Ma Ngkana Ti Aki …
Dennis E. Simmons
Man te Kauoua ni Kooram n te Itingaun
Mwaane a kakoroi nanon bwaai aika a kamimi man katukan aia koaua iroun te Uea ao ni kawakin Ana tua—man kamwakuran aia onimaki e ngae ngke a aki ataia ae te Uea e mwakuri ni kanakoraoiia.
Ngke I ataeinimwaane, I okira mweengau man te kaboo n aia batiketibooro koraki ake 13 nakon 14 te ririki n akea angiu, maraki n nano, ao n aki barongaaki. I tennano n taetae nakon tinau, “I aki ataia bwa ti kanga ni konaaki—Iai au onimaki ae ti na moanna!”
Ngkai I a ataia bwa ngkekei I aki ataia raoi bwa teraa te onimaki.
Te onimaki bon tiaki rikim n tokanikai, tiaki ti te bwai ae ko tangiria, tiaki ti te kantaninga. Te onimaki ni koaua bon te onimaki iaon te Uea Iesu Kristo—katuka nanom ni kabane ao te kakoaua iaon Iesu Kristo are e kaira te aomata bwa e na Iriria.1
Inanon te tienture ae nako, Taniera ao raoraona aika kairake a uotakinako man aia tabo ae a mwengaraoi iai nako nanon te aonaaba—te aonaaba ae boou nakoia ao ni kakamaku. Ngke Tiateraka, Metiaka, ao Abetenoko a rawa ni bobaraaki ao n taromauriia te boua ae kaaraki are e kateaki iroun te uea, e koro unin Nebukaneta ao n tuangiia bwa ngkana aki taromauri n aron are a tuangaki, a na waekoa n teweaki nako nanon te nnenikanaiai ae uramwaka te ai iai. “Ao antai te Atua ae na kamaiu ngkami mai nanoni baiu?”2
A waekoa ataeinimwaane ake teniman ni kaeka ma te ninikoria, “Ngkana tao arona [ngkana ko tewenakoira inanon te nenikanaiai], E kona Atuara ae ti toro i Rouna ni kamaiura man te nenikanaiai ae e ura mwaaka te ai iai, ao e na kamaiura mai nanoni baim.” Anne kanga bon titebo ma au onimaki n te roro ae 13 nakon 14 te ririki. Ma a kaotia ae a bon mataata bwa tera raoi te onimaki. A reitia, “Ma ngkana tao E aki, … ti na aki toro irouia antim, ao ti na aki taromauria te boua are te koora are ko kateia.”3 Aio te kibu n taeka ae bon te onimaki ni koaua.
A ataia ae a kona n onimakina te Atua—e ngae ngke aaki riki bwaai nakon are a kantaningaia.4 A ataia ae te onimaki e riaon riki te atatai n te iango, e riaon riki ataakina ae e maiu te Atua. Te onimaki bon katukan ni kabane te kakoaua Iaona.
Te onimaki bon kakoauakin ae e ngae ngke ti aki raoi mataata nakon bwaai nako, Ngaia e bon mataata iai. Te onimaki bon atakina ae e ngae ngke e memeere korakorara, Ngaia bon akea tian korakorana. Te onimaki iroun Iesu Kristo e irianaki ma katukan te mwioko ni kabane Iaona.
Tiateraka, Metiaka, ao Abetenoko a ataia ae a kona ni katan Iaona ni katoa tai ibukina bwa a mataata n Ana babaire, ao a ataia ae E aki bibitaki.5 A ataia, n aron ae ti ataia, bwa te maiu ae mamate aei bon tiaki te bwai ke te taneiai ae akea uaana. Bon te mwakoro ae e kimototo taina n Ana babaire ae korakora6 Tamara are i Karawa ae e tatangira are e katauraoia ibukira, ngaira Natina mwaane ao aine, bwa ti na karekea te kakabwaia are e reke naba Irouna, ngkana ti tangiria.
A ataia, n aron ae ti ataia, bwa maekara n te maiu are imwaain te maiu aei, ti reireiaki Irouna iaon te kantaninga n te maiu ae mamate: “Ti na karaoa te aonaaba are a na kona ni maeka i aona naakai; Ao ti na kataiia man karaoan aei, n noria ngkana a na karaoi bwaai ni kabane are e na tuangiia te Uea ae Atuaia.”7
Iai ara bwai ni kakoaua—bon te kataaki. Te aonaaba bon te tabo ni kataaki ibukiia mwaane ao aine n te maiu aei. Ngkana ti mataata bwa ngaia bon te tai ni kataaki, are e karaoaki iroun Tamara are i Karawa, ae e tangiriira bwa ti na kakoaua Irouna ao ni kariaia Ngaia bwa e na buokiira, ti kona ngkane n nori bwaai ni kabane n ae ota raoi.
A na mwakuri ao Mimitongina, E tuangiira, bwa E na “karekea te aki mamate ao te maiu ae akea tokina ibukin te aomata.”8 E a bon tia Ngaia ni karekea te maiu n atua. Ao ngkai Ana mwakuri bwa E na buokiira—ni karikiira bwa ti na oki Nakoina ao n riki n ai Arona ao ni maeu n Arona n te maiu ae akea tokina.
Ataakin aio ni kabane, e na bon aki kangaanga irouia ataeinmwaanen Aikubita ake teniman ni karaoa aia rinerine. A na iriira te Atua; a na kamwakura aia onimaki Irouna. E na kainaomataia, ma ngkana ti aki—ao ti ataa motin te karaki.
E a tia te Uea n anganiira te inaomata, te konaa ao te bukinaki ni karaoa are ti taku.9 E kataira man kariaiakakin ae ti na rinanon kakaewenako. E kauringiira bwa E na bon aki kataua bwa ti na kataaki nakon are e riaon ara konaa ni kaitaraa.10 Ma ti riai ni mataata bwa kakaewenako aika a korakora a karikiko ni korakora. Ti aki ukoukorii kangaanga, ma ngkana ti kaeka ma te onimaki, e kakorakoraira te Uea. Te taeka ae ma ngkana ti aki a kona n riki bwa kakabwaia aika tamaroa.
Te Abotoro ae Bauro e reiakina te reirei ae tamaroa aei ao n taekinna, imwiin ririki ni karaoan te mwakuri ni mitinare ma te nanomatoa, “Ma ti kimwareirei naba n taian rawawata …ngkai ti ata te rawawata bwa e karika taotaonan te nano; Ao taotaonan te nano, e karika te kataaki; te kataaki, e karika te kantaninga; Ao te kantaninga e aki kamaamaaea te aba.”11
E anganaki raun nanona iroun te Tia Kamaiu, “E a tau au akoi i roum: ba e kakoroaki raoi mwaakau n te mamara.”12
E kaeka Bauro, “Mangaia ae moan te kukurei Ngai … ni kamoamoai ni mamarau, ba e aonga ni memena m’akani Kristo i aou. … Ma ngaia ae I kukurei n taiani mamara, ma taian taetaebuakaki, ma taiani kai n nano, ma taiani bainikirinaki, ma taini maraki ibukin Kristo: bwa ngkana I mamara, ao I a korakora iai.”13 Ngke e kaitarai ana kakaewenako Bauro n ana kawai te Uea, e rikirake ana onimaki.
“N te onimaki Aberaam, ngke e kataaki, e kareana Itaaka.”14 Aberaam, ibukin ana onimaki ae korakora, e beritanaki ana kariki bwa a na mwaiti n aron mwaitin te itoi i karawa, ao bwa ana kariki a na reke rinanon Itaaka. Ma e waekoa Aberaam ni ira nanon are e tua te Uea. E na kawakina Ana berita te Atua, ma ngkana e aki n aron are e kantaningaia Aberaam, e teimatoa ni katuka a na onimaki ae bwanin Iaona.
Mwaane a kakoroi nanon bwaai aika a kamimi man katukan aia koaua iroun te Uea ao ni kawakin Ana tua—man kamwakuran aia onimaki e ngae ngke a aki ataia ae te Uea e mwakuri ni kanakoraoiia.
“N te onimaki Mote … e rawa n atongaki bwa natin natini Barao te aine;
“Ma e tangira riki ae e na bainikiriniia ma ana aomata te Atua, nakon te kimwareirei ae kai toki ae bwain te buakaka;
“Bwa te bwai ae kakawaki riki te taetaebuakaaki ibukin te Kristo nakoni bwain Aikubita aika bati. …
“N te onimaki e kitana Aikubita iai, n aki maka unin te uea. …
“N te onimaki are a ri nukan te nama are Uraura iai n ai aroia ngke kanga a nakonako i aon te tano ae mau. …
“N te onimaki are a bwaka nonon Ieriko iai.”15
Ake tabeman “rinanon te onimaki a katae aia kai uea, … a reke i rouia baike a atongaki n taeka n akoi, a bonoti wiia raian,
“A kamatea kabuebuen te ai, a rawei maiuia mani win te kabaang, a kakorakoraaki n te mamara, a riki n ninikoria n te buaka.”16
Ma ibuakon nako bwaai aika kakukurei ake a kantaningaaki ao ni kariariaaki irouia ake a rinanona, iai naba n tainako ae ma ngkana e aki:
“Ao a kataki tabemaang ni kakanikoaia ao ni kataereaia, … ni kabaeaia ao ni kainakiia:
“A karebanaki n atibu, a korouaki n tao, a kaririaki, a kamateaki n te kabaang: a tiotio nako … n akea aia bwai, a karawawataki, a bwainikirinaki; … 17
“Te Atua e katauraoi tabeua bwai aika raraoi ibukiia rinanon karawawatakiia, bwa n akean karawawatakiia aki kona ni kanakoraoaki raoi.”18
Ara boki aika tabu ao ara rongorogo a kaonaki ma rongorongoia ana aomata te Atua aika mwaane ao aine ake a kakoauaa bwa E na kamauia, ma ngkana e aki a bon kaotia ae a na teimatoa n onimaki ao ni kokoaua.
Iai mwakana, ma bon kataakira.
Tera ae kantaningaia te Uea mairoura ni kaineti ma kakaewenakoara? E kantaningaira bwa ti na karaoa are ti konaa. E karaoa are imwiina. E taku Nibwaai, “Bwa ti ataia bwa bon rinanon te akoi are ti kamaiuaki iai, i mwin bwaai ni kabane ake ti kona ni karaoi.”19
E riai ni iai iroura te aeka n onimaki n aron are iroun Tiateraka, Metiaka, ao Abeteneko.
Atuara e na kainaomataira man kamamaeakira ao bwainikirinara, ma ngkana e aki. … Atuara e na kainaomataira man te buti n aoraki ao aoraki, ma ngkana e aki. … . Atuara e na kainaomataira man te maroa ao te nanokawaki, ma ngkana e aki. … Atuara e na kainaomataira man taian kaikuaki, bukibuki aika kewe, ao te aki mano, ma ngkana e aki. … E na kainaomataira man te mate ke aki toamauia ake ti tangiriia, ma ngkana ti aki, … ti na onimakina te Uea.
Atuara e na noria bwa ti karekea te motiraoi ao te aki babakanikawaiaki, ma ngkana ti aki. … E na kakoauaa bwa ti tangiraki ao ni kinaaki, ma ngkana ti aki. … Ti na karekea toara ae moan te kororaoi ao ataei aika kokoaua ao n ongotaeka, ma ngkana ti aki, … e na iai ara onimaki iroun te Uea Iesu Kristo, n ataia bwa ngkana ti karaoa are ti konaa, ti na, n oin Ana tai ao n Ana kawai, kainaomataki ao ni karekei ni kabane bwaai ake E karekei.20 I kakoaua n aran Iesu Kristo, amen.