Ia Ke Sega

Dennis E. Simmons

Mai na iKarua ni koramu ni Vitusagavulu

Era dau rawata na tamata na veika talei ena nodra vakararavi vua na Turaga ka muria na Nona ivunau—ena nodra cakacakataka na nodra vakabauta ena gauna mada ga era sega tiko kina ni kila na Nona ivakarau ni veivakarautaki vei ira na Turaga.

Ena noqu gauna ni gone, au a lesu ki vale mai na dua na sotasota ni basiketepolo ni yabaki walu, ena yalo lailai, lomabibi, ka veilecayaki. Au tukuna yani vei tinaqu, “Au sega ni kila na cava keitou a druka kina—au a vakabauta saraga ni keitou na wini!”

Au sa qai kila oqo ni‘u a sega ni kila ena gauna oya se cava na vakabauta.

Na vakabauta e sega ni ka ni vakaraitaki, sega walega ni ka me divi, sega walega ni dua na inuinui. Na vakabauta dina sa ikoya na vakabauta na Turaga o Jisu Karisito—na nuidei kei na vakanuinui vei Jisu Karisito ka na liutaka e dua na tamata me muri Koya.¹

Ena vica na senitiuri sa oti, a biliraki tani vakasauri o Taniela kei ira na nona ilawalawa gone mai na bula taqomaki ki na vuravura rabailevu—e dua na vuravura tani ka veivakarerei. Ena gauna e ratou a sega kina ni via cuva sobu ka sokalou ki na ivakatakarakara koula ka a vakarautaka na tui o Setareki, Mesaki ke Apete-niko, a tukuna vei iratou ena cudru o Nepukanesa ni kevaka e ratou na sega ni sokalou me vaka e vakaroti, e ratou na biu vakatotolo ki na lovo ni bukawaqa kama. “Ia ko cei na Kalou me na vakabulai kemudou mai na ligaqu?”²

E ratou a sauma vakatotolo kei na yalonuidei na cauravou e tolu, “[Kevaka mo na biuti keitou ki na lovo ni bukawaqa], na neitou Kalou o koya keitou sa qarava sa rawa ni vakabulai keitou mai na lovo ni bukawaqa, ia ena vakabulai keitou mai na ligamuni.” Oqori e vaka saraga na mataqali vakabauta vaka noqu kalasi walu. Ia e ratou a vakaraitaka ni ratou sa kila vakavinaka sara na ibalebale ni vakabauta. E ratou tomana,“Ia kevaka e sega, … keitou sa bese ni qarava na nomuni kalou, keitou sa bese talega ni vakarokoroko ki na matakau koula ko ni sa vakaduria.”³ Oqori na itukutuku ni vakabauta dina.

E ratou kila ni rawa ni ratou nuitaka na Kalou—kevaka sara mada ga e sega ni yaco na veika e ratou a nuitaka.⁴ E ratou sa kila tu ni vakabauta e levu cake sara mai na veivakadeitaki ni vakasama, ka levu cake mai na ivakadinadina ni bula tiko na Kalou. Na vakabauta sa ikoya na veivakabauti vakataucoko ki Vua.

E kena ibalebale ni dina ga ni da sega sara ni kila na veika kece, o Koya e sa kila taucoko. Na vakabauta sa ikoya na kena kilai ni dina ga ni vakaiyalayala ga na noda kaukauwa, na Nona e segai sara. Na vakabauti Jisu Karisito e wili kina na noda vakaliuci Koya ena veika taucoko.

E ratou kila o Setareki, Mesaki, kei Apete-niko ni rawa ni ratou na dau vakararavi tikoga ki Vua baleta ni ratou kila na Nona ituvatuva, ka ratou kila ni sega ni veisau o Koya.⁵ E ratou kila, me vaka eda sa kila, ni bula oqo e sega ni vakacalaka. Oqo e dua na iwase⁶ ni ituvatuva cecere ni Tamada Vakalomalagi dauloloma me rawa kina vei keda, na luvena tagane kei na yalewa, me da rawata na veivakalougatataki vata ga ka Nona, kevaka eda sa tu vakarau.

E rautou kila, me vaka eda sa kila, ni ena noda bula taumada, a vakasalataki keda ko Koya me baleta na inaki ni bula vakayago: “Ia me da kauta yani na veika kece ka bulia na vuravura me ra tawana ko ira oqo; Io me da vakatovolei ira mada kina, me da raica se ra na muria se sega na veika kece sa vakarota vei ira na Turaga na nodra Kalou.”⁷

Sa ikoya saraga o ya—e dua na ka ni veivakatovolei. Na vuravura sa vanua ni veivakatovolei vei ira na tagane kei na yalewa vakayago. Ni da sa kila ni oqo e dua na veivakatovolei, ka vakarautaka na Tamada Vakalomalagi, o koya ka gadreva me da vakararavi ki Vua ka vakatarai Koya me vukei keda, eda na qai kila vakamatata cake na veika kecega.

Na Nona cakacaka kei na lagilagi, a tukuna o Koya, sa ikoya “me ra tucake tale mai na mate na tamata kecega ka rawata na bula tawamudu.”⁸ Sa rawata oti o koya na bula vakalou. Ena gauna oqo sa Nona inaki duadua oya me vukei keda—me rawa kina vei keda me da lesu tale ki Vua ka vakataki Koya ka bulataka na Nona mataqali bula tawamudu.

Ni ratou sa kila tu na veika kece oqo, a sega ni dredre kina vei iratou na tolu na cauravou Iperiu oqo me ratou vakatulewa. E ratou na muria na Kalou; e ratou na cakacakataka na nodratou vakabauti Koya. Ena sereki iratou o Koya, ia kevaka e sega—eda sa kila na veika a qai yaco.

Sa solia vei keda na Turaga na galala ni digidigi, na dodonu kei na itavi me da vakatulewa kina.⁹ E vakatovolei keda o Koya ena Nona vakatarai keda me da bolei. Sa vakadeitaka vei keda o Koya ni na sega ni laivi keda me da na temaki me sivia na iyalayala ni veika eda na rawa ni vorata.¹⁰ Ia me da kila tiko ni veibolebole lelevu ena vakavuna me da tamata qaqa. Eda sega ni vakasaqara na veika ni veivakararawataki, ia kevaka eda goleva ena vakabauta, ena vakaqaqacotaki keda na Turaga. Na kevaka e sega e rawa ni yaco me dua na veivakalougatataki vakasakiti.

A vulica na iApositolo o Paula na lesoni bibi oqo ka kaya kina, ni oti e vuqa na yabaki ni cakacaka yalodina vaka kaulotu, “Me da sa dau reki ena vuku ni veika rarawa ni da sa kila sa tubu na dau vosota mai na veika rarawa ; Ia na dauniveivakatovolei mai na dauvosota, ia na inuinui mai na dauveivakatovolei: Ia sa sega na madua ena vuku ni nuinui.”¹¹

A vakadeitaka na Turaga vei Paula, “Sa rauti iko na noqu loloma: ni sa vakalevui na noqu kaukauwa, ni sa malumalumu e dua.”¹²

A kaya o Paula, “O koya oqo sa yaloqu sara kina me‘u rekitaka na noqu malumalumu, me tiko kina vei au na kaukauwa i Karisito. Au sa vinakata kina na malumalumu, na vakasewasewani, na vakadravudravuataki, na veivakacacani, na veivakararawataki, ena vukui Karisito: ia ni‘u sa malumalumu, au sa qai kaukauwa.”¹³ Ni sotava o Paula na nona bolebole ena sala ni Turaga, sa tosocake na nona vakabauta.

“Nisa vakabauta sa vakatovolei kina ko Eparaama, a vakacabori Aisake.”¹⁴ Ena vuku ni nona vakabauta cecere o Eparaama, a yalataki vua ni nona kawa ena levu cake mai na veikalokalo mai lomalagi, ka ra na vu mai vei Aisake. Ia a muria sara vakatotolo o Eparaama na ivakaro ni Turaga. Ena maroroya na Kalou na Nona yalayala, ia kevaka e sega ni yaco ena ivakarau e namaka o Eparaama, ena nuitaki Koya tikoga.

Era dau rawata na tamata na veika talei ena nodra vakararavi vua na Turaga ka muria na Nona ivunau—ena cakacakataki ni vakabauta ena gauna mada ga era sega tiko kina ni kila na nona ivakarau ni veivakarautaki vei ira na Turaga.

“Ni sa vakabauta sa bese kina ko Mosese … me vakatokai me luvena na luvei Fero na goneyalewa;

“Ni sa digitaka me vosota na veivacacani kei ira na tamata ni Kalou, ia ka cata ni bau marau walega ena ivalavala ca ena siga eso;

“Ni sa vakadinata sa iyau levu me vakalialiai ena vuku i Karisito, ia na ka lailai na iyau mai Ijipita.

“Ni sa vakabauta sa biuti Ijipita kina ko koya, ka sega ni rerevaka na cudru ni tui.

“Ni sa vakabauta era sa lako kina e loma ni Wasawasa Damudamu me sa vanua mamaca.

“Na vakabauta sa bale kina na bai mai Jeriko.”¹⁵

Eso tale “ni ra sa vakabauta era sa vakamalumalumutaki na matanitu eso, rawata na veika yalataki, tabonaka na gusu ni laione,

“Bokoca na bukawaqa rerevaki, bula mai na iseleiwau, era sa vakaukauwataki tale ni ra sa malumalumu, era sa qaqa ena ivalu.”¹⁶

Ia ena maliwa ni veika lagilagi oqori ka ra vakanuinui ka nanamaki kina o ira na vakaitavi, e sa dau tu talega kina na ia ke sega:

“Ia sa vakatovolei eso ena veivakalialiai kei na vakanakuitataki, vesu talega kei na biu ki na valeniveivesu:

“Era sa lauviri ena vatu, era sa varo musuki rua, era sa dau veretaki, era sa vakamatei ena iseleiwau: era sa veilakoyaki era sa dravudravua sara, era sa vakararawataki, era sa vakacacani; ¹⁷

“Ia sa vakarautaka na Kalou vei keda na ka e vinaka cake, me ra kakua kina ni vakavinataki sara duadua ga me da vakavinakataki sara vata ga.”¹⁸

Na noda ivolanikalou kei na keda itukutuku makawa e vakasinaiti tu ena kedra itukutuku na turaga kei na marama cecere ni Kalou ka ra vakabauta ni na sereki ira o Koya, ia kevaka e sega, era vakaraitaka ni ra na vakanuinui tikoga ka dina.

Sa Nona na kaukauwa, ia sa noda na veivakatovolei.

Na cava e namaka vei keda na Turaga me baleta na noda bolebole? Sa namaka o Koya ni da na cakava na veika taucoko eda rawa ni cakava. E qai Nona na kena vo. Tukuna o Nifai, “Ia eda sa kila ni da sa vakabulai ena loloma soli wale, ni sa oti sara na veika kece eda rawa ni cakava.”¹⁹

E dodonu me tiko vei keda na vakabauta ka a tiko vei Setareki, Mesaki, kei Apete-niko.

Ena sereki keda na noda Kalou mai na veivakalialiai kei na veivakacacani, ia kevaka e sega. Ena sereki keda na noda Kalou mai na tauvimate kei na mate, ia kevaka e sega . Ena sereki keda o Koya mai na galili, lomaocaoca, se rere, ia kevaka e sega. Ena sereki keda na noda Kalou mai na veivakarerei, veisei, kei na veilecayaki, ia kevaka e sega. Ena sereki keda o Koya mai na mate se na nodra vakaleqai o ira na noda daulomani, ia kevaka e sega, eda na vakararavi vua na Turaga.

Ena raica na noda Kalou ni da sa ciqoma na lewa dodonu kei na tautauvata, ia kevaka e sega. Ena vakadeitaka o Koya ni da sa lomani ka kilai, ia kevaka e sega. Eda na ciqoma e dua na itokani uasivi sara kei na gone yalododonu ka talairawarawa, ia kevaka e sega, … eda na vakabauta na Turaga o Jisu Karisito, ka nanuma ni kevaka eda vakayacora na veika taucoko eda rawa ni cakava, eda na rawata, ena Nona gauna kei na Nona sala, me da na sereki ka ciqoma na veika kece sa tu Vua.²⁰ Au sa vakadinadinataka oqo ena yaca i Jisu Karisito, emeni.