧o̧r ko im bujen ko emakijkij kōnono kaki ijōņ, im ekōn kōjjem̧ļo̧k kōn kajjitōk in: “Kwon ke ikdeleel n̄an bōk kōrā eo pālem̧ em̧m̧an im ajri ro raorōk nejūm̧ n̄an m̧weo im̧ōn Irooj, bwe kom̧in maron̄ juon baam̧le indeeo ilo aolep indeeo?” Ro raar pojak in erom elder ro raar ba aaet, jerbal in kōkajoorļo̧k eaar ijjino, im kōttōbar eo kar tōpare.
Ilo 1952 eo eitōn aolep baam̧le ko ilo Rose Park Third Ward eo raar membōr ro me ro jemeer ak ļōm̧aro pālele raar kabwijer wōt Priesthood eo an Aron, ijello̧kin Melkizedek Priesthood eo. Kar kūr Brother L. Bent Goates n̄an jerbal āinwōt juon bisop. Eaar karuwaineneiktok juon brother ejaniknik ilo ward eo, Ernest Skinner, n̄an jipan̄ kōroltok 29 em̧m̧aan ro ilo ward eo me raar kabwijer opiij eo an rūkaki ilo Priesthood eo an Aron eo im jipan̄ em̧m̧aan rein im baam̧le ko aer n̄an etal n̄an tam̧peļ. Āinwōt juon membōr eo ejaniknik e make, Brother Skinner eaar m̧akoko ilo jinoin bōtaab āliktata eaar kwaļo̧k enaaj kar kōm̧m̧ane ta eo emaron̄e. Eaar jino loļo̧k rūkaki ro rōrūtto rōjeniknik e make, kajjieon̄ jipan̄ er lo eddo eo aer āinwōt ritōl ro an priesthood ilo m̧ōko im̧wer im āinwōt ļōm̧aro pālele im baba ro n̄an baam̧le ko aer. Ejjab to eaar kobaiktok jet iaan em̧m̧aan ro rōjāniknik n̄an jipan̄ e ilo jerbal ko an. Juon illo̧k juon raar bar lukkuun niknik im bōk baam̧le ko aer n̄an tam̧peļ.
Juon raan rijeje eo an ward eo eaar etal jān ļain in kōļļā eo ilo m̧ōn wia eo n̄an iak-iakwe kumi eo āliktata n̄an etal n̄an tampeļ. Ba kōn jejkej eo an āinwōt eo armej eo āliktata, eaar ba: “Iaar jutak im kar mijen ke aolepān kumi eo erom niknik ilo ward eo am im kar ilo̧k n̄an tampeļ. Eļan̄n̄e wōt iaar maron̄ in pijaikļo̧k ewi aiboojoj kar ilo tampeļ eo, im ekōjkan an naaj kar ukōt mour eo aō indeeo, ijjamin naaj kar eo āliktata in 29 ro raar liāp ilo tampeļ eo.”
Ilo kajjojo bwebwenato kein, ekar wōr emān men ko raar tōl er n̄an jeraam̧m̧an.
-
Iien eo em̧m̧an an jerbal in kōro̧o̧ltok eo kar jibadōke ilo jon̄ak eo an ward.
-
Bisop eo an ward eo eaar bōk kuņaan.
-
Kōkarbōb im im̧we rūkaki ro kar liļo̧k.
-
Leļo̧k an kar leļo̧k n̄an kajjojo armej.
Em̧m̧aan ro, jān keememej kapilōk eo an Kiin̄ Benjamin: “Eļan̄n̄e kom̧ij jerbal n̄an armej ro ami kom̧ij jerbal wōt n̄an ami Anij.”14
Jen pukōtļo̧k n̄an lo̧mo̧o̧ren ro me relukkuun aikuji jipan̄ eo ad im kotak er n̄an mour eo ewānōkļo̧k. Jen pedped e wōt ļōmņak eo ad ilo aikuj ko an rikabwijer ro an priesthood eo im kōrā ro pāleer im ajri ro me raar ilo̧k jān iaļ in niknik eo. Kōm̧m̧an bwe jen ron̄jake ennaan eo kar jab ekōnono kake jān būruwōd:
Jerbal in kōro̧o̧ltok eo ejjab juon jerbal n̄an ro rejowan ak ro riantoon. Ajri rej eddōkļo̧k, ro jinen im jem̧an rej rūttoļo̧k, im iien ejjab kōttar jabdewōt. Jab karum̧uj juon im̧we; ijelōkin, kwon kipele, im Irooj enaaj kōpeļļo̧k iaļ eo.
Emakijkij an wānōk in lan̄ eo an kijenmej menin aikuj. Āinwōt juon Bisop iaar en̄jake im̧we juon raan n̄an loļo̧k juon em̧m̧aan eo lio pāleen eaar bwe an niknik, barāinwōt ajri ro. Mekarta, em̧m̧aan in, eaar jab uwaak. Ekar juon raan ebwil ilo jōm̧ar ke iaar kōkaļļaļ ilo kōjām ok eo an Harold G. Gallacher. Imaron̄ in kar loe Brother Gallacher ej jijōt ilo jea eo an im riit nuujpepa. “Wōn kwe?” eaar kajjitōk, ilo an jab reitok.
“Iaar ba, “bishop eo am̧.” “Iaar itok n̄an jeļā kajjiōm̧ im kajjitōk kōn am im baam̧le eo am̧ pād ilo kweilo̧k ko ad.”
“Jaab, ilukuun poub,” eaar itok uwaak eo enana. Eaar jab reilōn̄tak. Iaar kam̧m̧oolol e kōn an ron̄jake im ilo̧k jān m̧aan kōjām eo.
Baam̧le eo an Gallacher ro raar em̧m̧akūtļo̧k n̄an California jidik iien tokālik. Iiō ko raar eļļāļo̧k. Innām, āinwōt juon uwaan Doulul eo an Jon̄oulruo eo, iaar jerbal ilo opiij eo aō juon raan im rijeje eo aō eaar ko̧o̧ļtok, ba: “Brother Gallacher eo juon iien eaar jokwe ilo ward eo am̧ ekōņaan kōnono ippām. Epād ije ilo opiij eo aō.”
Iaar uwaak, “Kajjitōk ippān eļan̄n̄e etan in Harold G. Gallacher eo, ippān baam̧le eo an, kar jokwe ilo Vissing Place ilo West Tempel im Fifth South.”
Liin eaar ba, “E ej em̧m̧aan eo.”
Iaar kajjitōk ippān liin n̄an kadeļo̧n̄tok e. Eaar wōr juon iien am bwebwenato em̧m̧an ippān doon ikkijien baam̧le eo an. Eaar jiron̄ eō, “Iaar itok n̄an joļo̧k bōd kōn kar jab jutak jān jea eo aō im kadeļo̧n̄ eok ilo kōjām eo ilo jōm̧ar eo elōn̄ iiō ko remootļo̧k.” Iaar kajjitōk ippān eļan̄n̄e eaar niknik ilo Kabun̄ in. Kōn juon ettōn̄ ekōjak, eaar uwaak, “Ij kiiō rikakpilōklōk eo kein karuo ilo ward bisoprik eo aō. Kūr eo am̧ n̄an itok n̄an jar, im uwaak eo aō enana, kar kōļon̄take eō jon̄an iaar jokāālet n̄an kōm̧m̧ane juon men kake.”
Harold im n̄a kar koba ippān doon ilo elōn̄ iien ko m̧okta jān an kar jako. Gallacher ro im ajri ro nejier raar bōk elōn̄ kūr ko ilo Kabun̄ in. Juon iaan ro jibwier edikdik tata ej kiiō jerbale juon mijen aolep raan.
N̄an elōn̄ mijenede ro me rej maron̄ ron̄ menin joteen in, ij kwaļo̧k ennaan eo me ine ko an naan in kam̧ool emakijkij aer jab m̧okaj aer eddōk okarer im kalle. Kwōn joļo̧k kijōm̧ ņa ioon dān ko, bwe kwōnaaj lo ālkin elōn̄ raan ko. Bōtaab ej ro̧o̧ltok.
Iaar uwaake an taļboon eo riin̄ juon jota im ron̄ juon ainikien ej kajjitōk, “Ej ke nukun Elder Monson eo eaar jerbal elōn̄ iiō ko remootļo̧k ilo New England Mijen?”
Iaar uwaak bwe ekar jab jekjek eo. Eo eaar ko̧o̧ļ eaar kwaļo̧k kadkad in āinwōt Brother Leonardo Gambardella innām kwaļo̧k bwe Elder Monson im Elder Bonner kar loļo̧k m̧weo im̧ōn jem̧aan im kar kwalo̧k naan in kam̧ool ko aer n̄an e im lio pāleen. Raar ron̄jake bōtaab kar jab kōm̧m̧an jabdewōt eļapļo̧k n̄an kōjerbal katak ko aer. Tokālik raar em̧m̧akūtļo̧k n̄an California, ijo, 13 iiō ko tokālik, raar bar juon alen lo m̧ool eo im kar oktak im peptaij. Innām Brother Gambardella eaar kajjitōk eļan̄n̄e ewōr wāween emaron̄ tōpar elder ro raar lo̧ļo̧k er ilo jinoin, bwe en maron̄ kwaļo̧k an kam̧m̧olool kōn naan in kam̧ool ko aer, me ekar pād wōt ippān im lio pāleen.
Iaar etale ļo̧o̧k ko. Iaar lo elder ro. Komaron̄ ke pijaikļo̧k aer bwilōn̄ ke, kiiō kar m̧are ippān baam̧le ko aer make, iaar kūrļo̧k er im jiron̄ er kōn ennaan eo em̧m̧an—em̧ool tōprak eo ilo jem̧ļo̧k kōn kijejeto ko aer m̧okta. Raar kajju ememej Gambardella ro. Iaar karōk juon kweilo̧k ilo talboon bwe ren maron̄ make kwaļo̧k aer kōjeraam̧m̧an im karuwaineneik er tok n̄an Kabun̄ in. Rekar kōm̧m̧an. Eaar wōr dān in kōmejaaļaļ ko, bōtaab raar dān in kōmejaaļaļ in lan̄lōn̄.
Edwin Markham eaar je eoon kein:
Ewōr juon mejān kajjik me ej kōm̧m̧an bwe jān jemjān jemjati;
Ejjeļo̧k juon ej ilo̧k ilo iaļ eo an make:
Aolep men me jej jilkinļo̧k n̄an mour ko an ro jet
Rej jepļaaktok n̄an mour eo ad make.16
Joteen in ij jar bwe kōjwōj aolep ro rej kabwijer priesthood eo ren maron̄ lo eddo ko ad, bwe jen, āinwōt Gideon eo etto, bwe aolep em̧m̧an ren maron̄ jutak ilo ijo kar karōke n̄an eok im, āinwōt juon, ļoor ritōl eo ad—em̧ool Irooj Jisōs Kraist—im rikanaan eo An, Būreejtōn Gordon B. Hinckley. Bwe jen diwōjļo̧k im lo̧mo̧o̧ren ro em̧ōj aer wōtlo̧k itōrerein iaļ eo, bwe en ejjeļo̧k juon jetōb aorōk enaaj jako.
Ilo etan Jisōs Kraist, amen.