Ngem No Saan …

Dennis E. Simmons

Ti Maikadua a Korum ti Pitupulo

Ipatungpal dagiti lallaki dagiti nakaskasdaaw a banag babaen ti panagtalek iti Apo ken panagtungpal kadagiti bilinna—babaen ti panangaramat iti pammati uray no dida ammo no kasano ti panangsukog ti Apo kadakuada.

Kas maysa nga agtutubo a lalaki, nagawidak manipud iti eighth-grade basketball tournament a naliday, naupay, ken natikaw. Imbugkawko ken ni nanangko, “Diak ammo no apay a naatiwkami—adda pammatik a nangabakkami!”

Maamirisko itan a diak ammo idi no ania ti pammati.

Ti pammati ket saan a palso, saan laeng a tarigagay, saan laeng a namnama. Ti pudno a pammati ket pammati ken ni Apo Jesucristo—kompiansa ken panagtalek ken ni Jesucristo a mangiturong iti maysa a tao a sumurot Kenkuana.¹

Adun a siglo ti napalabas, naipanaw ni Daniel ken dagiti agtutubo a kaduana manipud iti kinatalged dagiti pagtaenganda a napan iti lubong— maysa a lubong a ganggannaet ken adu a pakaburiboran. Idi nagkedked da Sidrac, Misac, ken Abdenago nga agtamed ken agdaydayaw iti bimmalitok a ladawan nga inaramid ti ari, imbaga kadakuada ti maysa a narungsot a Nabucodonosor a no saanda nga agdaydayaw kas naibilin, dagus a maipuruakda iti sumsumged ken umap-apuy nga urno. “Ket asino ti Dios a mangisalakanto kadakayo manipud kadagiti imak?”²

Dagus ken sitatalek nga insungbat dagiti tallo nga agtutubo a lallaki, “No kasta [no ipuruakdakami iti urno], kabaelannakaminto nga isalakan ti Dios manipud iti sumsumged ken umap-apuy nga urno, ket isalakannakaminto manipud iti imam.” Kasla dayta ti kita ti pammatik kas maikawalo a grado. Ngem kalpasanna impakitada a naan-anay a naawatanda no ania ti pammati. Intuloyda, “Ngem no saan, … dikamto agserbi iti diosyo, wenno agdaydayaw iti bimmalitok a ladawan nga adda kenka.³ Dayta ti maysa a palawag ti pudno a pammati.

Ammoda a makapagtalekda iti Dios—uray no saan a nagbalin dagiti banag iti wagas a ninamnamada.⁴ Ammoda a ti pammati ket ad-adda pay ngem iti tulag a mainaig iti panunot, ad-adda pay ngem maysa a panangbigbig a sibibiag ti Dios. Ti pammati ket naan-anay a panagtalek Kenkuana.

Ti pammati ket panangpati a nupay ditayo maawatan ti amin a banag, Isu ket maawatanna. Ti pammati ket ti pannakaammo a nupay limitado ti bilegtayo, saan a limitado ti bilegna. Buklen ti pammati ken ni Jesucristo ti naan-anay a panagpannuray Kenkuana.

Ammo da Sidrac, Misac, ken Abdenago a kanayon a makapagpannurayda Kenkuana gapu ta ammoda ti planona, ken ammoda nga Isu ket saan nga agbalbaliw.⁵ Ammoda, kas ammotayo, a ti mortalidad ket saan a maysa nga aksidente iti nakaparsuaan. Daytoy ti ababa a paset ti naindaklan a plano⁶ ti managayat nga Amatayo iti Langit a mangaramid a posible daytoy para kadatayo, nga annakna a lallaki ken babbai, tapno magun-odtayo dagiti isu met la a bendision a sagsagrapenna, no agtallugodtayo.

Ammoda, kas ammotayo, nga iti biagtayo sakbay daytoy a biag, insurona kadatayo ti panggep ti mortalidad: “Mangaramidta iti daga a mabalin a pagtaenganda; Ket subokenta ida ditoy, ta kitaenta no aramidendanto ti amin a banag nga ibilin kadakuada iti Apo a Diosda.”⁷

Isu nga idiay addantayo iti daytoy— daytoy ket maysa a pannubok. Ti lubong ket maysa a lugar ti pannakasubok para kadagiti mortal a lallaki ken babbai. No maawatantayo a pannubok amin daytoy, nga imatonan ti Nailangitan nga Amatayo, nga agtarigagay nga agtalektayo Kenkuana ken mangpalugod Kenkuana a mangtulong kadatayo, ngarud nalawlawag a makitatayo amin a banag.

Ti aramid ken gloriana, imbagana kadatayo, ket “mangipatungpal iti saan nga ipapatay ken agnanayon a biag ti tao.”⁸ Nagun-odnan ti kinadios. Ita panggepna laeng ket makatulong kadatayo—a mangpabael kadatayo nga agsubli Kenkuana ken agbalin a kas Kenkuana ken agbiag iti kita ti biagna nga agnanayon.

Iti pannakaammo iti amin daytoy, saan a narigat para kadagiti tallo a Hebreo nga agtutubo a mangaramid iti pangngeddengda. Surotenda ti Dios; aramatenda ti pammatida Kenkuana. Isalakanna ida, ngem no saan—ken ammotayo ti nabati pay a paset ti estoria.

Inikkannatayo ti Apo ti karbengan nga agpili, ti kalintegan ken ti pagrebbengan a mangngeddeng.⁹ Subokennatayo babaen ti panangipalubosna a masuboktayo. Ipatalgedna kadatayo a dinanto ipalubos a masulisogtayo iti labes ti kabaelantayo nga agandur.¹⁰ Ngem nasken a maawatantayo a dagiti dadakkel a pannubok ti mamagbalin kadagiti naindaklan a tao. Saantayo a sapulen ti panagtutuok, ngem no sumungbattayo iti pammati, papigsaennatayo ti Apo. Dagiti ngem no saan ket makapagbalinda a nakaskasdaaw a bendision.

Nasursuro ni Apostol Pablo daytoy napateg a leksion ket impakdaarna, kalpasan ti napasnek nga aramid a panagserbi kas misionario, “Maitan-okkami iti panagtutuok … iti pannakaammo a ti panagtutuok buyoganna ti panaganus; Ket panaganus, padas; ket padas, namnama: Ken ti namnama pagbalinenna a saan nga agbain. “¹¹

Impanamnama kenkuana ti Mangisalakan, “umdas ti paraburko para kenka: ta ti pigsak naaramid a naan-anay iti pagkapsutan.”¹²

Simmungbat ni Pablo: “Pagragsakak unay ngarud nga agdayawakto kadagiti pagkurangak, a ti bileg ni Cristo mangsallukob koma kaniak. … Agragsakak kadagiti pagkurangan, kadagiti pannakaumsi, kadagiti kasapulan, kadagiti pannakaidadanes, kadagiti pannakapaay gapu ken ni Cristo: ta no nakapsutak, ngarud napigsaak.”¹³ Idi sinango ni Pablo dagiti pannubokna iti wagas ti Apo, ket dimmakkel ti pammatina.

“Babaen ti pammati ni Abraham, idi masubok, indatonna ni Isaac.”¹⁴ Ni Abraham, gapu iti dakkel a pammatina, naikarian iti an-annabo a dakdakkel ti bilangda ngem kadagiti bituen iti langit, ken tapno umay ti an-annabona babaen ken ni Isaac. Ngem dagus a tinungpal ni Abraham ti bilin ti Apo. Tungpalen ti Dios ti karina, ngem no saan iti wagas a ninamnama ni Abraham, iti manamnama, naan-anay latta a nagtalek Kenkuana.

“Gapu iti pammati ni Moises … nagmadi a pinanaganan ti anak daydi anak a babai ni Faraon;

“Pinilina nga impangpangruna ti makipagsagaba iti rigat kadagiti tattao ti Dios, ngem iti makiranud kadagiti aglabas a ragragsak ti basol;

“Pinagarupna a dakdakkel a kinabaknang ti pannakaumsi ken Cristo ngem dagiti kinabaknang iti Egipto. …

“Gapu iti pammati , pinanawanna ti Egipto, a dina kinabuteng di pungtot ti ari. …

“Gapu iti pammati limmasatda iti baybay a Nalabaga a kas iti daga a namaga. …

“Gapu iti pammati natuang dagiti bakbakod ti Jerico.”¹⁵

Dagiti dadduma “gapu iti pammati adda inab-abakda a pagpagarian, … nakagun-odda kadagiti karkari, inappotda dagiti ngiwat dagiti leon,

“Dinepdepda ti pigsa ti apuy, nakalisida iti tadem ti kampilan, manipud iti kinakapuyda nagbalinda a nabileg, nagbalinda a mannakabalin iti gubat.”¹⁶

Ngem iti baet ti amin dagita a nagloriaan a nagbanagan a ninamnama ken namnamaen dagiti nakiraman, adda a kanayon dagiti ngem no saan:

“Ket dagiti sabali nagsagabada kadagiti pannakarabrabngis ken babaot, … pannakarepreppet ken dagiti pagbaludan:

“Nauborda, naragadina, nasuotda, napapatayda iti kampilan: nagallaallada ditoy ken idiay … napapanglawda, naparigatda, nakabkabilda; … ¹⁷

“Ti Dios insaganana ti nasaysayaat a banag a maipaay kadakuada babaen ti panagsagabada, ta no awan dagiti panagsagaba saanda mapalaing a naan-anay.”¹⁸

Napnuan dagiti nasantuan a kasuratantayo ken ti pakasaritaantayo iti pakaammuan dagiti naindaklan a lallaki ken babbai a namati nga isalakannanto ida, ngem no saan, impakitada nga agtalek ken agbalinda a napudno.

Addaan Isuna iti bileg, ngem daytoy ti pannuboktayo.

Ania ti namnamaen ti Apo kadatayo no maipanggep kadagiti karittayo? Namnamaenna nga aramidentayo amin a kabaelantayo nga aramiden. Aramidenna ti dadduma. Kinuna ni Nephi, “Ta ammotayo a maisalakantayo babaen ti parabur, kalpasan ti amin a maaramidtayo.”¹⁹

Nasken a maaddaantayo iti umasping a pammati kas kada Sidrac, Misac ken Abdenago.

Isalakannatayto ti Dios manipud iti panangumsi ken panangidadanes, ngem no saan. … Isalakannatayto ti Diostayo manipud iti sagabaen ken sakit, ngem no saan … . Isalakannatayto manipud iti kinaliday, depresion wenno panagbuteng, ngem no saan. … Isalakannatayto ti Dios manipud iti pammutbuteng, pammabasol, ken inseguridad, ngem no saan. … Isalakannatayto manipud iti ipapatay wenno isisina kadagiti ipatpateg, ngem no saan, … agtalektayo iti Apo.

Kitaento ti Diostayo a maawattayo ti hustisia ken kinasayaat, ngem no saan. … Penkennanto a maayat ken mabigbigtayo, ngem no saan. … Umawattayonto iti perpekto a kadua ken nalinteg ken natulnog nga annak, ngem no saan, … addaantayonto iti pammati ken ni Apo Jesucristo, iti pannakaammo a no aramidentayto ti amin a maaramidtayo, maisalakantayto, iti panawen ken iti wagasna, ken umawattayto iti amin nga adda Kenkuana.²⁰ Paneknekak daytoy iti nagan ni Jesucristo, amen.