Tuʻu [Maʻu] ʻi he Lakanga Kuo Fili Koe Ki Aí
Tōmasi S. Monisoni
Tokoni ʻUluaki ʻi he Kau Palesitenisī ʻUluakí
Fakatauange te tau lava ʻo tokoni ke fakahaofi ʻa kinautolu kuo hē atu he halafonongá, koeʻuhí ke ʻoua naʻa mole ha foʻi laumālie pelepelengesi ʻe taha.
ʻOku tau fakataha mai he efiafí ni ko ha haʻofanga tokolahi ʻo e lakanga fakataulaʻeikí, ʻi he Senitā Konifelenisí ni kae pehē foki ki ha ngaahi feituʻu kehe ʻi he māmaní. ʻOku maʻu ʻe ha niʻihi ʻa e Lakanga Taulaʻeiki Faka-ʻĒloné, kae maʻu ʻe he niʻihi ʻa e Lakanga Taulaʻeiki Faka-Melekisētekí.
Naʻe pehē ʻe Palesiteni Sitīveni L. Lisiate, ʻa ia naʻá ne hoko ko e tokoni kia Palesiteni Tēvita O. Makeí, “ʻOku faʻa fakaʻuhingaʻi ʻa e Lakanga Fakataulaʻeikí ʻo pehē ʻko e mālohi ʻo e ʻOtuá ʻoku foaki ki he tangatá.’” Naʻá ne hoko atu: “ʻOku ou tui ʻoku tonu ʻa e fakaʻuhinga ko ʻení. Ka ʻi ha ngaahi taumuʻa fakapotopoto, ʻoku ou fie fakaʻuhingaʻi e Lakanga Fakataulaʻeikí ʻo fakatefito ʻi he ngāue tokoní, pea hangē ko ia ʻoku ou faʻa ui iá, ʻko e palani haohaoa ki he ngāue tokoní.’ … Ko ha meʻangāue ia ʻo e ngāue tokoní … pea ʻe mole ia mei he tangata ʻoku ʻikai ke ne fakaʻaongaʻi iá, he ʻoku fakahā mahino mai ko ia ʻoku taʻetokanga ki aí, ʻhe ʻikai lau ia ʻoku taau.’”1
ʻI he Siteiki Paionia ʻi Sōleki Sití pea ko e feituʻu ia naʻá ku maʻu fakatouʻosi ai e Lakanga Taulaʻeiki Faka-ʻĒloné mo e Lakanga Taulaʻeiki Faka-Melekisētekí, ne akoʻi kimautolu ke mau maheni mo e folofolá, kau ai e ngaahi vahe 20, 84, mo e 107 ʻo e Tokāteline mo e Ngaahi Fuakavá. ʻOku tau ako fekauʻaki mo e lakanga fakataulaʻeikí mo hono puleʻi ʻo e Siasí ʻi he ngaahi vahe ko ʻení.
ʻOku ou fie fakamamafaʻi he poó ni ha veesi mei he Vahe 107: “Ko ia, tuku ke akó ni ʻo ʻilo ʻe he tangata kotoa pē ʻa hono fatongiá, pea ke ngāue ʻi he lakanga kuo fakanofo ia ki aí, ʻi he faivelenga kakato.”2
Naʻe faʻa akoʻi ʻe Palesiteni Hāloti B. Lī ʻo pehē: “ʻI he taimi ʻoku maʻu ai ʻe ha taha ʻa e lakanga fakataulaʻeikí, ʻokú ne hoko ai ko ha fakafofonga ʻo e ʻEikí. ʻOku totonu ke ne fakakaukau ki hono uiuiʻí ʻo hangē pē ia ko haʻane fai e fekau ʻa e ʻEikí.”3
ʻOku tau ako foki mei he ngaahi vahe ko ʻení ʻa e ngaahi fatongia ʻo e kōlomu ʻo e kau palesitenisií pea mo e foʻi moʻoni ko ia ʻoku tau haʻisia ki he niʻihi kehé, kehe meiate kitautolu.
‘Oku ou tui fakapapau ʻoku mālohi ange ʻa e Siasí he ʻahó ni ʻi ha toe kuonga. ʻOku fakamoʻoniʻi ʻe he ngaahi tuʻunga ʻo e ʻekitivitī ʻa e toʻu tupú ko ha toʻu tangata ʻeni ʻo e tui mo e līʻoa ki he moʻoní. Ka neongo iá, ʻoku ʻi ai ha niʻihi ʻoku nau hē atu he hala fonongá, pea ʻoku ʻi ai ha ngaahi meʻa hā ngali manakoa ʻoku nau tohoakiʻi kinautolu ke liʻaki honau ngaahi fatongia ʻi he Siasí. Kuo pau ke ʻoua naʻa tuku ke mole ʻa e ngaahi laumālie pelepelengesi peheé.
ʻOku fakautuutu honau tokolahí ʻi he lotolotonga ʻo e kau teuteu kaumātuʻá ʻa ē ʻoku ʻikai ke nau ʻiloa ʻi he ngaahi fakatahaʻanga ʻa e Siasí pe fakahoko e ngaahi fatongia ʻi he Siasí. ʻOku lava pea kuo pau ke fakatonutonu ʻa e tūkunga ko ʻení. ʻOku ʻatautolu ke fai ʻa e ngāué. ʻOku fie maʻu ke vahe ʻa e fatongiá pea fai leva e ngāué ʻo ʻikai ke toe toloi.
ʻOku lava ke fakamālohia ʻa e ngaahi kōlomu ʻo e kau palesitenisī ʻo e Lakanga Taulaʻeiki Faka-ʻĒloné, ʻi he malumalu ʻo e tataki ʻo e kau pīsopelikí mo e kau ʻetivaisa fakakōlomú, ke nau tokoni pea fakahaofi.
Naʻe folofola ʻa e ʻEikí, “Manatu ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá; … pea hono ʻikai ke lahi ʻa ʻene fiefiá ʻi he laumālie ʻe toko taha ʻoku fakatomalá!”4
Taimi ʻe niʻihi ʻoku hā ngali taulōfuʻu e ngāué. Te tau lava ʻo fakafoʻou ʻetau loto-toʻá mei he meʻa ne aʻusia ʻe Kitione ʻo e kuongamuʻá, naʻá ne lavaʻi ke tau mo e kau Mitiané mo e kau ʻAmalekaí ʻaki e mālohi ʻo e moʻui tāú. Te mou manatuʻi ʻa e fehangahangai ʻa Kitione mo ʻene kau taú mo ha kau tau ivi mālohi fau, tuʻukimuʻa mo ʻenau ngaahi meʻataú pea toe tokolahi foki. ʻOku lekooti ʻi he tohi ʻa e Kau Fakamāú ʻi he Fuakava Motuʻá ko e kau Mitiané mo e kau ʻAmalekaí ʻa honau fili kuo nau fakatahatahá naʻa nau, “mafola atu ʻi he teleʻá … ʻo hangē ko e fanga heʻé hono tokolahí; pea ko ʻenau fanga kāmelí naʻe taʻe-faʻa-laua ʻo hangē ko hono lahi ʻo e ʻoneʻone ʻi he matātahí.”5 Naʻe tautapa ʻa Kitione ki he ʻOtua Mafimafí ke ʻomi hano ivi.
Naʻe fakaʻohovale kia Kitione he naʻe faleʻi ia ʻe he ʻEikí naʻe fuʻu tokolahi ʻa ʻene kau taú ki he ʻEikí ke Ne tukuange ʻa e filí ki honau nimá, telia naʻa faifai pea nau pehē mai, “Ko hoku nima pē ʻoʻokú kuó ne fakamoʻui aú.”6 Naʻe fakahinohinoʻi ʻa Kitione ke ne fakahā ki hono kakaí: “Ko ia fulipē ʻoku vaivai mo manavaheé, ke foki ia ʻo ʻalu vave mei he moʻunga ko Kiliatí. Pea naʻe foki ʻa e kakai ʻe toko ua mano ua afe; pea naʻe kei toe ʻa e toko taha mano.”7
Pea toe folofola ‘a e ʻEikí, “Oku kei tokolahi fau ʻa e kakaí.”8 Naʻá Ne fakahinohinoʻi ʻa Kitione ke ʻave ʻa e kau tangatá ki he vaí peá ne siofi ʻa e founga ʻo ʻenau inú. Ko kinautolu naʻa nau ʻemo pē ʻa e vaí naʻe tuku ia ki ha kulupu ʻe taha, pea ko kinautolu naʻa nau punou hifo ʻi honau tuí ke inú naʻe tuku ia ki ha kulupu ʻe taha. Naʻe folofola ʻa e ʻEikí kia Kitione, “ʻI he kau tangata ʻe toko tolungeau ʻa ia naʻe ʻemó te u fakamoʻui ʻa kimoutolu, pea te u tukuange ʻa e kakai Mitiané ki ho nimá: pea tuku ʻa e kakai kehe kotoa pē ke nau ʻalu takitaha ki hono potu.”9
Naʻe foki ʻa Kitione ki heʻene kau taú ʻo ne pehē ange, “Tuʻu hake he kuo tuku ʻe [he ʻEikí] ki homou nimá ʻa e tau lahi ʻo Mitiané.”10 Pea naʻá ne vahe tolu ʻa e kau tangata ʻe toko tolungeaú ki he kongakau ʻe tolu, ʻo ne ʻai ʻa e meʻalea ʻi he nima ʻo e tangata kotoa pē, mo e ngeʻesi ipu mo e maama ʻi he loto ipú. Pea naʻá ne lea kiate kinautolu:
“Sio mai kiate au, pea faʻifaʻitaki mai: pea vakai, ʻo ka u ka hoko ki he potu ʻi tuʻa ʻo e ʻapitangá, pea ʻe pehē, ko ia te u fai ʻe aú, ʻe pehē pē hoʻomou faí.
“‘O ka u ka ifi ʻe au ʻa e meʻaleá, ʻe au mo kinautolu kotoa pē ʻoku ʻiate aú, mou ifi meʻalea ʻa kimoutolu foki ʻi he potu kotoa pē … ʻo lea pehē, Ko e heletā ʻa e ʻEikí, pea mo Kitione.” Peá ne toki pehē, “Muimui ‘iate au.” Ko ʻene ngaahi leá tonu ʻeni, “Ko ia te u fai ʻe aú, ʻe pehē pē hoʻomou faí.”11
ʻI he fakaʻilonga ange pē ʻa e takí, naʻe ifi leva ʻe he kau tau ʻa Kitioné ʻa e ngaahi meʻaifí mo maumauʻi e ngaahi ipú pea nau kaila, “Ko e heletā ʻa e ʻEikí, pea mo Kitione.” ʻOku lekooti ʻi he folofolá ʻa e taú ni ʻa ia ne ʻosi taʻetoeveiveiua ʻa hono olá: “Pea naʻa nau tuʻu ʻa e tangata takitaha ʻi hono potu,” pea naʻa nau ikuna.12
ʻI he ʻahó ni, ʻoku hoko ʻa e faiako fakaʻapí ko ha konga ia ʻo e palani ki he fakahaofí. ʻI he taimi naʻe fakafeʻiloaki ai ia ʻe Palesiteni Tēvita O. Makei ki he kotoa ʻo e Kau Taki Māʻolungá, naʻá ne faleʻi ʻo pehē: “Ko e faiako fakaʻapí ko e taha ia ʻo e ngaahi faingamālie vave mo ola lelei taha ke tanumaki mo ueʻi fakalaumālie aí, ke faleʻi mo fakahinohino ʻa e fānau ʻetau Tamai Hēvaní. … Ko ha ngāue tokoni fakalangi ia, ko ha uiuiʻi faka-langi. Ko hotau fatongia ko e kau Faiako Fakaʻapí ke ʻave e laumālié ki he ʻapí mo e loto kotoa pē.”13
ʻI ha ngaahi feituʻu ʻoku ʻikai ʻasi ai ʻoku feʻunga e mālohi ʻo e Lakanga Taulaʻeiki Faka-Melekisētekí, ʻe lava ke fakaʻaongaʻi leva ʻe he kau palesiteni fakasiteikí mo e kau pīsopé ʻa e kau faifekau taimi kakató, ʻi haʻanau fengāueʻaki mo e palesiteni fakamisioná, ke nau ʻaʻahi ki he ngaahi fāmili ʻoku māmālohí pea mo e ngaahi fāmili ʻoku mēmipa pē hanau niʻihí. ‘Oku ʻikai ngata pē ʻi hono toe fakamāfanaʻi e laumālie ʻo e ngāue fakafaifekaú ʻi he ʻapí, ka ʻokú ne toe ʻoange foki ha faingamālie ke maʻu ai e fetuʻutaki leleí.
ʻI he ngaahi taʻu kuo hilí kuó u ʻaʻahi ki ha ngaahi siteiki lahi ʻi he funga ʻo e māmaní, naʻe ʻi ai e ngaahi siteiki naʻe fakahoko ʻe he kau taki ʻo e uōtí mo e siteikí, ha meʻa pau pe taliui ki honau uiuiʻí, naʻa nau fakahaaʻi ʻenau loto vēkeveke pea mateuteu ke ngāué, pea, ʻi he tokoni ʻa e ʻEikí, naʻa nau ʻalu ʻo ngāue pea nau ʻomi ha kau tangata mahuʻinga ke fakafeʻungaʻi kinautolu ki he Lakanga Taulaʻeiki Faka-Mēlekisētekí, pea ʻomi honau ngaahi uaifí mo e fānaú, ke nau hū ʻi he temipalé ke maʻu honau ʻenitaumení mo silaʻi kinautolu.
ʻI hono fakanounoú te u ʻoatu ha ngaahi sīpinga:
ʻI haʻaku ʻaʻahi ki he Siteiki Milikulikí ʻi Sōleki Siti ʻi he ngaahi taʻu kuo hilí, ne u ʻilo ai ne fakanofo kaumātuʻa ha kau teuteu kaumātuʻa ʻe toko 100 tupu lolotonga e taʻu kimuʻá. Ne u ʻeke kia Palesiteni Sēmisi Keleki ʻa e fakapulipuli ʻo ʻene lavameʻá. Neongo naʻe fuʻu mā ʻa Palesiteni Keleki ke maʻu e lāngilangí, ka naʻe fakahā ʻe he taha ʻo hono ongo tokoní, ʻi hono ʻiloʻi ʻe Palesiteni Keleki ʻa e faingataʻá, naʻá ne kamata ke ui fakataautaha kinautolu pea fokotuʻutuʻu ha ʻapoinimeni maʻá e teuteu kaumātuʻa takitaha mo ia. Lolotonga e ʻapoinimení, naʻe lea ʻaki ʻe Palesiteni Keleki ʻa e temipale ʻo e ʻEikí, ngaahi ouau fakamoʻuí mo e ngaahi fuakava naʻe fakamamafaʻi aí, pea fakaʻosi ʻaki ʻa e fehuʻi ko ʻení: “Meʻa ní he ʻikai te ke fie maʻu ke ʻave ho uaifi ʻofeiná mo hoʻo fānau pelepelengesí ki he fale ʻo e ʻEikí, koeʻuhí ke mou hoko ko ha fāmili taʻengata?” Naʻe fakahā mai ha tali ʻio, naʻe fakahoko leva e ngāue ki hono fakamālohia ʻo e māmālohí, pea naʻe ikunaʻi ʻa e taumuʻá.
ʻI he 1952 naʻe tokolahi e ngaahi fāmili ʻi he Uooti Lose Paʻake Tolú naʻe maʻu pē ʻe he ngaahi tamaí pe ko e ngaahi husepānití ʻa e Lakanga Taulaʻeiki Faka-ʻĒloné kae ʻikai ko e Lakanga Taulaʻeiki Faka-Melekisētekí. Naʻe uiuiʻi ʻa Misa L. Peleni Koate ke hoko ko e pīsope. Naʻá ne fakaafeʻi ha tokoua māmālohi ʻi he uōtí, ko ʻĒnesi Sikina, ke tokoni ʻi hono fakamālohia e ngaahi tokoua lalahi ʻe toko 29 ʻi he uōtí ʻa ia ne nau maʻu e lakanga ko e faiako ʻi he Lakanga Taulaʻeiki Faka-ʻĒloné pea tokoniʻi e kau tangata ko ʻení mo honau ngaahi fāmilí ke hū he temipalé. Koeʻuhí ko ha mēmipa māmālohi ʻa Misa Sikina, naʻá ne momou he ʻuluaki taimí ka naʻe fāifai peá ne fakahaaʻi te ne fai e meʻa te ne ala lavá. Naʻá ne kamata ʻaʻahi fakataautaha ki he kau faiako lalahi māmālohi ko ʻení, ʻo feinga ke tokoni kiate kinautolu ke nau ʻilo honau fatongiá ko e kau taki lakanga fakataulaʻeiki kinautolu ʻi honau ngaahi ʻapí pea ko e ngaahi husepāniti mo e ngaahi tamai ki honau ngaahi fāmilí. Naʻe ʻikai fuoloa mei ai kuó ne fakakau mo e niʻihi ʻo e ngaahi tokoua māmālohí ke tokoni kiate ia ʻi hono fatongiá. Naʻa nau hoko taha taha pē ʻo toe mālohi ʻaupito pea nau ʻave honau ngaahi fāmilí ki he temipalé.
ʻI he ʻaho ʻe taha ne hū mai ai ʻa e kalake ʻa e uōtí mei ha laine ke totongi ʻene fakataú ke fakalea ki he tokotaha fakaʻosi ʻo e kulupú ke hū he temipalé. Naʻe fai ʻe he tangatá ni ha fakamatala ʻo fakafekauʻaki mo ʻene hoko ko ia ko ha tokotaha fakamuimui taha ʻi he lainé: “Ne u tuʻu mo mamata ki he mālohi kotoa ʻa e kulupu ko iá ʻi hotau uōtí pea nau ʻalu ki he temipalé. Kapau pe ā ne u lava ‘o sioloto ki hono fakaʻofoʻofa ʻo e ʻi he temipalé, pea mo e founga te ne liliu ʻeku moʻuí ʻo taʻengatá, he ʻikai ke u teitei hoko ko e tokotaha fakamuimuitaha ʻo e toko 29 ke sila ʻi he temipalé.”
ʻI he ngaahi fakamatala ko ʻení takitaha, naʻe ʻi ai e ngaahi meʻa ʻe fā naʻá ne takiekina kinautolu ke nau ikuna:
-
Naʻe muimuiʻi [lelei] ʻa e faingamālie ʻo hono toe fakamālohiá ʻi he lēvolo ʻo e ʻuōtí.
-
Naʻe kau ki ai ʻa e pīsope ʻo e uōtí.
-
Ne ‘omi ha kau faiako taau mo ueʻi fakalaumālie.
-
Naʻe fai ha tokanga ki he tokotaha fakafoʻituitui kotoa pē.
Ngaahi tokoua, tau manatu muʻa ki he faleʻi ʻa e Tuʻi ko Penisimaní: “ʻO ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá.”14
Tau tokoni muʻa ke fakahaofi ʻa kinautolu ʻoku nau fuʻu fie maʻu ʻetau tokoní pea hiki hake kinautolu ki ha tuʻunga lelei ange mo angatonu ange ʻo e moʻuí. Tuku ke tukutaha ʻetau fakakaukaú ki he ngaahi fiemaʻu ko ia ʻa e kau maʻu lakanga fakataulaʻeikí mo honau ngaahi uaifí mo e fānau ʻoku nau māmālohí. Fakatauange ʻoku tau lava ʻo fanongo ki he pōpoaki fakalongolongo mei honau lotó.
Ko e ngāue ʻo e fakamālohiá ʻoku ʻikai ko ha ngāue ia maʻá e fakapikopikó pe nofonoá. ʻOku tupu e fānaú, taʻu motuʻa e mātuʻá, pea ʻoku ʻikai tatali e taimí ki ha tangata. ʻOua naʻa fakatoloi ha ueʻi fakalaumālie; kae, ngāue leva ki ai, pea ʻe fakahinohino ʻe he ʻEikí ʻa e foungá.
ʻOku faʻa fie maʻu e anga fakalangi ko ia ko e kātakí. ʻI heʻeku hoko ko e pīsopé naʻe ueʻi au ʻi ha ʻaho ʻe taha ke u ui ha tangata ʻa ia naʻe ngali mālohi hono uaifí, pea pehē foki mo e fānaú. Ka neongo iá, ne teʻeki pē ke tali ʻe he tangata ko ʻení. Ko e ʻaho vela moʻoni he faʻahitaʻu māfaná ne u tukituki ai he matapā uaea ʻo Hāloti G, Kalesiá. Ne u lava ʻo fakatokangaʻi ʻoku tangutu ʻa Misa Kalesia ʻi hono seá ʻo lau nusipepa. Naʻá ne fehuʻi mai, kae ʻikai sio hake, “Ko hai?”
Ne u tali ange, “Ko hoʻo pīsopé.” “Kuó u haʻu ke ta maheni mo kole ke ke kau mai mo ho fāmilí ki heʻetau ngaahi fakatahá.”
Naʻá ne tali fakaʻita mai, “ʻIkai, ʻoku ou fuʻu femoʻuekina.” Naʻe ‘ikai ke teitei sio hake. Ne u fakamālō ki ai ʻi heʻene fanongo maí peá u mavahe atu mei he matapaá.
Ne ʻikai fuoloa kuo hiki ʻa e fāmili ʻo Kalesiá mei ai. Ne fakalau atu e ngaahi taʻú. Pea ʻi heʻeku hoko ko ha mēmipa ʻo e Kōlomu ʻo e Toko Hongofulu Mā Uá, ne u ngāue ʻi hoku ʻōfisí ʻi ha ʻaho ʻe taha mo e ui mai ʻa e sekelitalí ʻo pehē mai: “Ko Misa Kalesia ʻeni naʻe nofo ho uōtí ‘oku fie talanoa mo koe. ʻOkú ne ʻi heni ʻi hoku ʻōfisí.”
Ne u tali ange, “ʻEke ange pe ko hono hingoá ko Hāloti G. Kalesia ʻa ē naʻe nofo mo hono fāmilí ʻi Vissing Place ʻi he West Temple mo e Fifth South.”
Naʻá ne tali mai, “Ko e tangatá ia.”
Ne u kole ange ke ne tuku ke hū mai. Ne ma talanoa fiefia fakataha mo ia kau ki hono fāmilí. Naʻá ne talamai, “Kuó u haʻu ke kole fakamolemole ʻi he ʻikai ke u tuʻu mei hoku seá ʻo fakahū mai koe ʻi he matapaá ʻi he ʻaho ko ia ʻo e faʻahitaʻu māfaná he ngaahi taʻu lahi kuo hilí.” Ne u fehuʻi ange kiate ia pe kuó ne mālohi ʻi he Siasí. Naʻá ne malimali fiefia mo ne tali mai, “ʻOku ou tokoni ua he taimí ni ʻi he kau pīsopeliki ʻi hoku uōtí. Naʻe fuʻu fakahohaʻasi au ʻe heʻeku tali fakaʻita atu hoʻo fakaafeʻi au ke ʻalu atu ki he lotú peá u fakakaukau ke u fai ha meʻa ki ai.”
Ne tuʻo lahi haʻaku feohi mo Hāloti ʻi ha ngaahi taimi kehekehe kimuʻa peá ne toki pekiá. Naʻe maʻu ʻe he ongo Kalesiá mo ʻena fānaú ha ngaahi uiuiʻi lahi ʻi he Siasí. Ko e taha ʻo hona makapuna siʻisiʻi tahá ʻoku lolotonga ngāue fakafaifekau taimi kakato he taimí ni.
Ki he kau faifekau tokolahi ʻoku nau ala fanongo mai he efiafi ní, ʻoku ou vahevahe atu ʻa e ʻilo ko ʻení ʻoku ʻikai faʻa tupulaki mo fua vave maʻu pē ʻa e fakamoʻoní. Ko e maa ʻoku lī ki he fukahi vaí ʻoku toe foki mai pe ia, taimi ʻe taha ʻoku hili ha ngaahi ʻaho lahi mei ai. Ka ʻoku foki mai pē.
Ne u tali ʻeku telefoní ʻi ha efiafi ʻe taha ʻou fanongo ki ha leʻo ʻokú ne ʻeke mai, “ʻOkú ke kāinga nai mo ʻEletā Monisoni ʻa ē naʻe ngāue fakafaifekau ʻi he Misiona Niu ʻIngilaní ʻi he ngaahi taʻu kuo hilí?”
Ne u tali ange naʻe ʻikai. Naʻe fakafeʻiloaki mai ʻe he tokotaha naʻe tā maí ko Misa Leonati Kemipatela ia peá ne talamai naʻe aʻu ange ki hono ʻapí ʻa ʻEletā Monisoni mo ʻEletā Pona he ngaahi taʻu kuo hilí ʻo fai ange ʻena fakamoʻoní kiate ia mo hono uaifí. Naʻá na fakafanongo ka ne ʻikai fai ha meʻa ke fakaʻaongaʻi ʻena ngaahi akonakí. Naʻá na hiki mai ki Kalefōnia, pea hili ha taʻu ʻe 13 mei ai, naʻá na toe ʻilo ʻa e moʻoní pea naʻá na ului mo papitaiso. Naʻe kole ange leva ʻe Misa Kemipatela pe ʻe ʻi ai nai ha founga te ne lava ʻo fetuʻutaki ai mo e ongo ʻeletā ko ia naʻá na fuofua ʻaʻahi ange kiate kinauá, ke ne fakahaaʻi ʻena houngaʻia koeʻuhí ko e ngaahi fakamoʻoni naʻá na fai angé, naʻá ne tukulotoʻi ia mo hono uaifí.
Ne u vakaiʻi e ngaahi lekōtí. Ne u maʻu e ongo faifekaú. Te ke lava nai ʻo sioloto ki heʻena ʻohovalé ko e taimi ko ʻení, kuó na mali pea ʻi ai mo hona fāmili, ne u telefoni kiate kinaua ʻo fakahā ange ʻa e ongoongo leleí—ʻio ko e tumutumu ia ‘o ʻena ngaahi ngāue kimuʻá. Naʻá na manatuʻi he taimi pē ko iá ʻa e ongo Kemipatelá. Ne u aleaʻi ha telefoni fakakonifelenisi koeʻuhí ke nau ʻoatu ʻenau fakamālō fakataautaha mo e talitali lelei kinautolu ki he Siasí. Naʻa nau fai ia. Naʻe loʻimataʻia, ka ko e loʻimata ʻo e fiefia.
Naʻe hiki ʻe ʻEtuini Maakahami ʻa e ngaahi laine ko ʻení:
ʻOku ʻi ai ha ikuʻanga te tau ongoʻi ai e ʻofa fakatokouá;
ʻOku ʻikai fononga toko taha ha taha:
Ko ia kotoa pē ʻoku tau ʻoatu ki he moʻui ʻa e niʻihi kehé
ʻE toe foki mai ia ki haʻatautolú pē.16
ʻI he poó ní ʻoku ou lotua, fakatauange ko kitautolu kotoa ʻoku tau maʻu ʻa e lakanga fakataulaʻeikí ke tau ongoʻi hotau ngaahi fatongiá, ke tau, hangē ko Kitione ʻo e kuonga muʻá, ke tuʻu ʻa e tangata kotoa pē ʻi hono feituʻu kuo vahe ia ki aí pea, ko e tahá, muimui ʻi hotau Takí—ʻa e ʻEiki ko Sīsū Kalaisí—mo ʻEne palōfitá, ʻa Palesiteni Kōtoni B. Hingikelī. Fakatauange te tau lava ʻo tokoni ke fakahaofi ʻa kinautolu kuo hē he halafonongá, koeʻuhí ke ʻoua naʻa mole ha foʻi laumālie pelepelengesi ʻe taha.
ʻI he huafa ʻo Sīsū Kalaisí, ʻēmeni.