Ae Peitai, A Le o Lea …

Dennis E. Simmons

O Le Korama Lona Lua a Fitugafulu

E ausia e tagata mea ofoofogia e ala i le faatuatua i le Alii ma le tausia o Ana poloaiga---e ala i le faatinoina o le faatuatua e tusa lava pe latou te le iloa le ala o loo mamanuina ai i latou e le Alii.

A o avea o se alii talavou, sa ou toe foi i le fale mai se liki pasiketipolo a le vasega valu ma le faanoanoa, le fiafia, ma le le mautonu. Sa ou masua atu i lo’u tina, “Ou te le iloa pe aisea ua matou faia’ina ai---sa ou faatuatua o le a matou malo!”

Ua ou iloa nei ou te le’i iloa i le taimi lena pe o le a le uiga o le faatuatua.

O le faatuatua e le o le lototele faafoliga, e le na o le moomoo, e le na o se faamoemoe. O le faatuatua moni, o le faatuatua lea i le Alii o Iesu Keriso---mautinoa ma faalagolago ia Iesu Keriso e taitai atu ai se tagata e mulimuli ia te Ia.¹

I le fia seneturi ua mavae, sa faafuasei ona lafoina Tanielu ma ana paaga mai le saogalemu o o latou aiga i le lalolagi---o se lalolagi e le masani ai ma e taufaamatau. Ina ua mumusu ia Sataraka, Mesako ma Apeteniko e ifo ma tapuai i se faatusa auro na faatuina e le tupu, sa ta’u atu e Nepukanesa ma le ita tele ia i latou e faapea, afai latou te le ifo atu e pei ona poloaiina ai, o le a lafoina loa lava i latou i se ogaumu aasa. “O ai foi se Atua na te laveaiina outou ai la’u pule?”²

Sa vave ona tali atu ma le mautinoa nei taulelea, “Afai o lea, [afai e te lafoina i matou i le ogaumu aasa] e mafai e lo matou Atua, matou te auauna i ai, ona laveai mai ia te i matou ai le ogaumu e mu ai le afi, ma o le a ia laveaiina i matou mai ou lima.” E pei o lo’u faatuatua i le vasega valu. Ae na latou faapupula mai sa latou malamalama atoatoa i le mea e igoa o le faatuatua. Sa latou toe fai atu, “Ae peitai a le o lea, … o le a matou le auauna i ou atua, po o tupua auro foi ua e faatuina.”³ O se faamatalaga lea o le faatuatua moni.

Sa latou iloa e mafai ona latou faatuatuaina le Atua—tusa lava foi pe le tini i le mea sa latou faamoemoeina.⁴ Sa latou iloa o le faatuatua e sili atu i lo soo se mafaufauga, e sili atu i lo le na ona faailoa o loo soifua le Atua. O le faatuatua o le faalagolago atoatoa ia te Ia.

O le faatuatua o le talitonu lea e ui ina tatou le malamalama i mea uma, ae e malamalama o Ia. O le faatuatua o le iloaina lea e ui ina gata mai lo tatou malosi ae o Ia e le gata. O le faatuatua ia Iesu Keriso e aofia ai le faalagolago atoa ia te Ia.

Sa iloa e Sataraka, Mesako, ma Apeteniko e mafai ona latou faalagolago e le aunoa ia te Ia ona sa latou iloaina Lana fuafuaga, ma sa latou iloa e le suia lava o Ia.⁵ Sa latou iloa, e pei ona tatou iloa, o le olaga nei e le o se faalavelave tupu fua o le natura. O se vaega puupuu o le fuafuaga sili⁶ a lo tatou Tama o i le Lagi alofa ia mafai ai e i tatou o Ona atalii ma afafine, ona ausia faamanuiaga e tasi o loo Ia olioli ai, pe afai tatou te loto i ai.

Na latou iloa, e faapei ona tatou iloa, o lo tatou muai olaga, sa Ia faatonuina i tatou e uiga i le faamoemoega o le olaga faitino: “O le a tatou faia se lalolagi e nonofo ai i latou nei; ma o le a latou tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua.”⁷

O lea la ua tatou maua ai—o se suega. O le lalolagi o se nofoaga o suega mo alii ma tamaitai i le olaga nei. Pe a tatou malamalama o se suega uma lava, e faatautaia e lo tatou Tama Faalelagi, o le e finagalo ia tatou faatuatuaina o Ia ma faataga o Ia e fesoasoani ia i tatou ona mafai lea ona tatou vaai manino atili i mea uma.

O Lana galuega ma Lona mamalu, na Ia fetalai mai ai, “o le aumaia o le tino ola pea ma le ola faavavau o le tagata.”⁸ Ua uma ona Ia ausia le tulaga faaleatua. O le taimi nei na pau Lona faamoemoe o le fesoasoani ia i tatou---ia mafai ai ona tatou toefoi atu ia te Ia ma ia faapei o Ia ma ola i Lona ituaiga o soifuaga e faavavau.

O le iloaina o nei mea uma, sa lei faigata ai i na taulelea Eperu e toatolu ona faia la latou faaiuga. O le a latou mulimuli i le Atua; o le a latou faaaoga le faatuatua ia te Ia. O le a Ia laveaiina i latou, ae peitai a le o lea—ia ua tatou iloa le faaiuga o le tala.

Ua tuuina mai e le Alii ia te i tatou le faitalia, le aia tatau ma le tiutetauave e filifili ai.⁹ Na te sueina i tatou i le faatagaina lea o i tatou ia lu’iina. Na te faamautinoaina i tatou o le a Ia le tuua lava i tatou e tofotofoina i luga atu o lo tatou gafatia e tatalia ai.¹⁰ Ae tatau ona tatou malamalama o luitau tetele e faia ai tagata ia maoae. Tatou te le sailia ni faigata, ae tatou te tali atu i le faatuatua, ae faamalolosia i tatou e le Alii. O ae peitai a le o lea e mafai ona avea ma faamanuiaga ofoofogia.

Sa aoaoina e le Aposetolo o Paulo lenei lesona taua ma tautino mai, i le mavae ai o le fiasefulu tausaga o le galuega faamisionare tuuto, “Ua tatou mitamita i puapuaga … ina ua tatou iloa o le puapuaga e tupu ai le onosai; O le onosai foi e tupu ai le mautinoa; o le mautinoa e tupu ai le faamoemoe: o le faamoemoe foi e le ma ai.”¹¹

Sa faamautinoa e le Faaola ia te ia, “O lo’u nei alofa tunoa e lava lea e fesoasoani ia te oe: aua o le vaivai e faaatoatoaina ai lo’u mana.”¹²

Na tali atu Paulo: “O lea ua tele ai lava lo’u fiafia i mea ua ou vaivai ai, ina ia tumau i o’u luga le mana o Keriso. … Ou te fiafia i mea e vaivai ai, o le faaleaga mai, o manaoga, o sauaga, o le atuatuvale ona o Keriso: aua pe a ou vaivai, ona ou malosi ai lea.”¹³ Pe a faafetaia’ia e Paulo ona luitau i le ala a le Aliii, e faateleina lona faatuatua.

“E ala i le faatuatua ina ua tofotofoina Aperaamo, sa ia ofoina atu Isaako.”¹⁴ O Aperaamo, ona o lona faatuatua tele, sa folafola atu i ai o le a faateleina ana fanau e pei o fetu i le lagi, ma o na fanau o le a ala mai ia Isaako. Ae na vave ona uai atu Aperaamo i le poloaiga a le Alii. O le a tausia e le Atua Lana folafolaga, ae peitai a le o lea i le tulaga na faamoemoeina e Aperaamo, sa ia faatuatuaina atoatoa pea o Ia.

E ausia e tagata mea ofoofogia e ala i le faatuatua i le Alii ma le tausia o Ana poloaiga---e ala i le faatinoina o le faatuatua tusa lava pe latou te le iloa le ala o loo faafoliga ai i latou e le Alii.

“E ala i le faatuatua sa musu … Mose e faaigoa o ia o le tama a le afafine o Farao;

“Ua filifili e sili ona agaleagaina o ia faatasi ma tagata o le Atua, nai lo le fiafia i le agasala mo se vaitau;

“Ua manatu o ia i le upu faifai ona o Keriso o le oa lea e sili i faaputugaoa o Aikupito. …

“O le faatuatua na tuua ai e ia o Aikupito, ua le fefe i le ita o le tupu. …

“O le faatuatua ua latou ui ai i le sami Ulaula pei o le eleele matutu. …

“O le faatuatua na solo ai pa o Ieriko.”¹⁵

O isi “o le faatuatua na faatoilalo ai malo, … maua ai mea na folafolaina, na pupuni ai gutu o leona,

“Na tinei ai le malosi o le afi, na sao ai i le mata o le pelu, mai vaivaiga na avea ai ma mea malolosi, fitafita i taua.”¹⁶

Ae i le totonugalemu o na taunuuga mamalu uma na faamoemoeina e i latou na faatinoina, sa i ai pea lava le ae peitai a le o lea:

“Ma o isi na tofotofoina i tauemuga ma le sasaina, … noanoataga ma le tuuina i le falepuipui:

“Na fetogia i latou i maa, na vaevaeesea i ‘ili, na tofotofoina, na fasiotia i latou i le pelu: … feoai solo ua matitiva, puapuagatia, ma faapologaina; … ¹⁷

“Ua saunia e le Atua se tasi mea e sili ona lelei mo i [latou e ala i o latou mafatiaga, aua a aunoa ma mafatiaga e le faaatoatoaina i latou.”¹⁸

Ua tumu a tatou tusitusiga paia ma la tatou talafaasolopito i tala o alii ma tamaitai maoae o le Atua o e sa talitonu o le a Ia laveaiina i latou, ae peitai a le o lea, sa latou tautino mai o le a latou faatuatuaina ma faamaoni.

O loo ia te Ia le mana, ae o la tatou suega.

O a ni mea ua faamoemoe mai e le Alii ia i tatou ma le manatu mai i o tatou luitau? O loo faamoemoe mai o Ia ia te i tatou e faia mea uma tatou te mafaia. Na Te faia mea o totoe. Na fai mai Nifae, “Ona ua matou iloa e faaolaina i tatou i le alofa tunoa, pe a uma mea uma e mafai ona tatou faia.”¹⁹

E tatau ona ia i tatou le faatuatua e tasi e pei o Sataraka, Mesako, ma Apeteniko.

O le a laveaiina i tatou e lo tatou Atua mai tauemuga ma sauaga, ae peitai a le o lea … O le a laveaiina i tatou e lo tatou Atua mai ma’i ma faama’i, ae peitai a le o lea … . O le a Ia laveaiina i tatou mai le tuulafoaiina, loto popole, po o le atuatuvale, ae peitai a le o lea … O le a laveaiina i tatou e lo tatou Atua mai taufaamatau, tuua’iga, ma le le mautonu, ae peitai a le o lea. … O le a laveaiina i tatou e lo tatou Atua mai le oti po o le faamanuiaina o e pele ia i tatou, ae peitai a le o lea.

O le a silasila le Atua ina ia tatou maua le faamasinogatonu ma le le faaitu’au, ae peitai a le o lea … O le a Ia faamautinoa e alofaina ma aloaia i tatou, ae peitai a le o lea … O le a tatou maua se soa atoatoa ma ni fanau amiotonu ma le usiusitai, ae peitai a le o lea, … o le a tatou faatuatua i le Alii o Iesu Keriso, ma le iloa afai tatou te faia mea uma tatou te mafaia, o le a laveaiina i tatou, i Lana taimi ma i Lana ala ma tatou mauaina ai mea uma o ia te Ia.²⁰ Ou te molimau atu ai i le suafa o Iesu Keriso, amene.