Apan Kon Dili …

Dennis E. Simmons

Sa Ikaduhang Korum sa Seventy

Ang katawhan makahimo og kahibulongang mga butang pinaagi sa pagsalig sa Ginoo ug paghupot sa Iyang mga sugo—pinaagi sa pagpakita og hugot nga pagtuo bisan kon sila wala masayod kon giunsa sila pag-umol sa Ginoo.

Isip usa ka batan-ong lalaki, mipauli ko gikan sa grade 8 nga torneyo sa basketball naminghoy, nahigawad, ug naglibog. Dali kaayo kong nakasulti sa akong mama, “Ambot nganong napilde man mi—Nagtuo gyod ko nga modaog mi!”

Nakaamgo na ko karon nga wala diay ako makahibalo unsa ang hugot nga pagtuo.

Ang hugot nga pagtuo dili hinambog nga kaisog, dili lamang usa ka pangandoy, dili lamang usa ka paglaom. Ang tinuod nga hugot nga pagtuo mao ang hugot nga pagtuo diha kang Ginoong Jesukristo—pagsalig ni Jesukristo nga modala sa tawo sa pagsunod Kaniya.¹

Gatosan ka tuig ang milabay, si Daniel ug ang iyang batan-ong mga kauban sa kalit lang gitambog gikan sa kasigoroan sa ilang mga panimalay ngadto sa kalibotan—usa ka kalibotan nga dili nila sinati ug mahulgaon. Sa dihang sila si Sadrach, Mesach, ug Abed-nego midumili sa pagyukbo ug pagsimba sa estatuwang bulawan nga gipabuhat sa hari, ang usa ka masuk-anon nga Nabucodonosur misulti kanila nga kon dili sila mosimba ingon sa gimando, sila diha-diha dayon itambog sa nagdilaab nga hudno. “Ug kinsa ba kana nga dios nga makaluwas kaninyo gikan sa akong mga kamot?”²

Ang tulo ka batan-ong lalaki dali ug masaligong mitubag, “Kon mao kana [kon ikaw motambog kanamo sa nagdilaab nga hudno], ang among Dios nga among gialagaran makahimo sa pagluwas kanamo gikan sa hudno nga nagdilaab sa kalayo, ug siya magaluwas kanamo gikan sa imong kamot.” Kana daw sama sa akong grade 8 nga matang sa pagtuo. Apan sila nagpakita dayon nga sila hingpit nga nakasabot gayod kon unsa ang hugot nga pagtuo. Sila nagpadayon, “Apan kon dili … dili usab kami moalagad sa imong mga dios o mosimba sa estatuwa nga bulawan nga imong gipabuhat.”³ Kana usa ka pamahayag sa tinuod nga hugot nga pagtuo.

Sila nasayod nga sila makahimo sa pagsalig sa Dios––bisan kon ang mga panghitabo dili mao ang ilang gilaoman.⁴ Sila nasayod nga ang hugot nga pagtuo labaw pa kaysa mental nga pag-uyon, labaw pa kay sa pag-ila nga ang dios buhi. Ang hugot nga pagtuo usa ka hingpit nga pagsalig diha Kaniya.

Ang hugot nga pagtuo mao ang usa ka pagtuo nga bisan kita wala makasabot sa tanang butang, Siya nakasabot. Ang hugot nga pagtuo mao ang pagkahibalo nga bisan kon ang atong gahom limitado, ang Iyaha dili. Ang hugot nga pagtuo ni Jesukristo naglangkob og hingpit nga pagsalig diha Kaniya.

Si Sadrach, Mesach, ug Abed-nego nasayod nga sila kanunay nga makasalig Kaniya tungod kay sila nasayod sa Iyang plano, ug sila nasayod nga Siya dili mausab.⁵ Sila nasayod, sama nga kita nasayod, nga ang mortalidad dili usa lamang ka aksidente. Usa kini ka lakbit nga hugna sa dakong plano⁶ sa atong mahigugmaong Amahan sa Langit aron sa paghimo niini nga posible alang kanato, nga Iyang mga anak, aron maangkon ang sama nga mga panalangin nga Iyang natagamtam, kana kon kita mauyonon.

Sila nasayod, sama nga kita nasayod, nga sa atong kinabuhi sa wala pa dinhi sa yuta, Iya kitang gitudloan sa katuyoan sa pagkamortal: “Kita magbuhat og usa ka yuta diin kini sila mahimo nga makapuyo; ug kita mosulay kanila dinhi, aron pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila”⁷

Busa nasayod na kita––kini usa ka pagsulay. Ang kalibotan usa ka dapit sa pagsulay alang sa mortal nga mga lalaki ug mga babaye. Kon kita makasabot nga kining tanan usa ka pagsulay, nga gihatag sa atong Langitnong Amahan, kinsa buot nga kita mosalig Kaniya ug motugot Kaniya sa pagtabang kanato, dayon kita makakita sa tanang butang nga mas klaro.

Ang Iyang buhat ug Iyang himaya, miingon Siya kanato, mao ang “pagpahinabo sa pagka-imortal ug sa kinabuhi nga dayon sa tawo.”⁸ Siya nakakab-ot na sa pagka-dios. Karon ang Iyang nag-inusarang tumong mao ang pagtabang kanato––nga makapahimo kanato nga mahibalik ngadto Kaniya ug mahimong sama Kaniya ug magpuyo sa Iyang matang sa kinabuhi nga walay kataposan.

Nasayod niining tanan, dili lisod niadtong tulo ka batan-ong Hebreohanon sa paghimo sa ilang desisyon. Sila mosunod sa Dios, sila mopakita sa ilang hugot nga pagtuo Kaniya. Siya nagaluwas kanila, apan kon dili––ug kita nasayod sa nahabilin nga istorya.

Ang Ginoo mihatag kanato og kabubut-on, ang katungod ug ang kapangakohan sa paghukom.⁹ Siya mosulay kanato pinaagi sa pagtugot kanato nga mahagit. Siya nagpasalig kanato nga Siya dili buot nga kita pagatintalon labaw niana nga kita makalahutay.¹⁰ Apan kita kinahanglan nga makasabot nga ang dagko nga mga hagit makapahimo og dungganon nga mga tawo. Kita wala magtinguha og kasakit, apan kon kita mosagubang sa kasakit uban sa hugot nga pagtuo, ang Ginoo molig-on kanato. Ang mga apan kon dili makapahimo og talagsaong mga panalangin.

Ang Apostol nga si Pablo nakakat-on niining mahinungdanon nga leksiyon ug mipahayag, human sa mga dekada sa mahalarong misyonaryong buhat, “Nagakalipay kita bisan sa atong mga kasakit … nasay[o]d man kita nga ang kasakit mohimog pagkamainant[o]son; Ug ang pagkamainant[o]son mohimog kalig-on, ug ang kalig-on mohimog pagla[o]m; ug ang pagla[o]m dili mopahigawad.”¹¹

Siya gipasaligan sa Manluluwas, “Ang akong grasya igo alang kanimo, kay ang akong gah[o]m ginahingpit diha sa kahuyang.”¹²

Si Pablo mitubag, “Labi pang igakalipay ko hinuon ang pagpasigarbo tungod sa akong mga kahuyang, aron ang gah[o]m ni Kristo magapandong kanako. … Igakalipay ko ang mga kahuyang, mga pagbugalbugal, mga kalisdanan, mga paglutos ug mga kasakitan, alang sa katuyoan ni Kristo: kay sa diha nga magmahuyang ako, magmalig-on man hinuon ako.”¹³ Dihang nag-atubang si Pablo sa iyang mga hagit diha sa pamaagi sa Ginoo, ang iyang hugot nga pagtuo nadugangan.

“Tungod sa hugot nga pagtuo si Abraham, sa dihang gisulayan siya, mihalad kang Isaac.”¹⁴ Si Abraham, tungod sa iyang dakong hugot nga pagtuo, gisaaran og mga kaliwatan nga mas daghan pa ang gidaghanon kaysa mga bitoon sa mga langit, ug tungod niana kana nga kaliwatan moabot pinaagi ni Isaac. Apan si Abraham diha-diha dayon mituman sa sugo sa Ginoo. Ang Ginoo motuman sa Iyang saad, apan kon dili diha sa matang nga gipaabot ni Abraham, siya misalig gihapon Kaniya sa hingpit.

“Tungod sa hugot nga pagtuo si Moises … midumili nga matawag nga anak sa anak nga babaye sa Paraon;

“Nagpalabi pa hinuon sa pag-ant[o]s sa mga pagdagmal kauban sa mga tawo sa Dios, kay sa pagtagamtam sa mga kalipay sa pagpakasala sulod sa usa ka panahon;

“Iyang giisip ang pasipala nga pagaantuson alang kang Kristo ingon nga labi pang dakong bahandi kay sa mga bahandi sa Ehipto. …

“Tungod sa hugot nga pagtuo siya mibiya sa Ehipto, dili nga mahadlok sa kasuko sa hari. …

“Tungod sa hugot nga pagtuo ang mga tawo mitabok sa Dagat nga Mapula nga daw sa yuta nga mamala. …

“Tungod sa hugot nga pagtuo ang mga kota sa Jericho nangatumpag.”¹⁵

Ang uban “pinaagi sa hugot nga pagtuo gipangdaog nila ang mga gingharian, … gipangdawat nila ang mga saad, ginapagtak-om nila ang mga baba sa mga leon,

“Gipalong nila ang mabangis nga kalayo, nakaikyas sila sa sulab sa ispada, gikan sa kahuyang nakab-ot nila ang kalig-on, nangahimo sila nga makagagahom sa panggubatan.”¹⁶

Apan taliwala sa tanan niadtong mahimayaong mga sangpotanan nga gilaoman ug gipaabot sa mga nangapil, sa kanunay anaa gayod ang mga apan kon dili:

“Ug ang uban nanag-ant[o]s sa mga pagbiaybiay ug mga paghampak, … sa mga talikala ug sa mga pagbilanggo:

“Gipangbato sila, gipanagpamutol sila pinaagi sa gabas, gitintal sila, gipamatay sila pinaagi sa ispada: … sila nanagpanglakaw … nanag-ant[o]s sa kawad-on, mga sinakit, mga dinagmalan; … ¹⁷

“Sanglit gitagana man sa Dios ang labi pa ka maayong butang alang kanila pinaagi sa ilang mga pag-antos, kay kon walay mga pag-antos sila dili mahimong mahingpit.”¹⁸

Ang atong mga kasulatan ug ang atong kasaysayan napuno sa mga istorya sa dungganong mga lalaki ug mga babaye sa Dios kinsa mituo nga Siya moluwas kanila, apan kon dili, magpakita nga sila mosalig ug magmatinuoron.

Siya adunay gahom, apan kini atong pagsulay.

“Unsa ang gilaoman sa Ginoo gikan kanato kalabot sa atong mga hagit? Siya nagpaabot kanato nga mobuhat sa tanan nga atong mahimo. Siya na ang mohimo sa uban. Si Nephi miingon “Kay kami nasay[o]d nga pinaagi sa grasya kami maluwas, human sa tanan nga atong mabuhat.”¹⁹

Kita kinahanglan gayod nga adunay sama sa hugot nga pagtuo nila ni Sadrach, Mesach, ug Abed-nego.

Ang atong Dios moluwas kanato gikan sa pagtamay ug paggukod, apan kon dili. … Ang atong Dios moluwas kanato gikan sa sakit ug balatian, apan kon dili … . Siya moluwas kanato gikan sa pag-inusara, depresyon, o kahadlok, apan kon dili. … Ang atong Dios moluwas kanato gikan sa mga panghadlok, mga pasangil, ug sa walay kasiguroan, apan kon dili. … Siya moluwas kanato gikan sa kamatayon o kakulangan sa gimahal nga mga tawo, apan kon dili, … kita mosalig diha sa Ginoo.

Ang atong Dios mosiguro nga kita makadawat og hustisya ug kaangayan, apan kon dili. … Siya mosiguro nga kita higugmaon ug ilhon, apan kon dili. … Kita makadawat og hingpit nga kauban ug matarong ug masulundon nga mga anak, apan kon dili, … kita magbaton og hugot nga pagtuo diha ni Ginoong Jesukristo, nasayod nga kon kita mobuhat sa tanan nga atong mahimo, kita makahimo, diha sa Iyang panahon ug diha sa Iyang pamaagi, mahimong maluwas ug madawat ang tanan nga anaa Kaniya.²⁰ Ako mopamatuod sa ngalan ni Jesukristo, amen.