Ak Eļan̄n̄e Jab …
Dennis E. Simmons
Jān Doulul eo Kein Karuo an Jiljilimjuonn̄oul
Armej rej kōttōbrak men ko rekwabilōn̄lōn̄ ilo aer lōke ilo Irooj im kōjparok kien ko An—ilo ad kōjerbal tōmak eo ad men̄e jejjab jeļā wāween an Irooj ļōme er.
Āinwōt juōn ļaddik em̧m̧an ded, ikar jepļaak n̄an m̧weo im̧ō jān jie basketball ikkure eo an kūlaaj ruwalitōk ilo aō illu, inepata, im tarpok. Ikar lam̧ōj ļo̧k n̄an m̧am̧a, “Ijaje etke jejam tōn luuj—ikar tōmak ke jenkar win!”
Ij kiiō kile bwe ikar jab jeļā ta in tōmak.
Tōmak ejjab kōmjāje, ejjab kōņaan, ejjab kōjatdikdik wōt. Tōmak em̧ool ilo Irooj Jisōs Kraist—peran im lōke ilo Jisōs Kraist enaaj tōlļo̧k juon armej n̄an ļoor E.1
Bukwi iiō ko rem̧ootļo̧k, Daniel im rūm̧m̧an ded ro m̧ōttan rekar kaju kam̧akūt er jān juon laļ eo me ekar koņ aer pād ie—n̄an juon laļ reruwamājet ie im ekaamijak. ruwamāejet im e bwil. Iien eo Shadrak, Meshak, im Abednego rekar m̧akoko in bun̄ badikdik im kabun̄jar n̄an juon ekjab kōm̧m̧an jān gold me kiin̄ eo ekar kōm̧m̧ane, Nebuchadnezzar eo ellu ekar ba n̄an er bwe eļan̄n̄e rejjab kabun̄jar āinwōt kakien er, renaaj kajju joļo̧k er ilo upaaj in kijeek ebwil. “Im wōn Anij eo e maron̄ lo̧mo̧o̧remi jān peiū?”2
Likao rein jilu rekar mōkaj im peran ilo aer lōke, “Eļan̄n̄e enaaj āindein [eļan̄n̄e kōm naaj joļo̧k kōm ilo upaaj in kijeek e bwil], am Anij Eo kōmij karijer n̄an E, Emaron̄ in lo̧mo̧o̧ren kōm jān upaaj in kijeek e bwil, im Enaaj lo̧mo̧o̧ren kōm jān peim̧.” Menin eitōn āinwōt tōmak eo aō ke ikar kūlaaj ruwalitōk. Bōtaab ilo tōre eo rekar kwaļo̧k bwe rekar lukkuun meļeļe ta in tōmak. Rekar wōnmaanļo̧k wōt, “Ak eļan̄n̄e jab, … kōm ban karejer n̄an ro anij ro am̧ ak kabun̄ n̄an ekjab gold eo kwaar kajutake.”3 En̄ņe ej juon unin kōnono kōn tōmak eo em̧ool.
Rekar jeļā bwe rej aikuj kar lōke Anij—men̄e men ko rekar jab jejjet n̄an ta eo rekar kōjatdikdik kaki.4 Rekar jeļā bwe tōmak eļapļo̧k jān juon men eo majid, eļapļo̧k jān ad jeļā ke Anij ej mour. Tōmak ej lukkuun lōke ilo E.
Tōmak ej tōmak bwe men̄e jejjab meļeļe kōn aolep men, E ejeļā. Tōmak ej jeļā bwe men̄e ad kajoor elōn̄ jon̄an, An ejjeļo̧k jem̧ļo̧kin. Tōmak ilo Jisōs Kraist ewōr ie kōjatdikdik eo elikio ilo E.
Shadrak, Meshak, im Abednego rekar jeļā bwe rej aikuj kar kōjatdikdik ilo E aolep iien kōn rekar jeļā karōk eo An, im rekar jeļā bwe E ekar jab oktak.5 Rekar jeļā, ilo ad jeļā, bwe mour ejjab juon jide wāween. Ej tukaduin juon m̧ōttan karōk eļap6 an Jemedwōj Ilan̄ n̄an kōm̧m̧an bwen kūrm̧ool n̄an kōj, leddik im ļaddik ro Nejin, n̄an bōk ejja kōjeraam̧m̧an ko Ej lan̄lōn̄ kaki, eļan̄n̄e jenaaj kōņaan.
Rejeļā, ilo ad jeļā, bwe ilo mour in jej mour ie, E ekar katakin kōj kōn ta unin mour in; “Jenaaj kōm̧m̧ane juon laļ eo ioon rein remaron̄ jokwe.”7
Innem en̄in jej pād ie—ej juon idajon̄jon̄. Laļ in ej juon jikin idajon̄jon̄ n̄an em̧m̧an im kōrā ro ilo mour in. N̄e jej m̧elele bwe aolep men kein rej idajon̄jon̄, kar tōl jān Jemedwōj Ilan̄, eo ekōņaan bwe jen lōke ilo E im kōtļo̧k bwe En jipan̄ kōj, innem emaron̄ alikkar aolep men ko me jej kalimjōki.
Jerbal eo An im An aiboojoj, E ekar ba n̄an kōj, “n̄an kakūrm̧ool jab wabanban im mour indeeo an armej.”8 E em̧ōj an kadede kōm̧m̧ane eddo eo an juon Anij. Kiiō jibadbad eo wōt An ej n̄an jipan̄ kōj—n̄an kōmaron̄ kōj n̄an jepļaak n̄an E im erom̧ āinwōt E im mour āinwōt mour eo An indeeo.
Jeļā kōn aolep menin kein, ekar jab ped n̄an likao in Hibru ro n̄an kōm̧m̧ani kālet ko aer. Rekar ļoor Anij, rekar kōjerbal tōmak eo aer ilo E. E enaaj lo̧mo̧o̧reņ er, ak eļān̄n̄e jab —im jejeļā aolepān bwebwenato eo.
Irooj ekar letok n̄an kōj anemkwoj in kālet, maron̄ im eddo eo n̄an kālet.9 Ej teej e kōj ilo ad kōtļo̧k bwe jen jelm̧ae idajon̄jon̄. Ej kakeememej kōj bwe E eban kōtļo̧k ad en̄taan eļapļo̧k jān ad maron̄.10 Bōtaab jej aikuj meļeļe bwe idajon̄jon̄ ko reļļap rej kōm̧m̧an bwe jen erom̧ armej ro rem̧m̧an. Jejab kappukōk mellijon̄ ko, ak eļan̄n̄e jej jelm̧aeiki ilo tōmak, Irooj ej kōkajoor kōj. Ak eļan̄n̄e jab emaron̄ oktak im erom̧ kōjeraam̧m̧an ko rekwabilōn̄lōn̄.
Rijilōk Paul ekar ekkatak aorōk in katak in im ekar kwaļo̧k, ālkin jon̄oul iiō ko in an jerbal in mijenede, “Jej lan̄lōn̄ ilo en̄taan ko ad … jej jeļā bwe en̄taan ej jerbale kijenmej; im kijenmej māllejon̄ im māllejon̄ kōjatdikdik: Im kōjatdikdik ej jab jook.”11
Rilo̧mo̧o̧r ekar kalikkar ļo̧k n̄an E, “Aō jouj e bwe n̄an eok, bwe Aō kajoor e weepānļo̧k ilo m̧ōjņo̧.”12
Paul ekar uwaak im ba: “Innem inaaj kanooj m̧ōņōņō in kōmmejāje kōn m̧ōjņo̧ ko aō, bwe kajoor an Anij en pād ioō. … Innām e bun̄būruō ilo m̧ōjņo̧ ko, ilo jorrāān ko, ilo aikuj ko, ilo matōrtōr ko, ilo en̄taan ko kōn Kraist; bwe n̄e I m̧ōjņo̧, innām I kajoor.”13 Ke Paul ekar iooni mālejjon̄ ko ilo wāween an Irooj, tōmak eo An ekar ļapļo̧k.
“Kōn tōmak Ebream, ke mālejjon̄ e, ear katok kōn Aisak.”14 Ebream, kōn tōmak eo an eļap, kar kallim̧ur e bwe ineen enaaj ļap ilo bōnbōn in iju ko ilan̄, im bwe ineen enaaj itok jān Aisak. Ak Ebream ekar kajju kakobaiki ippān kean̄ eo an Irooj. Anij enaaj dāpij ilo kallim̧ur eo An, ak elan̄n̄e jab ilo wāween eo Ebream ekar kōtmene, ekar lukkuun lōke E ilo aolepān An.
Armej rej kōttōprak men ko rekwabilōn̄lōn̄ ilo aer lōke ilo Irooj im kōjparok kien ko An—ilo ad kōjerbal tōmak eo ad men̄e jejjab jeļā wāween an Irooj ļōme er.
“Kōn tōmak Moses … ekar m̧akoko bwe ren likūt etan nejin kōrā eo nejin Pero;
“Ļōmņak bwe an en̄taan ippān ro doon Anij em̧m̧an jān m̧ōņōņō ko an jero̧wiwi me rej n̄an jidik wōt iien;
“Ej watōk bwe kajjirere kōn Kraist e aorōk jān m̧weiuk otemjej ilo Ijipt. …
“Kōn tōmak ear ilo̧k jān Ijipt, im jab mijak illu an kiin̄ eo. …
“Kōn tōmak raar etal eoļōpan Lomaļo e Būrōrō āinwōt ioon āne e m̧ōrā. …
“Kōn tōmak oror ko in Jeriko raar bun̄.”15
Ro jet “kōn tōmak raar bōk anjo̧ ioon aelōn̄ ko, … raar bōk menin kallim̧ur, raar pinej lo̧n̄in ļaiōn ko,
“Raar kune kajoor in kijeek, raar ko jān mejān jāje, ar kōkajoor er jān aer m̧ōjņo̧, raar peranļo̧k ilo tariņae .”16
Ak ilo eoļōpan aolep men kwojarjar ko kar kōjatdikdik kaki im kōtmāni jān ro raar bōk koņaar, ijeņ ewōr ak eļan̄n̄e jab:
“Im bar jet, em̧ōj mālijjon̄ er kōn kajirere im den̄ļo̧ke ko … chain ko im kalbuuj:
“Em̧ōj kade er kōn dekā, im bukwe er kōn jidpān, im kapo er,im m̧an er kōn jāje: Raar etetal … ilo jeram̧ōl, im jorrāān im ko̧kkure; … 17
“Anij ear kōpooj jabdewōt men eo em̧m̧an n̄an er kōn en̄taan ko aer, n̄e ejjeļo̧k en̄taan rekar jab maron̄ wānōk.”18
Jeje ko ad rekwojarjar im bwebwenato ko rej obrak kōn bwebwenato ko kōn em̧m̧aan im kōrā ro an Anij rem̧m̧an me Enaaj lo̧mo̧o̧ren er, ak eļan̄n̄e jab, rej kwaļo̧k bwe renaaj lōke im m̧ool.
Ewōr kajjoor Ippān, bōtaab ej mālejjon̄ e kōj.
Ta eo Irooj ej kōtmene jān kōj ilo ad iooni idajon̄jon̄ ko? Ej kōtmene bwe jen kōm̧m̧ane aolep men ko jon̄an wōt ad maron̄. E enaaj kōm̧m̧ani men ko jet. Nipai ekar ba, “Bwe kōm jeļā bwe ej jān jouj jej mour, ālikin aolep ijo jemaron̄ kōm̧m̧an make.”19
Jej aikuj tōmak āinwōt Shadrak, Meshak, im Abednego.
Ad Anij enaaj lo̧mo̧o̧ren kōj jān kakkure im en̄taan, ak eļan̄n̄e jab. … Ad Anij enaaj lo̧mo̧o̧ren kōj jān nan̄inmej im mej, ak eļan̄n̄e jab … . E naaj lo̧mo̧o̧ren kōj jān ajjimakeke, inepata, ak mijak, ak eļan̄n̄e jab. … Ad Anij enaaj lo̧mo̧o̧ren kōj jān kwōdmat, kūkinaakak im jbb aperan , ak eļan̄n̄e jab. … E naaj lo̧mo̧o̧ren kōj jān mej ak jeneļo̧k jān ro jej iakwe er, ak eļan̄n̄e jab, … jenaaj likūt wōt ad lōke ilo Irooj.
Ad Anij enaaj loe bwe jej aikuj bōk wañōk im jim̧we, ak eļan̄n̄e jab. … E enaaj luukuun ļo̧ļoorjake bwe jen en̄jake iakwe im kile, ak eļan̄n̄e jab. … Enaaj wōr ṃōttar eo em̧m̧an im jim̧we im ajri ro repokake, ak eļan̄n̄e jab, … enaaj wōr ad tōmak ilo Irooj Jisōs Kraist, jeļāke eļan̄n̄e jenaaj kōm̧m̧ani aolep men jon̄an wōt ad maron̄, jenaaj, ilo iien ko An im wāween ko An, enaaj lo̧mo̧o̧ren im bōk aolep men ko me ewōr Ippān .20 Ij kam̧ool kōn menin ilo etan Jisōs Kraist, amen